موقع زيدل الصفحة الرئيسية  

العودة   منتديات زيدل > المنتدى الزيدلي > منتدى المجتمع

 
 
أدوات الموضوع تقييم الموضوع انواع عرض الموضوع
  #1  
قديم 24th January 2006, 06:15 PM
الصورة الرمزية angel
angel angel غير متواجد حالياً
عضو مخضرم
 
تاريخ التسجيل: May 2004
المشاركات: 685
الجنس: انثى
angel is on a distinguished road
ما هو عدد الأطفال المثالي للعائلة ؟

في جلسة صباحية على القهوة ضمتنا أنا وصديقتي(س) وإحدى جاراتها _ التي شارفت على أعتاب الستين _ دارت المحاورة التالية بين صديقتي وجارتها :
- شو يا (س) مو ناوية تبلشي بشي ولد ثالث ؟
* ولد ثالث ؟؟؟ لشو ؟؟
- لا تقولي لي إنك مقتنعة بولدين بس..!
* ومن شو بيشكو الولدين ؟ حلوين بس الله يخليهم...
- وشو شغلتك لما تجيبي الثالث ؟؟
* يعني إذا ما عندي شغلة بشتغل بالولاد ؟ .. بعدين ياخالة ولدين وما عم لحق وراهم شغل وتنظيف ..
- لاتتحججي .. الولد بيربى مع شغل البيت ..!
* خالة هذا الكلام كان على دوركم .. بس اليوم ما في أم عم ترضى تظل قاعدة بالبيت .. يعني أنا مو مصدقة يصير الصغير بالحضانة حتى إطلع وإعمل دورات تدريبية ولاقي شي وظيفة محترمة .. شو بظل كل هالعمر عم جيب وربي ؟ .. يعني إذا الوحدة فينا صارت أم خلص خلصت حياتها عند هالمرحلة ؟ .. بدي إرجع عيش حياتي مثلي مثل أي وحدة ثانية عندي علاقات عمل .. عندنا مناسبات اجتماعية أنا وزوجي .. ومنحب بالأيام نعمل سياحة على دول ثانية .. يعني الولاد إلهم حصة وحياتنا الخاصة إلها حصة كمان ..
- بس شو الولدين .. فتحي عين وغمضي عين بتلاقيهم طيروا من عندك ..!
* خالة حتى ولو كانوا عشرة رح يجي يوم ويطيروا .. نحنا كنا خمسة إخوة وخوات بالبيت وبظرف سنتين ما ظل حدا حوالي أهلي ...بعدين مستهوني مصروف الولدين بها الأيام هلق وتكاليف تعليمهم الجامعي بالمستقبل ؟ ... بكفي أصلا" هم تربايتهم خاصة هون بمجتمع الغربة .. إي عم نشوف مناظر بالطريق .. الله يستر عالجميع .. بعدين الحمد لله عندي ولد وبنت يعني لو ولدين أو بنتين كان ممكن فكر بالثالث من باب التشكيلة مو أكثر بس مشكلين خلقة .. وحتى بعرف عائلات عندها بس بنتين ومقتنعين فيهم وما بفكروا أبدا" بالثالث ..
المهم انتهت الجلسة مع وعود من الجارة بجلسات إقناع أخرى لصديقتي ...
***
قبل أن أترك البلاد كنت أعمل في مستوصف لإحدى القرى الفقيرة والمتأخرة نوعا" ما .. وذات يوم جاءت إحدى مراجعات المستوصف .. وجلست ريثما تلتقط أنفاسها .. وكنا بالصدفة نتحدث أنا والممرضات عن الأطفال .. فقالت لي المراجعة : دكتورة مو حرام عليكم إنتو بزيدل حالتكم أحسن من حالتنا بكثير العيلة عندكم بتجيب ولدين أو ثلاث بالكثير ونحنا اللي رزقتنا كل يوم بيومه العيلة اللي ما عندها عندها خمس أو ست ولاد ؟؟؟
وعبثا" حاولت أن أشرح لها أن الولد عندنا يكلف أضعاف ما يكلفه الولد عندهم .. فمنذ أن يفتح عينيه على الدنيا يطلب الدراجة والكمبيوتر واَلة موسيقية ودورة موسيقى والتسجيل بالمسبح عدا الدروس الخصوصية .. وإذا احتاج الأمر التعليم المفتوح ... أما الولد عندهم فإختراع ( الجوارب ) لا يعرفه فتراهم ينتعلون صندلا" مفتوحا" من الأمام صيفا" وشتاء وتبرز من خلاله أصابع مزرقة من البرد
***
ما رأيكم بالموقفين السابقين .. وبرأيكم كم عدد الأطفال المثالي في العائلة .. وهل تغيرت المعطيات بين الأمس واليوم ؟؟؟
__________________
الرب راعي فلا يعوزني شيء.. في مراع خصيبة يربضني ومياه الراحة يوردني..

Sponsored Links
  #2  
قديم 25th January 2006, 05:05 PM
الصورة الرمزية سناء جلحوم
سناء جلحوم سناء جلحوم غير متواجد حالياً
مشرف عام
 
تاريخ التسجيل: May 2003
الدولة: بيروت
المشاركات: 2,980
الجنس: انثى
سناء جلحوم will become famous soon enough
Thumbs up أتنين كتير قليل

على مايبدو أنجيل ماحدا من الأعضاء عم يفكر بالولاد ..الشباب كلها عم تفكر بالزواج والولاد كل شي بوقتوا حلوا ...يعني الله بيدبر .
طبعاً رغبة الإنجاب رغبة نسبية نوعاً ما والوضع المعيشي المرتاح عند عائلة مش بالضرورة يكون سبب لإنجاب عدد أكبر من الأطفال .بدليل أنو أكثر العائلات المالكة أقل العائلات المنجبة وهالشي بيرجع لتفكير ونظرة كل عائلة على حدى من منظارها الخاص للحياة .
وحتماً متل ماذكرتي (( زمن أول أتحول )) يعني أنا متطلباتي مش متل متطلبات أمي ولا متطلبات بنتي متل متطلباتي وهالتفاوت هوي نتيجة لكل التطورات اللي عم تحصل مع تقدمنا بالتاريخ والزمن والعمر .
مازالت هناك بعض العقليات المتخلفة اللي بتتكل على الله بها الموضوع وهالشي بيرجع لقوة الجهل بأمل أنو هالطفل مش ضروري يتعلم أو يترفه يلا بيعيش متل ماعاشوا أهلوا ..بكره بيكبر وبيدبر حالوا .
و كمان مافينا ننكر اليوم تفكير بعض العقول الراجحة في تحديد النسل واللي كمان اتبنتوا بعض الدول متل الصين الشعبية .

هلق عن رأي إذا كان الي الحظ بولادة صبين فبفضل يكونوا 3 على أمل كانت تجيني بنت حلوة ومهضومة ...والعكس صحيح ...يعني العدد المثالي 3 و3 ولاد بيكفوا وبيفوا واذا طفح الكيل .....خليهم 4 ...وبسسسسسسسسسسسسس.

شكراً أنجيل



زهرة الصحراء
__________________
كل مجدي أني حاولت....sanaa jalhoum
  #3  
قديم 25th January 2006, 07:56 PM
الصورة الرمزية سيلفانا خوري
سيلفانا خوري سيلفانا خوري غير متواجد حالياً
مشرف سابق مميز
 
تاريخ التسجيل: Oct 2005
الدولة: venezuela
المشاركات: 495
الجنس: انثى
سيلفانا خوري is on a distinguished road
شكرا انجيل حبيت شاركك بالموضوع ولو اني لا املك الخبرة لأحكم في عدد الأطفال المثالي ولكن في وجهة نظري ان تركيز الأهتمام يجب ان يكون في الكيفية اكثر من الكمية كيفية التربية وتوفير كل الأحتياجات العضوية والعقلية والعاطفية لهذا الطفل.
وممكن ان يكون تفكيري من منطلق انه لايهم ان كانت الاسرة قليلة او متعددة الافراد بقدر الاهتمام بتدعيم اساسها وتقوية بنيانها بتربية صالحة بوقت واهتمام كافي ينهض بهؤلاء الأطفال ليكونوا ركائز متينة لمجتمع سليم.

سيلفانا
  #4  
قديم 25th January 2006, 08:22 PM
الصورة الرمزية angel
angel angel غير متواجد حالياً
عضو مخضرم
 
تاريخ التسجيل: May 2004
المشاركات: 685
الجنس: انثى
angel is on a distinguished road
معك حق زهرتنا نسبة كبيرة من أعضاء المنتدى الأعزاء عزابية وأكيد اَخر همهم الأولاد بس لأنو المنتدى بضم مختلف الشرائح والأعمار من عزابية لخاطبين لمتجوزين جديد ليلي لسه بمرحلة تكبير الأسرة وأخيرا" اللي أنهوا رسالة الإنجاب ... فهيك منسمع اَراء قبل الخبرة وبعد الخبرة .. وهي العزيزة سيلفانا اعطتنا رأيها اللي بتصور بمثل رأي الجيل الجديد ...
شكرا" سناء وسيلفانا على المرور وبانتظار المزيد من الاَراء ..
__________________
الرب راعي فلا يعوزني شيء.. في مراع خصيبة يربضني ومياه الراحة يوردني..
  #5  
قديم 25th January 2006, 09:16 PM
الصورة الرمزية Nada1981
Nada1981 Nada1981 غير متواجد حالياً
مشرفة المنتدى الترفيهي
 
تاريخ التسجيل: Mar 2005
الدولة: The Netherlands
المشاركات: 1,286
الجنس: انثى
Nada1981 is on a distinguished road
ضد العدد المفرد

مرحبا جميعا

بلأول شكرا انجيل لطرحك الموضوع هدا الي بعتبره انا مهم كتير.

سمحولي شارك معكم مع انه انا من شلة العزابية ( نشكر الله )

انا بحياتي ما فكرت اني احسد حدا على اي شي, بقول الحمدلله و بسكت. بس لما بشوف اختين ماشين مع بعض بحس بحسرة كبيرة لانه الله ( عن طريق الاهل ) ما بعتلي اخت تكون جنبي.

رح يصير عمري 25 سنة و لهلا امنيتي الوحيدة انه تكون عندي اخت, كيف مابعرف هي مشكلة اهلي ههههههه . عنجد اذا حدا قلي تمني امنية لنعطيكي شغلة انتي ما عندك منها هلا بقول بدي اخت

لما بحكي هيك قدام رفقاتي بيضحكو عليي لانه الله حرمني الاخت بس بعتلي صديقات كتيرة انا بعتبرهم مثل اخواتي و اعز, و يمكن لانه ما عندي اخت في عندي صديقات كتير.

بس الصديقة هي حتى لو كنت بعزها مثل اختي و بشاركها و بتشاركني افراحي و احزاني مارح تكون علاقتي فيها مثل الاخت, الاخت الي بتكون من لحمك و دمك.

الحمدلله عندي اخين 2 شباب ما مخليني حس بلوحدة ابدا, بلعكس بيعاملوني احسن معاملة و يمكن كمان لاني الوحيدة. بس بلأيام اذا الله طعمني و شفت اولادهم رح ينادولي عمة, بس كلمة خالة رح انحرم منها كل حياتي

يعني مثل ما انا بحاجة لأخت كان ممكن لو الله باعتلنا بنت بدل صبي كان رح يكون اخي وحيد, و اعتقد كان رح يكون رأيه نفس الشي.

في عالم كتير بتقول الوحيد احسن لانه بيتدلل اكتر و الاهل بيعطوه اهتمام اكتر, كلام صحيح, بس الدلال الزائد كمان مانه كويس و المشكلة هي انا عم عاني منها هلا كتير, مثل ما بتعرفو شعاري بلحياة هو: الي ب بيت اهله على مهله, بس هي قصة ثانية غير موضوعنا هدا.

انا بلنسبة الي ضد فكرة العدد المفرد بعدد الاطفال بلعائلة, و ضد فكرة يكون في حدا وحيد كمان. بس كمان ما ننسى انه الشغلات هي ما بيد الانسان, لمى المرأة بتكون حامل حتى لو كانت بتفضل تجيب صبي او بنت, لازم تدعي بلاول انه يكون المولود بكامل صحته لانه هدا اهم من اي شي ثاني.

العائلة الصالحة المكونة من أب و أم متفاهمين بين بعض و اهتماماتهم و افكارهم متشابهة, بيحبو بعض, بيعرفو و بيخافو الله, مستعدين يربو اولادهم مثل ما اهاليهم ربوهم تربية صحيحة, وقتها مارح يكون في مشكلة اذا جابو ولد 1 ولا 4 او حتى 10

اسفة على الاطالة

تحياتي للجميع

ندى
__________________
๑۩۞۩๑ Dream as if you'll live forever, live as if you'll die today๑۩۞۩๑
  #6  
قديم 25th January 2006, 10:36 PM
manalo manalo غير متواجد حالياً
عضو
 
تاريخ التسجيل: Dec 2005
المشاركات: 9
الجنس: انثى
manalo is on a distinguished road
سؤال صعب

سؤال صعب كتير يا انجيل
لما كنت صغيرة كان كل رفقاتي عندهن ستة اعمام...خمس خالات...اربع عمات.....
يعني باختصار كان عندهن قرايبين كتير....و اولاد قرايبين كتير....و انا ابي كان وحيد ...
لما كنت شوفهيك كنت قول متل ما بتفكر ندى يمكن...ما لازم حدا يكون وحيد..يعني صبيين و بنتين نعمة.......
و من جهة تانية لانو بمجتمعنا بيحبو الصبي اكتر كنت قول بدي بنات ما بدي صبيان...بنتين منيح...
لانو كنت كتير انبسط و اسمع من رفقاتي نيالك عندك اخ كبير ارجع قول بنتين و صبي حااااااج...
و هلق لما تجوزت و صار عندي ببيو صغير..صبي...و بعدالمخاض الصعب قلت حاج ما رح عيدها...ههههههه
بس وقت بفكر بابني بقول..يعني اخ او اخت كمان و بيكون نعمة...خاصة اذا كانت بنت..
برايي انو بهالايام ولدين نعمة...لحد التلاتة حاج...اما اكتر من هيك فحرام لانو اول الشي صار كلمة ولد يعني مدرسة و جامعة و مصاريف كتيرة لازم نحسب حسابها احسن ما نجني على اولادنا بس يكبروا...تاني شي لانو على الاغلب الشب عم يتجوز كبير اذا ما قلنا البنت كمان...فلهيك عم يقللو اولاد مشان يقدروا يعيشوا مع ولادهن كل مراحل حياتهن...ما يكونوا الاهل صاروا تقاعد لما الاولاد بعمر صغير...ما رح يقدروا يكفوا معهن بعدين....
يعني باختصار لما منفكر بعدد الاولاد لازم نفكر بكل ولد من لحظة ما يجي على الدني لحتى يكبر
مو بس بحاجاتو المادية كمان بحاجتو لنكون جنبو نقدر نفهمو بكل مراحل عمرو.......
بس الاهم انو نحنا يعني الاب و الام يلي نفكر بعدد اولادنا...و ايمت منحب نعمل كل ولد..طبعا بعد ارادة الله......لانو ياما منشوف و منسمع الناس عم بيقولوا فلانة لسى ما حبلت او لسى ما عندها غير ولد...او يلي عقبالك بصبي....و خاصة الحكي بيكتر قبل الولد الاول...بدون مراعاة لمشاعر الزوجين او احترام رغبتهن ....و لهيك بشوف انو العدد المثالي بتحددوا كل عيلة حسب قدرتها و قناعتها...بس ما بتخيل هالايام يزيد عن اربعة...
و لكم حبي......
  #7  
قديم 25th January 2006, 11:37 PM
a_aroush a_aroush غير متواجد حالياً
مشرف سابق  
تاريخ التسجيل: Aug 2003
الدولة: united states of America
المشاركات: 886
الجنس: ذكر
a_aroush is on a distinguished road
والله سؤال صعب

أكيد كل واحد عنده عيلة جديدة و عم يكون أسرة جديد بيضل محيرو هالسؤال .

بس الجواب عليه صعب لأنو بيلعب فيه تفكيرين واحد من العقل و الثاني من القلب , العقل بيقول يعني ولدين بيكون نعمة و حاج , و الحقيقة ترباية الأولاد بأيامنا بتكلف وين ما كنا عايشين و العقل بيقول أن نربي هالولدين تربية مليحة و نقدر نأمنلهن حياة مليحة أحسن ما نذايق حالنا و ينظلمو , و كمان فكرة ترباية الأولاد اللي مو سهلة أبداً و بعد تجربة اثنين منقول كافي ما بدنا نقطع كل حياتنا ترباية أولاد .
أما القلب بيقول , و أنا بفكر هيك دائماً , أن مثل ما الله عطاني أخ قلو أخي و أخواتي البنات عندهن أخت يصيحولها يا أختي و شأدها حلوة هالكلمة و شأدها حلوة الشب يكون عنده أخ و البنت يكون عندها أخت , شغلة نعمنا فيها الله و أهلنا هني أصحاب الفضل , ليه لنحرم ولادنا من هيك شي .
الأهل مانهن دايمين , فلما نحنا نولّي شأد حلو أولادنا يضل عنده أهل اللي هني أخواتهن , ما في شيء أنا بلاقيه بهالدنيي حلو أكثر من أن اجتمع بأهلي و بأخواتي و ما في أحلى من لو كانو كثار , يعني أربعة على الأقل .
لكن بيضل القلب شيء و العقل شيء ثاني و يمكن مو بس من ظروفنا من أنانيتنا ما منفكر نكثر أولاد , لأن حتى لو كانت ماديات الواحد بتسمح منلاقي الناس صارت تكتفي بولدين .
على كل هي شغلة كل مين و قناعتو فيها و ما فينا نجبر حدى أن يقتنع برأينا حتى شريك حياتنا .
__________________
there is no place like home
  #8  
قديم 26th January 2006, 12:08 AM
الصورة الرمزية ziad sattah
ziad sattah ziad sattah غير متواجد حالياً
مشرف المنتدى الأدبي
 
تاريخ التسجيل: May 2005
الدولة: zaidal
المشاركات: 1,739
الجنس: ذكر
ziad sattah is on a distinguished road
-
مثنى و ثلاث و رباع , و إن ْ لم تعدلوا فواحد .

أنا مثلاً رزقني الله بثلاث أولاد ذكور , و لقد اكتفيت مبدئياً بذلك . و لكن هنالك نقطتين هامتين حين أفكّر بالموضوع , أوّلهما : من وجهة نظر أولادي : ماذا لو سألوني لاحقاً عن سبب عدم إنجاب أخت لهم حيث أنني ( ربما بنظرهم ) حرَمتهم من المناداة بـ : أختي !! و ثانيهما أنني أنا كنت أحلم منذ الصغر بأن تكون لدي ابنة ...

برأيي : الأخ بأمس ّ الحاجة لأخ يشاركه اللعب في الصغر( وهي حاجة تربوية و نفسية ) و يشاركه الأفراح و الكروب في الكبر . و حاجة الأخت للأخت هي أشد و أحوج . إذاً أربعة أبناء في البيت هي سعادة و نعمة و عدل و كفاية ...

__________________
إذا كان الله معنا فمن علينا
  #9  
قديم 26th January 2006, 02:15 AM
الصورة الرمزية angel
angel angel غير متواجد حالياً
عضو مخضرم
 
تاريخ التسجيل: May 2004
المشاركات: 685
الجنس: انثى
angel is on a distinguished road
ما تزعلي كثير ندوش ... أنا عندي أخت بس الفارق بيناتنا 11 سنة ووقت أنا اتزوجت كان أختي عمرها 13 سنة يعني كنت حس تجاهها بمشاعر الأمومة أكثر من الأخوة وربينا كل وحدة كأنها وحيدة بالرغم من كوننا أختين ... على كل انشالله الله بعوضك وبيعطيك بنات بالمستقبل لأنو البنت بس تكبر بتصير مثل الأخت .. بس شدينا همتك ولاتتدللي كثير عالعرسان ...
الغالية منال .. السيد عبدالله .. الأستاذ زياد معكم حق ما في أحلى من قولة أخي وأختي وما في أحلى من العيلة الكبيرة وقت بتلتم إن كان عالفرح أو الحزن .. بس مثل ما اتفضلت سناء (زمن أول اتحول ) وصار تكوين عيلة كبيرة من الأمور الصعبة بها الزمن الصعب ...
شكرا" على مروركم واَرائكم جميعا"
__________________
الرب راعي فلا يعوزني شيء.. في مراع خصيبة يربضني ومياه الراحة يوردني..
  #10  
قديم 26th January 2006, 11:05 PM
الصورة الرمزية angel
angel angel غير متواجد حالياً
عضو مخضرم
 
تاريخ التسجيل: May 2004
المشاركات: 685
الجنس: انثى
angel is on a distinguished road
بالمناسبة فينا نضيف طرح جديد ومن صلب الموضوع ... وهو فرق العمر المثالي بين الأبناء ... يعني يا ترى هل الأنسب إنو تكون الأعمار قريبة من بعض صحيح الأهل بيتعبوا شوي زيادة .. بس الولاد بتربى مع بعض وبتتسلى مع بعض وبيخلص تعبهم بفترة أقصر ... أو يكون في مسافة مليحة بيناتهم بحيث كل طفل ياخذ حقه من الاهتمام بس على حساب راحة الأم ووقتها ؟؟
__________________
الرب راعي فلا يعوزني شيء.. في مراع خصيبة يربضني ومياه الراحة يوردني..
  #11  
قديم 28th January 2006, 11:51 AM
الصورة الرمزية سناء جلحوم
سناء جلحوم سناء جلحوم غير متواجد حالياً
مشرف عام
 
تاريخ التسجيل: May 2003
الدولة: بيروت
المشاركات: 2,980
الجنس: انثى
سناء جلحوم will become famous soon enough
ومنكم نستفيد

شكراً أنجيل للمتابعة .

يلعب بتحديد الفرق بين عمر الأولاد عدة أسباب :

_ الحالة الإجتماعية
_ الرغبة عند الزوج والزوجة في تربية الأولاد بوقت واحد
_ وعندما تكون المرأة عاملة أم لا
_ وأخيراً فرق عمر الزواج

ومن البند الأخير أستطيع عرض تجربتي بالزواج وترك فترة طويلة بين ولد و ولد .

تزوجت بعمر 20 سنة يعني بعد انتهائي وتخرجي من المعهد المتوسط الهندسي بجامعة دمشق مباشرة (( علي وعلي ))
رزقت بطفلتي الأولى بعد عام من زواجي وحينها كنت أماً لأربعة أولاد من غير أم ولا أب هم أخوة زوجي ..
كان العدد 5 بالنسبة لي ليس بالعدد القليل فالجميع أصغر مني سناً وجميعهم بحاجة لرعاية وكون عمري الزواجي يسمح لي بالتأخير بإنجاب طفل آخر تأخرت 6 أعوام ..وبعد 6 آخرين أتيت بطفلي الثالث إذاً الزواج المبكر هو سبب أساسي في جعل الفترة تطول بين ولد وآخر
مع التنويه أن فرق العمر بين الأولاد أمر مريح في بدايته إنما هو صعب جداً في النهاية وأترك الرأي لأصحاب الشأن الآن أو مستقبلاً في تحديد مسير حياتهم وحياة أبنائهم .


مرة أخيرة شكراً أنجيل وخير ماعم تعملي وإنشالله نفرحلك ببنوتة حلوة .أهم شي تكون متل وسام ...أوكنان ...أو أندروا ....وإذا متلك .....ياسسسلالالالام ياسلام

زهرة الصحراء
__________________
كل مجدي أني حاولت....sanaa jalhoum
  #12  
قديم 29th January 2006, 08:29 PM
الصورة الرمزية angel
angel angel غير متواجد حالياً
عضو مخضرم
 
تاريخ التسجيل: May 2004
المشاركات: 685
الجنس: انثى
angel is on a distinguished road
تسلمي يا سناء كلنا من بعدك .. وشكرا" على نقل تجربتك الخاصة ..
الحقيقة أنا كنت نظريا"أؤيد فرق 3 سنوات بين الأبناء بحيث يكون الولد السابق أخذ حقه وبكون قرب يدخل الحضانة يعني أسهل للأم أو ليلي عم تساعد الأم العاملة بتربية أبنائها ( جدة الطفل أوعمته أو أو ..) وطبيا" بكون جسم الأم جدد طاقاته لتنمية الجنين الجديد .. وفارق 3 سنوات بكون تفكير الأولاد لسه قريب من بعضه ....بس مو دائما" الظروف بتسمحلنا نتصرف حسب قناعاتنا .. يعني ببلد مثل كندا الأولاد بشكلوا عائق كبير أمام الأهل فممنوع مثلا" تواجد ولد قبل عمر 12 سنة في البيت لوحده والمدارس ينتهي دوامها الساعة 3 بعد الظهر بينما الموظف لايعود إلى بيته قبل الساعة 5 بأحسن الأحوال أي في ساعتين يعتبروا مشكلة وطبعا" لازم حدا من الأهل يقوم بتسليم الولد لباص المدرسة واستلامه منه ..طبعا" في حضانات خاصة بتستقبل الأطفال بعمر شهور وبتخليه كل اليوم بس تكاليفها كثير عالية .. وإذا الأم عم تشتغل بتاخذ تقريبا" نصف راتب الأم ... فبها الحالة إما الأهل بتقتنع بولد واحد أو بتضطر تقلص الفرق بين الأولاد حتى تختصر فترة التزام الأم بالبيت ... وفي كثير عائلات الأم بتنتظر حتى يدخل أصغر الأبناء المدرسة حتى تقدر تتحرك وتمارس دورها خارج البيت ...
__________________
الرب راعي فلا يعوزني شيء.. في مراع خصيبة يربضني ومياه الراحة يوردني..
 

أدوات الموضوع
انواع عرض الموضوع تقييم هذا الموضوع
تقييم هذا الموضوع:

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


Sponsored Links

جميع الأوقات بتوقيت GMT +3. الساعة الآن 09:24 PM.


Powered by vBulletin V3.6.2. Copyright ©2000 - 2020
تصميم الموقع وسام عبد العزيز جميع الحقوق محفوظة, Copyright ©2001 - 2020
المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص