(آخر قصيدة عشق) ..هدية متواضعة لروح الشهيد الصديق الشاعر المهندس سامي سعادة.

[ماجد سطّاح]

(آخر قصيدة عشق)
هديي متواضعة لروح الشهيد الصديق الشاعر المهندس سامي سعادة
==========
بقلبو سكنتي وكانْ عِشقِك هَمْ ........متل الضَنَا , ومتل المرا والإمْ
يا سوريا, ومن هَيكْ ( بُو كابي).......صاغِكْ قصيدة مْسَطَّرة بالدمْ
==========================
أروع قصيدة انكَتبِتْ بإحساسْ..........شاعر على جبينو سَمَار الأرضْ
غَيم السما بوقفة شْموخو بَاسْ ... داوِتْ وطن مجروح طولْ وعرضْ
==========================
هالشاعر تعوَّد يرشّْ ورودْ............عَ المنبر بصوَتو بكِل فَقْرهْ /ا
وقرَّر يصبّْ النار والبارودْ ..........عا ناسْ لَ بتسمع ولا بتقرى
===================
يا غصن أخضر عا جْروحو كَزّْ ..........لمّا جْرح هالأرض بَلَّش نَزّْ
بهالعاصفة بشرشو كَمَش الترابْ.......مْآمن بإنّو العمر وقفة عِزْ
==========================
بكرى نْ مرق نيسانْ عَ الوادي .....رح يلمَح خْيالَك عَ خَدْ الشِيْرْ
والنهر عمَ يسمع شِعرْ هادي ....برمشَك هَمَستو لْجَوقة عْصافيرْ
وكلما بزيدل جُرحها ينادي .......بشَحرورْ شَدّو العِشق عَا بكّير
إبنْ وصِهِرْ من عَيْلة سْعَادهْ .... (سامي) إسم رَحْ تذكرو وتقولْ:
كبير عاش وهَيْك مَاتْ كبيرْ
============================
يللي هوى الأوطانْ رِسْمَالَكْ..............وقْرَنَتْ كْلماتَك بأفعَالَكْ
إنتْ ما نِلَت الشهادة اليومْ .............تاج الشهادة يا بطل نالَكْ
سُوْريا وطن باقي بأمثَالَكْ
=============================
ألله يرحمو ويعطيه الملكوت السماوي .... التعازي الحارة لزوجتو وكل أفراد عيلتو وأهلو ..الرب يعطيهُن القوة والصبر على فراقو .
ماجد سطاح
01/06/2015