الارشيف - حضرنا الدعوى يا زياد .. جايي شيخ الصيادي..

Pages: 1

حضرنا الدعوى يا زياد .. جايي شيخ الصيادي..
(انقر هنا ان احببت مشاهدة الموضوع الاصلي بالالوان و الصور )

Posted by: عدنان

حضرنا الدعوى يا زياد .. جايي شيخ الصيادي..

يروي حكاية للأجواد ..زيدو حتف الأعادي

* * *

لا تقلي شايل قنطار --- صف كلام وبزيادي

إبدا شوط من المشوار--- تباع دروب القرادي

حط كلام وإرسي شعر--- سمعني حكمة لقمان

جبلي من معقول الفكر--- شرك يركع رب الجان

بدلك عا مدلول السر --- وبربط بالتواني زمان

زمان يطول قصر العمر--- زمان يد مّ الأعادي

* * *

يلا أستاذ زياد يمكن بعدك ناطر .. وبعد ما صنتو الموقع
صار بدو رفرشة من قوالك الحلوي ..

أتحفنا ..

Posted by: ziad sattah

مين قَلَّك ما شِلت الهَم ... لمّا شلتَك عَكْتافي

خفّة عقل و ْ ثقلة دمّ ... دُوري وْ عاملّلي سْنافي

لو مَقطَع واحد ما تَم ... سْكافي وْ بتضَلَّكْ حافي

كلشي صيّاده تلتَمّ ... مـ َ بْترمي الطير الشّادي

**

Posted by: عدنان

الطير الشادي ما بنرميه --- وحبة حنطة شي كافي

وان غرّد لو ملء الفيه ------- رح هزلو النفنافي

مقطع يرخي حبل التيه--- مقطع يعطيك عوافي

رح دكـّلّك جفت الفيه--- ختم شباع الزوادي

Posted by: ziad sattah

النفنافه اللي عطرا فاح ....... ردّت للساقي جْميلو

بْورداتك عطّرت الساح ... و غَطِّتْ عـ اللي مْقابيلو

خيَّك زيّاد السّـــطّاح ........... بْيِبْكيلَك لـو تشكيلو

لاكن لو بتشيل سْلاح ........ قدّ الحمله وْ بزيادي

-----------------

Posted by: عدنان

لو بتدق طبول الحرب --- درب جهنم رح قيلو

الإيد اللي مأيدها الرب--- غصن الزيتون تشيلو

من الحمأة مرعوب الشب --- ومنهزم مقابيلو

ألف ومية والبتحب --- منحديلو ع الطرّادي

Posted by: ziad sattah

ألف و ميّه يدقّو طْبول ... مـ َ بْيِلوو راس الحَيّه

لاكن بلساني المعسول ....... بْرَقّصها عا إيدَيّي

لا تخاف. اللي بْقلبك قول..... حتّى اللمسه الفنّيّه

تعلى و تْطالِب و تْقول: ... بو يوسف مَنّو عادي

***

Posted by: عدنان

مادامو لسانك معسول --- جود بدبق الخليّة

غلّ قفير النحل وجول--- بشهدلك ميّة الميّة

بشل من الشعار فلول--- و زياد البو نشمية

بشمع النحّالي مشغول --- يشمّع خيط الخرادي

عدنان

Posted by: ziad sattah

@

مشغول بْنحله بكيّر ...... مرقتْ صوب سْياج الفل

و عيوني مثل نْواطير ......تْفَلّي النحله وْ فيها تْغِل

و قلبي اللي عاملّي زير ...... لا بـيـكـِلّ وْ لا بـيـمِـل

يْبَحْبِشْ تـ َ يْفِكّ التَّشفير ...... وْ يسرُق شهد الزُّوادي

***

(( هاي موضوع .. هات لـَنشوف ))

Posted by: عدنان

الشاغل قلبك نيالو --- لاطي وقلبك حق وبق

وعيونك مشبوحا لو --- ولاهو سائل عنك حق

الزير معلق بحبالو --- عطشان ومن بيرو طق

نرجس تايه بجْمالو --- غرق بدست العمّادي

وع موضوع الحلا منرد ..

لو بدي ع النحل بصير--- شهد العسل وحلالو

بهدي للنحلة قوافير--- فيها سحري وجمالو

وبعدك يا زياد صغير--- حتى تشعر بكمالو

وشلال وعسل وهدير --- بزيدك منو وجْلادي

Posted by: ziad sattah

القِلـّه مـ َ بْتعطي الفِلـّه ... وْ لا القرّيص بْيَعطي عْطور

لـ َ تْجادلني وْْ لـ َ تْقلّي .... وْ خلّيلي الطابق مـســـتـور

النّحله تـَتْعـَبّـي غـَلـّه ........ واحـة ازهـاري بـتـزور

و اللي مْعَوَّد عالقِلّه .......... يـزرَع فـصّه بـالـوادي

أنا بانتظار باقي أفراد جوقتي = زملائي في الجوقة . ( دون تسمية حتى لا انسى أحد )

Posted by: عدنان

الــقــلــــة اللي معبايه موي --- شربو منها بكل دهور

بتحيي روح بتبني حي --- وبعدو حاميها الناطور

والنحلة بتاعك يا خي --- من جنتنا تجني شهور

والقـــلـّــي ..تقــلـّـــك : يا بَي--- كتر المرعى مو جادي

* * * *

بكل الجوقة المحبوبه أهلا وسهلا

ومرسح زيدل واسعنا سحرو بيحلا

وبتقلي هــ الطيوبي السمرا الكحلا

زيد و دفو و جوقاتو رتمي الهادي .

هلا ومية بالكل ..

Posted by: ziad sattah

قـالتلي القلّه بـالــسّـر ... علقة بو يوسف كَشره.

القلـّي بتعمل متلَك غِر ... مافي غَلـّه يـا حســـره

و الكثره بتتركني سر ... قلب السمرة و الشّقره

شـ ُ بتعمل قُلـّه مـَ تْشر .... قــدّام الـبحر الـهـادي

***

Posted by: عدنان

مع قلة ما بحكي و هـــرّ --- القلة ندهت يا ( زيادي)

عيب عليك وحاجي تـﭽــر --- عدنان سيد الأجوادي

الكترة ما بتفيد الحــرّ --- يا عبد بلا إفادي

بيني وبينك سنّ الدهر --- بفتّلّك عندي زيادي

* * *

علّمتك معنى ( القلة ) --- يا هــ المسكين
عقلك بيزيدك .. قلّي --- زغل .. وتفتين
يابو ( ﭼلّة ) ما تقلي --- رسمك ع جبين
مبين متل الترغلّي--- مزقزق ..شادي
* * *

Posted by: ziad sattah

مِنْ قـِلـّة أرباب الكار ... قـْبِلتْ بـْ عدنان شْريكي

ساعه قرّادي الأشعار ... و ساعه مْوَشَّح أنتيكي

عن قـِلـّه أو كثره اختار... حتّى تَـكـْتِـكْ تـكـتـيـكـي

مش رَدّه بـْقمّة سنجار ... وْ رَدّه بـعـيـون الـوادي

Posted by: عدنان

مش حلوه شكوى القلّي --- وما برضى شريك ( الهلــــّـــي )

مش قادر تحمل قلّي --- بخفف حملك و الـــقـَـــلّــه

تكتيكك ..تَاكي موَلّي--- تكّه مَـنـّــو مغربلّي

و غربالك ع الترللّي--- تشتشنالك ع َ إيادي..

* * *

Posted by: ziad sattah

الفلس اللي سيطو بـ إنجيل ... خَلـَّد أرملتو بـ ْ جَنّه

و الكثره مـ َ بْتعمل جيل ... بْيِكْفيها ( مريم ) حَنّه

قادِر إحمُل ثقل الفيل ... لو فَنَّك يِعلى لـ ْ فَنّي

لاكن من بعد التَّبجيل: ... بعدي بْشُوفَك: قُرّادي

**

حنّه : هي والدة مريم العذراء
القرّادي : اسم عصفور صغير جدّا ً

Posted by: عدنان

مفلّس يا ع لسانك( فلس) --- و(الكثرة )عم تتكرر

يظهر إنو القلي (PLUS)--- حكّت جلدك المترتر

والعدرا من يوم الأمس--- بتصليلا يا معتّر

لو بتردلك عزّة نفس --- وبركة منها و ايادي

* * *

Posted by: ziad sattah

خَرْبَطْنا نـْبَلـِّشْ يا خال ... الليله معْ آخر ردّي

قلّه وْ كتره وْ قيل وْ قال...وْ هدّي ان كَن فيك تْهَدّي

بدّك دوره لـْ عشر جْيال ... تا تقدر توقف حدّي

وْ فتّة خبز بـْ عشر رْطال ...تَتْباريلي أحفادي

****
END

Posted by: عدنان

أحفادك ما بيتبارو --- مش شايفهم بقصادي

تروك الدف وأحبارو--- وبقبش بين الحصادي

لسانك كلماتو بارو --- ولو !!.. ملبك كالعادي

الليلة منقرّ برجال --- الطشّي بيصفو بادي

* * *
ونشالله منلتقي بجلسة أصيلة وتقليدية ..ونفسها طويل .. وفيها صبر ..

ومع باقي فرقتك ..

يسعد مساك ..

Posted by: حكيم عيون

يسْعِد رَ بّـا هالفِرقهْ ..............بتشبهْ صِيصانْ و قِرقةْ

تا تتوَقـّى صَيْبة ْ عَيْنْ ................بينقَصها خـْرزة زرقا

=============================

Posted by: غسّان

نِحنا سياد الزَجّالي ....فِرقة فُرسان
وَهج شموس البتلالي ... حِكمة و ايمان
***
الاستاذ لْ الله اختارو..عِملو مِرسال
نَطْقِت بالحق فكارو ..رَبّى أجيال
باح الكون باسرارو .. ع لسانو وقال
صدق الكلمة وأشعارو .. بأجمل ألحان
***
لَكن سُبحان الخالق ..خِيري وأشرار
للمير بيَعْطي مِرافِق ..مِن مُلكو يغار
بْيفرَح لو شافو مفارِق ..وهمومو كتار
وبالزفة مْبَرْبِر طالِق ..غِلّو غِليان

Posted by: ziad sattah

المشاركة الأصلية كتبت بواسطة غسّان

نِحنا سياد الزَجّالي ....فِرقة فُرسان

وَهج شموس البتلالي ... حِكمة و ايمان
***
الاستاذ لْ الله اختارو..عِملو مِرسال
نَطْقِت بالحق فكارو ..رَبّى أجيال
باح الكون باسرارو .. ع لسانو وقال
صدق الكلمة وأشعارو .. بأجمل ألحان
***
لَكن سُبحان الخالق ..خِيري وأشرار
للمير بيَعْطي مِرافِق ..مِن مُلكو يغار
بْيفرَح لو شافو مفارِق ..وهمومو كتار
وبالزفة مْبَرْبِر طالِق ..غِلّو غِليان

يسلملي الخال الرايق ... يسلملي الزَّوق

سكران وبعدي فايق ... مِن رَدَّك فوق

رَدَّك عا صدري لايق ... كلماتَك طـَوق

جُود وْ لـ َ تْضَلـَّك سايق ... نهج الكتمان

&*&*&

Posted by: غسّان

شَرَّفْنا بْخَرزة زَرقا ...و ضِحْكه بالطول
مِن وَحي فْكارو المِرقة .. تفلسَف بهلول
نَقَّّرْنا بْرَدّة لِبْقة ...فَََلسَع مَذهول
مِثل الدودة من القرقة ... تخَبّى بِ سيان

تفضل يا حكيم .. نحنا تلاميذك
****

استاذي صاغ شهادة ...لْصِدري نيشان
مْن زياد نْهَلْْْْت زيادة ... وبعدي عطشان
ينبوع اللحن الشّادي ... وحكمة لقمان
ذِخر ولادي واحفادي ... مْرَبّي الانسان

Posted by: حكيم عيون

يسْعِد رَ بّـا هالفِرقهْ ..............بتشبهْ صِيصانْ و قِرقةْ

تا تتوَقـّى صَيْبة ْ عَيْنْ ................بينقَصها خـْرزة زرقا

=============================

يسلملي القلبْ الْ بيرِقْ...........بقرقهْ , عْلى الصوص الشاطرْ

وكِلما بحازوقهْ بيهِقْ.......................بتعملـّو جبرة ْ خاطرْ

انشاللهْ شيْ بَحْصهْ مَ يبِـِقْ....................بردّة قرّادي يخاطِرْ

لنّو قحفو بنقفهْ بشِقْ ........................تا شِفْ دماغو بشَرقهْ

=============================

Posted by: غسّان

يسعِد رَبا هالفِرقة...بالفِكر الراقي بتِرقى
انشالله بينشقّو العزال ...ويصِلّو بنار الحَرقة
***
مِن بَعدهْريبة بيطِل ... راسو نْمَد بقرّادة
بيفِح باشعارو الغِل ... وبيتحفنا بكيادة
شو صُوجو مَخلوق الظِل ... الشر بطبعو مِش عادة
ل بجهنم موعود يصِل... بيشحد من قلبي الشفْْْقة

Posted by: حكيم عيون

المشاركة الأصلية كتبت بواسطة غسّان

يسعِد رَبا هالفِرقة...بالفِكر الراقي بتِرقى

انشالله بينشقّو العزال ...ويصِلّو بنار الحَرقة
***
مِن بَعدهْريبة بيطِل ... راسو نْمَد بقرّادة
بيفِح باشعارو الغِل ... وبيتحفنا بكيادة
شو صُوجو مَخلوق الظِل ... الشر بطبعو مِش عادة
ل بجهنم موعود يصِل... بيشحد من قلبي الشفْْْقة

يسْعِد رَ بّـا هالفِرقهْ ..............بتشبهْ صِيصانْ و قِرقةْ

تا تتوَقـّى صَيْبة ْ عَيْنْ ................بينقَصها خـْرزة زرقا

=============================

الصيّاد الـْمَ قشعتو منيحْ......... وحوش البريِّهْ قارض

لو طـَلْ منْ قْبالو زيحْ .........وساوي حالكْ مِتـْمَارضْ

وكَنْ بَدّكْ دَمّكْ مَ يسيحْ..........جفتو بمَرقهْ لَ تعارضْ

لنّو عْظامَكْ لِمْ بتصيحْ .........ديوكو , بتصفّي مَرْقهْ

========================

Posted by: حكيم عيون

المشاركة الأصلية كتبت بواسطة غسّان

شَرَّفْنا بْخَرزة زَرقا ...و ضِحْكه بالطول

مِن وَحي فْكارو المِرقة .. تفلسَف بهلول
نَقَّّرْنا بْرَدّة لِبْقة ...فَََلسَع مَذهول
مِثل الدودة من القرقة ... تخَبّى بِ سيان

تفضل يا حكيم .. نحنا تلاميذك
****

استاذي صاغ شهادة ...لْصِدري نيشان
مْن زياد نْهَلْْْْت زيادة ... وبعدي عطشان
ينبوع اللحن الشّادي ... وحكمة لقمان
ذِخر ولادي واحفادي ... مْرَبّي الانسان

لـَكْ لـَكْ لَكْ لـَكْ ....!!!!
هاي الردّه بدّك تعذرني أنا ماشفتها غير هَلّق صِدْقا ً ....ولهالسبب بيطلعلي ردّ عليها بالقرّادي ...

يا صوص الـْفيك البصبوصْ ...........قاشع عالمنبر دودهْ

هيدي الدودهْ يا مفعوصْ.............يَ بن القِرقهْ المقروديْ

شقفة لِلـْسان المقصوصْ..................يللي منّكْ مفقوديْ

لمّا بديت قبالي تحوصْ...........وعا راسكْ كـَلـْتْ الطـَرْقهْ

========================

Posted by: غسّان

يسعِد ربّا هالفِرقة ... ويسعِد رَبّا هالرِفْقة
بيشَرّفني يا حَكيم... بيدّي تِعلَق هالعَلقة
***

اقتباس:

الصيّاد الـْمَ قشعتو منيحْ......... وحوش البريِّهْ قارض

لو طـَلْ منْ قْبالو زيحْ .........وساوي حالكْ مِتـْمَارضْ

وكَنْ بَدّكْ دَمّكْ مَ يسيحْ..........جفتو بمَرقهْ لَ تعارضْ

لنّو عْظامَكْ لِمْ بتصيحْ .........ديوكو , بتصفّي مَرْقهْ

عامِل صيّاد الحَبّوب ... وراجِعلي بجِفت بلاستيك
مِتصَيّد فيل و دَبدوب ... مِن الصوف.. وما تنسوالديك
ولِم لََيث تلاقى الأرنوب... بالروضة تعلّم تَكْتيك
للسَبع يقلوالمَطلوب ... تْمارض وفقَاه الحَزقة

*****

اقتباس:

يا صوص الـْفيك البصبوصْ ...........قاشع عالمنبر دودهْ

هيدي الدودهْ يا مفعوصْ.............يَ بن القِرقهْ المقروديْ

شقفة لِلـْسان المقصوصْ..................يللي منّكْ مفقوديْ

لمّا بديت قبالي تحوصْ...........وعا راسكْ كـَلـْتْ الطـَرْقهْ

ابن القُرقة المَقرودي ...ديك وبالحِكمة صَيّاح
بصوتو الشَمس الموعودي ... بْتِصْحى وبتصَحي الأرواح
بيهَلْهِل للحاصودي ...وعَ الرِزق مْوَعّي الفلاح
مِش مِثل سْخامة سودي ... عَ سِفْل المَنبر لِزقة

Posted by: حكيم عيون

إقتباس عن غسّانْ

اقتباس:

*****

عا ها لردّهْ يا غسّانْ===جْفتي ضَبِّيتو بـْكـَيْفيْ

لنّو سَبْعَكْ لِمّا بانْ ===كتيريْ عْليهْ النِقـَّيفهْ

منتوفهْ رياشَكْ عريانْ===خرج الحمام الصيفيْ

تَ تصيرْ بحقل القصدانْ ===تحرّمْ تدعَسْ عا ورقهْ

===================

إقتباس عن عسّان

اقتباس:

ابن القُرقة المَقرودي ...ديك وبالحِكمة صَيّاح
بصوتو الشَمس الموعودي ... بْتِصْحى وبتصَحي الأرواح
بيهَلْهِل للحاصودي ...وعَ الرِزق مْوَعّي الفلاح
مِش مِثل سْخامة سودي ... عَ سِفْل المَنبر لِزقة

سْخامه سودا يا أمّورْ ................لازقْ عَا سقفْ المنبرْ

مثل الغيمهْ الـْصرلا دْهورْ........... و مَ تشتـّيْ مِسكْ وعَنبرْ

مشْ مِثلكْ ما كنتْ تغور ْ...........و واقف عالفاضي مْـقنبرْ

مَ تقاقيْ بصوتـَكْ مَبهورْ...............وما شفنا بفكِركْ بَرْقهْ

=============================

Posted by: غسّان

اقتباس:

عا ها لردّهْ يا غسّانْ===جْفتي ضَبِّيتو بـْكـَيْفيْ

لنّو سَبْعَكْ لِمّا بانْ ===كتيريْ عْليهْ النِقـَّيفهْ

منتوفهْ رياشَكْ عريانْ===خرج الحمام الصيفيْ

تَ تصيرْ بحقل القصدانْ ===تحرّمْ تدعَسْ عا ورقهْ

جَفْ من الوَهلة الحَباب ... وصار يتَئتِئ ويتَرْشِق
مْجَمِّع حولو من الألعاب ...نُقيفة وجِفت مْحَرْتِق
من خوفو شَر المِزراب ... المَريول وشورتو مْغَرِّق
ل بدو يلاعِب سَبع الغاب ...لازِملو حْفاضة بلَصْقة

اقتباس:

سْخامه سودا يا أمّورْ ................لازقْ عَا سقفْ المنبرْ

مثل الغيمهْ الـْصرلا دْهورْ........... و مَ تشتـّيْ مِسكْ وعَنبرْ

مشْ مِثلكْ ما كنتْ تغور ْ...........و واقف عالفاضي مْـقنبرْ

مَ تقاقيْ بصوتـَكْ مَبهورْ...............وما شفنا بفكِركْ بَرْقهْ

عَم قاقي بصوتي مَبهور .. مْسَبِّح هالرّب العاطي
في ناس بيخْلِقها طيور ... وناس مِن سْخام مْخاطي
طيور بْتِعْلى لْعَنْد النور ...و دود بيحْفُر عالواطي
هالمَنبر طَالِب لِ نسور ... ما بيقبل كَمْخة مِرقة

Posted by: حكيم عيون

حاجة تكفر يا غسّان ......الشعر ما بيحتمل الكلمة اللي فيها قـَرَف..
فإعذرني أنا ما فيني تابع على هالمستوى
وفيك تعتبرني خسران

Posted by: غسّان

لْ حِفاضة الْ مِنها قَرفان ...لْبونا آدم مَنسوبي
أوَّل ما بيلبِس انسان ...بِ هالدنيا المَكتوبةِ
مَمْنونى نْ كانت كِتان ... أو قطن عليها بوبي
بتِحْمي مِن الحَرقة الوَلْدان.. و بْتَبديلا أُُلعُوبةِ
وللطِفل بتَعْطي الآمان ..لما بيحْبي ويدوبي
نْ كِبر وبَعدو مِش نَظفان ... بتحافظ عَ الهَيّوبةِ
بيتركّها بدَمعة وعَرفان ..لَ آخِرتو مَطْلوبةِ
بْيحتاجا رفيقة ال شَيّبان ... تسْتر ما بين شْبوبي
و حتى لَشْبوبي فِتيان ..بْتبقى الخِرقة موجوبةِ
لو بيحِبوا الطَياران ...وطَلعة فَضا بمَركوبةِ
أو مثلي زاجِل هويان... عَمْ اتْمَخْتر بزغوبي
لا مَنبرهالسطاحان ... لْبِست حفاضة بجيوبةِ
خَايف لا عود الرِمان ...يكوي بالشِعر جْنوبي
لَكني لْقيتك بَهتان ... وشايل جِِفت بْلا ضروبةِ
رْسَمْتَك بِ تِقْن الفنان ... طِفل وحامِل لَعّوبةِ
عِملتلك سَبعي نيشان ... بس الخَرطوش خْلوبي
قِلنالك طِفل وخيفان ... بصورة شِعرية لِبقة
***
الكَمخة المِرقة يا قَرفان ... سِر وأصل الاعجوبةِ
بْلا كَمخة مافي انسان ... ولا حِيوان ولا عْشوبي
الروح مْكوّنها الدّيان ... بكمخة مِن طُهرو وطوبي
الكَمخة مقدسها العَجّان ... عَ طْحيناتو مَصْلوبةِ
وعَ الميّ بتُنْصُر قُبطان ... مِن عَهد اليَّخْت النوبي
وعِند مْجَنْزِر مَكْنِسيان ...الكَمخة السودي مَرغوبةِ
ومِنْ هالمَوقِع مِن زَمان ... وردة شكْرَ و موجوبةِ
لْ كَمخة بمُخْك مَع شِريان ... صاغوا فِكرة مَكتوبةِ
ومْشيت بحَقل القصدان ... تْلِم و تِزرَع لْ قلوبي
مِن كَمخاتَك ياكَمخان ... تْعَلّمنا هالألعوبةِ
بْلا كَمخة راسَك ما كان ...لا زَجّالي ولا فِرقة
***

حَقّي صار عِندَك يا فلان ... الرَدّة القِرفة مِش لِبقا
مْكَفِّرني وماني غَلطان ... وقبلان بحُكم الجَوقة
الكِلمة نور بْلا ألوان ... صورة للعين الحِدقة
والحِكمة الها سُلطان ... بِ سْخام المِقرف تِرقى

موقع زيدل سوريا حمص .. خدمات تشات و دردشة ... أرشيف المنتدى