حلقات زجل عالـ otv

[ziad sattah]

هذه دعوة منّي و نصيحة لحضور برنامج تلفزيوني أسبوعي على قناةالـ otv اللبنانية . و هو بعنوان : أوف .
تقضون خلاله سهرة زجلية لساعة واحدة .و ذلك مساء الجمعة ليلة السبت الساعة التاسعة و النصف من كل أسبوع . و تعاد الحلقة في يوم السبت الساعة الثانية ظهرا ً ( بتوقيت سوريا و لبنان ) .
ليس هذا الخبر دعاية للبرنامج و لكنّ ما لفت نظري و أحببت ُ أن أطلعكم عليه هو مشاركة شعراء من منتدانا من موقعنا : موقع زيدل في ذلك البرنامج فلقد كان صديقنا العضو معنا في المنتدى الشاعر الجميل ابراهيم ياسين مشاركا ً في الحلقة السابقة . و كذلك في الحلقة التي قبلها كان مشاركا ً أخونا و شادينا في المنتدى : الشاعر شادي موسى . هذا بالاضافة إلى شعراء عرفناهم في موقع مشتاوي و مواقع ثانية كالشاعرين المبدعيين عمر تنن و شفيق الديب . و انا للأسف لم أتابع الحلقات الاولى لأعرف باقي الأسماء .
لجنة التحكيم تضم إلى جانب الدكتورة كلوديا أبي نادر و الشاعر القدير و أستاذ الزجل الشاعر الاستاذ موسى زغيب و يشاركهما ضيف ثالث يتغيّر في كل حلقة , و يكون عادة ً من أساتذة الزجل اللبناني .
تبدأ الحلقة بقصيدة للشاعر موسى زغيب ثم ينطلق التحدّي بين شاعرين على لون القرّادي أولا ً ثم المعنّى و أخيرا ً موشّح . ثم يختم الشاعرموسى زغيب في كل حلقة بقصيدة أجمل من القصيدة التي قبلها. .
و كم كانت جميلة تقليعة موسى زغيب عندما قال :

وعـَّيـْت الطير الغافي بـ ْ عبّك بكـّير ... لـْقيتو مرتاح وْ دافي ما بدّو يـْطير .

(( حزّورة : ما المقصود بالطير !؟! لا تجاوبوا ))
و كذلك خاتمة للشاعر عمر تنن :

لـمّـا تَوبِك قصـّرتي قـدّام الـكـِل ... قالولـِكْ ما قصّرتي عا هالتّقصير

.................................................. ................
و إنّ حلقة جميلة تنتظرنا الأسبوع القادم فهي ستكون بين شاعرين : أحدهما من سوريا و الآخر من لبنان .
و تا نشوف على قولة الشاعر موسى زْغَيب :

مين الليلة بدّو يْفوز ........ السوري يمّا اللبناني !!

شكرا ً ..

[ثناء حيدر]

شكراً أستاذ زياد عا هالخبرية
بس يا خسارة ما بتطلع عنا ببراغ محطة otv
زعلتني بقدر ما فرحتني

بيستاهلوا الشباب كل خير

محبتي

ثناء

[samar dahi]

شكرا استاذ زياد على هالخبر الحلو ..
الحقيقة احلى من مسابقات الزجل ما في وخصوصا بوجود زجال عريق مثل الشاعر الكبير موسى زغيب ..وانا بكل صدق بيكبر قلبي لما بشوف جيل الشباب عم يهتم بالزجل بهالشكل لأنو هو تراثنا اللبناني السوري اللي منتميز فيه وانشالله بتضل الأصالة بحياتنا دايما .
اكيد يا استاذ زياد رح نكون من المتابعين للبرنامج ..ورح نشوف مين بيفوز لبنان ولا سوريا...
بالتوفيق لكل شعرائنا الشباب
سمر

[ziad sattah]

شكرا ً أيتها الأخوات على تعليقكن الجميل على الخبر .
أخت سمر : كما جاء في عبارتك ( تراثنا اللبناني السوري ) و لكن و من باب التصحيح : تراثنا السوري اللبناني .. لأن الزجل انطلق من سوريا أولا ً باتّجاه لبنان . و لكن برأيي إن ّ اللهجة اللبنانية تناسب تماما ً هذا اللون من الشعر .

أخت ثناء : يمكنك متابعة الحلقات من خلال موقع القناة على الانترنيت : www.otv.com.lb

[ziad sattah]

كان طرفي الحوار هذه الحلقة شاعرين كبيرين بكل معنى الكلمة .

الشاعر حسان بسطاطي & الشاعر مازن غنّام

ونظرا ً لإعجابي الشديد بشاعرية صديقنا الشاعر حسان بسطاطي فقد قمت استثنائيا ً لهذه المرّة فقط بكتابة كامل الحلقة و أهديكم أياها :

بدأت السهرة بشروقية للشاعر موسى زغيب :

في طيور حرّة و مـ َإلها حَظّ بالألحان ... معكون رب اللخلقها لسان عاطيها

و في طيور لو بالقفص كانت ورى القضبان ... بيضَل يوعى الصّباح عـْلى أغانيها

و هَيك البِغَنّو بِجو مع دورة الازمان ... مثل النهورة الـ عم تجدوِل سواقيها

و إلها النهورة رأي تهدر بهالوديان ... لاكن ماإلها رأي تغيّر مجاريها

بنتعَب تَفَنّ الزّجل يبقى مثل ما كان ... حيث الضياع الخِلِق تُراثنها فيها

معنا تعمّر ليالي بسوريا و لبنان ... تبقى ليالي الزّجل أجمل لياليها

-----------

حسان بسطاطي :

لبنان أوّل ما تصوّرتو ... بالأرجوان بـْ صور صوّرتو

شو لـِبـْسِتْ خْدودي ورد أحمر ...مِن غيرة عْيوني اللي صَوّرتو

دمّ الـْ مِن عروقي نَبت أخضر ... لمّا أرز لبنان زوّرتو

قلبي بِقي: سوري على الدّفتر... لا رخّصت فيه وْ لـ َ زوّرتو

مِن كثر ما بحبّك أنا اكثر... وْ مِن فَيض إحساسي اللي فَوّرتو

شعّلت تحت الليل هالمنبر ... و العتم قهوة بـْهال فوّرتو

عامود خمر بْعلبك اتْكَسّر ... فـْتَحتو عـ كلّ النّاس دوّرتو

عـْمِلت القمر سَدّه تَيِتْسَكّر ... وْ عا دورة العامود دوّرتو

والموج عا شطّك رح بـ ْ يِحضَر... كلما بـ ْ مجد فينيق سوّرتو

هالموج لـ َ تـْأنْسَن و لا تْحَضَّر ... لولا مـ َ حضّرتو وْ مـَ طوّرتو

هيدا الحلو لبنان شو بْيِكْبَر ... كلما جنينة زهر حوّرتو

بـْيِستقبلك بالفل و العنبر ... مِن شاشة عْيونو بِمَسّينا

وْ عالـ ْ otv بيقول نوّرتو

------------------------

اسألي حالِك عليّي يا مرايي ... كلما ترابِك استَلهَم سَمايي

عم تتطَلّعي فيّي كأنو ... مـَ بتشوفي الدّني حلوه بلايي

أنا شاعر بَعِد مثلي مـَ ثَنّو ... مَزَجْت المُنتهى باللا نهايي

المدى لا بَعرفو وْ لا اسمعت عَنو ... لأنّي مـ َ اعتَدِت طلِّع وَرايي

كلما قـْصايدي للشعر حَنّو ... وْ ما عندي حبر يشربني كـْفايي

البحر كلّو دْوايه عـْمِلت منّو ... تـَ نهر النّيل غِطّو بالدَوايي

أنا اللي بْيِشْرَبو بالعيد دَنّو ...وْ لأنّو بنكهتو طعمة دَفايي

وْ إذا بالشّعر عا شِعري تَجَنّو ... يا ما استَشهدو قْصايد سوايي

بكرى بعد منّي لو تمنّو ... يلاقو عبقريه بـْمستوايي

لا يِتْعَذّبو زْياده لأنّو ... جـْمَعِت كلشي زَرَعْ الله مواهب

عِنِد ْ ما كِنت صَوب الأرض جايي

-------------------------------

مازن غنّام :

ما اروَعَك بالسّهل يافلاّح ... زهورَك مراكب و النحل سوّاح

ترابك عم يقلّك بعد اسهر ... حجارك عم تقلّك بِكَفّي, ارتاح

لا تخاف يا فلاّحناالاسمر ...سهلك الجّنّه وْ معوَلَك مفتاح

وْ كلما صَخَن صفصافَك الأصفر... بتعمل المنجل شفرة الجّراح

وْ منشان تسقي سهلك الأخضر ... بالليل بيضَوّيلَك الملاّح

وْ لو غاب مصباح السّما الأشقر ... بتِقْشَع الوردة الحاملتلَك زِر

زوجه حنونه حامله مصباح

------------------------

شو بقول عن لبنان يا خَيّي ... لبنان شجره عا نبع مَيّي

و كلما الورق يوقَع من الأشجار ...كلما بتنقَصْ روعة الفَيّي

لبنان فيروز وْ نَغَم أوتار .... وْ كـَرّة وَديع: الأووف يوميّي

لبنان كاس و خابيه و خَمّار ...وْ شاعر بشرداتو الخياليّي

لبنان ضحكة فجر للأزهار ... وْنسمة عَمَرجوحه ربيعيّي

و الليل قهوة و القمر بصّار ... وْ عشّاق عم بتذوب لـَيليّي

و ختيار عم يسقي الزّهر بالدّار ... و ختيارتو عالصّاج محنيّي

لبنان حَجّه وْ راهبه وِ مـْزار ... و شَيخَه عم تْصَلّي بصفى نيّي

لا تسرقو لبنان يا تجّار ... لا تحرقوا لصّوره الحقيقية

نحنا خْلقنا للربيع قمار . اسلام و دروز و مسيحيّي

نحنا بنبقى بهالوطن أحرار ...بدمعة يَتيم بـْنصنَع الأبطال

بنخلق بدمّ الطّفل حُرّيّي

--------------

يـَ منبر أنت يا دمعه عـ َ خدّي ... سريري البحر و الموجه مخدّي

و طفالى الشعر عا الشاطّي بتركع .. تتشرب رغوتي و تربى عـَ يَدّي

أنا رح عيد تأهيلَك تتلمَع ... و تسطَع هالمواهب نار حَدّي

وْ ببكي عا خليل الكان يسمع ... و زمن حمدان مع زين التّصَدّي

ببكي ع ادوار ال كان يسطَع ...و عصر زغلول و زْغيب المندّي

يـ َريتو عصرهن هلـّق بيرجَع ...تـ َ لاقي بصفهن مطرح عـ َ قدّي

رماني صغر عمري بهيك موقع ... و بعتليهيك جيل بـ ْ هيك مدّي

وْ لأنّو خصم من جيلي مـ َ بقسشَع ... أنا مضطَرّ غنّي المرايي

تحتّى يـْليق بـ ِاسمي التحدّي

------------------------

( يتبع )

[ziad sattah]

(( قال الشاعر موسى زغيب و القرّادي ولعاني : ))

**

احتار الواقع و ال بيجُوز .. بين مازن و الحسّاني

مين الليلة بدّو يفوز ..... السوري يمّااللبناني

***

مازن :

يا انصاري يا حـُضّار ... أنتو الميزان العلمي

إنتو بحنجرتي أوتار ... أنتو نهداتي و حلمي

المنبر مذبح للأشعار ... وْ مازن مطران الكلمه

عمّد بدموعو الشُّعّار ... و ضَيَّف روحو قربانه

_______

حسان :

احتار الواقع و ال بيجُوز .. بين مازن و الحسّاني

بدنا الليله الشعريفوز ... لا السوري و لا اللبناني

ثقّف حالَك يا مطران ... وْ فلسِف لاهوت طـْموحَك

و للبدو يسقي القصدان ... قدّم قلبك مش روحك

روح الفنان الدّيّان ... الفيها عمّدت جْروحَك

الله جَدَّدْها بـْ حسان ... و لا بتقبَل شاعر ثاني

______
مازن :

عالدّنيي لمّا طَلّيت ... الشّافوني قالوا اسمالله

بـِ مـْلَفه زْغيره كاغَيت ... حْروف الشّعر الـمِن الله

و عا خدّي دْموعي صبَّيت ...و حنّيتو بـْزيت مـْصَلّى

تا أمسَح عـَ جـْبينَك زَيت ... صلّي بـْ بَرْكة قصداني

_______
حسان:

لـُ مْسَحت جْفوني بعيون ... الشّمس بـْ تِشْقَرّ جْفوني

لـُ مْسَحت عيوني بجْفون ... الزهر بـْ تِخْضَرّ عيوني

وْ لـُ مْسَحْت جْبيني بتكون ... جْبيني يا مازن قوني

عم ترشَح زيت الميرون ...مِن إحساسي وْ وجداني

________________________

أما الشاعر الياس خليل فـ : أووووووووووف :

كان عنّا بالجبل أملاك ... لا حيط لا ناطور لاأسلاك

و كان عنّا بيت عالي القَدر ... علو ّ الكتاف بـْ شقلة المدماك

و كان في شبّاك وِسْع الصّدر ... مشلّع متل تطليعة النّسّاك

و كانت صبيّه تـْشَرّعو للبدر ... و حتّى يموت الحب بالضَّيعة

قَتلو الصّبيه و ْكسّرو الشّباك

----

حُبّك شَغَلني قَدّ شُغْل البال ...و ما عاد فيّي اليوم إترَوّى

بـْغَربِل جْبال الرّمل بالغربال ... مطرح مـَ قنديل القمر ضَوّى

لمّا تغيبي بـْحِسّ بالإهمال ... و بيصير قلبي يـْغار مِن جوّى

وْ معذور عالغيرة انا مازال ... مـ َ القَيت فوق الأرض إلا ّ رجال

و انتي الو حيدة من جنس حوّه

------

مطرَح مـَ بَدِّك رفرفي وْ روحي ... آخِر حدود جْوانحِك روحي

وْ نوحي عليّي بـْلهفة المحبوب ... عَيني سَفينه وْلهفتِك نوحي

مكتوبِك مـْعَبّى قْلوب قْلوب ... لاكِن بٍسِرّ الياس مـَ تْبوحي

مَطرَح مـ َ اسمِك زَيَّن المكتوب ... مـ َ القَيت بِجْيابي قَلَم أحمر

زَيَّحْت تحت الإسم بِجْروحي

----------------------------------

عودة لحسان و مازن \ بين الصخر و الازميل\ :

حسان :

يا حرف مشّط شَعرَك و البس جديد ... و استَقبِل الريشه اللي جايي من بعيد

لو كنت لون بترسمَك لوحة نبيذ... و برواظَك الكاسة مِن قْزاز القصيد

لو كنت همّ بترسمَك آه وْ نَهيد ...مثل الدّفى يـْلَمِّع ثريّات الجليد

لاكِن إذا بتكون صخره جامده .... رح بدّل الريشه بإزميل الحديد

-------------

مازن :

إترُك الرّيشه التّاركه فِيّي أثَر ...رمشي عَزَف عالجّفن تا دَمعي انْهَمَر

الموجه عَشاطي صور مرسومه وَتر ... و بكتاب أليسارريشه مِن القدر

وْ قدموس بالريشه رَسَم حرف و صُوَر .. مِن قبل مـَ الإزميل عـ َ سطورو حَفَر

اتركني بأرض جْبَيل صخره جامده ..... وزَّع حروف الأبجديه عالبشر

------

حسان :

تأنّى يـ َ إزميل المثقّف بالحوار ... تـْحاور صخر جامد عليه الدّهر جار

كان الصّخر أعمى بكهف الإنتظار ... قدموس فتّحلو عيونو عالنّهار

وْ لمّا تزوَّج إيد بتحبّ العَمار ... طلعو وْلادو شي حروف وْ شي حجار

راحوالحروف تـْغَرّبو وْبعدو الحجر ...عايِش عـ َ صيت وْ مَجد إخواتو الكبار

-----

مازن :

عنّا بـْ وطنّا حروف شرقَط نارها ... ما سافَرو, اللي سافَرو زُوّارها

بعلبَك حروف المجد عا أسوارها ... نزلو الطّيور وْ نَقْوَدو آثارها

وْ عمغارة جْعيتا وْ كهف أسرارها ... شو تغرّب الكون بـ حلى مشوارها

شاف المغاره إم, و دموع الصّخور ... أطفال عم يربو بِظِلّ حْجارها

-----

حسان : ( قصيدة الختام )

ضَلَّك يا حَجَر بالفَيّ رابي ... لـ َ تحكي بالشّموخ وْ بالإهابي

كِنِت صخر وْ أنا اللي بـْعرس قانا ... نَحَتَّك جرن يِشْمَخ عالخوابي

لـَوِنَّك مزهريّة بـْمنتدانا ...تَحَوِّشْلـَك زهور مْنِ الرّوابي

وْلـَوِنـَّك صخرة الراعي وَرانا ... تـ َ إعزِفلَك عـ َ منجيرة عَزابي

صِرِت تتفلسف بـْأوّل لـُقانا ... بإسم الأبجديّه و الكتابه

و انا السّهل البقاعي اللي كفانا ... وَهَبتَك بالكَرَم موسم شَبابي

كنت بْعَلبَك وْ عَزمَك تَوانى... و صرت اليوم عايِش عالرّتابي

نـْحَتت عامودَك بـْقبّة سَمانا ... وْتحتّى تْنام مَجَّدت السّحابه

مِن جْعيتا يـَ صخرسْميك عانى ... لمّا شفت بعيونَك كآبه

نـْحَتِت من دمعتك حبّة جُمانى ... تـَصبحي لفّها بـْمشلح ضّبابي

قَدَر يا صخر ما تحكي بـْ قَفانا ... غير النَّحت ما عندي إجابه

أنا بمحبّتي روحي تفانا... مـ َ عندي حْجار تا إشلَح حجارَك

وَلا بالآخره بلبُس ترابي

-----------------

مازن ( القصيدة )

أنا حجار الكريمه و الهدايا ... يِلِبْسوني العرايس و الصّبايا

يـَ ريتَك عِشت لحظاتي السّعيده ... حجر ياقوت عـَ صْدور الحنايا

أنا مخدّة بهالأرض الحميده ... دِفِي الفلاح عَخدودي الندايا

و إذا غدر الشّتي بـْيَعمل مكيده ... على شي بيت اطفالو حفايا

أنا من حجار صوانه فريده ... إذا حكّيتني بدفّي العرايا

أنا جنوبي, انا بـْقانا المجيده ... حجر عا قبر أطفال البرايا

وِ بِفْلسطين عم يصرخ بِإيدي ... حجر عم يقتل وْلاد الخطايا

وْقِفِت داوِم على ارضي العنيده ... وْقَبل ما روح كَفّي عالبقايا

بقلبي شَكّ إزميل الحديدي ... شظيّه طايره بين الشّظايا

وْتَتِسْلَم إنت يا فختة نهيدي ... من لبنان من أرض الابايا

بنهر الكلب عـَ صخورو العديدي ... انجَلو جيوش الأجانب و الخلايا

و لمّا اسألت جاوَبني نشيدي ... غزات الكون مرّو عا وطنّا

وْمـَ قدرو حطّمو صخورو القوايا

___________________________
( يتبع )

[ziad sattah]

أمّاالموشّح فـ : ( موسى زغيب ) :

الجيران الـ منِّك غارو .... عا هالتّلوين

قَطـْعو الحُمْره وْ ما صارو .... مثلِك حلوين

**

فستانِك فيه احتارو ... عقـّال وْ خوت

خبّا الزّنبق و قمارو ... و كـْبوش التّوت

كلماعـْقَلتي زنّارو ... بـْتِدفىبيروت

وكلما فكّيتي زْرارو... بـْيِعْرَق صنّين

____

( الياس خليل ) :

حبيتِك عشرينيّه ... لـْياليكي حُمْر

وْ حبّيتِك خمسينيه ...؟ خبزاتِك سُمر

وحبّيتِك ستّينيه ... بـْستّين العمر

وْ رح حِبّك تسعينيّه ... بـْعمر التّسعين

-----------------

حسان :

فساطينك أصفر أخضر ... أحمر ياقوت

البستي الاحمر و الاصفر ... صفّى ممقوت

قال الأحمر للأصفر .. رح طق وْ موت

شعلِت عالخصر المرمر .. حرب فـْصاطين

-----

مازن :

قالتلي زيح الشّرشَف ... عن جسمي شـْوَي

وْ خلّيلي مَيل مـْكَشَّف ... ميله بالفَي

و لا تترك زهري مقَشَّف ... و تـْزيدو كـَي

نَشّف ْ دمعي وْ ما نَشّفْ ... زهر النَّسرين

----

حسان :

اللون بـْعَين المكحولة ... دَوَّبني وْ داب

و سحرِك خلاّكي تقولي.... صبحان الآب

لـْهـَطّ الشّفّه المعسوله ... بحـْرارة آب

وْ شَتّى فَوق الجَّدّوله ... عَتْم كـْوانين

------

مازن :

بين الأزهار فـْرحتي ... بـْمرجوحة غار

و ْ مثل الزّهرة تـْمَرجَحتي ... وْ فستانِك طار

ميله صنّين وْضَحْتي ... و ْ ميله ازهار

يا رَيت غقدِرْتي اكـْشَحتي ... غيمة تشرين

-----

شروقية زغيبية الخاتمة

يارَيت إنتي و انا نتحَوّل مـْجانين

و نهرب عـَغربه و معي سنتَين خلّيكي

و نسكن بغرفه براديها من اليسمين

و افرش درجها ورد و عـْليه مشّيكي

و بالشَوب هَوّي إلِك بجوانح حْساسين

و بالبرد خلي وهج قلبي يدفّيكي

و كل ماعليكي تْنَقْوَز بلبل الشّربين

إلا بشرشف الغيره ما بغطّيكي

و امرق مَلاك النّعَس عَـ رموش تعبانين

و افرش زنودي لـِكي, عالشّوق غفّيكي

و تنزل عـَ وجهك خصل شعرات مشقَرّين

و إعطَش لثغرك و ما لي قلبوعّيكي

قدّيش خلفي ركض عشّاق و مْحبّين

و رشّو دموع و رسايل عا شبابيكي

تـْرَكتُن لأنّي غـْرِقِت بعيونك الحلوين

و ضيّعْت كلّ الدِّني وْ لـْقيتها فيكي

-------------------

أمّا الحلقة القادمة فـ :

الغنّيّة بـْلـْيالي الكَيف ... موعوده بـ ْ نغمه جـْديده

شكرا ً للمتابعة و الله يعطيني العافية
و كتابة هذه الحلقة مهداة لكل من لم يتسنّى له متابعتها أو سماعها بسبب الاغتراب أو ظروف العمل .

[Ibrahim.Y]

شكرا جزيلا للأخوة الشعراء على المجهود لإخراج البرنامج إلى الضوء و انا اعتذر كتيرا عن غيابي القسري الطويل عن صفحات هذا المنتدى الذي كان كل السعادة بتمثيله في البرنامج

[علي عامر]

روائع خيي زياد

يسلمو ايديك يا بطل

لا تبخل علينا من كنوز الاخوان

بكل الحب والتقدير

[ziad sattah]

الشاعر علي :
هذا أقلّ من واجب تجاه شعراءنا الكرام و خصوصا ً من هم مشتركين في موقعنا : زيدل .
يؤسفني أنني لم أتابع أوّل أربع حلقات من البرنامج لذلك لا أعرف مَن المشاركين فيها.
و لكن ما رأيك بحلقة البارحة للصديق سمير هلال ؟

[ziad sattah]

الـ ْ كانت مِن برّه لـ ْ برّه ... ترميلي شْباك

ما عادِت تمرق مرّه .... وْ تسأل شو باك

----------------------( موسى زغيب )

حلقة جميلة جديدة للشاعرين السوريّين سميرهلال و طعان طجره من منطقة معلولا...

قلوب النّاس العطشانه ... عم تسألني وْ حيرانه

مِين بدّو مِن عين الشّعر ... يردّ الجّرّه مليانه

--------------------------------( موسى )

وْ مين كان ممكن يردّ الجّرّة مليانه غير أخونا و صديقنا الشاعر الذكي ذو الابتسامة المعبّرة الشاعر سمير هلال العضو المميز معنا في منتديات موقع زيدل .. يقول سمير :

بعد مـ َ الـشّــعر ذوّقني قَصيدو ....صرت مدمن على خمرة نبيدو

مـ َ بِروى غير مِن نكهة نزارو ...مـ َ بشبَع غير من طعمة سعيدو

و أيضا ً :

يـ َ كلمة آووف , شو فيكي سَلاسه ... تـ َ زخّة غَيم أفكاري وْ حواسي

على تمّي شفافي بـ ْ يـرقصولـِك ... قبل ما يرقصو عـا تـمّ كاســــي

------------------------------------------------

أمّا لشاعرَي الحلقة القادمة فـ ْ

قـَبّّّّّّّّـو جْوانِحكُن تَنْشوف ...... مين الأكثر بيعَلـّي