منتديات زيدل

منتديات زيدل (http://www.zaidal.com/229/index.php)
-   منتدى المجتمع (http://www.zaidal.com/229/forumdisplay.php?f=16)
-   -   عادات سورية جديدة (http://www.zaidal.com/229/showthread.php?t=2761)

RAMI 1up 6th January 2006 02:43 AM

عادات سورية جديدة
 
عادات سورية جديدة

إذا صار عندنا عرس .... بنزمر

إذا نجحلنا حدا بالبكالوريا ....... بنزمر

قبل ما تفتح الإشارة الضوئية ... بنزمر

بعد ما تفتح الإشارة ......كمان بنزمر

على الدوار وعلى الكوربة على النزلة على الطلعة .... كمان بنزمر

إذا طول علينا الشرطي وهو موقفنا .... مشان نذكره بنزمر

أما إذا حد كسر علينا بالغلط أو بالقصد ..... أكيد بنزمر

أما اللي بتوقف سيارته قدامنا عطلانه ....... مو مشكلتنا بنزمر

إذا طالعين من شارع فرعي لرئيسي بالليل أو بالنهار ......بنزمر

ويا عيني على سيارة الغاز ..... فاضي مليانة بنزمر

وإذا عجبتنا بنت ماشية بالشارع اوووووووووووووووه بنزمررررررر

وإذا شفنا أبو فلان بالشارع وحبينا نقله مرحبا .............. بنزمر

ولو قرر واحد منا يخفف مشان يمرر أحد المشاه .... كل اللي وراه بيزمر

ويا حبيبي إذا فاز أحد المعجبين فيه أو فيها بالسوبر ستار أو ستار أكاديمي......بنطلع كلنا وبنزمر

وطبعا" اذا فاز المنتخب بنطلع ......... بنزمر

لا أظن إنها ظاهرة اليس كذلك ؟!!!!!!

لكن المفارقة هو انه اذا ارتفعت الأسعار كالوقود وإذا ارتفعت الضرائب وإذا زادت رواتب الكبار وبقيت على حالها رواتب الصغار وإذا زاد معدل البطالة مع وفود عماله .. اذا حصل كل هاد أو اكثر

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

العجيب انه فجأة ما بطلعلنا صوت و لا .............. بنزمر

fr george massis 6th January 2006 05:38 AM

زمر
 
مرحبة رامي كثير حبيت سلم عليك وهنيك على هالموضوع
الحقيقة ما بعرف بغير بلدان بس ببلد مثل البرازيل الزمور بيعني مسبة وسخة جدا!!!!!
ونادرا ما تسمع صوته وحتى ما بالغ أنو أغلبية اصحاب السيارات ما بيعرفوا وين الزمور لقلة وندرة الاستعمال................
أما عنا يالطيف شي بيفزع والواحد بيظل ينقز بالشارع لأنو ما بيحس إلا وحدا نقفوا زمور طلع من سويدات راسوا هههههههههههههههههههههههه
كثير عادة سيئة بالفعل وبضم صوتي لصوتك وزموري لزمورك وبنقول يا زمامير العالم اتحدوا
تحت شعار لازمامير بعد اليوم
وكل تزميرة وأنتم بخير...............................
والله معك..................................:pray:

hosam abdulaziz 6th January 2006 03:55 PM

فعلا حلوة هالللفتة عن علاقة الشعوب المتخلفة مع الزمور
مس ما سمعت بالمثل عن فلان مطبل بالدني و مزمر بالآخرة
و هيدا حال الشعب السوري و بده شي يفش خلقه في لأنه ما طالع بايده يعمل شي حتى الحكي محرمينه عليه.
يعني ابونا المعنى واحد بكل البلدان و عنا كمان بتعني المسبة , بس كون الواحد ما بيسترجي يسب الحكومة , بيستعيض عنها بالزمور ليحقق هدفه و هو المسبة (استعارة فرضية هيك يمكن علمونا بالعربي )
اذا الزمور احدى وسائل التنفيس عنده , و حكلي تحكلك و زمرلي تزمرلككككككك , يعني سبلي تسبلك و لنفش خلقنا ببعض .

a_aroush 6th January 2006 08:09 PM

بدي رحّب برامي معنا أول شيء , و تعا زمّر معنا هون , بس في شغلة بدك تنتبه الها أن التزمير اللي عم تدور عليه ممكن تلاقي منو هون , و لكن كمان انتبه لشغلة , أن كمان التزمير اللي بدك اياه رح يطلع عالفاضي لأن لمين بدك تزمّر لتزمّر , و لو بدنا نزمّر كل ما زاد سعر الوقود و كل زادت البطالة و كل ما شفنا شغلة غلط عم تصيب مجتمعني بكفلك أنك تضل مزمّر , بس للأسف ما رح حدا يسمعلك , و حتى لو سمعوك بدك تخاف على حالك ممكن يزمرولك .

و في معنى لزمّر منتعاملو نحنا بين بعضنا بالعامية , لما منقول لواحد زمّر يعني انقلع .

فإذا زمرت استياء عالوضع ما رح تفرق معهن لأن مبدأهن هو ( هذا الموجود و إذا مو عاجبك زمّر على غير بلد ).

أما عن تزمير السيارات في سورية , فهي بالفعل شغلة ما بتنطاق , صرلي 18 سنة بأمريكا ما سمعت زمامير أد اللي سمعتهن بنزلة وحدة عالسوق بحمص , و ما فيك تليمهن أحياناً , يعني كثير أحيان بصادف كلب أو قطّة بالشارع بتلاقيهن عم يتطلعو إذا الشارع فاضي قبل ما يقطعوه , عنا العالم بتطحش و بتقطع الشارع و لا كأن فيه سيارات , و هذول مثل طرش الغنم بيقطع الشارع هيك بلا فهم منوب , و في سيارات و شوفيرية عني ما بيعرفو شو هي قوانين السير و حتى لو بيعرفوه ما بيهمهن هالموضوع كثير .

فلمين بدك تزمر لتزمر لأوضاع البلد ولا للعالم ولا للسيارات , فإذا هيك بدك لازم معناتو تعيش بسورية شاعط زمورك عالآخر و ماشي 24 ساعة باليوم .

Mounir2006 7th January 2006 01:09 PM

حلوه هاللفته منك .......انا بعطيك 9 زمامير من عشرة عليها

برافو ...وزمر الى الامام:smilyyy:

RAMI 1up 7th January 2006 05:24 PM

شكرا للأكم على هالردود اللطيفة

اقتباس:

الحقيقة ما بعرف بغير بلدان بس ببلد مثل البرازيل الزمور بيعني مسبة وسخة جدا!!!!!
ونادرا ما تسمع صوته وحتى ما بالغ أنو أغلبية اصحاب السيارات ما بيعرفوا وين الزمور لقلة وندرة الاستعمال
الموضة الدارجة حاليا هي تركيب عدة زمامير حسب الحاجة فمن عنانة الشرطة إلى زمور الهوا يلي بتستعملو الشاحنات إلى الزمور الزغير تبع جوات البلد .. يعني تعددية بالزمامير

اقتباس:

ما سمعت بالمثل عن فلان مطبل بالدني و مزمر بالآخرة
و الله سمعت فيو .. بس المشكلة أنو نحن السوريين مزمرين بالدنيي فشو بدنا نساوي بالآخرة ؟

a_aroush : شكرا لألك على الترحيب و بتمنى كون معكم على طول و نزمر سوا

Mounir2006 : و على قبال الزمامير العالية http://www.zaidal.com/229/images/smilies/smilee.gif

Nada1981 8th January 2006 05:54 AM

مرحبا جميعا و انا كمان بدي رحب برامي معنا اهلا و سهلا فيك و انشاءالله بتقضي وقت حلو و مفيد معنا

في شغلة مافهمتها من الردود كلها:

انتم جميعا زعلانين من الزمامير بسوريا؟؟؟؟؟

انا زرت سوريا بعد غياب 9 سنيين تقريبا و اكتر شي عجبني من اول ما كنا بطريق دمشق- حمص هو الزمامير :D


عنا بهولندا كمان ممنووووع الزمامير لأي سبب ( الا لمى بيلعب الفريق تبعنا و بيربح (: ) و صحيح الشغلة هي بتعطي هدوء بلبلد كلها بس كمان الواحد مرات بيحتاج انه يستخدم الزمور, بس وقتها اذا انا استخدمته بيكون الحق عليي و انا باخدها مخالفة.

لهيك لازم العرب ما يزعلو من الزمامير لانه زمور بليد احسن عشرة على الشجرة :emlaugh:

و بما انه دراستي صارت هلا سياحة و سفر رح اعتبر الزمور هدا تراث و من العادات العربية و رح اعملها دعاااااااااية بهولندا :D

تحياتي

ندووووووووش :car: :angel:

George daboul 8th January 2006 10:24 AM

لا تخلطو عباس بدباس
 
تحية للجميع
عادات سورية ؟؟؟ وبدأ الجميع بالتزمير ؟؟؟؟؟ وهذا ما ذكرني بحدث أثناء الاحتفالات بأعياد الميلاد ورأس السنة والعادة عندنا هو أنه يقام كرنفال برعاية التعليم الديني وتشارك به عامة الناس وبشكل شبه منظم ؟؟ وأثناء التحضير رأيت أحد معارفي وهو يقوم بتزيين سيارته وعندما سألته مستغربا ؟ شايفك عم تشنشل السيارة : فأجابني ولك ورح زمر كمان إذا جن ربعك عقلك مابينفعك
***************************
الكل يزمر
وقبل أن أقوم بالضغط على الزمور أحب أن أشير إلى أنه عندنا في سورية عادات اجتماعية رائعة تتميز بالمشاركة الحقيقة وتتسم بالكرم والمحبة وحسن الضيافة والاستقبال والتضامن عند المحن وخصوصا في الريف
ولكن صدى الزمور يزداد عندما لايكون أمامك خيار فالأوامر صدرت بأن تضغط على الزمور
(( وبتكون رجال إذا ما بتزمر )) بتزمروا ولا مابتزمروا ؟؟ يابتزمر يا إما بزمرولك
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وعذر إن أخطأت
‏الاحد‏، 08‏ كانون الثاني‏، 2006

عبدالوهاب عاصي 8th January 2006 11:36 AM

بيـــــــــــــــــــــــــب
هاد زمور الترحيب
لسه ما شفت زمور التعليق

















وي وي وي وي وي وي وي وي وي وي وي وي وي


شو رأيك بهالزمور أخ رامي


جميع الأوقات بتوقيت GMT +3. الساعة الآن 09:47 PM.

Powered by vBulletin V3.6.2. Copyright ©2000 - 2022
تصميم الموقع وسام عبد العزيز جميع الحقوق محفوظة, Copyright ©2001 - 2022

المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص