الارشيف - مطار دمشق الدولي, يا ويلي ؟؟!!

Pages: 1

مطار دمشق الدولي, يا ويلي ؟؟!!
(انقر هنا ان احببت مشاهدة الموضوع الاصلي بالالوان و الصور )

Posted by: RUSHA AWAD

مطار دمشق الدولي, ومابالك بما يحدث في المطار

أنسب جملي ممكن يبلش فيها الحكي عن مطار الشام. لأنو على طول الحديث مابيخلص و "له بقية". المهم الحديث عن المطار والمقارنات بغير مطارات بتبلش من وقت ما الناس بتبلش تحجز بطاقات السفر لسورية ومابتنتهي لبعد مايرجعو بشي شهر وطبعا بكون في مزيج من المواقف الطريفة والمواقف المزعجة. ومن سابع المستحيلات انو أي مسافر بالمغادرة او بالقدوم مايصير معو شي.

أني حاسي انو مطار دمشق "الدولي" صار "مسلسل لا ينتهي" لأنو بكل صراحة أني بالمرتين اللي رحت فيهن على سورية تكون أصعب مرحلة بالسفر بالمطار بسورية والسبب هوي سوء التنظيم بطاقم الموظفين, تعاسة التجهيزات اللي أكل عليها الدهر وشرب, النظافة غير متواجدة نهائيا, والحمامات يعوض بسلامتكن الداخل مفقود والخارج مولود.....ممكن شناتي السفر تقطع قارات العالم كلو ومايكون في أي مشكلة وبس وصلو على مطار سورية بضيعو وقلعة ابو بحلب اللي بترجعلو شنتة ضايعة.

يعني أول روحة على سورية كانت 12 يوم وكان لازم ارجع عالمطار حتى جيب الشنتة بناء على اتصال منهن ووقت بوصل عالمطار بتفاجأ انو هني مابيعرفو وين الشنتة وضلت الابتسامة على وجهي حتى دخلت شي اسمو " مستودع المفقودات" وبدون طول شرح مالقيت الشنتة, بس كمان مرة ثانية موظف بالمطار من خلال طاقة الاستشعار عن بعد و "المعلوم" قدر يجيبها من بين شي ثلاثين شنتة.

بالروحة الثانية وصلت الطيارة عالمطار الساعة 9:30 الصبح بس ماطلعني من المطار للساعة 12 الظهر وكمان ليش مابعرف, طوابير على تختيم الجوازات وكأنو فايتين على شي بلد بالفضاء الخارجي مو على بلدني بجوازات سفر سورية, لك حتى الملامح مابتغش انو ممكن هالشخص يكون أجنبي.

صاحب الحظ السعيد اللي بلاقي عرباية تحميل شناتي بكامل قواها "يعني بدون أي دولاب ناقص" والحظ الأكبر بكون اذا نزلت من الطيارة ولقيت شناتيك عالقشاط "والله يجعلو قشاط", طبعا بتصور ماغيرو من يوم اللي دشنو مطار دمشق "الدولي" لأنو غالبا بكونو الشناتي مزتوتين عالأرض والحظ الكبير اذا ماشي واحد فهمان بيجي وبياخذ شنتك بالغلط.

هلأ كلشي بفهمو بس مابستوعب ليش هالموظفين ان كانو أمن او غيرو بطلعو بالواحد كأنو عاملو شي عملي وخايف منهي, تطليعات مالها لا تفسير ولا طعمة ولا فنة.

واللوحة الالكترونية مارح جيب سيرتها لأنو مالها لزوم.

وشو مشان موضوع فتح الشنتة وتفتيشها باليد بعد استلامها من على القشاط, يمكن البلد الوحيد اللي بصير في هالشي هوي سورية. وشو مشان ريحة الزيتون والشاي والزعتر اللي طالعة من مكاتب التأشيرات "شي بشهي"

السنة الماضية كانت الإصلاحات لأبو موزي على أساس إعادة تأهيل للمطار وبصراحة مابعرف كيف صار الشكل الجديد للمطار.

كل الشي اللي كتبتو فوق ما بوازي شعور الغضب والانزعاج اللي حسيت فيهن وقت سيدة اماراتية كانت قاعدي حدي بالطيارة قالتلي "أسافتو بلدكن" طبعا معها حق تحكي هالحكي لأنو يخزي العين اللوحة الالكترونية ماعطت الموعد الصح للمسافرين وعدد الموظفين عند المغدرة ماكان بكفي وقاعة تسليم الشناتي بتاخذ جائزة غينيس لأصغر وأسوأ قاعة بالعالم والطيارة تأخرت بالإقلاع ساعتين والمشوار لدبي 3 ساعات, اي مابلومها لأنو مطار دبي من أحسن مطارات العالم ومهما صار في ضغط اقلاع او هبوط طائرات مجهز بكوادر بشرية وتقنية قادرة تستوعب هالأعداد الهائلة. بجوز تفكرو انو مافي مجال مقارنة بين دبي وسورية "مو الإمارات كلها وسورية" وحكت عن مواقف كثير صارت معها بالبلد بس مارح نطلع عن موضوعني....

فهمني عاد, هوي هالمطار الدولي اللي شايفين حالنا في لأنو أغلب الرحلات الجوية بتنزل في, يعني مابعرف قديش رح يكلفهن تجهيزو مثل أي مطار "دولي" بالعالم, لك هاذ بوابة سورية يعني اللي بدو يفوت عالبلد بياخذ نظرة اولى من المطار وتقبرو هالنظرة اللي عم ياخذوها الأجانب والعرب عن مطارني.

ياترى ايمت رح يخففو 1% من هالسرقات وهالنهب اللي عم يصيرو بالبلد ويتبرعو فيهن لهالمطار المسكين المشحر اللي صارت حجارو مكاحل. ليش على طول منقول "أسافي" وقت منوصل عالمطار وبتضل حسرة بقلب الواحد انو يصير يلاقي معاملي بمطار بلدو مو أحسن بس مثل اللي بلاقيها بمطارات العالم...

لك ااااااااااخ يا بلد, المصيبة الكبيرة مدري النعمة الكبيري انو على قد ما منحكي ومننتقد ومنعترض بتضل الوصلة على مطار الشام , على باب سورية و بداية الطريق لزيدل من أحلى اللحظات اللي ممكن يعيشها الإنسان, صدقوني شعور مافي أحلى منو بسسسسسسسسسس.....

مع حبي واحترامي
رشاعواد

Posted by: organist

مرحبا رشا والله معك حق بكل شي حكيتي حتى صار موقف مع أحد الأقرباء إتعرض لأكثر من مرة فقدان الشناتي

وصار يكره يجي سياحة

Posted by: زهرة النرجس

بس الجيي عالشام بتستاهل هالتضحية ما هيك يعني الشام هي سورية كلها طبعاً واذا كانت القصة بس ممتعلقة بالمطار فبتتدبر !!!!!!!

Posted by: dj-hani

يا جماعة ما بعرف ليش انتو هيك ؟؟؟!!!!!
طيب اذا هيك الوضع عنا بشكل عام .... ليش بدكون نوهم العالم انو نحنا كتير مميزين ؟
خلص الصراحة حلوة من اولتا .
معقول الواحد يجي ع المطار يلاقيه بيجنن ...... يقطع المطار و يدخل يلاقي الوضع تعبان (و الحالة تعبانة يا ليلى ... خطبة مفيش )
لهيك الشباب عم يراعو هالقصة منشان ما يصير مع السياح جلطات ... و ازمات قلبية ... و سكري
من اول شي بيعرفوكون عالوضع منشان بعدين ما تنصدمو ....

شكرا

Posted by: nicole

بدي طمنك يا رشا انو خلص تجهيز المطار اخيرا
بس للأسف لسه الوضع بيخجل ديكور غريب والوان مضحكة ونقص كبير بعدد المقاعد وفعلا متل ما قلتي شفتو وانا حاسة بزعل من جوا قلبي لاني متاكدة انو المبلغ اللي نرصد لتحسينوا كان بيعمل اكتر من هيك بكتر
هدا عدا عن جملة بتضل دايما بذهني وبتضل مزعلتني قالها شخص كان عم يزور سورية للمرة الاولى ولسه لهلق بيقولها كل ما انذكرت سوريا قدامو (انا حبيت سوريا كتير بس المطار كان كارثة )

موقع زيدل سوريا حمص .. خدمات تشات و دردشة ... أرشيف المنتدى