الارشيف - موظف قرفان

Pages: 1

موظف قرفان
(انقر هنا ان احببت مشاهدة الموضوع الاصلي بالالوان و الصور )

Posted by: جورج سيمون رزق+

هاد مرة موظف وقف عند البقالية يلي بحارتو واشترى شوية غراض وعند الدفع طلب من صاحب البقالية انّو يسجّلهن عليه بالدين فرفض صاحب البقالية وقلو أنا ما بقا أتعامل إلا بالكاش بَدي !!! (cash Money)

فقلو الموظف متعجب: بدك كاش ؟؟

قلو صاحب البقالية: اي ليش لأ ؟

فجاوبو الموظف :

لأنو الكاش غير متوفر بالأسواق المحلية

لأنه تجمع بأيدي شلة من الحرامية

والحرمية صارو كتار والكترة غلبت الشجاعة

والشجاعة كنز لا يفنى

والكنز موجود بالمغارة

والمغارة ما بتفتح إلا لعلي بابا والأربعين حرامي

والأربعين حرامي صارو ملايين

والملايين عم تندفع لضعاف النفوس رشوة

والرشوة صارت حق

والحق يا حسرتي ضاع

والأكل ما عاد منو غذاء

والغذاء مقابل النفط

والنفط جاب البلا على روسنا

وروسنا تمرمطت بالأرض

والأرض مقابل السلام

والسلام صار استسلام

والاستسلام ضيّع الكرامة

والكرامة ربح على الوحدة

والوحدة صارت حلم

والحلم سيد الأخلاق

والأخلاق تحوّلت لنفاق

والنفاق جمع نفق

والنفق لازم يتكمّل

ولحتى يتكمّل بدو متعهد بناء صالح

وصالح ما عاد صالح بهالأيام

وبهالأيام صارت المفاهيم مقلوبة

والمقلوبة بدها بيتنجان ولحمة

واللحمة ماعادت تفوت لبيت الفقرا ولو نطحو الحيطان

والحيطان صار إلها أدان

والأدان معبّية البلد

وهالبلد صار في أكل هوا

والهوا صار فيه تلوث

والتلوث عشعش بالنفوس.... والسجل المدني والقضاء

وللقضاء على القضاء صار بدو قضاء وقدر

والقدر علينا مكتوب

والمكتوب ما في منو هريبة

والهريبة تلتين المرجلة

والمرجلة ما عادت لكل واحد

وكل واحد الو ساعة

والساعة آتية لا ريب فيها

يوم يأخذ كل ذي حق حقه الذي شفِط منه في الدنيا

وعلى الدنيا السلام

مشان الحصول على الأختام

والأختام عند المدام

والمدام كانت شامية وهلأ صارت روسية شقرا

والشقرا بتهز الأرض

والأرض بتتكلم عربي

والعربي مو عرفان وين حاطو الله

والله إذا منضلّ على هالحالة لتسحبنا الكلاب

والكلاب أحسن من البني آدم

وآدم علق علقة مصخّمة مع حوا

وحوا ما بتعرف غير كلمة بدّي

وبدي ألعن أبو هالحالة........

موقع زيدل سوريا حمص .. خدمات تشات و دردشة ... أرشيف المنتدى