الارشيف - رأيكم بالتزفييت الجديد لزيدلنا

Pages: 1

رأيكم بالتزفييت الجديد لزيدلنا
(انقر هنا ان احببت مشاهدة الموضوع الاصلي بالالوان و الصور )

Posted by: زيدلاوي غيور

مرحبا شباب ...

أهل الضيعة بيعرفوا و شافوا و عاشوا مراحل التزفييت الجديدة و أخيراً التخطيط بالأصفر و الأبيض ...

اشو رأيكن باللي شفتوه؟ جيد ... سيء ... كان بيصير أحسن ... و لا نقول للبلدية الله يعطيكن ألف عافية ...

Posted by: Kinan

اول شي اهلا بالزيدلاوي الغيور معنا بالمنتدى

بالنسبة لسءالك عن التزفيت
انا بتصور انه كان كثير ممتاز و خطوة اكثر من رائعة شملت مساحة كبيرة من زيدل تم فيها تزفيت اهم شوارع الضيعة تقريبا
التزفيت كان جيد على كامل عرض الطريق (من الحيط للحيط)
بالنسبة للتخطيط شغلة كثير حلوة و حضارية
و في تمنى انه يا ريت البلدية ترجع المطبات اللي شالتها قبل ما يتم التزفيت خصوصي عند التقاطعات الخطرة
تحياتي

Posted by: زيدلاوي غيور

مرحبا كنان و شكرا على ردك ...

كلامك صحيح ، و الله يعطيهن العافية لشباب البلدية و بالأخص الأستاذ منيف، بس برأيك تزفييت الطريق العام هوي أحسن من الطرق الداخلية و لا لاء؟؟ أنا برأيي كان في قلة اهتمام بمراقبة متعهد الزفت ، و اللي بينزل ع الشوارع بيعرف شو عم احكي ...

و في شي بالمناسبة بينحكى و هوي ...

صحي وين باقي الشعب ... بعرف المنتدى أنشط من هيك بكتييييييييييير ....

المطبات الثلاث اللي وضعوا على الطريق الرئيسي عند التقاطعات الرئيسية بهدف التقليل من الحوادث فيها خطأ هندسي قاتل و اللي بيحزر اشو هوي بيطلعلو مطب خاص قدام بيتوا ..؟؟؟؟

Posted by: silva

اشو رأيكن باللي شفتوه؟ جيد ... سيء ... كان بيصير أحسن ... و لا نقول للبلدية الله يعطيكن ألف عافية .
لتزفيت أكثر من جيد وتستق البلدية : نقول للبلدية الله يعطيكن ألف عافية .
وان شاء الله يشمل كل الشوارع بالقرية بالعام القادم .....
وبنتمى يحلوا مشكلة سوء السير ويعود الباص او السرفيس ليحسن مستوى النقل بالقرية ........

Posted by: ziad sattah

المشاركة الأصلية كتبت بواسطة زيدلاوي غيور

المطبات الثلاث اللي وضعوا على الطريق الرئيسي عند التقاطعات الرئيسية بهدف التقليل من الحوادث فيها خطأ هندسي قاتل و اللي بيحزر اشو هوي بيطلعلو مطب خاص قدام بيتوا ..؟؟؟؟

الخطأ معروف و لاحظناه منذ اليوم الأول و لكن على مبدأ : استروا ما شفتو منّا ... لم نشأ الكلام .
الخطأ : ما كان عليهم مد ّ المطبات على استقامة واحدة قبل الفتحة من الجانبين .. لأن ّ في الجانب الآخر جاء المطبّ بعد الفتحة في المنصّف و هذايقلّل من اهميته
الله يعطيهم العافية و انشاء الله الخطوة القادمة تكون في تأمين مركز ثقافي للمركز الثقافي ليكون حقّا مركز ثقافي لا غرفة ثقافة ( اعتراضي على المكان لا على الأشخاص )
أكرر : الله يبارك بالجهود

Posted by: hosam abdulaziz

سبق و نشرنا تقرير عن عمليات التزفيت و صار تساؤل حول المطبات (تسمية خاطئة) على الطريق العام
و التفسير للشي اللي شفتوه هو التالي:
المحافظة لم تسمح باعطاء الاذن للبلدية بانشاء مطبات على الطريق العام كونه باتجاهين (اوتستراد)

لذلك البلدية لم تجد مخرج قانوني لعمل شيء لتخفيف السرعات سوى اقامة ممر للمشاة بمواصفات خاصة (قبلتها المحافظة) عند التقاطعات
و طبعا ممر مشاة لازم يكون بخط واحد من الجهة الاولى حتى الثانية (الا اذا اخترعوا ممر مشاة حمصي زيك زاك)
و تأكيدا لكلامي تم وضع لوائح تحذيرية عند كل ممر تشير الى وجود ممر مشاة.

لهيك اذا الزيدلي الغيور بيقصد فيها بالخطأ القاتل فهي اذا منها خطا ابدا و انما التفاف قانوني لتحقيق مطالب اهل القرية.

انا كثير عجبني شغل البلدية من ناحية التنفيذ , اما مسألة جودة التزفيت ما فينا نكتشفها الا بعد مرور مدة زمنية لأننا منا اختصاصيين.

بس مأخذ الوحيد بقصة تخطيط الطرقات هو التكلفة اللي ممكن تطلع عكل بيت , سمعت انه الارقام كبيرة و مو مستاهلة مقارنة بالفائدة المرجوة من التخطيط(يا ريت حدا بيعرف ارقام يخبرنا)

Posted by: Kinan

في مشكلة وحدة انتبهتلها من اول اول يوم زفتو فيه شارع التدريجة
و هوي انه كان في جورة مقابيل بيت ابو جوزيف الطحان
بعد ما اتزفت الشارع ضلت هالجورة بس صارت مثل نزلة صغيرة بالشارع
يعني اللي بيمر من فوقها بالسيارة بيحس فيها بشكل واضح
فا ما بعرف بعد فترة ممكن تصير جورة نظامية ؟؟!!

Posted by: زيدلاوي غيور

شكرا أخي حسام ع التوضيح ... كافي و وافي ... بس برأيك هالمخرج القانوني اللي حكيت عنو ما عطى نتيجة عكسية ...

و الأفضل كانت المطبات تنفذ على الطرق الفرعية مقابل التقاطع بدل الاتوستراد...

بالنسبة للي رح يطلع عالبيوت ... ممكن نسأل حدا من البلدية ... الشباب من عنا ...

Posted by: Kinan

فكرة المطبات على الشوارع الفرعية للطريق العام فكرى ممتازة و لازم تنعمل حتى مع وجود المطبات على الطريق العام
اما من ناحية انه هالمطبات عطت نتيجة عكسية فا انا ما بتصور هالشي ابدا لانو عالقليلة عم تجبر السائقين على تخفيف سرعتهم داخل القرية
و هالشي كثير منيح بغض النظر مكانها قبل او بعد التقاطع

Posted by: hosam abdulaziz

انا مع كنان انه المطبات رح تعطي نتيجة كبيرة و السبب انه السائق الجاي من حمص او سكرة بسرعة كبيرة
رح يطر يخفف سرعته بـ 3 مرات و كل مرة ما بيلحق يسرع الا وصل للمطب التالي و هيك رح يقطع قبل القرية بسرعة متوسطية مقبولة بتمنع من حدوث حوادث عالقليلة مريعة
ممكن يصير بعص الصدامات اللي بتنفدا بالحديد , بس حوادث مريعة بتأمل انه رح تنعدم باذن الله.

Posted by: hosam abdulaziz

مرحبا جميعا
اليوم اجاني اتصال هاتفي من احد مهندسي البلدية مبديا اهتمامه بالطرح المذكور و بنفس الوقت حب يعطي وجهة نظره و يدافع بنفس الوقت عن زملائه اللي كان في اجحاف بحقهم من قبل البعض في هذا المقال

و انا هالأتصال كثير اسعدني و بتصور رح يؤكد للجميع حرص القائمين بالبلدية على عملهم و عدم تقصيرهم في خدمة الضيعة ضمن الامكانات المتاحة.
بداية الزيدلاوي الغيور اتهم البلدية بقلة الاهتمام بمراقبة المتعهد:
هالكلام من وجهة نظر البلدية مرفوض لأنه كان في 3 الى 4 مهندسين عميراقبوا التزفيت و احيانا يتواجد معهم رئيس البلدية
ليشرفوا على التزفيت و ياخذوا القياسات و حتى من ساعات الصباح الاولى.

هلق هون انا واجبي ادلي بشهادة عينية وقت زفتوا طريق حارتنا
و للصدفة كنا سهرانين للصبح (وصل اخي من الاغتراب) و هالحكي شي الساعة 6 و نص الصبح
بلشت سيارات المتعهد تصل و تحضر للتزفيت
الساعة 7 الى 7 و نص بلشت عملية التزفيت و طلعنا نتفرج
و فعلا كان موجود 3 مهندسات من البلدية و معهم الاستاذ منيف وقت هالكلام (مع انه قبل موعد الدوام الرسمي)
طبعا عم بحكي على طريق حارتنا
و بعد بكم يوم مرقت وقت تزفيت الطريق امام كنيسة سيدة النجاة و شفت بعيني الاستاذ منيف مع مجموعة من المهندسين عميراقبوا الوضع.

نقطة ثانية موضوع السماكات للطريق
بتم مراقبته خلال عملية التزفيت بشكل مستمر و ما ممكن التلاعب فيها
و حسب كلام البلدية انه بعد مدة بيجي دكاترة مختصين من جامعة البعث
بياخوا مقطع من الزفت (حفرة على غمق الزفت) من مناطق عشوائية
و بيعملوا عليها دراسة ليشوفوا اذا مطابقة للمواصفات المطلوبة من سماكة و نوعية و مواد مستخدمة ......
فاذا كان في خلل فيها بيرفعوا تقرير للبدلية و عأساسه بيتعاقب المتعهد و ما بتسدد اله المستحقات
اما اذا كان التقرير ايجابي , فهون البلدية بتطلع المسؤولية منها و بيكون التزفيت مطابق للمواصفات.

من شي اسبوعين كنت بقرية الحفر و تفاجأت انه الطريق العام مزفت نصه و النص الثاني متروك بلا زفت
فسألت عن الموضوع فقالوا انه البلدية وقفت المتعهد عن العمل لمخالفته للشروط المتفق عليها, بس ما بعرف بهيك حالة شو بيصير هل فيه عنده مجال يصحح الغلط او راحت عليه و خسر كلشي زفته سابقا من هالطريق
بس بالنهاية الي بقصده من هالمثال انه هيك مشاريع ما فيها مزح و فيها مسؤوليات كبيرة هالمهندسين و ما فيهم يقصروا فيها نهائيا
يعني تخيل كلفة حملة التزفيت اللي صارت بزيدل (عشرات الملايين)
فهل من المعقول يقصر مهندس بمتابعة عمله و يحط عحاله مسؤولية هيك مبلغ قد تطاله غرامة كبيرة في حال التقصير ؟؟؟؟

نقطة اخرى في حال تعرض الزفت لبعض الخفوتات لاحقا بسبب ظروف معينة او وجود منطقة ضعيفة بالطريق
فمهمة البلدية بتقوم على تصليح هالمناطق

بالنسبة لتخطيط جانا توضيح انه القيمة للتكلفة ما كثير مخيفة
حوالي 60 الى 70 ليرة للمتر
يعني مثلا نحن تزفت قدام دارنا شي 20 متر
فبيطلع علينا ان كثرت 1500 ليرة
و طبعا هالمبلغ عادي و مقبول
ربما التخطيط ما اله فائدة عملية ضمن القرية , بس الناحية الجمالية مو خسارة فيها هالمبلغ البسيط.
اما عن تكلفة التزفيت نفسه
فاغلب الطرقات اللي تزفتت كانت (قمصان) و هي تكلفتها كثير قليلة
اما التكلفة الكبيرة فهي عالطرقات المعبدة حديثا و سبب ارتفاع الاسعار هو غلاء المحروقات اللي صار بالقطر من سنة
و هالتسعيرة موحدة عمستوى القطر و البلدية ما الها اي يد فيها لا من قريب و لا من بعيد.

اخيرا برد كرر شكري للمهتمين بهالموضوع و خصوصي المهندس المتصل و اللي وضحلنا بعض الامور اللي ما كان مصدر دقيق الها.

Posted by: زيدلاوي غيور

أخي حسام ...

شكرا كتييييير ع التوضيح و الشرح الكافي ، و أشكر بدوري مهندس البلدية الذي اتصل بك و وضح اللبس الموجود ، و هذا يدلّ على نزاهة و مصداقية البلدية و موظفيها ..

أعتذر في حال تم فهم موضوعي على أنه اتهام للبلدية أو غيرها ... فأنا لم أقصد سوى بعض التوضيح ... و هذه التساؤلات لا تخطر لي فحسب ، بل نتداولها بيننا في جلساتنا و سهراتنا و هي موضوع يهم كل أهل البلدة ..

تقبل محبتي و تقديري ....

موقع زيدل سوريا حمص .. خدمات تشات و دردشة ... أرشيف المنتدى