للســـــورين فقط ....بتتذكروا ؟!؟

[abode durra]

شكرا اخ عبودي على هالذكريات الحلوة يعني اكيد اني هون اصغر واحد فيكن (18 سنة )بس كثير من هالشغلات كنت سويهي مع رفقاتي و شغلات حاكيلي عليهي ابي و عمامي بقى فعلا شغلات حلوة ما لازم تنتسى

كنت العب مع رفقاتي احمر ازرف و شوية بييور و كلال (حفر و خط ) و كمان العفريتة و الرسمات على الارض بالطبشور اوقات و اذا ما توفر من بلش ندور على حجر ابيض خرج الكتبة فيه على الارض لحتى يمشي الحال
وكمان لعب السقوط و العالي واطي و اللحقان و كني نسمي الصغير اللي ما يعرف يلعب "" عصفور طيار "" و هالولد يكون لا بقدم ولا بيأخر باللعبة
و اكيد لعب الغني و خبط الايدين (ما لقيت اسم احسن) مثل
سكر مكر لالالا ........بياع السكرلالالالا
وكمان
سي سي سي...... مي مي مي ....... فطوم فطوم فطومه..................خبيني ببيت المونة

هههههههههههههههههه
و كمان كني نلعب كرة قدم مع ولاد الحارة و نتبارة ببماريات مع الحارات الثانية و نخطط و نتدرب
و اكيد
المشوطة على البسكليتات و الدوران بكل الضيعة و نستكشف وين في شي شجرة خوخ او مشمش او دراق او اكدنيا خرج الاكل و مادة على الشارع مشان "" ناخذ "" منهي و كني دائما ناكل و نحس انو اطيب من البيت
و شغلات كثيييير

ما بعرف شباب و صبايا اذا حدي من الجيل القديم كان يسوي هيك
بس شكرا عبودي على الذكريات الحلوة

[ABUODEE]

مليون مرحبا فيكم اخ سام و عبودي الصغير
بالحقيقة الابيش مو غريبة علي هاللعبة مارر على راسي هالاسم كتير بس ماني متذكرها بالظبط
ياريت حدى يذكرنا فيها مزبوط
وعودان البوظة كنا نتفنن فيها شي نعمل برواز للصورة مربع ومعين .....
اما تحويش الجلبانة واكلها فهاي كتير بذكرها شكرا الك ذكرتني فيها كانت رايحة عن بالي
بس تذكرت اكلة كنا نشتريها بس ماني فطنانها كان لونها احمر وكنا نشتريها من نص الضيعة
وكانت موجودة بصينية كبيرة وعليها جوز الهند من فوق ياترى شو كان اسمها؟؟؟

واكيد كلكن بتذكروا الغزوولي

وفي نوع تاني اسمو شعر البنات ههههههههه

سي سي سي...... مي مي مي ....... فطوم فطوم فطومه..................خبيني ببيت المونة

هاي مليحة كمان عبودي ذكرتني فيها لهاي اللعبة شكرا الك
وكمان كنا نشتري ضروب لفرد الكبسون

لهلق ريحت البارود مابتروح من بالي ههههههه
شكرا الكم جميعا واكيد بانتظار ذكرايات حدى منكم بلكي بيذكرنا بشي نسيانينو

والكم مني احلا وردة

[sam kassab]

على ما اذكر لعبة القبيش كانت تتالف من فريقين وخمس او ست حجار مبسطا وكرة صغيرة وتضع بشكل عمودي جنب حائط وعلى مسافة اربع أمتار واحد من فريق الخصم يضرب الكرة الصغيرة على عمود الحجارة بحيث يبعثر الحجار وعليه ان يبداء يعمر الحجار من الاول وفي نفس الوقت الفريق الثاني يحاول بان يضربه بالكرة اذ اصابه يقتل ويخرج من العبة وينزل غيره وان لم يتمكنوا من اصبته الفريق الثاني وعمر الحجار يقول ابيش .ويفوز وبنزل غيره من فريقه
شكرا لكم وارجوا منكم ان كنت مخطء التصحيح لانني منذ 35 سنة لم العب بهذه العبة.
مغ الشكر والمحبة لكم.

[sam kassab]

لعبة الدحار أيضا كانت تتألف من فريقين وكل واحد يملك عصا من الخشب مثل عصا لعبة الهاكي وعلبة سردين او اي علبة تنك نطعوجها بحيث تصبح مثل الكرة من ثم نحفر حفرة بحيث التنكة المطعوجة تسقط فيها ومن ثم نقسم فريقن اربع على اربع او خمس على المهم كم واحد متواجدين نقسم العدد في النص.
ونبداء فريق يحاول ابعاد التنكة والفريق الثاني يحاول بأن يقربها على الحفرة لكي يسقطها في الحفرة لكي يفوز.وكنا نركض وراء التنكة مرات نصل بها الى فيروزة ومرات نصل على متلس.


اااااههههه على ايام زمان كانت من احلى ايام العمر.

[ABUODEE]

الله عليك يامعلم والله ذكرتني بالقبيش تمام التمام اما الدحار ماني متذكرها بس اتذكرت لعبة كنا نسميها جوَر
طابة تنس خضرا وكنا نحفر جورة ونرمي الطابة على الجورة واذا نزلت بالجورة يركض الي عم يرمي الطابة وياخذها من الجورة والتاني يهرب وبدو يخلعو بالطابة على ضهرو
ويلااااه هاللعبة كانت ممحية من الذاكرة عندي منوب
على فكرا رح اهديك هالصورة بعتقد كتيرين رح يتذكروا شو هوي الي بالصورة وكل الشكر الك اخ سام على احياء بعض من الذاكرة المنسية وبانتظار المزيد

[abode durra]

و كمان خطر على بالي لعبة ثانية لازم تتذكروهي و هيي لعبة الادريز وقت منرسم مربع على الارض ومنرسم في خطين مشان نقسمو لاربع اقسام و اللعبة بتلعب اثنين و كلو واحد معو 3 حجار و منحط (كب بانيوس ) مشان نشوف مين الاول و .........

اذا ما تذكرتوهي بعود اشرح عنهي اكثر

و كمان في لعبة كان جيلني يلعب فيهي هيي ( تتجه الحرب ) ما بعرف عن جيل الكبار

و هيي انو منرسم دائرة على الارض منقسمهي حسب عدد اللي عم يلعبو و بعدين كل واحد بيختار اسم بلد و بيكتبو بالقسم تبعو
و ببلش شي واحد و بيقول( تتجه الحرب الحرب نحو **** اسم البلد ) و اللي اسم البلد تبعو لازم يوقف بنص الدائرة و يقول ( ستوب STOP )
و بهالوقت اللعيبي الباقين بيهربو اكثر ما فيهن و بيوقفو بس الثاني قال ستوب و بيجي هذاك بينقي شي واحد من اللعيبي و بقدر المسافة كم فشخة و بيقول بعدين بيقيس و اذا طلع نفس ما قال بيربح و اللي راح لعندو بيصرلو ( دودي ) بتنحط بقسمو على الدائرة
و بيكون في اتفاق بعد كم (دودي ) بيطلع الواحد

اسف على طول الشرح بس وقت اتذكرت اللعبة حبيت شوف كنو متذكر كلشي عنهي و كتبت كلشي
شكرا

و صحي عبودي هالشي اللي بالصورة الحاططهي اني شايفو من قبل بس نسيان اشو هوي

[ABUODEE]

الله يعطيك العافية عبودي الصغير بالفعل كنا نلعب تتجه الحرب هاي ذكرتنا فيها
والشكر الجزيل للاخ سام على تفاصيل اللعبتين الدحار والقبيش

الصورة الي حطيتها لشي اسمو غليون ابو طابة كنا نشتريه وننفخ فيه حتى تطير الطابة وتصير بالجو والشطارة انك نخلي الطابة ترجع على محلها بالغليون
وكان في شي تاني اسمو صفّيرة العصفور وهي صفّيرة على شكل بلبل وكان الو محل لحتى نعبيه مي ونصير ننفخ فيه لحتى يطلع صوت بلبل عم يغرّد
ايام نتمنى لو ترجع في يوم من الايام

[sam kassab]

شكرا لك عبودي على الصورة ذكرتنا في هذه اللعبة لعبة الغليون التي كنا ننفخ لكي نرفع الكرة عن السلة ولعبة العصفور ابضا وفي العلامة كنا نشتريهم من عند اسعد الدباس من نص الضيعة لا ادري اذ كان على دورك

[ABUODEE]

اي على دوري محل اسعد الدباس وحتى اني ذكرت من قبل انو في اكلي كنا نشتريها لونها احمر وموجودة بصينية وعلى وجهها في جوز الهند ماني ذاكر اسمها كانت موجودة بس عند اسعد الدباس
ياسيدنا هالمحل كان عندو كل شي وكان في شي كنا نسميه سحبات
كرتونة وفيها متل الحفر مسكّرة من الاعلى
كنا ندفع ليرة ونفتح الحفرة وانت وحظك يابو الحظوظ

ياللـــــه شباب انبشو معنا
جـاري النبش .....

[الملاك الثائر]

بتذكر.. يوم تجي عمتي وتقول لي : بدك أرسم لك ساعة وانته تمد إيدك ويعضّك هديك العضة اللي تضل مرسومة أسبوع.
وكمان بتذكر لما كنا نربط الشراشف على رقابنا او نرفع الشمسية مفتوحة ونطوط
وكمان بتذكر لما كنا نلعب (بيت بيوت)ونعمل بيوت من الدواشك والشراشف و كلما شافتنا امهاتنا او خالاتنا ناكل بهدلة

وبتذكر كمان لما كنا نلعب طابة وبيتنا شقة وكل مرة نكسر الضوء او بلور البواب ونركض نتخبى بالحمام حتى يتم اصلاح العطل
بس للاسف نحن من جيل الهمبرغر وابطال الديجيتا ولما يحكو الكبار عن طفولتهن نضل نطلب يحكولنا كمان وكمان ونضل نقول نيالكن
وهن يقولو ولاد هل الزمن ما يعرفو يلعبو تتذكرو لما..........


بس سؤال
شكون يعني عنوان الموضوع؟؟؟؟؟؟؟؟؟؟؟؟؟

[ABUODEE]

اهلين فيكي الملاك الثائر
الصراحة على سيرة الامتحانات ذكرتيني بدفتر الاشغال الي كنا نقصقص منو ونلزق على الرسمة والوان الشمع الي كنا نرسم فيها

وكمان كان في معجون نعمل منو اشكال بحصة الرسم والاشغال
بالاضافة للاتكيت الي كنا نلزقو على الدفاتر والكتب وقت نبلش حفلت التجليد

وكمان كان في مساطر عليها جدول الضرب كنا نشتريها ونحطها بقلب المقلمة


وبدنا ماننسى برنامج الدروس الاسبوعي اكيد كلكم عرفتوه


اما بالنسبة لعنوان الموضوع يمكن صار لازم يتغير ليصير لبلاد الشام ..بتتذكروا؟؟

[الملاك الثائر]

يوه يعني بس البابات والمامات ببلاد الشام لعبو اكتر من ولادن ؟؟؟؟؟؟!!!!!!!!!!!

[alosh66]

طيببببببب بتتزكروا ايام عيد الصليب والشعبورة
وحياة الله يمكن ما مر عيد وماني حارقة شي ٣ او ٤ بناطلين
هههههه لا ع اساس نطلع مزبطين حالنا نحنا البنات و متئمشين
ويجون الصبيان بالفتيش ويزتوا بين اجرينا ويبلش حرق البناطلين ههههه

وكمان كنا نجيب هدول الصواريخ الفتيش ونحطون بئنينة الكولا ونشعل
مشان يطير ومانحرق اصابيعنا ومع هيك كنا نرجع محروقين حالنا
ومافي ولا اصبع صاغ ههههه

[ABUODEE]

شكرا لمرورك علوش وشكرا لتذكيرنا ببعض ذكرياتنا القديمة التي نتمنى انت تعود يوما

اسمحولي ذكّركم وحط صورة للبوجيّة (طبعا مو الكل بيعرفها )
بعد عدّة نقاشات عرفت انو في عالم ماعرفت شو هي البوجيّة بالظبط
طبعا هالاختراع مابعرف اذا هوي حمصي بس بعرف انو اختراع عبقري ومو طبيعي الي اخترعو
ويعتبر اختراع تكتيكي وفنّي بحاجة الى صفنة وتفكير عميق

على كلٍ الصورة رح تعطيها للبوجية حقها بالشرح

وعلى فكرة البوجية والنقيفة يعتبرو خطرين نوعا ما
طبعا النقيفة الها انواع (( حديد - خشب طبيعي من الشجر- خشب تفصيل بالمنشرة)

طبعا أول شي لازم تجيب بانسة و مطرقة و مفكات و حجار و تقعد تشتغل شي ساعتين لحتى يطلع معك بوجيّة او نقيفة معتبرة

ان شاء الله تكونو تذكرتوهن مزبوط
وبانتظار المزيد من الذكريات المنسية من احد الاعضاء لتذكيرنا بها واحيائها في الذاكرة من جديد

[alosh66]

والله يا عبودي انا حمصية وكتير بسمع بالبوجية بس مابعرفا بالضبط

بس عن النقيفة فهي غنية عن التعريف اسالني انا عن ايام النقيفة ههههه
يا حرام كنا بالحارة نضل الشاطر عامل نقيفة ولاحق هالولاد
وكل يوم يكون في جرحى وقتلا والاولاد
والشاطر يلي بيرجع على بيتو صاغ ومانو معور من النقيفة ههههه