منتديات زيدل

منتديات زيدل (http://www.zaidal.com/229/index.php)
-   منتدى المجتمع (http://www.zaidal.com/229/forumdisplay.php?f=16)
-   -   مضحك؟؟؟؟؟؟؟؟؟؟ لأ : مبكي (http://www.zaidal.com/229/showthread.php?t=3125)

fadisa 4th March 2006 02:13 AM

مضحك؟؟؟؟؟؟؟؟؟؟ لأ : مبكي
 
مضحك ؟؟؟؟؟؟؟؟؟؟ لأ : مبكي
حبيت خصص هالزاوية لأكتب فيها أنا وكل شخص بيحب يشاركني بأي فكرة أو موقف بتلامس الواقع اللي عم نعيشو .
والكلام يلي رح أكتبو ما فيه أي صفة شخصية ضد أي شخص بس هوي من حرقة قلبي ورح بللش بها الموضوع يلي بيعاني منو كثير من سكان زيدل وانشالله يلتقالو حل ع دور ولادنا أو أحفادنا وهوي بعنوان ع هدير البوسطة .:car:
أي موظف مثلي بيظطر كل يوم لأنو يركب ميكرو زيدل مرتين ع الأقل باليوم يعني مرة الصبح الساعة 7.30 ومرة الساعة 3.30 الظهر ، بس شوفو شو بيعاني راكب ميكرو زيدل :
- أول شي الشباب بيظطروا ع طول يطلعو ع الواقف ( طبعا من باب الأدب و الاحترام للستات ) و المحظوظ بيطلع ع القاعد من الساحة لمعمل العرق أو بيشتغل معاون للشوفير وبيقعد ع غطا الموتور .لأنو ميكرو الصبح ع طول للشفة مليان و مثل ما بيقولو بيضل ناقصنا شوية زيت و قرن فليفلة وبنحصل ع علبة سردين .
- بمكرو زيدل بالشتي لازملك شمسية لأنو ما شالله ع هالمكريات ( الشب فيهن عمرو شي خمسين سنة ) وما بتعرف من وين عم يدلف السقف . وبالصيف بعد كل مشوار لازملك حمام لأنو بتتعبا من الطراب والغبرا .
- مكرو زيدل بيشتغل ع الخلايا الشمسية يعني بالشتا بيوقفوا المكريات الساعة 5 المسا وبالصيف ( ع أساس يعني بيتاخرو) – بيضلو لشي الساعة 7 .
- ميكرو زيدل أدامه الله لنا ( لأنو كتير أيام ما بيجي ) بياكل معو المشوار من الكراج للكراج شي 40 دقيقة والساكن بزيدل لازم يضيف عليهن شي 10 دقايق لحت يشرف جنابو ، ويوم الجمعة وبالأعياد فيكن تضيفوا نص ساعة وانتو مرتاحين .
- عفواً الفقرة السابقة كان لازم نضيفها لميزات ميكرو زيدل لأنو شخص مثلي مابيشوف أهلو كل النهار ( من الوظيفة ع الشغل بعد الظهر ) ممكن يقعدلو شوي هوي و أختو ويتناقشو بأمور البيت وأخبار العيلة وبياخدلو غفوة والميكرو ما وصل – أو منشوف الطلاب خلصت مادة كاملة بالميكرو .
- ما بدنا ننسا انو اللي زاد الطين بلة قرار توقيف باص النقل الداخلي يلي كان يمر كل ساعة مرة بس ع القليلة كان يتأخر للساعة 9 المسا .
وهون بيجيك واحد متفضي بيقلك : يا أخي اشتريلك سيارة . وكأنو أنا عم حول مصرياتي ع بنوك سويسرا وماني عرفان وين بدي روح بالمصاري .
هاي كانت شوي من المعاناة اليومية يلي لسا ما التقالها حل عنا وانشالله بيلتقا شي حدا من أصحاب القرار ليقرا ويسمع المكتوب .:close_ears:
وبترك الساحة لردكن أو ليلي بيحب يكتبلو شي مفارقة ودمتم .
فادي س . :pullhair:

a_aroush 4th March 2006 12:58 PM

أول شيء بحب سلم عليك ( فادي عيسى ) هيك فهمت اسمك .

لما قريت الموضوع لقيتني فعلاً شوي بتضحك و شوي يمكن بدك تبكي على هالقصّة .

عندي شوية أسئلة الك و اللي هي :

مين المسؤول عن توقيف عمل باص النقل الداخلي على الضيعة , و ما هو سبب هذا التوقيف ؟.

من هو المسؤول في القرية عن طرح هذا الطلب للمحافظة أو دائرة النقل المسؤولية في المدينة , و هل تقدّم بهذا الطلب؟.

هل قام أهل القرية بتقديم عارضة أسماء للمتضررين بشكوى رسميّة للجهات المسؤولة عن هذا التوقيف ؟. و ماذا كان ردّهم . و هل يمكن لتقديم شكوى من هذا النوع أن تحصل على نتيجة .

إذا كانت كل الخطوات الممكنة للمعارضة على توقيف الباص قد اتخذت , فهل رفعها أحد لجهات مسؤولة أعلى ؟.

مرافق كثيرة في القرية تشكو من التقصير , البلدية و الجمعية الفلاحية و المدارس ..الخ , فهل هو اهمال من المحافظة و البلديات , أم تقصير المسؤولين عنها في القرية ؟.

أظن أنه حان الوقت لأهل القرية أن يطالبو بحقوقهم , و ملاحقة المقصرين , و السعي على إزاحتهم من مناصبهم لو كانو مقصرين ... و إذا كان التقصير خارج عن أيدي هؤلاء , أن يلاحقوا المسؤول في المدينة و يرفعوا شكوى إلى رؤسائه .... المهم ألا نسلّم بالأمر الواقع و هذا عادة ما يحصل .

ziad sattah 5th March 2006 10:30 PM

!!!!!
البارحة ,كنت أحاول الدخول إلى موقع زيدل لعدّة مرات و لكن لا فائدة , فقلت لنفسي : مو مشكلة .. فجلست أتابع إحدى القنوات على الديجيتال و لكن فجأة تعطّل هو الآخر !!! فقلت : مو مشكلة .. و قررت الاتّصال بالصديق الذي قام بتركيب الديجيتال عندي , و بما أن جهاز الهاتف كان ما يزال في مركز الصيانة , فقد قررت الإتصال به بواسطة الموبايل , و لكن كان الجواب : خارج التغطية !!!
فقلت لنفسي : مو مشكلة . سأذهب إليه بواسطة الدراجة النارية ( ما عندي سيارة ) . الدّرّاجة لم تشتغل بسبب إنتهاء خزّان الوقود , فقلت : مو مشكلة , سأستعير ليتر بنزين من عند جاري القصّاب . و هذه المرة كنت موفّقا ً فقد أعطاني جاري ليتر البنزين بعد تسميعة صغيرة عن غلاء البنزين . و انطلقت ُ لمحطّة الوقود و أوقفت الموتور و فتحت غطاء خزّان الوقود ثم ّ نظرت لعامل المحطّة الذي نظر إليّ بابتسامة معبّرة و قال : آسف , مافي بنزين , مو مشكلة تعال بعد كم ساعة بيجوز يكون إجانا الصهريج .
فرجعت للبيت و أنا أقول : يعني إذا وصلت للبيت و وجدت أن موقع زيدل رجع يفتح معي بيكون فعلا ً موووووووووووووووو مشـــــــــــــــــــــــــــــكلة!!!!
قلّي بقا أيها العم فادي: بعدك شايف إنّو في مشكلة ؟؟؟

سناء جلحوم 5th March 2006 11:21 PM

أنا متل زياد يافادي بالنسبة الي ماعندي مشكلة !
أولاً لأن ساكنة ببيروت وآخر همي ميكرو زيدل !!
وحتى لو أجيت لزيدل سيارتي معي ورئيس البلدية معوا سيارتوا ا يعني منطحش على الميكرو ومنغبر عليكن أكتر ومابيهمنا !!!
يافادي ماتزعل من ردي ولامن رد زياد المشكلة أنو هالقضية صارت مطروحة للمرة التالثةعلى صفحات هالمنتدى مرة من شادي ومرة من فايز زكور والتالثة اليوم منك فمشان هيك حق معك والله تعنون موضوعك بالمضحك المبكي .

أما عن عن مين المسؤول .........فبرأي المسؤولين هني المدعومين بالضيعة ...هلق مين المدعومين مابعرف ...بس ببساطة بقول بأنو بكل قرية سورية في فئة مدعومة صح ؟؟ والمفروض وحدها تكون المسؤولة عن تأمين راحة أهل هالضيعة لتأمين النقل الداخلي لأن هيك موضوع مابيمرق بلا دعم واسطة ....ومن ثم هي أقل واجبات المدعومين ؟

وبتبقى نصيحتي لأهالي الضيعة يعملوا متل ماعملوا اللبنانية يرفعوا يافطات معارضة ويطالبوا باستقالة رئيس البلدية أبوسام ..أو يهددوا للإهتمام بها القضية .... لالالا حرااام شو ألوا علاقة رئيس البلدية ......أبو وسام مش مدعوم :crazylol:

دخلكن في شي عضو معنا من البلدية ؟؟؟
:bomb:

زهرة الصحراء

ziad sattah 6th March 2006 12:44 AM

رئيس البلدية هو زوج أختي يا سناء:nonono:

و السيارة ما صارلها عندو غير ثلاثة أيام أو أربعة:pullhair:

و الضيعة ما رح تعرف خيرو حتّى تجرّب غيرو , و ساعتها ...:scared9:

سناء جلحوم 6th March 2006 10:44 AM

شو هالعلقة
 
زوج مين يازياد :amazed:
والله كنت متأكدة بأنو لابد مايكون في حدا معنا بيقرب رئيس البلدية .
ياعمي أعتبر المكتوب ما أنكتب ....:surrender
ولكن لا...لا...مادام في مين يوصل الرسالة لأبو وسام ضروري الكل يوقعوا على مشاركة فادي واللي لازم نعتبرها بمثابة عريضة من منتدى زيدل لرفعها للمسؤولين أولهم أبو وسام بعدين على المجلس البلدي ومن ثم عالفرقة الحزبية وأخيراً بترجع للسيد عيسى محيسن اللي بدوره بيروح بزيارة لعند محافظ مدينة حمص وبيشرح وضع هالشباب المعتر اللي مش قادر يشتري سيارات للتنقل براحة أكتر ...وبدوره بإذن الله بيرفع المحافظ كتاب لمديرية النقل والمواصلات بالإهتمام بالنقل لقرية زيدل اللي مابتبعد أكتر من 5 كيلومتر عن أطراف المدينة .

وأخيرا في متل كلنا منعرفوا بيقول مابيحك جلد غير ظفرك .

أما عن خير وشر رئيس البلدية فيازياد هيدا موضوع قادرة تشهد علي فقط أهالي الضيعة في حال وصل للمنصب رئيس تاني غير الريس عيسى ....تحياتي لأبو وسام من عندك

بس شو قصة السيارة اللي ماصرلها عندو 3 أيام :D .....بكل الأحوال مبروك ألف مبروك الله يبعد الضربات..........



زهرة الصحراء

ماجد سطّاح 6th March 2006 04:47 PM

والله يا إبن عمي فادي ..ماني عارف شو بدي قلّـك ..لأني بعرف الحكي بهالموضوع مارح يفيد ْ ...
فمكرواتْ زيدل قدر محتومْ على أهالي زيدل ....على كلّن كتبتلكْ هالأبياتْ الزجلية ...فيكْ تحفظها وترددها بالروحة والجية من الدوام ْ ....وهيكْ بتفش خلقكْ ..وبتسلّى بنفس الوقت ...والله بيعينْ ..:D



لا تستعجل يا منظوم ....متأخر رحْ توصل دومْ

بمكرو زيدل هالكركوبْ.....قدَرَكْ تتعود عالنومْ

**********************************

مهدْ مدللْ للأطفال.............بيتهادى مثل العرزالْ

وكلْ طجة ْبيسلتْ شروالْ....اللي واقفْ بنصْ الكومْ

**********************************

مشواركْ لو كانْ زغير .........لازملو فيقة بكـّير

رحلة عذاب وتعتير..........قدامكْ كل يوم بيوم

***********************************

وسيارة ما عنا نجيب........وراتبنا فاضي بالجيبْ

وعمْ نستنى الياناصيب....وحظّي بنحساتو مغرومْ

***********************************

وباص البالدية طار...................تتزيد الحالة شحّار

ولو كان ْ المركوب حمار....أشرفْ منْ ميكرو مزعومْ

************************************
:crazylol: :pullhair:

hosam abdulaziz 8th March 2006 01:20 PM

مرحبا جميعا
بالنسبة لباص النقل الداخلي فكان رغم كل مساؤه و عيوبه , يحل ازمة كبيرة و يسهل امر ابناء القرية الراغبين بالتسوق في مركز المدينة خصوصا بالسرعة العجيبة التي يقودها سائقيه فيتختصر الوقت على الجميع للوصول الى الغاية المنشودة.

لو بحثنا في سبب توقيف هذا الباص ؟؟؟؟
سمعت في مشاركات قديمة ان السبب هو قلة راكبي خط زيدل فيروزة حمص ؟؟؟؟
و ربما يعود السبب الى كثرة وسائل النقل الخاصة بالقرية.
هذا الكلام مجرد افتراء و كذب
فمالكي السيارات الخاصة لا تتعدى نسبتهم الـ10% من القرية ,

النقطة الأهم و هي ان استخدام الباصات في سورية يعتمد على تذكرة موحدة لجميع الخطوط.
و بالتالي من المستحيل مراقبة الدخل اليومي لأي خط في المدينة حتى يعرف بمدى استخدامه او ربحه او خسارته.
و كل القصة قصة تقدير من السائق فيما لو سئل عن هذا الأمر.
و بالتالي تزييف الحقيقة امر سهل جدا فيما لو احتاج احد المسؤولين سحب الباص من خط زيدل
و اضافته الباص الى خط لجهة محسوبة عليه او يهمه امرها او اهلها بيطيبوا الخاطر اكثر من اهل زيدل و فيروزة هو امر بغاية السهولة.
و بالتالي كالعادة نحنا شعب طيب انضحك علينا بقصة الباص.

على من يلقى اللوم (بدون مجاملات)
انا برأي الشخص يلقى على الأشخاص المحسوبين على الدولة و لديهم تعامل مباشرة مع المسؤولين و الذين في الحفلات و المناسبات العامة و الستقابالا الرسمية يضعون انفسهم بالصدارة
لكن في وقت الطلبات التي من صالح القرية , يتهرب منها الجميع .
الكل يلام : رؤساء الفرق الحزبية , و رئيس البلدية و اعضائها المنتخبين, و رئيس الجميعة الفلاحية , ورئيس لجنة العمل الشعبي مع اعضائها.
فلو توحدت كلمتهم ومطالبهم لشكلوا صوتا يصل الى المسؤولين و على راسهم محافظ حمص .

اذا احببنا الأعتماد على ابناء القرية من مغربين و مقيمين لأيجاد باص بديل و متقدم تقنيا و رفاهية.
فشراء الباص امر في غاية السهولة:
لكن سنتصطدم مجددا مع الدولة في قصة تأمين السائق الذي تغطي الدولة نفقاته الشهرية (كما حصل مع سيارة الاسعاف)
و قد يأتي الرفض من باب عدم التفرقة الطبقية بين اهل زيدل و فيروزة مع باقي القرى(حريصين عشعور المواطن)

بالنهاية اخ Fadisa انا بضم صوتي لكل من نصحك ببلع الهم و قبول الأمر الواقع
لأنه صوتك ما رح يبعد اكثر من هالمنتدى الكريم
لأنه هالباص موجود لخدمة الناس المكتوب عليهم التعب و الشقاء.
بينما الأغنياء و حتى المغتربين و اصحاب النفوذ.
فمنهم شايفيين اي مشكلة بوجود هالباص او عدمه(لأنه جميعهم لا يستخدمونه) و لهيك ما رح يتحرك حدا منهم.


جميع الأوقات بتوقيت GMT +3. الساعة الآن 03:39 AM.

Powered by vBulletin V3.6.2. Copyright ©2000 - 2020
تصميم الموقع وسام عبد العزيز جميع الحقوق محفوظة, Copyright ©2001 - 2020

المنتدى | الجالري | صفحة الافراح | شبكة زيدل محادثة صوتية صور المناسبات العامة خارطة منتدى سوريا حمص