الارشيف - شقفة من ذكريات الطفولة

Pages: 1

شقفة من ذكريات الطفولة
(انقر هنا ان احببت مشاهدة الموضوع الاصلي بالالوان و الصور )

Posted by: حكيم عيون

كَمْ منزل ٍ في الأرض ِ يألفهُ الفتى .....وحنينـُهُ أبداً لأوَّل ِ مَنزل ِ.

بوقت دريتْ بأنو ( قرية الفرقلس ) القرية اللي ولدِت وعِشتْ صِبايي فيها ...صار إلها موقع عالنت ..فتتْ عالموقع ..وخطر ببالي أكتب شي للبيت وللأرض اللي أنا خِلقتْ فيهن ْ ..منشان حِسْ بشوية راحة ضمير تجاه الأرض اللي فتّـَحت فيها عيوني على الدنيي ... وما بعرف ليش طلعو معي موشّّح .... فقلتْ :

يَ طـْموحْ الـْمَالو نـْهايهْ ==عا عُمري دُوسْ

ورجِّعلي النسمِهْ الجايي ==من وادي السُوسْ

=======================

وَيْنِكْ يا ضَيعهْ غِفـْيتْ ==عَا كِتف الريحْ

بَعْدِكْ روحيْ ما شِفيتْ ==من عِشْقْ الشِيْحْ

ظهْرة صِرِّكْ ويْن صِفـْيتْ==تَ كَمِّي ودِيحْ

وريفْ الـِْي جْـريِّيْ حِفـْيتْ==تَ حْجارو تـْبوسْ

------------------------------------------

يا غصن الــْ كِنتْ لـْحَافيْ==ودَفـِّيتْ الروحْ

خـَيْرَكْ طـَعمو عَ شْفافي ==مِشْ راضي يروحْ

بْقـِيتْ بوجداني طـَافي==عَا نـَهر جْروحْ

تشرب من دمعي الصافيْ==وما كِنـْتْ تـْحوسْ

---------------------------------------

يَ عْصافير البريِّهْ ==زِرْعِي و مِطواقْ

ورْدِتـْيْ عا بْركهْ بَيِّيْ==بْشوبْ الحَرَّاقْ

ترشـِّي عا بَعْضِكْ مَيِّهْ==والميِّـهْ فـْراقْ

نادمْ ما قال خـْطـَيِّ==بْصَيْدِكْ مْهَووسْ

-----------------------------------

مبارحْ كنـّا نتشاقى==بحِضنكْ يا دارْ

وكيفْ بنرجع نتلاقى==وضاعْ المشوارْ

مثل الواقف عالطاقهْ ==محبوبكْ صارْ

وخنجرْ لـَهفهْ حَرَّاقهْ ==بصدرو مغروسْ

=================

وادي السوس: ....هوّي وادي يقع غربي القرية ......وغرب بيتنا.... و ما كان يفصلو عن بيتنا إلاّ أرضنا ....
ظهرة الصِرّ: تلّة ممتدّة لكيلومترات كانت أرض بور صخريّة قليلاً .. كانت تصير جنّة زهور بريّة ..خزامى وأقحوان وشقائق النعمان ..بسنين الخير أيام زمان ....واليوم صارت أرض مفلوحة .. بسنين الخير يا دوبْ ينبتْ الشعير فيها ...

Posted by: علي عامر

عا قدر ما بالسوس طاب الملتقى

طايب من بيوتك حنين السقسقه

وعا كعبة جروح القلب خيي الحكيم

هي كلمتك بدها تضلّ معلّقه

بكل تقدير

Posted by: حكيم عيون

المشاركة الأصلية كتبت بواسطة علي عامر

عا قدر ما بالسوس طاب الملتقى

طايب من بيوتك حنين السقسقه

وعا كعبة جروح القلب خيي الحكيم

هي كلمتك بدها تضلّ معلّقه

بكل تقدير

لمّا...الزهر بينقـَطـَف سِرقة .............بهالعمر غير وراقْ شو بيبقى

و بالذاكرهْ دَرفة ْ قناني عطورْ...............عَ رفوف مَنسيّة بلا طـَبْـقه ْ

لـُوْ فـْـتحتها عْليكْ العطر بيجورْ............و بتدوقْ طـَعمْ الآهْ والحرقه ْ

وبتشوفْ حالكْ بالقفصْ عصفورْ.........نسيانْ شو لونْ السما الزرقا

وبتقول يا ريتْ الزمنْ بيدور ْ......و بْدال ْ ما نكبرْ ...عَ زَفـْرَهْ نموتْ

نِزغر تَـَحتـّى نموتْ عا شَهْـقـَه ْ

=======================

شكراً خيي علي هذا من ذوقكْ و لطفكْ ..

Posted by: allbaseet

يا ضيعتي حابب زورك بس متى نلتقي
كنت قريبة من القلب واليوم ضاع اللقا
كلشي فيك تغير وإحنا مثلك أخذنا التغير
وما عدنا نتذكر ما فيك غير أيام الشقا
وأثناء مرورنا بجوارك بشدنا الحنين
لشوية شباب عشنا معهن أيام الصفا
والحكيم اليوم رجّع إلنا شوية ذكريات
عشناها في الفرقلس بالطفولة والصبا
ستة وأربعون عاما" وأنا عنك غريب
واليوم أصبح حنيني للفيافي والروبا
عسى نلتقي يا حبيبتي بعد تلك السنين
فشوقي لكل بيت فيك نجد أهله ترحبا
وأدعو لك يا قريتي على مرور الأيام
بالعز معمّرة وساكنيك بالسعادة تنعما

كل الشكر للحكيم الغالي الذي أعادنا للماضي الذي عشناه في قرية الفرقلس وإن كان قد أصبح من الذكريات .

******** البسيط /م.ع.س ********

Posted by: ملك الاحساس

اول شي كتير حلووووووووووووه القصيده
ومشكور كثير عليها
اتمنى لك التوفيق

موقع زيدل سوريا حمص .. خدمات تشات و دردشة ... أرشيف المنتدى