موقع زيدل الصفحة الرئيسية  

العودة   منتديات زيدل > المنتدى الزيدلي > المنتدى الترفيهي > النكات و القصص الطريفة

إضافة رد
 
أدوات الموضوع تقييم الموضوع انواع عرض الموضوع
  #1  
قديم 27th May 2009, 09:19 PM
الصورة الرمزية ABUODEE
ABUODEE ABUODEE غير متواجد حالياً
مشرف المنتدى الترفيهي
 
تاريخ التسجيل: Jun 2004
الدولة: Abu Dhabi
المشاركات: 826
الجنس: ذكر
ABUODEE is on a distinguished road
للســـــورين فقط ....بتتذكروا ؟!؟

بتتذكروا ،،،،

بتتذكروا.. يوم يجي أخوك الأكبر منك ويقول لك: بدك أرسم لك ساعة وانته تمد إيدك ويعضّك هديك العضة اللي تضل مرسومة أسبوع.

‏ بتتذكروا.. يوم كنا نتصوّر عند مصوّر العيلة وطبعاً غصب عنك الخلفية زرقاء مو بكيفك ولازم تمشط شعرك بالمشط اللي عنده.. كله شعر...


‏ بتتذكروا... المصيص الأحمر اللي بيعلق بالسنان ومعو عود لونه احمر مخطط بالأبيض وكنا نقلبو بالمقلوب ونحطو ع الشمعة أو الغاز وننفخ مشان نساوي فقاقيع وطبعا ما تطلع النفيخة لحتى تطلع زلاعيمك معها وتنحرق كل أصابيعك.

بتتذكروا.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت ونتم ناكل مثله


بتتذكروا.. تيلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل.

‏ بتتذكروا.. يوم كنا نربط الشرشف على رقابنا مثل سوبرمان ونطلع فوق الخزاين ونط على التخوت وآخر شي ناطط غلط ومنكسرة إيدك.

‏ بتتذكروا.. يوم كنا نحط الآيس أو الكازوزة بالكيس بالتلاجة مشان تصير متلجة وكل ما بدك تجي تاخدها تلاقي الوالدة حاططته تحت ومانو متلّج... يا حسرة.

بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طوال النهار وآخر الشي تنفكش رجل شي واحد وما ينام الليل لأنو رجلو ورمانة..



بتتذكروا... عزايم قبل والسفرة ومفرش الطاولة اللي عليه صورة (‏فواكه) ‏وريحتو لازم مثل ريحة المطبخ وقاعدين على كراسي القش اللي لما تقوم تلاقي سيقانك عليها شخوط ومربعات.

بتتذكروا.. أيام الدراسة لما نشد حيلنا بالدراسة ونشتري قلم فسفوري أصفر أو برتقالي مشان نظلل على الشي المهم وآخر شي نظلل على كل الكتاب.. وين الشي المهم؟؟ ما بعرف!!!!

‏ بتتذكروا.. لما تتقاتل مع ولد الجيران وتقول له: انقلع عن بيتنا وعن رصيفنا...
يقول لك: مو رصيفكن هادا رصيف الحكومة
كلام منطقي, ‏ويتم يمرق قدام البيت ويقول لك مادخلك.

بتتذكروا.. لما يروحوا الأولاد السوق مع أبوهن أو أمهن مشان يشتروا تياب للعيد ..وآخر شي شارين تياب متل بعض بس غير ألوان وتشوفن بأول يوم العيد من الأخ الكبير للصغير متل فرقة حسبالله.

بتتذكروا.. لما الشباب بدهن يعملو عضلات يرحوا يترسو علب النيدو باطون ويحطوا بينهن عمود حديد وهووووووووب وآخر شي منكسرة ضهورهن.

بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت.


واللي ما عمل شي من المذكور فوق بيكون من جيل الهمبرغر وسبيس توون وأبطال الديجتال..راحت عليكم هديك الأيام
أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل و تدريجة وشحططة في الشوارع والمطاعم. ماشاف لا أفلام كرتون ولا لعب وهو صغير..

أول ما يفتح التلفزيون بتلاقيه يتفرج ع هيفا ونانسي وروبي
وعلى أيامنا قصص عالمية وسهرة صباحية ع الشدة كل ليلة خميس
وأم عمار ببرنامج ما يطلبه الجمهور
وعصمت رشيد يغني بين الشوطين


ايام كلنا نتمنى لو ترجع
__________________
~*¤ô§ô¤*~~*¤ô§ô¤*~ حتى لوكان قلبك يحترق فلا تدع الدخان يخرج من فمك ~*¤ô§ô¤*~~*¤ô§ô¤*~
رد مع اقتباس

Sponsored Links
  #2  
قديم 27th May 2009, 10:27 PM
الصورة الرمزية iyad tahhan
iyad tahhan iyad tahhan غير متواجد حالياً
عضو مخضرم
 
تاريخ التسجيل: Jan 2005
الدولة: زيـــدل
المشاركات: 252
الجنس: ذكر
iyad tahhan
Thumbs up

له يا عبودي نسيت كثير بعد
بتذكر وقت نص اولاد الضيعة يجتمعوا و يلعبو بلعبة الصقوط او الطميمي
بتذكر وقت نجتمع شلة اولاد و نلعب لعبة البييور و نوصل لفيروزة و نرجع و نحنا عم نضرب البييور بالعصاي و عد إذا فيك تعد
بتذكر وقت نقصم فريقين فريق شباب و فريق بنات و نلعب لعبة أحمر أزرق
و بعد كثييير شو بدي عد لعدلك
بتذكر ملعب الربيع الي ما كان يخلى من الصغار و الكبار بلعب الطابي و طيارات الورق اللي نصنعها بايدنا
بتذكر وقت اللي الثلج يعبي الساحات و الشوارع و يشتغل الخبيط بالثلج و صنع جدك أبو السبع
كانت إيام حلوي و راحت و صعب ترجع لكنها بتضل ذكرى حلوي من أيام الطفولي و أيام زيدل العتيقة
موضوع حلو عبودي مشكور معلم


__________________
لا خير في انسان لا يحب ارض احتضنت اول دعسات قدميه وابصر النور فيها
رد مع اقتباس
  #3  
قديم 27th May 2009, 10:29 PM
الصورة الرمزية Kinan
Kinan Kinan غير متواجد حالياً
عضو مخضرم
 
تاريخ التسجيل: May 2003
الدولة: Zaidal
المشاركات: 933
الجنس: ذكر
Kinan
يعني ابو عبيد حلوة منك و كل الشغلات اللي حكيت عنهون بيجننو

و يا ريت انو يرجعو هالذكريات الحلوة

بس كلو ولا ام عمار و عصمت رشيد

يا زلمي انا لا حبيتوا و لا عرفت كيف صار مطرب

نبقى نستنى ام عمار و بعد ما تخلص هالتحيات اللي بدها نص ساعة لانو كل واحد ماشالله ما ينسى حدى بالحارة و ما يبعثلو تحية
تطلعلها شي غنية او غنيتين بالبرنامج بينسمعو
و الباقي اللي لا يسمعك اياه
و عالغالب كان نص الفديوكليبات مسروقة و محطوط فوق اشارة القناة الثانية شي شغلة
__________________

Keep Smiling !
It's The Second
Best Thing You Can Do With Your Lips
رد مع اقتباس
  #4  
قديم 27th May 2009, 10:59 PM
الصورة الرمزية ABUODEE
ABUODEE ABUODEE غير متواجد حالياً
مشرف المنتدى الترفيهي
 
تاريخ التسجيل: Jun 2004
الدولة: Abu Dhabi
المشاركات: 826
الجنس: ذكر
ABUODEE is on a distinguished road
اقتباس:
له يا عبودي نسيت كثير بعد

اي والله نسيت كثير وعم نتذكر سوى يا ايادووف
طيب بتذكر البوجية لما كنا نحطلها نبريج بلاستيك ونعبيه ريش حمام ونجيب بسمار وعود كبريت ونبلش نزتها لفوق وتنزل تطق و نطقطق على الزفت بالحارة؟؟
بتتذكروا لما ماكنا نخلي لمبات شغالة بالضيعة ونطقشهن ببواريد الضغط؟؟
بتتذكروا لما كنا نحضر الكابتن ماجد ولما يخلص كنا نلبس تياب الرياضة والبوط والحماس دابب فيني ونبلش تخبيط بهالطابة؟؟
بتتذكروا لما كانت تنقطع الكهربا ونطلع كل الشلة نلزق جراس البيوت بلزيق ولما تجي الكهربا تطلع العالم تركض على جرس الباب ويفكروه معلق لحالو؟؟
بتتذكروا قعدات الصيفية على المسطبة او نطالع الطراريح ونعمل صندوق مفتوح ونقعد نارغل ونشرب متي؟؟؟
ذكرونا يا شباب والله هالايام مابقى تنعاد ولا ترجع
__________________
~*¤ô§ô¤*~~*¤ô§ô¤*~ حتى لوكان قلبك يحترق فلا تدع الدخان يخرج من فمك ~*¤ô§ô¤*~~*¤ô§ô¤*~
رد مع اقتباس
  #5  
قديم 27th May 2009, 11:11 PM
red rose red rose غير متواجد حالياً
عضو
 
تاريخ التسجيل: Apr 2008
المشاركات: 23
الجنس: انثى
red rose is on a distinguished road
ونحن البنات شو بدنا نذكر :
منذكر وقت كنا نلعب بالبحثة ونلم كل حجار الحارة ونلعب عليهم والشاطرة هي اللي بتربح هالحجار .
منذكر وقت اللي كنا نلعب بالحارة ( عالي واطي ) والشاطرة هي اللي بتنط على اعلى ارتفاع لرفيقتها .( كانت الشاطرة هي اللي بتنط على قامة رفيقتها وهي واقفة كاملة ومنزلة رقبتها فقط ما بعرف اذا بتذكروا هالشي بس نسيت شو كنا نقول للواقف هيك يا ريت حدى يساعدني ويتذكر معي )
منذكر لعبة المزرعة اللي كانت امتع لعبة عنا .
منذكر وقت كنا نتقاتل نحن وشباب الحارة مين اللي بدو يغلب فريق البنات او فريق الشباب بالاحمر ازرق .
منذكر كيف كنا نلعب بالشارع لانو ما كان مافي غير كم سيارة تمر بالشارع كل كم ساعة لتمر شي الية ونبقى لوقت متأخر بالحارة وكل اولاد الحارة يلعبو مع بعض ونرجع على بيوتنا كل واحد بدو حمام من بعد اللعب .
يا الله هالالعاب اديش كانت زيدل بشكل خاص الها طابع مميز فيها
منذكر وقت كنا ننتظر كم برنامج اطفال على القناة السورية الوحيدة اللي كانت تجي مثل ريمي و هايدي وساندي بل وكريندايزر وافتح يا سمسم
منذكر بعد ما كبرنا شوي ننتظر كل خميس ليلة جمعة لحتى نحضر فيلم السهرة العربي الفيلم الوحيد اللي كنا نحضره .
ذكريات بالفعل ما في احلى منها
شكرا يا عبودي لانو خليتنا نتذكر هالأيام الماضية اللي بتصور انو انا بنت الجيل اللي اقدم منك بشوي وعندي ذكريات اكثر منك بهالاشيا هاي البسيطة .
شكرا كثير وانشالله منقدر نحافظ على جزء من هالبساطة اللي كنا عايشينها بس يمكن هالشي صار صعب بعد هالتعقيدات اللي دخلت على كل المجتمع .
والكن كل التقدير من :
زهرة الحب النقي
الزهرة الحمراء .
رد مع اقتباس
  #6  
قديم 28th May 2009, 03:55 AM
الريم الريم غير متواجد حالياً
عضو متقدم
 
تاريخ التسجيل: May 2008
المشاركات: 69
الجنس: ذكر
الريم is on a distinguished road
شكرا عبودي رجعتنا لايام عن جد كانت حلوة وغير كل اللي عم نعيشه هلق

ومتل ماقلت جيل السبيس تون والهمبرغر ياحرام ماشاف جمال الايام الماضية

بس الغريب انه انا من الشام وكنا نلعب نفس الالعاب وبتفاصيلها معقول كانت كل سوريا تلعب نفس الالعاب حتى برامج التلفزيون نفس الشعور انه ام عمار وساعة اهداء وبعدها غنية لموفق بهجت ياصبحة هاتي الصينية
شكرا عبودي
رد مع اقتباس
  #7  
قديم 28th May 2009, 09:44 AM
الصورة الرمزية ABUODEE
ABUODEE ABUODEE غير متواجد حالياً
مشرف المنتدى الترفيهي
 
تاريخ التسجيل: Jun 2004
الدولة: Abu Dhabi
المشاركات: 826
الجنس: ذكر
ABUODEE is on a distinguished road
اهلا فيكم جميعا
الريم والوردة الحمراء واياد وكنان
الحقيقة ذكرياتكم وذكرياتي اجمل شي بالحياة
وخلونا عم نتذكر مع بعض....
بتذكروا لما كنا نروح رحلة خلوية على شي منطقة قريبة من المدرسة فيها خضار
ونبسط على هالارض مع الانسة وكل واحد ناتع مدري كم سندويشة معو؟؟؟

بتذكروا لما كنا نروح على المدرسة ونرجع من المدرسة بطليعة وصافين ورا بعض مثل القطار وعينكن تشوفوا هالطلاب ماشين ورا بعض ومسنتلين على المدرسة ؟؟؟؟

بتذكروا لما كنا نوقّف على علب السمنة ونثقبها ونربطها بخيط ونطلع فوقها ونصير نمشي على العلب؟؟؟؟

بتذكروا لما كنا نضل طول النهار نحرك بالانتيل تبع التلفزين حتى تصفى القناة وعلى طول واحد عم يحرك البوري وواحد ناطر جنب التلفزيون وبيعيطلو حرك على اليمين شوي وعلى اليسار شوي وبس خلص اجت القناة ؟؟؟؟؟

والله هالذكريات رجعتنا مدري كم سنة لورا
يالله ياجماعة ذكّرونا بعد شو في ذكريات حلوة نسيانينها يالله
__________________
~*¤ô§ô¤*~~*¤ô§ô¤*~ حتى لوكان قلبك يحترق فلا تدع الدخان يخرج من فمك ~*¤ô§ô¤*~~*¤ô§ô¤*~
رد مع اقتباس
  #8  
قديم 28th May 2009, 02:48 PM
الصورة الرمزية imad_dahi
imad_dahi imad_dahi غير متواجد حالياً
عضو مؤسس
 
تاريخ التسجيل: Mar 2003
المشاركات: 522
imad_dahi
والله حلو..

كلو حلو الاحمر والازرق والبيور والغلال ..

ومشاوير البسكليتات ع الملعب البلدي , وملعب الربيع , و و و و

هدول ذكرياتنا بس يا ترى شو هني ذكريات اطفال هالجيل الجديد

يالله طبوش ابدعلنا ذكريات هادا الجيل
__________________
يالي مش فهمان اللعبة
خليني قلك شو صاير
في ناس بأوهامها كبرت
ناس بتنسى كيف تربت
في ناس بمطرحها بقيت
بين الماضي وبين الحاضر
ابو وديع
رد مع اقتباس
  #9  
قديم 28th May 2009, 10:00 PM
الصورة الرمزية fm1976
fm1976 fm1976 غير متواجد حالياً
عضو مخضرم
 
تاريخ التسجيل: Sep 2008
الدولة: الشام
المشاركات: 317
الجنس: ذكر
fm1976 is on a distinguished road
أشكرك عزيزي عبود ي

فقد أرجعتنا لأكثر من 20 سنة

بالرغم من كوني من الشام وعمري 33 سنة اليوم

90% من الذي ذكرته عشناه

بس الله يرحم هديك الأيام

ويجعل أيامنا وأيام أولادنا كلها خير ومسرة

والشكر لكل من ساهم في هذه الذكرى العزيزة والغالية
__________________
----------------------------------------------------------------

أعراف
مسلمون ومسيحيون يداً واحدة وأمةً واحدة
ليس قيمة المرء ما يحسن بل قيمة المرء ما يطلب
وأجهل الجهل أن يجهل الإنسان جهله ويجهل نفسه ويجهل خالقه
فإن لم يكن لك أثر في هذا الوجود
فأنت زائد على هذا الوجود
يداً بيد من أجل إنطلاقة حضارية لإنقاذ البشرية
رد مع اقتباس
  #10  
قديم 29th May 2009, 08:26 PM
عا شق اليا سمين عا شق اليا سمين غير متواجد حالياً
عضو متقدم
 
تاريخ التسجيل: Jun 2007
المشاركات: 31
الجنس: ذكر
عا شق اليا سمين is on a distinguished road
عبودي الف شكر الك على الموضوع الي كتير حلوووو وكتير رجعني
كان في غنية كل طفل سوري كان حافضها وهي
حاشيشت البي هل الطول هل الطول
كبرت وصارت هل الطول هل طول
هيك بيلعبو السمكات
هيك بيطيروو العصافير
هيك بيقعدوو الشاطرين
الخ ................... هي الغني انا مابروح من بالي ابدا
او كتير من الاغاني ايم الي كنا اطفال
انا بسمع او مابعرف هل المعلومي صح او غلط
بقولو انو كل واحد كبير في بقلبوو من جوا طفل صغير
دوم بزكروووو بالولدني ويام الطفولي
حتى انا لهلق بيجيني حركان ولدنة او هي الاغاني لهلق بغنيها
مابنساها
رد مع اقتباس
  #11  
قديم 30th May 2009, 04:29 AM
الصورة الرمزية imad_dahi
imad_dahi imad_dahi غير متواجد حالياً
عضو مؤسس
 
تاريخ التسجيل: Mar 2003
المشاركات: 522
imad_dahi
هالموضوع بيعجب كل الذين عاشو تللك المرحله من طفولتهم وانا كنت واحده منهم وعلى الرد على الو رده الحمرا اللعبه اللي شرحت عنها العالي واطي هي غير لعبه كنا نسميها اول بيكش الذبان والتي توقف على طولها يمكن كان اسمها العامود ولعبه العلي واطي الشروط كانت بس الارتفاع عن مستوى الارض ولعبات الحجاره كانت كتيره بحصه وحده اللحسي 3بحصات نسميها مالي ستي فضه و 5بحصات فرفور و زرزور ودخيلكن لا تنسو لما يحفرو الخنادق بالضيعه للنط من فوقها او للتخبايي ايامنا كانت حلوي كتير وكفولتنا احلى وشكرا الكن على فتح هالموضوع
__________________
يالي مش فهمان اللعبة
خليني قلك شو صاير
في ناس بأوهامها كبرت
ناس بتنسى كيف تربت
في ناس بمطرحها بقيت
بين الماضي وبين الحاضر
ابو وديع
رد مع اقتباس
  #12  
قديم 30th May 2009, 08:48 AM
الصورة الرمزية ABUODEE
ABUODEE ABUODEE غير متواجد حالياً
مشرف المنتدى الترفيهي
 
تاريخ التسجيل: Jun 2004
الدولة: Abu Dhabi
المشاركات: 826
الجنس: ذكر
ABUODEE is on a distinguished road
اهلا وسهلا فيكم fm1976 و عاشق الياسمين وعمادوووف
الصراحة انو هالموضوع عم يخلينا نتذكر شغلات كانت رايحة عن بالنا
حشيشة قلبي هالطول هالطول لقيت حالي حافظها بصم لما قريتها من عاشق الياسمين
بس كنت نسيانها ورايحة عن بالي
ومالي ستي فضة.. مالي عم تتوضى.. مالي اجاها ضيوف ........
والله هالقصص رائعة ياريت اذا حدى تذكر شي لعبة او ذكرى يحطلنا اياها
بس بتذكروا لما كنا نربط سحّارة خشب بحبلة ونشحط حدى من رفقاتنا فيها على الزفت
واحد قاعد بقلب السحارة وواحد عم يشحط فيه
ولما كنا بدنا نلعب سقوط كنا نعمل كوب بانيوس ((الكوب بانيوس عبارة عن ايدينا كنا نقلبها وجه وقفا يعني :اربع ايدين 3 منهم وجه ووحدة قفا كانت تطلع القفا ويرجعوا الباقين يعملوا كوب بانيوس وهيك ليضل واحد بس ويطب لحتى نلعب سقوط))
اهلا فيكم وبذكرياتكم وبانتظار تذكيرنا بشي ذكرة قديمة
__________________
~*¤ô§ô¤*~~*¤ô§ô¤*~ حتى لوكان قلبك يحترق فلا تدع الدخان يخرج من فمك ~*¤ô§ô¤*~~*¤ô§ô¤*~
رد مع اقتباس
  #13  
قديم 30th May 2009, 02:13 PM
الصورة الرمزية imad_dahi
imad_dahi imad_dahi غير متواجد حالياً
عضو مؤسس
 
تاريخ التسجيل: Mar 2003
المشاركات: 522
imad_dahi
اي والله يا عبوووووووووووودي

متل ما قلت هالاشيا منفكر حالنا ناسينها بس لما شفناها طلعت مأصلي فينا وجزء ما بتتجزأ

مثلا لي ضحكتني هلق لما شفت منك الكوب بانيوس

قعدت قولها طلعت معي دغري

كوب بانيوس .... حط حق المستحق الكوب بانيوس
كسرنا الجرة طلعت مرة كسرنا العود طلع دود يا معقوووود

ويلي .. طلعت انا الاول هههههههههههههه


عم نلعب كش دبان .. مين ع بالو يلعب معنا
__________________
يالي مش فهمان اللعبة
خليني قلك شو صاير
في ناس بأوهامها كبرت
ناس بتنسى كيف تربت
في ناس بمطرحها بقيت
بين الماضي وبين الحاضر
ابو وديع
رد مع اقتباس
  #14  
قديم 5th June 2009, 11:13 AM
الصورة الرمزية ABUODEE
ABUODEE ABUODEE غير متواجد حالياً
مشرف المنتدى الترفيهي
 
تاريخ التسجيل: Jun 2004
الدولة: Abu Dhabi
المشاركات: 826
الجنس: ذكر
ABUODEE is on a distinguished road
طيب بتتذكروا لما كنا نشتري مكبّرة ونطلع بالشمس نحاول نشعّل المحارم؟؟؟
وبتتذكروا لما كنا نلعب سكر مكّر لالالا ...بياع السكّر لالالا
وبتذكروا لما كنا ننق على اهلنا بدنا ننام برا ونطالع الطراحة ونفرش برا وبدنا نام برا؟؟
وبتذكروا لما كنا نلعب لعبة القراني؟؟زوايا يعني ((خمس اشخاص اربعة منهم ماخذين اربع زوايا والخامس بالنص وبيصير تبديل الاشخاص بالقراني والي بالنص بدو يحاول ياخذلو شي زاوية))
طيب مين منكم بيتذكر كلمة (( طُشّ ))؟؟؟
وكلمة حوز من الجوز؟؟؟
__________________
~*¤ô§ô¤*~~*¤ô§ô¤*~ حتى لوكان قلبك يحترق فلا تدع الدخان يخرج من فمك ~*¤ô§ô¤*~~*¤ô§ô¤*~
رد مع اقتباس
  #15  
قديم 6th June 2009, 12:32 AM
الصورة الرمزية sam kassab
sam kassab sam kassab غير متواجد حالياً
عضو متقدم
 
تاريخ التسجيل: Oct 2005
المشاركات: 82
الجنس: ذكر
sam kassab is on a distinguished road
شكرا لك عبودي رجعتنا لايام الطفولة
وارجوا ممن يتذكر لعبة الابيش ولعبة الدحار بان يذكرنا بيهم .في الحقيقة لقد نسيتهم ونسية كيف كنا نلعبهم مع شكري لكم .
وهل تتذكروا عندما نلعب على البيادر ونحفر حفرة في اعلى البيدر ليسقط احدا في الحفرة.
وهل تتذكروا عندما كنا نحوش الجلبانة ونألكل الجلبانة .
وهل تتذكروا تصنيع طائرات الورق ونذهب قبلي الضيعة لنطيرهم.وتتذكروا لعبة الفيشة عند ابو عرب. ولعبة النقش بنديي. ولعبة تفوير الكازوز. وعودان البوظة من يربح اكثر.ولعبة الكلال( النحل)وايام الاعازر . وشعبورة عيد الصليب . وجواميق الضيعة عندما كنا نلبس جزم ونخوض في الجواميق الغميقة
في الحقيقة كانت ايام حلوى .
يالية الطفولة تعود يوما.
شكرا لكم
رد مع اقتباس
إضافة رد

أدوات الموضوع
انواع عرض الموضوع تقييم هذا الموضوع
تقييم هذا الموضوع:

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


Sponsored Links

جميع الأوقات بتوقيت GMT +3. الساعة الآن 03:56 AM.


Powered by vBulletin V3.6.2. Copyright ©2000 - 2021
تصميم الموقع وسام عبد العزيز جميع الحقوق محفوظة, Copyright ©2001 - 2021
المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص