... حلم العَـلَم كبير ... وحلم الوطن أكبر ....  

( لوين رايح يا بيي ...؟ ) آلها الصبي لمن شاف بيَّو حامل هاك العصاي الـ إلها زنار وعا كتفو شلحَها متل لفحة شتي بيومة برد ... فوق بدلة الخاكي وزنار عريض بوسط هامة ... يشد العزم ... وبوط أسود يلمع يعكس ضو شمعة بليلة عتم ... وخوذة حديد عا راسو لونها غريب ما عرفها ليش مدورة ...!! لفتة متل الحلم بوجه الصبي ما نسيها وشالها من بالو يوم ... وصوت من بيَّو أجاه متـل النسمة بليلة بدر يناديه لحضن دافي : ( تعا يمي ... تعا يمي ).

الصبي لمن ركض صوب بيَّو ... سارع خطوتو ... عساه يمسك رجل ... يمسك أيد ... ويشد بيَّو بعزم ... ويخليه معو بغرفة حلم ... حطب موقدة ونار ... خاف عليه من البرد ... دمعة نزلت من عيون الصبي وأختها من عيون أمو تقولو يمكن ما تشوف بيك سنة ... بيَّو أخد أيدين الصبي وحطها عا خدودو ... يمكن يحس الصبي بجرأة بطل ماشي يصد عدو ... يصون عرض ... يحمي حبة تراب صانها والدو من أبـْل ... يرفع علم بسَما وطن ... ويحافظ عا شموخ أهل من ذلة عمر ...

بحنيي أبـَّل صغيرو ... وبلطف خلاَّ شريكة عمرو تمسح دمعة حزن ... وبصوت كلو ثـئة ردد وصيي : زيـدل يا بنيي وجيرانها حقهم عليي وعلى كل واحد حر بها الأرض الأبيـي ... بألبك خليها زينة عمر ... وأسوارة عرس بأيد الصبيي ... رايح يا بنيي مع اصحاب العمر ندفع خطر عدو عن أرض غنيي ... ارجعت وقتها بحكيلك شو صار معي ... وان ما رجعت وصيتي ألك صون متـل ما صنت أنا وبيي الأرض الأبيـي ....

كلمة سمعها الصبي وحلْـق صارت بدانتو غنّْيي ... عسا من شموخو وشموخ بيَّو يعَمْر وطن ... واللي بدم الغالي ارتوى وجبلة ترابو حجر ... تا يعمر طوبة ... طوبة ... بيتـنا العز والكرامة بفخر ... وسوريا الحبيبة وزيدل حبها بألوبنا حفر .....

اعذروا كتابتي باللهجة المحكية, وبمناسبة عيد الشهداء أوجه كلمتي لشهداء زيدل وشهداء سوريا الأبرار منحنياً بقامتي إجلالاً لهؤلاء الأبطال الذين نكن لهم جميعاً كل العرفان بالجميل فلولاهم لما كان لنا علمٌ يرفرف خفاقاً عالياً في سماء سوريا الحبيبة ....... شكراً لأهالي الشهداء وأبنائهم وأقربائهم وأصدقائهم ومدارسهم لجهودهم ولكل ما أمدونا به من معلومات تغني موقعنا ومنتدانا في زيدل الخضراء ومنتدى محبة زيدل.