موقع زيدل الصفحة الرئيسية  

العودة   منتديات زيدل > المنتدى الزيدلي > منتدى موقع زيدل > الأعضاء الجدد و التعارف

إضافة رد
 
أدوات الموضوع تقييم الموضوع انواع عرض الموضوع
  #1  
قديم 5th March 2010, 05:36 PM
الصورة الرمزية RUSHA AWAD
RUSHA AWAD RUSHA AWAD غير متواجد حالياً
مشرفة منتدى المجتمع
 
تاريخ التسجيل: Sep 2003
الدولة: USA FLORIDA J
المشاركات: 630
الجنس: انثى
RUSHA AWAD is on a distinguished road
المتهم أبونا جورج مصيص والمساعد جميل

مرحبا يا أعضاء منتدى زيدل .. بداية اسمحوا لي أن أعلن عن افتتاح غرفة دردشة ثقافية خاصة بالمنتدى يكون بطلها عضو من أعضائه ..
هذا الموضوع بعنوان :
( قر واعترف ... أنا المساعد جميل )



طبعاً سيتقمص كل منا شخصية المساعد جميل
ويقوم بطرح عدة اسئلة على العضو المتهم المختار
الهدف من الموضوع هو التماس ثقافة بعضنا البعض و التعرف على شخصية كل منا
( آراء وأفكار ومعتقدات....
الأسئلة بتوجهات اجتماعية وأدبية وسياسية وثقافية وشخصية...إلخ
دون الاحراج )
يعني بالعامية ( ياللي عم تسأل خود راحتك وكتر بالأسئلة )


طريقة اختيار المتهم : أنا سأبدأ باختيار أول متهم وسيبقى بغرفة التحقيق لمدة أسبوع كامل بعدها نعطيه البراءة ليقوم هو باختيار العضو الذي سيليه لنوجه له الأسئلة والاتهامات
ملاحظة : نرجو عدم توجيه الأسئلة المحرجة


مع حبي واحترامي
رشاعواد
__________________
قد تنسى الذي ضحكت معه, ولكن لن تنسى الذي بكيت معه
رد مع اقتباس

Sponsored Links
  #2  
قديم 6th March 2010, 11:54 PM
fr george massis
Guest
 
المشاركات: n/a
مرحبة او محكمة هههههههههههههه

وين الناس والمدعين والمحامين والمساعد جميل الهيئنة انو
او خايف مع اني ما بخوف بنوب هيك بيقولوا ههههههههههههههههه
او انو الرياضة الروحية وموضوع الصحراء والصوم والصمت مأثر كثير على رواد المنتدى وما بستغرب هالشي هههههههه
على كلن انا ناطر بعد شوي ما بيبقى وقت لشي لحقوا حالكم
والله معكم.......................
رد مع اقتباس
  #3  
قديم 7th March 2010, 12:29 AM
الصورة الرمزية RUSHA AWAD
RUSHA AWAD RUSHA AWAD غير متواجد حالياً
مشرفة منتدى المجتمع
 
تاريخ التسجيل: Sep 2003
الدولة: USA FLORIDA J
المشاركات: 630
الجنس: انثى
RUSHA AWAD is on a distinguished road
هالمرة توقعاتك ما زبطت لأنو المساعد جميل كان مشغول بشي ثاني
بس ترى هلأ فضيلك فجهز حالك لأسبوع ممتع.

الاسم, العمر, المهنة, الهوايات
أبونا فيك تخبرنا عن اختيارك لطريق الكهنوت, يعني ياريت لو بتشرحلنا شوي عن "الدعوة"اللي حسيتها
وشو كان يدور ببالك قبل ما تختار هالخيار؟

التأثير الإيجابي والسلبي اللي صار بحياتك بعد ما صارت البرازيل مقر إقامتك؟

كيف بتقارن بين الناس الزيادلية بالبرازيل وبزيدل؟

سؤال إلك حرية الإجابة عليه او عدمها: ياترى ماكنت بتتمنى بيوم من الأيام انك مثل أي شاب يكون الك
شريكة حتى تكفو هالحياة مع بعض ويكون عندك أولاد تعيش معهن حياتهن بكل مراحلها؟

رح اكتفي بهالكم سؤال حاليا وراجعتلك

مع حبي واحترامي
رشاعواد
__________________
قد تنسى الذي ضحكت معه, ولكن لن تنسى الذي بكيت معه
رد مع اقتباس
  #4  
قديم 7th March 2010, 12:36 AM
samar dahi samar dahi غير متواجد حالياً
مشرفة منتدى المجتمع
 
تاريخ التسجيل: Oct 2003
الدولة: zaidal
المشاركات: 624
الجنس: انثى
samar dahi is on a distinguished road
الحقيقة انا ضعت ......شو عم يصير بالموضوع .......؟؟؟؟؟؟؟؟؟
رشا دوختينا ....انا كنت عم انتظر منك انو تطرحي اسئلتك المعهودة لتعريف الشخص عن نفسو ...
وانتظرت.... قلت شو عم يصير ليش رشا ما سألت اسئلة المشرف عن الموضوع ..؟؟؟؟؟فافتكرت انو في شي من وراء الكواليس عم يصير ...وشو هو ؟؟؟ الحقيقة ما قدرت افهم .........
لا حدى عم يشارك بالموضوع ويمكن الكل منتظر اسئلة رشا لتعريف الشخص عن نفسو مثل ما صار معي ...
فشو القصة يا رشا ..؟؟؟؟؟؟؟؟؟؟
على كل حال حصل خير
وهاد ابونا بين ايدينا
بدي اسألك هلق بشكل مبدئي بينما رشا ترجع وتسألك الأسئلة الاعتيادية
شو كانت ردة فعلك وقت قرأت اسمك انو انت رح تكون المتهم الجديد...؟؟؟؟؟؟؟
سبيت علي ...هههههههههههه؟؟؟؟؟؟؟؟؟؟؟؟؟وحاشا انك تسب يا ابونا .....

__________________

في الليل التمست من يحبه قلبي...وفي حديقتي القاحلة جعل مكسنه
وبلآلىء الندى كسا وجهي
نفسي جميلة ...وحبيبي يناديني
هلمي يا جميلتي ...هلمي إلى حديقتي
فالشتاء قد مضى ...والكروم ازهرت ...وأفاحت عطرها



رد مع اقتباس
  #5  
قديم 7th March 2010, 01:38 AM
الصورة الرمزية RUSHA AWAD
RUSHA AWAD RUSHA AWAD غير متواجد حالياً
مشرفة منتدى المجتمع
 
تاريخ التسجيل: Sep 2003
الدولة: USA FLORIDA J
المشاركات: 630
الجنس: انثى
RUSHA AWAD is on a distinguished road
شو سمر, يظهر بعدك ماخذي على خاطرك من التحقيق
معك الأسبوع الماضي. كل متهم الو اسلوب معين بالتحقيق
والأسلوب اللي اعتمدناه معه مو بالضروري نعتمدو مع غيرك هههههه

هلأ عنجد, أني بعتذر لهالتأخير الغير مقصود ويمكن لهيك لقيت
انو من الأفضل نبلش بالأسئلة مباشرة والمتهم بيعطي المعلومات
اللي بتعرّف عنو وممكن تساعد بإثبات براءتو, شو رأيك؟!

مع حبي واحترامي
رشاعواد
__________________
قد تنسى الذي ضحكت معه, ولكن لن تنسى الذي بكيت معه
رد مع اقتباس
  #6  
قديم 7th March 2010, 02:23 AM
wajdy barakat wajdy barakat غير متواجد حالياً
عضو مخضرم
 
تاريخ التسجيل: Jan 2008
الدولة: سورية...حمص...زيدل
المشاركات: 256
الجنس: ذكر
wajdy barakat is on a distinguished road
تحياتي ابونا جورج قلتلي ما حدا مسترجي يحقق معك هي هي اجيتك ووقعت والله وقعك وعلى راسك كمان ههههههههه اهلين ابونا تفضل وارتاح على كرسي الكهرباء ومن حسن حظك انه مقطوعة حاليا بس اذا تعاونت معي بالتحقيق منخليها مقطوعة والعكس غير صحيح يالله:

1- كيف لحتى اخترت الكهنوت يعني انا بعرف انه في مثل علامة او اشارة بحسس الواحد بانه لازم يحمل رسالة ويبشر فيها ففيك تخبرنا شيء عن هالامر؟
2- كيف ملاقي خدمة الكهنوت هل هيي صعبة او سهلة وشلونملاقي وضعك بالبرازيل وهل كنت بتفضل البقاء في سورية؟
3- هل انت نادم على قرارك وخاصة انك شب وحيد لاهلك ؟
4-لو لم تصبح كان ماذا كنت تمارس عملا اليوم؟ شو رايك بالنجارة او فتح مطعم ههههههه
5-انا على حد علمي انك اعملت عمل جراحي لحتى تخفف وزنك هل انت نادم عليه وشو سبب نصاحك بالبرازيل (عم يدللوك الجالية زيادة) وفيك تقلي شو تغيير ببرنامجك الغذائي بعد العملية ؟ ترى بتنصحني سويها هههههه

يالله حاجتك هالكم سؤال ورح خلي لغيري دور ....سلم على الجميع وخاصة على ستي ام جبر من عندك وانا رح وصيها تخفف الاكلات الدسمة شوي مشان صحتك والا شو رايك؟

__________________
اضحك تضحك لك الدنيا
رد مع اقتباس
  #7  
قديم 8th March 2010, 10:48 AM
الصورة الرمزية ziad sattah
ziad sattah ziad sattah غير متواجد حالياً
مشرف المنتدى الأدبي
 
تاريخ التسجيل: May 2005
الدولة: zaidal
المشاركات: 1,739
الجنس: ذكر
ziad sattah is on a distinguished road
مرحبه أبونا و جارنا و معلمنا جورج :
- السبت الماضي زارنا في زيدل الصديق أعراف ( fm ) و طلب أن يزورك و يتعرّف إليك شخصيا ً لاعتقاده أنّك تقيم في زيدل .. فماذا تقول له ؟
- بصراحة مباشرة : ما هو رأيك بالمنتدى الروحي في منتديات زيدل : سلبيات و ايجابيات ؟؟ و ما هي اقتراحاتك و نصائحك بهذا الخصوص ؟؟
- يبدو أن المواصلات بيننا و بين البرازيل سالكة بصعوبة , على أمل أن يصلك سؤالي و يصلني الجواب قبل الخميس .
__________________
إذا كان الله معنا فمن علينا
رد مع اقتباس
  #8  
قديم 8th March 2010, 05:10 PM
الصورة الرمزية drrany noufal
drrany noufal drrany noufal غير متواجد حالياً
مشرف المنتدى الطبي
 
تاريخ التسجيل: Aug 2008
الدولة: HOMS
المشاركات: 457
الجنس: ذكر
drrany noufal is on a distinguished road
مرحبا أبونا كيف الصحة إن شالله بخير
وهي فرصة قليلاً ما نحضى بها
لو سمحت عندي كم سؤال:
1 - أين دور الكنيسة في مجتمعنا المسيحي هذه الأيام؟ من عدة نواحي الاجتماعية - الدينية - اللغة الأرامية و السريانية؟
2- لما لا يوجد توحيد دائم للأعياد في سوريا بين الشرقيين و الغربيين .
3 - لما لا يسمح للمرأة بدخول هيكل الكنيسة حتى لو كانت طفلة صغيرة ( علماً ان السيد المسيح عليه السلام قال دعوا الأطفال يأتون إلي )مع أن كثيراً من الإناث قديماً و حديثاً هن أكثر إيماناً من كثير من الرجال وهل كان يمنع على السيدة العذراء دخول الهيكل ؟ ولما لا ترسم قساوسة إناث مع العلم بوجود الكثير من الراهبات و القديسات
4- لما مدة الصوم 50 يوم بينما صيام السيد المسيح كان اربعين يوم فقط؟
5 - لما ننادي القساوسة بأبونا و عند الصلاة نقول أبانا ؟
6 - ما هو موقف الكنيسة تجاه تشريح الجثث لغايات طبية و علمية ؟
مشكور سلفاً على الرد
__________________
ليس النجاح أن تكتشف ما يحبه الاخرون
إنما النجاح أن تمارس مهارات تكسب بها حبهم
RANY M NOUFAL
رد مع اقتباس
  #9  
قديم 8th March 2010, 08:11 PM
الصورة الرمزية fm1976
fm1976 fm1976 غير متواجد حالياً
عضو مخضرم
 
تاريخ التسجيل: Sep 2008
الدولة: الشام
المشاركات: 317
الجنس: ذكر
fm1976 is on a distinguished road
تحية طيبة للجميع

بداية أشكر الأستاذ العزيز زياد على الحفاوة والكرم الذي أتحفني به في بيته

وسرني اللقاء بالدكتور ماجد (حكيم عيون) الذي أشكره على مازودني به من نظرة جديدة لفن الزجل والشعر النبطي وقد فتح بذلك لي باب جديد لم أكن على إطلاع عليه سابقا

كما سرني معرفتي الأولى بالأستاذ حسام الذي أشكره على لقائه الممتع

وأشكر أيضا العم أبو ممدوح (البسيط)على ضيافته الكريمة ولقائه الرائع

وبالطبع أشكر أستاذي الكبير العزيز إيلي سويد(حبيب العمر)بلقائه الممتع دائما

بالطبع أهل زيدل أهل الكرم واللقاء الجميل وهي قرية صغيرة لكنها كبيرة بأهلها وناسها

أعتذر إن كنت قد خرجت عن الموضوع ولكن لا يشكر الله من لا يشكر الناس

فكيف إذا كان من يتوجب شكرهم هم أساتذتي ومن يحتلون مكانة كبيرة في قلبي

إلى الأب جورج تحية طيبة

أدعو الله عزوجل أن تكون بصحة جيدة وأن أتمكن من تعرف عليك في مقبل الأيام فمعرفة أمثالكم شرف لي

سأبدأ بالأسئلة التي أتمنى أن يتسع صدرك لها:

1- ماهو برأيك سبب الإفتراق بين البيت الواحد المسيحي(ارثوذكس - كاثوليك ..الخ) وهل هناك مشروع على أرض الواقع لتوحيد البيت المسيحي لتكون الكنيسة واحدة وقوية؟
وماهي العقبات التي تقف في طريق تحقيق هذا الهدف؟

2- مارأيك : زيدل - منتدى زيدل - سوريا وماذا ينقص كل منهما؟

3- ذكر لي أحد الأصدقاء المسيحيين أن هناك قديسين سوريين نادرا ما يذكرون وهم على الأغلب غير معروفين فما صحت هذا الكلام وإن كان صحيحا فلماذا؟

4- لماذ يتميز الأخوات الراهبات بلباس معين وأقصد بذلك غطاء الرأس وهل هو واجب في المسيحية عليهم فقط أم أنه يشمل الجميع؟

5- هل المسيحي ملزم بما جاء في العهد القديم أم أنه يستطيع أن يكتفي بما جاء بالعهد الجديد وأعمال الرسل؟

6- من المعلوم أن هناك كنائس في أوربا أقرت زواج المثليين فهل هذه الكنائس تمثل المسيحية وهي جزء منها؟

7- ما لونك المفضل؟

8- الأكلة المفضلة ؟

9- رأيك : الدين - التدين - اللادينية - المساكنة؟

10 - رأيك ببرنامج لول ؟

شكرا لك ودمت بألف خير
__________________
----------------------------------------------------------------

أعراف
مسلمون ومسيحيون يداً واحدة وأمةً واحدة
ليس قيمة المرء ما يحسن بل قيمة المرء ما يطلب
وأجهل الجهل أن يجهل الإنسان جهله ويجهل نفسه ويجهل خالقه
فإن لم يكن لك أثر في هذا الوجود
فأنت زائد على هذا الوجود
يداً بيد من أجل إنطلاقة حضارية لإنقاذ البشرية
رد مع اقتباس
  #10  
قديم 8th March 2010, 09:11 PM
fr george massis
Guest
 
المشاركات: n/a
هالمرة توقعاتك ما زبطت لأنو المساعد جميل كان مشغول بشي ثاني
بس ترى هلأ فضيلك فجهز حالك لأسبوع ممتع.

الاسم, العمر, المهنة, الهوايات
مرحبة رشا اسمي جورج راتب مصيص من مواليد زيدل 23 نيسان 1976 بحب كثير الطبخ

أبونا فيك تخبرنا عن اختيارك لطريق الكهنوت, يعني ياريت لو بتشرحلنا شوي عن "الدعوة"اللي حسيتها
وشو كان يدور ببالك قبل ما تختار هالخيار؟
طبعاً قلتها أكثر من مرة وبمناسبات كثيرة انو ما إجاني ايميل دعوة ولا فاكس ولا هاتف ههههههه الدعوة كانت بشكل تماهي بأبي الروحي ابونا جورج كساب يلي كان وما زال مثال الي ولكثيرين بفضلوا تعرفت على طريق الرب وبفضلوا حبيت امشي بهالطريق والحمدالله املك من فرح الدعوة ما يكفي لإحراق العالم اجمع بلهيب الهي اسراري هلق قبل الدعوة كنت شب طالب عادي فكرت فبل كثير بدراسة أثار او سياحة وما تستغربوا شقد كمان كنت مغرم بفن تصميم الملابس ولليوم بحب وبتابع بشغف الموضى بكل اشكالها وبأكثر حميمية عالم ديكور البيوت

التأثير الإيجابي والسلبي اللي صار بحياتك بعد ما صارت البرازيل مقر إقامتك؟
طبعاً تم اختياري لكون الكاهن رقم خمسة يلي بيخدم كنيسة قلب يسوع الأقدس بمدينة بيلو روزنتي - البرازيل يلي هي أكبر وأقدم جالية زيدلية وأول كنيسة سريان كاثوليك خارج حدود الشرق على الاطلاق ما بخفي عليكم جالية ختيارة بس معهم اتعلمت كثير من الحكمة والفطنة يلي ببعض الأوقات بنفقدها كشباب متحمس أنا فرح بخدمتي كثير وبعتقد بأنو رعيتي مرتاحة معي الى حد ما وعلى قدر المستطاع نعمل سوية في حقل الرسالة......... الثر السلبي هوي البعد الجغرافي مثلاً كمان فرصة دراسة علية مثل بقية أترابي وزملائي كمان الذوبان في عادات غريبة لكيما تقع في شواذ لا يمكن مغفرته من قبل كثرين فنحن لم نعد يعربين العادات ولم نتأقلم ونتقولب مع البرازيلين
طبعاً أنا أعمل مع رعية ضخمة روادها من البرازيلين الكاثوليك وأنا على مثال بولس كلا للكل لأربح الكل

كيف بتقارن بين الناس الزيادلية بالبرازيل وبزيدل؟
فيروز عبرت احسن شي " فزعاني يا قلبي اكبر بي هالغربي وما تعرفني بلادي خدني على بلادي "
كم مرة بكينا سوية على لحن كلمات متنهدة تقول نيال يلي عاش ومات ببلدو ...............

سؤال إلك حرية الإجابة عليه او عدمها: ياترى ماكنت بتتمنى بيوم من الأيام انك مثل أي شاب يكون الك
شريكة حتى تكفو هالحياة مع بعض ويكون عندك أولاد تعيش معهن حياتهن بكل مراحلها؟
الشريكة يلي قلبي اختارها وحبها ما قبلت تمشي معي مشوار الدعوة ومن يومها فضلت صوت ربي على صوت قلبي وما ني نادم أبدا
رح اكتفي بهالكم سؤال حاليا وراجعتلك
ناطرك ما تتأخري من يوم يومك متعبتيني من أيام التعليم المسيحي بزيدل

مع حبي واحترامي
رشاعواد
__________________
رد مع اقتباس
  #11  
قديم 8th March 2010, 09:18 PM
fr george massis
Guest
 
المشاركات: n/a
خالتي سمر

الحقيقة انا ضعت .....
من زمان هههههههههههههه
.شو عم يصير بالموضوع .......؟؟؟؟؟؟؟؟؟
علمي علمك
رشا دوختينا ....شو ناطروة من رشا غير هيك
انا كنت عم انتظر منك انو تطرحي اسئلتك المعهودة لتعريف الشخص عن نفسو ...
وانتظرت....
شو بعدك ناطرة استني لقلك
قلت شو عم يصير ليش رشا ما سألت اسئلة المشرف عن الموضوع ..؟؟؟؟؟فافتكرت انو في شي من وراء الكواليس عم يصير .. طبعاً شو كل المتهمين مثل بعضهم فتحي عينك
.وشو هو ؟؟؟ الحقيقة ما قدرت افهم ......... الحقيقة ولا أنا

لا حدى عم يشارك بالموضوع ويمكن الكل منتظر اسئلة رشا لتعريف الشخص عن نفسو مثل ما صار معي ...
فشو القصة يا رشا ..؟؟؟؟؟؟؟؟؟؟
على كل حال حصل خير
وهاد ابونا بين ايدينا اي لكن ابونا طابة بما انو بالبرازيل

بدي اسألك هلق بشكل مبدئي بينما رشا ترجع وتسألك الأسئلة الاعتيادية
شو كانت ردة فعلك وقت قرأت اسمك انو انت رح تكون المتهم الجديد...؟؟؟؟؟؟؟
بصراحة من يوم يلي اتحركشت فيكم عن الموضوع وشفت تقصير بموضوع رياضة الصوم وخصوصا منك يا سمر قلت رح كون الضحية القادمة

سبيت علي ...هههههههههههه؟؟؟؟؟؟؟؟؟؟؟؟؟وحاشا انك تسب يا ابونا .....
في مسبات بمكانها تسابيح ههههه مزحة ولي لا تصدقوا
ناطرك خالتي لا تطولي
رد مع اقتباس
  #12  
قديم 8th March 2010, 09:43 PM
fr george massis
Guest
 
المشاركات: n/a
وجدي بركات

تحياتي ابونا جورج قلتلي ما حدا مسترجي يحقق معك هي هي اجيتك ووقعت والله وقعك وعلى راسك كمان ههههههههه اهلين ابونا

أهلا فيك يا وجدي صاحيلك ولا يهمك بس يا ويلك بعدين بحكي شو كنت تسوي بالتعليم المسيحي ههههههههههههه

تفضل وارتاح على كرسي الكهرباء ومن حسن حظك انه مقطوعة حاليا بس اذا تعاونت معي بالتحقيق منخليها مقطوعة والعكس غير صحيح يالله:

1- كيف لحتى اخترت الكهنوت يعني انا بعرف انه في مثل علامة او اشارة بحسس الواحد بانه لازم يحمل رسالة ويبشر فيها ففيك تخبرنا شيء عن هالامر؟

جاوب على هالسؤال بتحقيق رشا يعني برجع وبأكد الدعوة كيف بدي قلك مثل وقف لقلك او بمعنى أدق انه استوقفني شي كثير شخصي ومقدس يمكن أو اكيد ثمرة صلاة الأهل ما بنسى أبي الله يرحموا كان اكليريكي قديم يمكن دعوتوا استمرت فيّ

2- كيف ملاقي خدمة الكهنوت هل هيي صعبة او سهلة وشلونملاقي وضعك بالبرازيل وهل كنت بتفضل البقاء في سورية؟
بشكر الله على نعمة الكهنوت بحب رعيتي كثير لدرجة العشق ما تنسى هي رعيتي الأولى وما بعرف اذا الأبدية رح تكون يلي بحط ايدو على المحراث ما بينظر لورا وصدقوني كل الرعايا مثل بعضها وكل المؤمنين مثل بعضهم مع بعض الاختلاف في الأماكن ويل مابيفرح وبنبسط بمكان مارح يرتاح بغيروا

3- هل انت نادم على قرارك وخاصة انك شب وحيد لاهلك ؟
يمكن يكون القرار صعب وعلى فكرة مافي شي اسموا قرار 100% صح أو خطأ انا فرحان بقراري لهذه الساعة ومتكل على نعمة ربي ونعمته تكفيني بدل الولد صار عندي اولاد انت مثلا بتقلي ابونا واجمل واغلى واحلى كلمي بحب اسمعها حتى امي بتقلي ابونا وهون البرازيلي علمتهم الكلمة بالعربي وبيقولوها بفرح

4-لو لم تصبح كان ماذا كنت تمارس عملا اليوم؟ شو رايك بالنجارة او فتح مطعم ههههههه

يا وجدي ايام الأكل راحت بس نفس الطبح موجود وفي تطور مستمر بحب يكون عندي مطعم مع انو عندي مطعم دائم كل يوم بقدم فيه طبق شهي ومجاني ومقدس وببلاش يسوع المسيح بالقربان المقدس

5-انا على حد علمي انك اعملت عمل جراحي لحتى تخفف وزنك هل انت نادم عليه وشو سبب نصاحك بالبرازيل (عم يدللوك الجالية زيادة) وفيك تقلي شو تغيير ببرنامجك الغذائي بعد العملية ؟ ترى بتنصحني سويها هههههه

انت مانك مطول الهيئة لاحقني على الدعسي دير بالك وجدي هههههههههه
القصة مانها دجلال ولا شي انمكا طبيعة أجسام وسبب العمل الجراحي للتنحيف هو دسك داخل العمود الفقري من النوع النادر فاما أو اما وانا حبيت جراحة التنحيف على عملية الدسك وهكذا جرت الأمور أنا مرتاح كثير بس الك بنصحك بالرياضة فيك تحقق نتائج افضل


يالله حاجتك هالكم سؤال ورح خلي لغيري دور ....سلم على الجميع وخاصة على ستي ام جبر من عندك وانا رح وصيها تخفف الاكلات الدسمة شوي مشان صحتك والا شو رايك؟

وصل السلام شو ما مفكر بزيارة لعندا اهلا وسهلا

رد مع اقتباس
  #13  
قديم 8th March 2010, 11:48 PM
fr george massis
Guest
 
المشاركات: n/a
الأساذ زياد الله معك....

مرحبه أبونا و جارنا و معلمنا جورج :
اهلا وسهلا بالجار ومافي معلم غيرك قرب عيد المعلم ينعاد عليكم جميعنا اساتذتنا الغالين

- السبت الماضي زارنا في زيدل الصديق أعراف ( fm ) و طلب أن يزورك و يتعرّف إليك شخصيا ً لاعتقاده أنّك تقيم في زيدل .. فماذا تقول له ؟
ميت أهلا وسهلا بكل ضيوفنا الأعزاء للأسف ماقلتولي كنت اجيت على السريع على كلن الجايات كثار انشالله و الى لقاء قريب

- بصراحة مباشرة : ما هو رأيك بالمنتدى الروحي في منتديات زيدل : سلبيات و ايجابيات ؟؟ و ما هي اقتراحاتك و نصائحك بهذا الخصوص ؟؟
رأيي بالمنتدى الروحي أول ما عرض علي الخال حسام الفكرة حبيت كثير وحقيقة كان كنيسة حقيقية فعالة لأبعد الحدود من خلال مشاركات وآراء وحتى مواقف تنم عن ايمان واعي وناضج حتى من زوارنا الأحبة ولكن فيما بعد اصبح المنحى متشعب وصار في فوضى فكرية روحية بين
مواضيع الحوار والمناقشات ومناقرات الخ
دائما كان شعاري منذ البدء ليس هدفنا تبشيريا ولا الوعظ وتبيان من الأفضل واين هي الحقيقة لأن موقع زيدل يفرض على كل زائر أن يكون من ذوي الفكر والدعوى هي دائما للحوار وبغير الحوار لايوجد نتيجة مرجوة من هنا أغيب مستنكرا عندما تحتد اللهجة التعصبية فاسحا المجال لكل شخص للتعبير وهذا لايعني التخلي عن المسؤولية كمشرف بحيث اني لم اغفل ولا كلمة كتبت في المنتدى الروحي ابدا ولكن نوع من التربية التي ادين بها للمجتمع المتحرر بحرية الرأي لأبعد الحدود دونما تجريح
نحن بخير في المنتدى وبنشكر الله في شي من النتائج لأول مرة بصرح فيها المنتدى أنقذ فتاة من الانتحار اذا عندها الجرأة فتتفضل تشهد بنعمة ربنا يلي وصلتها من خلال كلام الرجاء والمحبة والحياة يلي دجفعها للبحث عن الكاهن والتروي والنتجية هي اهم بكثير من كلشي ممكن ينقال أو يكتب
في عندي عم باميركة تعرفت عليه من سنتين بعقده الخامس ماتتخيلوا شقد فرحتي كبيرة لما حضني وقلي أنا بقرا وبحب وفخور بكل كلمة بتكتبها بمنتدى زيدل وأنا كثير استغربت مع اني بعرف انو المنتدى بيوصل للعالم ولكل انسان بس يكون صلة تعارف روحي حميمي يرسم صورتك لشخص بغربة كلوا حماس ليتعرف عليك فهاي هي نعمة ربنا
طبعا مؤخرا حث البابا مبارك 16 وبالصوت العالي مطالبا كل الكنائس لدخول عالم النت واظهار وجه المسيح المحب لكل الناس وكلنا فخر بموقع زيدل اننا من السباقون

- يبدو أن المواصلات بيننا و بين البرازيل سالكة بصعوبة , على أمل أن يصلك سؤالي و يصلني الجواب قبل الخميس .
صعب شوي حياة برا لأنو الدقيقة أحيانا بتكون صعبة والكاهن هون مو بس يوم الأحد عندوا قداس يوميا بين 2 -3 قداديس وزيارة مرضى وتحضير مع كل فئات الرعية ما بجوز حدا اذا ما قعدت معاه على الأقل 6 مرات بعد تحضير الزواج هيك مطلوب وهيك الصح وانا بحب كثير كون رسول شرقي مميز يحمل عبق الانجيل لكل الناس
وشكرا لطلتك اساذ زياد الى لقاء قريب


__________________
رد مع اقتباس
  #14  
قديم 9th March 2010, 12:43 AM
fr george massis
Guest
 
المشاركات: n/a
دكتور اهلا فيك

مرحبا أبونا كيف الصحة إن شالله بخير
وهي فرصة قليلاً ما نحضى بها
كلنا شرف نتعرف عليك كمان وبنرفع راسنا فيك

لو سمحت عندي كم سؤال:
1 - أين دور الكنيسة في مجتمعنا المسيحي هذه الأيام؟ من عدة نواحي الاجتماعية - الدينية - اللغة الأرامية و السريانية؟

للكنيسة دور في كل المجالات بس بدي جاوب على السؤال بسؤال وين شبيبتنا وشعبنا اليوم
اللغة السريانية بعطيك الصلاحية القيام بتسجيل كل من يرغب والدورة مجانية وانا عن ابونا طوني انو بيقوم بهالعمل بس وين الطلاب ؟

2- لما لا يوجد توحيد دائم للأعياد في سوريا بين الشرقيين و الغربيين .
الوحدة موجودة أنا مثلا مكا بشعر باي نوع من التفرقة او المشاكل بموضوع العيد هلق بتقلي رفيقي من غير ملة سالني ايمت مات مسيحك وايمت بيقوم فهاي مشكلتوا هو وضعف من مؤمنينا يلي ما بيقدروا يعبروا بقوة عن ايمانهم وكأنوا كلشي بحياتي هوي تاريخ العيد اي خلصنا قوموا مع المسيح وخلوا ايمانكم ناضج اكثر من هيك
(الموضوع قابل للنقاش بتوسع أكثر)
3 - لما لا يسمح للمرأة بدخول هيكل الكنيسة حتى لو كانت طفلة صغيرة ( علماً ان السيد المسيح عليه السلام قال دعوا الأطفال يأتون إلي )مع أن كثيراً من الإناث قديماً و حديثاً هن أكثر إيماناً من كثير من الرجال وهل كان يمنع على السيدة العذراء دخول الهيكل ؟ ولما لا ترسم قساوسة إناث مع العلم بوجود الكثير من الراهبات و القديسات
والله هاي عادة غير صحيحة لا تاريخيا ولا عقائديا كل الموضوع تعصب ذكوري شرقي
على العكس الكتب المقدسة مليئة برسامة القسيسات زوجة الكاهن والشماسات خادمات المذابح
اما اذا المقصود الكهنوت النسائي فالتقليد لا يقبل فالسيح اختار الرسل وكرسهم دونما النساء اللذين رافقه وكانوا معه دائما وفي كثير من الأحيان أشجع منهم كلهم ولكن قبل المسيح الكهنوت حفظ للرجال فقط

4- لما مدة الصوم 50 يوم بينما صيام السيد المسيح كان اربعين يوم فقط؟
اسبوع الحاش اي الألام لايحسب مع الصوم فهو زمن ليتورجي مستقل + كل ايام الآحاد فهي ذكرى قيامة الرب+عيد البشارة 25 اذار+عيد مار يوسف19اذار فهما اعياد سيدية كبرى لايجوز فيهم الصوم =40 يوم الصوم الكبير
5 - لما ننادي القساوسة بأبونا و عند الصلاة نقول أبانا ؟
للدلالة الروحية والتبعة البنوية لله الخالق والكاهن هو اب حقيقي لكل ابناء الرعية من مهامه تفقد الفقراء والأيتام ومراعاة حرمات البيوت والسهر على رعيته روحيا وزمنيا فهو مثال الاب الغيور المحب يعني ابانا
6 - ما هو موقف الكنيسة تجاه تشريح الجثث لغايات طبية و علمية ؟
الانسان صورة الله ومثاله كل ما يخدمه تباركه الكنيسة وكل وما يتسربل تحت أجنحة الخطيئة فالكنيسى ضد
باركت الكنيسة عمليات وهب الأعضاء وتحث ابنائها على ذلك اما الاتجار والخطف والبيع فلا يليق بكرامة الكائن البشري والغاية لاتبرر الوسيلة
مشكور سلفاً على الرد
شكرا لك
رد مع اقتباس
  #15  
قديم 9th March 2010, 01:17 AM
fr george massis
Guest
 
المشاركات: n/a
الله معك

إلى الأب جورج تحية طيبة
اهلا وسهلا انشالله بنلتقى قريبا ومثل ماقلت للأستاذ زياد الجايات اكثر من الرايحات مثل زيدلي احبه كثيرا هههه

أدعو الله عزوجل أن تكون بصحة جيدة وأن أتمكن من تعرف عليك في مقبل الأيام فمعرفة أمثالكم شرف لي


سأبدأ بالأسئلة التي أتمنى أن يتسع صدرك لها:
انشالله نقدر نروي بكلماتنا البسيطة ظمأ أسألتك قول يا رب


1- ماهو برأيك سبب الإفتراق بين البيت الواحد المسيحي(ارثوذكس - كاثوليك ..الخ) وهل هناك مشروع على أرض الواقع لتوحيد البيت المسيحي لتكون الكنيسة واحدة وقوية؟
بكل بساطة وبتستغرب المستعمر ما بيهموا نتوحد حتى على المستوى الروحي طبعاً نحن مستعمرون من روح الضلال في هذا العالم روح الشر التي تقف بوجه كل خطوة توحيدية
المشروع القائم حاليا هو الحوار لأن الكنيسة وبعد تاريخ حافل باللقاءات والمجادلات رأت أنه لا بد من حوار بناء جريء يعبر عن كل ما يجول بخاطر الكنيسة ويبلسم جراحات قرون كرست للتفرقة وفي كثير من الأحيان لعدوات وحروب واليوم الفتيكان لا يوفر جهد ولا مسعى في سبيل تحقيق الهدف المرجو
والكنائس كل يعبر عن حاجاته ومبرارته لتحقيق مشروع الوحدة فهانحن نرى اسبوع كامل مكرس للصلاة من اجل وحدة الكنائس ونكحل عيوننا بمشاهد الأخوة واللقاءات الأخوية ليس على مستوى المسيحين فحسب بل على مستوى الانسانية جمعاء وكلنا رجاء بقيامة حقيقية لهذا المشروع والهم الكبير وحدة الكنائس تحت راية بطرس الصخرة التي بنيت عليها كنيسة المسيح

وماهي العقبات التي تقف في طريق تحقيق هذا الهدف؟
الايمان الناضج للشعب قبل الرؤساء والصلاة الحارة التي يستجيب لها الله الاب


2- مارأيك : زيدل - منتدى زيدل - سوريا وماذا ينقص كل منهما؟
زيدل حبيبي الأولي وعشقي الأزلي
منتدى زيدل وجه زيدل الحضاري
سوريا ام الدني
ينقص كل منهما أبونا جورج كثير مشتاق هههههههههه


3- ذكر لي أحد الأصدقاء المسيحيين أن هناك قديسين سوريين نادرا ما يذكرون وهم على الأغلب غير معروفين فما صحت هذا الكلام وإن كان صحيحا فلماذا؟
الكنيسة السورية عاشت في عصورها المسيحية الأولى التبشيرية نعمت الشهادة بالتبشير وبالدم هؤلاء هم ذخائر الكنيسة الحقيقين ونظرا للظروف اللاحقة لاسيما الزمن المترامي لم يعودوا يذكرون أو لم تصل سيرهم للكنيسة الغربية التي ستأخذ على عاتقها ارشفة وتنظيم كتب القديسين
أضف كل ما حدث على مسرح الأحداث في شرقنا الحبيب من حروب واضطهاد ووووووو
جعل من الكنيسة بمؤمنيها وشهدائها وابناءها قديسين أحياء وحتى يومنا هذا لانزال نعيش الشهادة بوجه أو بأخر



4- لماذ يتميز الأخوات الراهبات بلباس معين وأقصد بذلك غطاء الرأس وهل هو واجب في المسيحية عليهم فقط أم أنه يشمل الجميع؟
اللباس هو علامة تكرس وعندما يتوحد فهو علامة فارقة ويتلون ويختلف تبعا للثقافة والمكان والزمان والطبيعة القاسية
اما بخصوص غطاء الرأس فيستحسن بحسب رسالة القديس بولس ان يستتر للمكرسات ولكنه ليس بالضرورة فهذه عادة قديمة اقرب منها الى الوثنية فهو رمز القوة مع شمشون وهو الذي يقدم كنذور والشعب الألماني القديم اعتبر الشعر الطويل رمز الانسان الحر والعبد هو حليق الرأس ومن هنا بعض الرهبان يحلقون شعر رأسهم علامة وتصريح على تحررهم ورفضهم للعالم المتمدن
الراهبة والراهبة يقص شعر رأسه علامة للتكرس والخضوع للأوامر الرب والتجرد عن خيرات العالم المادية كما انه علامة عن التوبة في بعض الحضارات القديمة الشعر هو مركز لحبائل الشيطان
وطريقة تمشيط الشعر لها رمزية ففي روسيا الفتاة ذات الجديلة الواحدة فهي عزباء وذات الجديلتين فهي متزوجة
الخ.....


5- هل المسيحي ملزم بما جاء في العهد القديم أم أنه يستطيع أن يكتفي بما جاء بالعهد الجديد وأعمال الرسل؟
الكتاب المقدس بعهديه جزء لا يتجزء من قصة ومسيرة شعب الله الباحث والمنتصر والخائن والمنبوذ والرابح والمسبي وابناء الوعد وورثة الأنبياء وكله ينفته ويكتمل بنور المسيح الوحي الكامل لحقيقة الآب السماوي فلا يمكن تجزئته ولكن يجب فهمه بتمعن وحرص وليس كل شخص على هواه وخلفيته التي لا تخدم كلمة الله والخلاص بشيء



6- من المعلوم أن هناك كنائس في أوربا أقرت زواج المثليين فهل هذه الكنائس تمثل المسيحية وهي جزء منها؟
الكنائس التي اقرت ليست على علاقة ووحدة ايمانية مع الكنيسة الكاثوليكة التي لي الفخر لأكون أحد ابناءها الكهنة بالنسبة لنا هذا الأمر مرفوض


7- ما لونك المفضل؟
الأخضر


8- الأكلة المفضلة ؟
راحت ايام الأكل كلو نعمة من رب العالمين ويلي بيرضى بيعيش


9- رأيك : الدين - التدين - اللادينية - المساكنة؟
الدين هو الانسان
التدين عودة للأصل الالهي
اللادينية محاولة للتستر بورق التين
المساكنةحرية لا بد من أن تكون مسؤولة


10 - رأيك ببرنامج لول ؟
ما بعرفه؟؟؟؟؟؟؟؟؟؟


شكرا لك ودمت بألف خير
أهلا بك صديق عزيز
رد مع اقتباس
إضافة رد

أدوات الموضوع
انواع عرض الموضوع تقييم هذا الموضوع
تقييم هذا الموضوع:

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


Sponsored Links

جميع الأوقات بتوقيت GMT +3. الساعة الآن 08:10 AM.


Powered by vBulletin V3.6.2. Copyright ©2000 - 2022
تصميم الموقع وسام عبد العزيز جميع الحقوق محفوظة, Copyright ©2001 - 2022
المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص