منتديات زيدل

منتديات زيدل (http://www.zaidal.com/229/index.php)
-   الشعر العامّي والزجل (http://www.zaidal.com/229/forumdisplay.php?f=50)
-   -   عقل و جنون (http://www.zaidal.com/229/showthread.php?t=17633)

سيمون برصون 26th March 2014 07:02 AM

عقل و جنون
 
يقول الدكتور ماجد
ولخيي سيمون بقلّو :
خليّك عاقل يا سيمون وزيحْ====ما دام غِصنَكْ تَوْ بِلِشْ تفتيحْ
و بليزْ لَ تصرِّخ يا خيي كتيرْ===عا صرختَك بفزَع تْصحّي الريحْ
وجنونها يعبّي المدى تجريحْ

================






يا مْجَرْوَحِ بْنسمة هوى قلّي ... شو جَنّن النسمات تِسْلَملي
مِن يومها بْتسري على ميزان ... بين الدفى و البرد متدلّي
و مْزيبقة بالضغط عالميلّي

:rose2:





لي الشرف بهالحوار.... تفضّل دكتور

ماجد سطّاح 26th March 2014 09:11 AM

سيمون نتفهْ بعقلَك تحلَّى ................بهالمنتدى وعنّو مَ تتخلّى

كرمال تا تفهم يَ خَيي منيحْ ......كيف دَوْزن وتارو جْنون الريحْ ؟؟


رحْ بنصَحك روح إسألو لْألله
============================

angel 26th March 2014 03:58 PM

للأسف أن الشعر الموزون ليس من اختصاصي وليس لدي موهبة فيه ولكن سيمون أنا أشجعك حتى النهاية علنا نعيد الدكتور إلى طريق العقل (ولو أني أشك أن أحدا سار في طريق الجنون ورجع ) وسأتابع النقاش في الصفحات الأخرى :gthumb:

سناء جلحوم 26th March 2014 05:12 PM

الله معكم
 
انا كمان الله حرمني هالموهبة
بس الحمدلله أنعم علي بنعمة التمتع بكل القراءات الأدبية وخصوصآ الشعرية والنثرية

دكتور ماجد سيمون الله يكون معكم ونحنا أكيد معكم مبسوطين والكم من الشاكرين

:rose2::rose2::rose2:

سيمون برصون 26th March 2014 10:32 PM




الدوزان بيشدّو عَقِل مو جْنون ... بْفَنّ و حِساب و فيزيا موزون

بيرَخِّم ب Alto حكايا زْغار .... و يحتد Soprano لْ قَلِب بالنار

و بال Base بيزلزل حكيم عيون

:rose2:



ماجد سطّاح 27th March 2014 01:49 AM




لمّا الهوى بيهِبْ لا تبقى تْغِبْ ........ولِبْ الكلام اسماعْ وبهالقِشر كِبْ

بجنون بعشق رمشْ محبوبي أنا ...... قلّي بْعَقْلَك كيف عَمْ تقدر تْحِبْ ؟
=======================================


=دكتورة أنجل ...كأنّك أعلنتِ الهجوم من الجبهة الشمالية مع عملاء أمريكا ؟؟ ...
لكن اتحمّلوا الخسائر ..:D
=سناء موقفك عقلاني مو عاجبني بنوب ..:popcorn:


angel 27th March 2014 02:10 AM

هههههههههههه حكيم الخسائر معك ربح.......يعني ربحانة على كل الحالات :gthumb:

سيمون برصون 27th March 2014 04:39 AM



عِشق الجسد مجنون بشهدلك أنا ...نيران شهوة صالية ليوم الفنى

بتسعَر بلا بَقوه الملل منها الجنى .... و بتحرق بيوت الفضيلة بالزنى

لكن حبيب الروح و شريك المُنى .... عرشو كِبِر بالقلب ,بالعِشره نبنى

و كلما شهوة جنون هَبّت بالهوى .... بتذري عليك العقلنة و ذِكرى الهنى


:rose2:






ماجد سطّاح 27th March 2014 12:50 PM

بالشعر كِلما جَنْ حبري عَ الورقْ..............ما فيك تفهم بالحلا سرّ الغَرقْ

وما دام يا سيمون هالباب انطرق .............وبنار مجنونة عَ بَالَك تِنْحَرَق

عقلَك على هموم الدني كِلما مَرَقْ...........وحَسِّيتْ زَهر العَافية فيك انسَرق

لوما الجنون يخلّصَك مِلْ العَقلَنةْ ...........ما كِنت يا سيمونْ بتحِب العَرقْ

=====================================

سيمون برصون 27th March 2014 09:10 PM

لو كان روح الكَرم لَجنونَك شَهيد ... ما قَدّسو الفادي لَدَمّاتو مَديد

وْ لَمّا بقانا قال للخَمرة تِزيد .... مِش للسَكَرْ تَتسَبِّح الرب المَجيد

مَ الروح لو غِرقت بِفِكر مْن الجَليد ... نيران مِن روحو الكَرِم بيمِد إيد

لَكنّو يلي بْيغرق بْشَحطة حِبِر .... صَعبة عليه يقَطِّع بْقَطرة نَبيد


:rose2:




على راسي انت حكيم ...بس للضرورة الشعرية

ماجد سطّاح 28th March 2014 07:41 PM

أنا يا شِعر كلما بْدِيتْ غَنّي........وهموم القلب جيتْ حْمَلِت عَنّي

بِعَبقَر كِلّْ مَ بقَطِّف ورودي..........عَ كِل وردة بيجِنّ جْنون جِنّي

عقل حوّا وعقل حَيّة حَسودة...........اللي غَرّق آدم ببحر التَمنِّى

وخلَّى المعرفة من دَهْر تُودي............بحياتو للشقا من بَعد جَنّة


العَقل شو قيمتو بساعة شرودي ؟...بشَعِرْ مجنون جَنَّن شَال بِنّي

وشو نفع العقل بالحلوة الودوده........وعطر مجنون فاح بشِعِرْ مِنّي

فيا سيمون بَس تقرى رْدودي..........قبل مَ تبتدي عْليي التجني

بضميرك كون شاهد من شْهودي...الجنون فنون وانتَ شِفِت فَنِّي

وإذا الإبداع مَ بيوصَل حْدودي.......بعقل فنّان ما بيكون أبْدَعْ

ولَا بِ خيبتَك فينا نْهَنِّي
==============================

:rose2::rose2::rose2:
وشكراً لأخي سيمون ولكل من تابعنا .

سيمون برصون 29th March 2014 06:54 AM

حدودك بانِت و وِضحت حدودَك ... نَشَرها الخوف و الشَّح بْردودَك

بْخلا لِ جنون عَم تُنصُب إمارة .... و فُقاعة سَلطنة قلعة صمودَك

و على العقلات جاي تْشِنّ غارة .... صَفير الريح و الخَمرة جنودَك

بِرَدّ و نصّ شدّولك إزارة ... مِنِ جْنون ل نَشدّتو في نُشودَك

وْ لِكَونو العقل أقوى مْنِ الجسارة ... و مُرونة فِكر أرحَم مِن جُحودَك

نشيدي فاض مِن عَقلي منارة ... عَسى يهديك من وَهلة شُرودك

و لأن بْيلبَقك ثوب الوزارة ... و أمانة لْعِلم حَصّلتو بجهودَك

إذا أنجيل توميلي بإشارة ....ع دار المعرفة بِسمَح تترجع

وعَ حَدّي بالصدر تِثبِت وجودَك.


:rose2:



شكرا للدكتور ماجد على عطائو الكريم و انشاالله مرة جايه بيطوّل بالو علينا أكثر شوي

و شكراً لكل المتابعين
:rose2:


جميع الأوقات بتوقيت GMT +3. الساعة الآن 05:04 PM.

Powered by vBulletin V3.6.2. Copyright ©2000 - 2020
تصميم الموقع وسام عبد العزيز جميع الحقوق محفوظة, Copyright ©2001 - 2020

المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص