الارشيف - ويزعل ضمير الليل

ويزعل ضمير الليل

بعرف صرت ليش القلب محتار = قضّى سنين ملوّع ومنهار

ليلو ورد فكرو نحل حايم = علقان ع دبوق الوحي بآذار

والعشق ينده آخ ممنونك = يا ربّة الإخلاص والأشواق

بحري انا من دفقة عيونك = وشو قيمة النعمه بلا الخلاّق

بحبّك ومحتار بهدا ظنونك = والحيّروني بعد اشيا كثار

لون السحر من شردة عيونك = وخدود إلهن فضل عا نوّار

قلبك بعطرو الطيّب الحسّاس = وروحك صفاها بصفوة الإلماس

وذوق اللي طهرو بيوهب الايناس = خيرات فردوسك نضوج وشهد

وفيكي شويّه من حنين النار

من مطلعي خلقان مجنونك = وبعيد عنّك لو قضيت نهار

بفزع يجن الخمر من دونك = بكاس المدى ويشاكل الخمّار

ويزعل ضمير الليل ع جفونك = ويبكي الشعر عا خاطر الآثار

دخلك تضلّي بحضن بيصونك = ولا تجرّبي تجافي جرح بيغار

احسن م حظك ع الملا يخونك = الغربه جريمه والهجر غدّار

وبعترفلك عن ثقه محتاج = حبّك ت يشفي فجور آلامي

يا غاليه القهر بحياتي فواج = ولولا تركتي آخ ايّامي

بختير بطق وبصبح على دراج = موتي وعذابي يشل انغامي

من هيك ما بسكن قصور وبراج = بفضّل بقلبك عيش احلامي

بصدرك بغلّ بحرقص الاقدار = مأكّد قداسه بتزهر الازهار

بصدرك تشيّد معبد الاسرار