الارشيف - مطلوب رأيكم بأخبار الوفيات في الموقع

Pages: 1

مطلوب رأيكم بأخبار الوفيات في الموقع
(انقر هنا ان احببت مشاهدة الموضوع الاصلي بالالوان و الصور )

Posted by: hosam abdulaziz

مرحبا جميعا
بما انه عجبتكم قصة الديموقراطية رح نكفي فيها و استشيركم بشغلة

هل بتلاقوا اي رفض لطريقة عرض اخبار الوفيات في الموقع
اللي بقصده ان كثير اوقات بينزل خبر وفاة شخص (بعيد الشر عن الجميع) ضمن اخبار افراح او ولادات جديدة
يعني بيصير خبر حلو خبر محزن خبر حلو .........

فهل بتتمنوا يكون العرض بغير هيك اسلوب (مثل عزل اخبار الوفيات بمكان مغاير لاخبار الافراح)
او انه بما انها سنة الكون فالامر عادي جدا.

Posted by: iyad tahhan

أول شي يعطيك ألف عافية على كل اللي عم تقدمو للموقع و اللي دايماً محطة إعجاب

أما بخصوص أخبار الوفيات
أنا بتوقع الفرح و الحزن بيضلو أخبار عن اللي عم بيصير بالضيعة و بما انو الموقع بيعنى بأبناء القرية المقيمين و المغتربين أكيد هالشي بيسهل عليهم معرفة أخبار القرية و المشاركة فيها و لو كان من بعد بإرسال بطاقة التهنئة أو التعزية عبر الموقع
و بهيك حال بيبقى أي خبر شو ما كان نوعو فرح او حزن مجرد نقل خبر يعني مافي أهمية التميز او الفرز بين الأخبار
أما إذا كانت الإدارة الكريمة عندا رأي ثاني بعتقد مافي شي عملتو الادارة و كان إلو معارضين و إذا صار في معارضين إماكنية إعادة الوضع لما كان عليه واردة مع إجراء التعديلات الجوهرية اللي ممكن توصل لنتيجة ترضي الجميع .

بيضل كلامي رأي شخصي مع إحترامي للجميع

Posted by: RUSHA AWAD

سلامات صهر
أني بأيد فكرة انو يضلو اخبار الوفيات والولادات والأفراح على نفس الشريط
وانتي واياد عطيتو المبررات الكافية وبالنهاية كلها أخبار لازم الناس تعرفها
بزيدل وبرات زيدل.

مع حبي واحترامي
رشاعواد

Posted by: wajdy barakat

وانا معكن بانه تظل الاخبار مع بعضها لانه بالنهاية الخبر خبر شو ما كان والله يبعد الاخبار السيئة والمحزنة عن الضيعة والاكيد انه مثل ما في افراح في احزان ومثل ما في اهمية للاولى في اهمية للثانية وشكرا حسام والله يعطيك العافية .

Posted by: Kinan

لاء اخي عادي خليهون مثل ما هني هلق ما بتصور في اي مشكلة بهالشي
بالتالي هي كلياتها اخبار من الضيعة
و منهتم نعرفها اذا كانت حزن او فرح
و شكرا الك

Posted by: حكيم عيون

يعطيك العافية حُسام على هالتعب بالسعي ليظهر هالموقع بالصورة المثلى ....
والحقيقة التغيرات الأخيرة كثير عجبتي شخصياً ...
بس من ناحية أخبار الوفيات أنا إلي رأي شخصي ....بخالف فيه الشباب شوي ...
صحيح الموت والولادة ..والحزن والفرح ...هنّي المسيرة الطبيعية للحياة بهالدنيي ..بس الإنسان لازم يشوف من هالدنيي نص الكبّاية المليان قبل مايشوف نص الكبّاية الفاضي..
ومنشان يضل للفرح الركن اللي بيقابلوا بحياتو ...
أنا من ناحيتي بفضل يكون ركن الوفيات زاوية ماتشوفها العين إلاّ بوقت اللي بدها تشوفها ....
بيبقى هذا رأي شخصي ...وبالنهاية رأي الأكثريّة من الأعضاء والناس بيبقى هو الأهم ...

وفي عندي ملاحظة ثانية ...على الألوان بالموقع ...
ألون الصفحة الأولى الرئيسية على الموقع كثير حلوي و مُريحة للنظر ..
بس اللون الإفتراضي للمنتدى ...بحسّو ما عاد عميتناسب مع ألون الصفحة الأولى ....
بيبقى هذا رأي شخصي كمان ..
بالنهاية برجع بقول لحسام يعطيه العافية على التعب وطولة البال بالسعي لإرضاء أذواق أكبر عدد من الناس والأعضاء..(و معروف إنو إرضاء كل الناس غاية لا تدرك)...

Posted by: hosam abdulaziz

شكرا لجميع اللي شاركونا بالنقاش و اللي جميعهم اتفقوا على رأي واحد
باستثناء الاخ حكيم عيون اللي فيني رد عنقطتين

المشاركة الأصلية كتبت بواسطة حكيم عيون

أنا من ناحيتي بفضل يكون ركن الوفيات زاوية ماتشوفها العين إلاّ بوقت اللي بدها تشوفها ....

وفي عندي ملاحظة ثانية ...على الألوان بالموقع ...
ألون الصفحة الأولى الرئيسية على الموقع كثير حلوي و مُريحة للنظر ..
بس اللون الإفتراضي للمنتدى ...بحسّو ما عاد عميتناسب مع ألون الصفحة الأولى ....

موضوع الركن الخاص بالوفيات هو امر موجود (من قائمة زيدليات)
بس يا ترى لو صارت حالة وفاة جديدة و ما حطينا الخبر يبين بالرئيسية
فقديش نسبة اللي رح يخبروا من الموقع من اول يوم ؟؟؟؟
بتصور رح تكون قليلة و اغلبهم رح يخبر بالموضوع بالتناقل قبل الانترنت
و هيك رح ينتقص حق الموقع من انه يكون وسيلة اولى لأبن القرية ليعرف اخبارها حتى لو كانت حزينة.

موضوع الالوان انا بايدك فيه
و ما بنكر اني كنت ناوي قوم بتعديل على الوان المنتدى ليتماشى مع التغييرات الجديدة , و اللي شملت جميع اركان الموقع باستثناء المنتدى
ترددت بالخطوة و اجلتها حتى اشعار آخر بعد ما شفت ردة فعل اهل البيت من ابناء المنتدى دفاعا عن حق منتداهم بالصفحة الرئيسية
فقلت خليك بعيد عن المنتدى احسن ما تزعج اهل المنتدى مجددا.

بس في حل وسطي انه بنعمل تصميمين (القديم + الجديد بالوان متوافقة مع الرئيسية)
بنخلي الجديد هو الاساسي
و اللي بيحب الالوان القديمة و قلبه بيهواها و متعود عليها فيه يختار هالشيء من الاعدادات الشخصية او من قائمة منسدلة باسفل الصفحة الرئيسية للمنتدى
طبعا اللي بيختار الشكل القديم في يختاره عطول ما في داعي يغير هالشيء كل مرة.

موقع زيدل سوريا حمص .. خدمات تشات و دردشة ... أرشيف المنتدى