Pages: 1
موقع زيدل مطلوب رأي الجميع
(انقر هنا ان احببت مشاهدة الموضوع الاصلي بالالوان و الصور )
Posted by: Kinan
مرحبا للجميع
في عندي اقتراح او استفتاء
انا بعرف انو اغلب اعضاء منتدى زيدل مو عاجبهون الوضع اللي هوي عليه المنتدى بالصفحة الرئيسية
يعني اني اللي عم يصير معي وقت عم افتح موقع زيدل بالتصميم الجديد بتطلع بالصور الكبيرة اللي هي اخر الاخبار و عالاغلب برجعها بايدي على الصورة الاولة لانو بتكون قلبت عالصورة الثانية قبل ما تفتح
عاليسار ما بتطلع ابدا لانو عرفان انو نفس الاخبار اللي موجودة بالنص
منجي للاخبار السياسية
بتطلع على المختارات الادارية اذا عجبني العنوان فتحتو ما عجبني العنوان ما فتحتو
المنتدى عم يكون نص العنوان طاير و ما مبين مين كاتبو و لا عدد المشاركات و لا شي
انا عندي اقتراح انو
هل في مجال تلتفي الصور الاساسية الكبيرة بالنص لانو هي نفسها عم تكون عاليسار
و هل ممكن تصير مواضيع المنتدى بالنص محلها خصوصي انو هالصور حجمها كبير و واقات عم تبطئ التصفح
هل ممكن انو الاخبار تقتصر على اقسام بس او صفحة خاصة و ما تكون حائزة على اغلب الواجهة الرئيسية
شو رئيكون لو موقع زيدل رجع ترتيبو مثل ما كان اول يعني المنتدى بالنص و الاخبار الزيدلية على اليمين و اليسار؟؟
بتمنى من الجميع المشاركة بالرد و التصويت
و أي او اقتراح بحيث ممكن يساعد بتطوير و تحديث الموقع و عملو بشكل يريح الاستخدام
و برجع اكيد بشكر حسام على الجهد و الوقت اللي عم يقضيه بالعمل و التطوير بموقع زيدل 
Posted by: wajdy barakat
والله يا كنان اني معك بكل شيء قلتو وبصراحة ان كان اخبار الضيعة فما ضروري تتصدر الوسط وبالنسبة للاخبار السياسية ترى اني من متابعين سوريا نيوز وما بحاول اقرا بتمعن شو في على موقع زيدل وانا الشكل القديم عجبني اكثر لو انو الوان الجديد احلى بكل الاحوال انا مؤيد الك وطبعا مع الشكر لحسام على محولات التتبع لكل شيء بخص الموقع والسبيس .
Posted by: ABUODEE
|
اقتباس:
|
|
الشكل الجديد جميل ولكن يحتاج الى بعض التصحيح و التعديل
|
اول شي بدي اشكر حسام على تعبو بالموقع والسبيس
برأي الموقع بشكلو الجديد صار كانك فايت على موقع اخباري وسياسي مثل موقع سيريانيوز
اذا في نية لقلب الموقع اخباري فهيك شي بيرجع لقرار صاحب الموقع
اما اذا الموقع المقصود فيه موقع لضيعة وتطويره الى الاحسن فبعتقد
انو اذا عطينا المنتدى حقو اكثر من هيك بيكون ازبط
يعني انا من الناس الي اذا بدي اقرا اخبار رح روح على السيريا نيوز بدون نقاش
اول شي اخبارها موثوقة وبنفس الوقت في تحقيقات بتشد الواحد للقراءة
هلق عم نحكي عن المنتدى وبرأي يرجع على النص ويبين كاتب الموضوع وعدد القراءات بيكون احسن وبالتالي الرأي للادارة
اما الصور الي بالنص بعتقد كمان فينا نستغني عنها بما انو عم تنحط الصور بشكل مصغر وتحتها عنوان الحدث المهم انو نعطي المنتدى حقو من الموقع
اما عم المشاكل الثانية هاي قديمة بس بما انو صار وصار الحديث فياريت تلاقولنا حل وبسرعة لمشكلة الفير فوكس وتصفح صور ستوديو ماجد عواد
سبق وسالت حسام عن المشكلة وقال انو في سيكورتي على نسخ الصور من ستوديو ماجد
هلق اذا في عندك سيكورتي ياريت تحط السيكورتي الي بدك اياها بس المهم اقدر اتصفح الصور بدون الرسائل المزعجة
الملف المرفق 4595
كل مابدي فوت بتطلع وكل مابدي ارجع بالصفحة بتطلع وكل هالقصة مابعرف ليش
على الفايرفوكس مابيفتح لا الاستوديو ولا لوحة الشرف كمان نفس القصة
بهالوقت صارت العالم تقلب على الفيرفوكس وانت ياحسام من اول الي بيشتغلو على الفيرفوكس
بعدين في كود بينحط بيمنع نسخ الكتابة كمان ياريت تحطوه على منتدى الشعر والغزل والقصائد للشعراء المتميزين الي عم يشاركو معنا
بصراحة كتير اشعار بمجهود شخصي عم نلاقيها منقولة لمنتديات اخرى
في حلول تانية رح اقترحها اذا حسام حابب يغيرها اما اذا مو حابب يغيرها رح اكتفي لهون بشرح القصة
هاي بالنسبة للسيكورتي والفايرفوكس وياريت تحللي القصة لانو كمان صرت سامعها من كثيرين بيستخدمو الفايرفوكس
وبالتالي مافي شي اسمو سيكورتي 100 % على النسخ ان كان صورة او كتابة
واكيد نحنا مع التغير بين كل فترة وفترة
وان شاء الله الى الامام دائما
وشكرا ابو الحس على تعبك الدائم معنا
Posted by: samar dahi
شكرا يا كنان على الموضوع لانو بصراحة يا حسام صرت سمعانة شي مية نقد على الموقع بشكلو الجديد وما بدنا نجامل بعض ونقول كل شي منيح وحلو . لا في اشيا مانها مزبوطة ولازم نغيرها وهالشي ما بينفي انو نقدر و نشكرك يا حسام على التعب اللي عم تعملو مشان تطويرالموقع ولكن لما الواحد بيسمع اكثر من راي عن نفس القصة ونفس الملاحظة فالمفروض ياخد هالشي بعين الاعتبار .
الشي اللي قالو عبودي بحرفيتو كنت بدي قولو ..انو الواحد صار لما بفوت على موقع زيدل كانو فايت على موقع سيريانيوز وانا ماني مضطرة اني فوت على زيدل حتى اقرا الأخبار بكل تفاصيلها افضل اني فوت على سيريانيوز بيكون احسن ..فالحجم الكبير للأخبار كثير مبالغ فيه ....والمنتدى انهضم حقو كثير كثير وانا بتصور هاي ثالث مرة بقلك هالشي يا حسام ...
وانتو احرار ولكن انا بصراحة ماني حابة هالشكل الجديد كثير وكثير ناس مثلي وبدون زعل يا حسام ....
بدو تعديل مثل ما قالو الشباب انو يرجع المنتدى لنص الصفحة واخبار الضيعة بصورها مثل ما كانت قبل والأخبار ترجع لنفس الموضوع ...
انا عم فوت على موقع قريتي بدي اهم شي يكون فيه هو اخبار ضيعتنا وبعدين اخبار العالم اللي بتصور انو عم نقراها كلنا من غير مواقع مع احترامي الكبير لتعبكن بهالأخبار ولكن موقع زيدل مانو اخباري هو موقع لضيعة اسمها زيدل وغايتو نتواصل ولاد الضيعة بكل انحاء العالم مع بعضنا ...
انا عم انقل راي كثار من الناس يا حسام و المفروض تاخدو بعين الاعتبار راي اغلب الناس واللي بتصور انتقل لالكم مباشرة هالشي .....
بتمنى من الإدارةالتجاوب مع هالاراء هاي اللي بتمثل شريحة كبيرة من متصفحي موقع زيدل ..
وشكرا الكم على جهودكم وتعبكم
سمر
Posted by: Kinan
شكرا شباب على هالمشاركات الحلوة و انا ما عملت هالموضوع غير لانو سمعت كثير حكي و انتقاد لهل قصص
الموقع للضيعة و النا اذا ما نحنا شاركنا في تحسينه و بنائه بحياتو ما رح يتقدم
بتمنى من الجميع الدخول و المشاركة او التصويت و انا متأكد انو الادارة رح تتقبل هالنقد او الاراء بكل رحابة صدر
و انشالله موقع و منتدى زيدل الخضراء دائما للاحسن
Posted by: ABUODEE
ماني عرفان ليش الصورة تبع الرسائل المزعجة الي بتطلع لما بنفوت على كل صورة من صور استوديو ماجد بالرد تبعي بطلت تطلع مو بالعادة
صارت تطلع هيك
مع انو حطيتها وكانت هيك
Posted by: Kinan
عادي ابو عبيد بتكون خطئ لما تم نقل الموضوع
المهم منيح حطيت الصورة مرة ثانية
على فكرى انا اليوم جربت مثل ما قلتلي انو استديو ماجد و لوحة الشرف ما بيفتحو على الفير فوكس
بالفعل بتفتح الصفحة كانك فاتح صفحة جديدة بيضة و بدون عنوان
Posted by: hosam abdulaziz
مرحبا جميعا
بداية بحب وجه الشكر لجميع المشاركين بهالحوار و السبب هو اثباتهم لمحبة و غيرة لهالموقع اللي بيمثل قرية زيدل على الشبكة العنكبوتية.
رح اشكر كنان عالمشاركة كونه من اهل البيت و هالشيء بيدل على مساحة الحرية و الديموقراطية اللي بنتمتع فيها ضمن العيلة , بعيدين عن المجاملة و الاطراء اذا كان في غير محله.
بالنسبة للتغييرات اللي صار بالموقع كان الهدف منها تجميلي بالدرجة الأولى و تقنية بالدرجة الثانية
الحمد الله كان في شبه اجماع على تحقيق الهدف الاول من التغيير .
اما الشق التقني فما رح اخفيكم الامر كان في تذبذب بالآراء و بينها الأسباب اللي طرحتوها
في نقطة لازم تعرفوها و انا عن بحكي من خبرة طويلة , انه يستحيل اننا نصل لصيغة مثالية ترضي جميع الأطراف.
بس كمان انا ما فيني اتجاهل الأصوات اللي عم تدعي لتغيير في اجماع عليه
لهيك قبل ما نقوم باي تعديل لازم نسمع اكبر شريحة اصوات من زوار الموقع
رح نفتح هالمشاركة للجميع ليعبروا عن آرائهم و عأساسها بنقرر
مثلا جميع المشاركين لحد الآن من شريحة بتحب المنتدى (لهيك بيهمها امره )
و من شريحة بتدخل يوميا عالموقع (لهيك كنان بيقول الصورة بالوسط ما في فائدة عملية)
بس انتم بتعرفوا انه في ناس يمكن ما بتعرف كثير شي عن المنتدى و في ناس ربما كل 3 ايام او اسبوع لتدخل الموقع
فلازم نسمع اغلب الآراء.
بالنسبة للفير فوكس هذا متصفح بحتروموا كثير و كان بأولويات عملي للتغييرات انه شكل الموقع يتوافق معه تماما مثل الاكسبلورر و الحمدالله كانت النتائج جيدة
لهيك رح اتجاوب معكم برفع الحظر عنه بقسم استديو ماجد و صفحة الشرف للمتفوقيين
اما اضافة زر الحماية للقصائد الشعرية فهو امر ممكن و لاح نقوم عتنفيذه. بس ما بعرف يا عبودي اذا هذا النموذج اللي بتقصده (دليل هاتف زيدل) جرب انسخ منه , بس الخطأ اللي عمتصوره لستديو ماجد منه موجود عندي عالاكسبلورر 6 فهل انت من مستخدمين الـ7 و عمليا هو مو خطأ و انما رسالة تحذيرية قد تستطيع التخلص منها من اعدادت المتصفح
رح نفتح هالمشاركة للجميع و انشاء الله رح نكون كلنا راضيين.
Posted by: Kinan
الموقع الجديد فيه امكانية للتصويت و اللي هوي موجود باسفل الصفحة بالامكان تغير التصويت الحالي ووضع تصويت عن مدى فعالية الشكل الجديد للموقع
بهيك رح يكون مفتوح للعموم اكثر و اكيد فكرى ممتازة انه الموضوع يكون مطروح للعامة بحيث انو الجميع رح يكون الو صوتو و تعليقو
حتى انا بقترح انو نحط هالموضوع بالسبيس على شكل مدونة او تصويت لانو اكيد بيهم راي شباب السبيس بهالقصة
Posted by: ABUODEE
|
اقتباس:
|
|
اضافة زر الحماية للقصائد الشعرية فهو امر ممكن و لاح نقوم عتنفيذه. بس ما بعرف يا عبودي اذا هذا النموذج اللي بتقصده
|
يعني فيك تقول انو كل شي وهالرسالة عم تطلع ((الرسالة التحذيرية))
فيك تقول في شي بيضيق الخلاق
في كود بينحط وبيعملك سيكورتي على النسخ مثل السيكورتي تبع دليل هاتف زيدل ولكن بدون هالرسالة التحذيرية
|
اقتباس:
|
|
و عمليا هو مو خطأ و انما رسالة تحذيرية قد تستطيع التخلص منها من اعدادت المتصفح
|
يعني اذا انا عم استخدم اكسبلورر 7 ليش حتى اضطر انا وغيري الغاء هالخاصية من اعدادات المتصفح؟؟
اذا في مجال تشيلها شيلها حتى نصير نفوت عن طريق الفيرفوكس اما اذا مافي مجال تشيلها فرح اضطر مافوت على الاستوديو متلي متل غيري
يعني هيك انت مانك عم تكسب زوار لهالقسم اذا رح تضل هالرسالة تطلع مع العلم انو في اكواد بتحطها بتمنع النسخ بدون ماتطلع هالرسالة التحذيرية
ماعلينا وخلونا نشوف نتائج التصويت وان شاء الله خير
Posted by: Kinan
بس تعقيب صغير انو حسام عم يحكي انو هوي عالاكسبلورر رقم 6 ما عندو مشاكل
بس انا بتصور انو 90 بالمية من الناس عندها الاصدار 7
بعدين هلق نزل الاصدار رقم 8 و اكيد في شريحة كبيرة من المستخدمين رح تحدث هي اذا ما نزل لحالو عن طريق تحديث الوندوز
القصد انو الاكسبلورر 6 صار قليل استخدامو حتى انت وقت بتفوت على مواقع عالمية من اكسبلورر 6 بيطلبو منك تقوم بالتحديث او تفوت عن طريق متصفح ثاني
فا بتصور انو لازم يكون يتم الاخذ انو الاكسبلورر 7 هوي الاساس و ليس 6
Posted by: hosam abdulaziz
ما بعرف اذا قلة المشاركات بهالموضوع سببه انه السكوت علامة الرضا
او انه شعبنا بزيدل تعودنا عليه بيحب القراءة اكثر من الحوار
طرحنا الموضوع بالصفحة الرئيسية و بالسبيس لكن المشاركات لحد الآن قليلة.
على كل رح ننطر بعد و نشوف النتيجة
بالنسبة للتغيرات الاخرى قمنا فيها جميعها تقريبا باستثناء لوحة الشرف اللي رح نحدثها بالنتائج الجديدة و نعدل عليها فورا
Posted by: ABUODEE
|
اقتباس:
|
|
بالنسبة للتغيرات الاخرى قمنا فيها جميعها تقريبا باستثناء لوحة الشرف اللي رح نحدثها بالنتائج الجديدة و نعدل عليها فورا
|
الف شكر الك ابو الحس وبعرف مابتقصّر
اللـــه يعطيك العافية
هيك هلق صار فينا نشتغل على الفيرفوكس بدون مشاكل ورسائل مزعجة 
وبانتظار نتائج التصويت 
بس في شغلة دوختني
اعتبر انت هلق بقلب الموضوع هيدا وطلعت لفوق وكبست على زر الانتقال الى المنتدى عم يحولني على الغرفة الصوتية (( الدردشة ))
المنتدى
بس ليش ماعرفت 
Posted by: Kinan
عبودي هي مجرد خطأ تقني و بيتصلح فورا
|
اقتباس:
|
طرحنا الموضوع بالصفحة الرئيسية و بالسبيس لكن المشاركات لحد الآن قليلة.
على كل رح ننطر بعد و نشوف النتيجة
|
بالفعل شكلو ما حدى حابب يعطئ رأي و عم يكتفو بالتصويت يا ريت بس اللي عم يصوت انو الموقع بحاجة للتعديل يكتب شو هوي التعديل اللي بيلاقيه مناسب مشان الادارة يكون عندها علم و بيجوز تنتبه لشغلات تكون غفلاني عنها
بس ما تكون
|
اقتباس:
|
|
ما بعرف اذا قلة المشاركات بهالموضوع سببه انه السكوت علامة الرضا
|
على كل حال رح مننتظر شوي بعد
Posted by: hosam abdulaziz
مرحبا جميعا
اشتغلت بالمدة الاخيرة على حل بتصور انه هيك لازم يرضي الجميع
تخلينا عن نشر الاخبار مع ترك مساحة صغيرة لمختارات ادارية بننشر فيها اخبار هامة بتخص البلد
و بعدها بتجي مشاركات المنتدى
فشو رأيكم شوفوا الصرورة بالمرفقات
Posted by: RUSHA AWAD
عزيزي حسام
اول شي يعطيك العافية عالفكرة بحد ذاتهي بتجديد الموقع
وهالشي بياخذ وقت وتعب ووجع راس.
شكرا لأنك عطيت مجال للمتصفحين حتى يعطو رأيهن وانتقاداتهن
وهالديمقراطية عاجبتني كثير..... الصورة المرفقة بظن انها تلاقي
ترحيب عند الكل مع العلم انو المساحة الإخبارية زغرت كثير
بس اني بتصور انو انتي مانك مبسوط كثير لأنو الشي اللي كنت
انتي حابو بالتناظر والتناسق بين الجهتين اليمين واليسار ماعد موجود
على كل حال بتصور مارح يكون في شكل نهائي لبعد كم شهر وعلى طول
رح يكون في اضافات وتعديلات.
مع حبي واحترامي
رشاعواد
Posted by: Kinan
ممتاز جدا انا بأيي انو هيك كثير حلو
او شي اخبار الضيعة صارت تبين بشكل اكبر و مع صور لانه صار الها مساحة اكبر عاليمين و اليسار
المنتدى اخذ حقو و رجع مثل اول
الاخبار ما التغت و ضلت المختارات الادارية اللي انا ذكرت انو الوحيدة اللي كنت اقراها لانها عنجد حلوة اما الباقي فا صار على جنب
و الصورة الكبيرة بالنص ما التغت صحيح هي يمكن كبيرة بالتحميل بس الصراحة عاطية جمالية بالموقع
يعطيك العافية اخي و انشالله هيك يكونو كل الاعضاء موافقين على هالتغييرات
Posted by: samar dahi
اي ها هيك يا حسام ..........
من الأول كان هيك الاقتراح وهلق مشي الحال .....
بتصور هلق كل شي أخذ حقو ...
الصورة اللي بالنص كثير حلوة وعاطية جمالية للموقع مثل ما قال كنان حتى لو كان حجمها كبير مو مشكلة .....واخبار القرية بكل مجالاتها اخذت حقها كمان ....والمنتدى رجع لوضعو الأول ...والأخبار التغت واللي كانت آخذة الحجم الأكبر واكتفينا بالمختارات الإدارية وهي الأهم ...... كثير حلو هالشي ...
هلق صار فينا نقول انو الموقع اخذ الصورة النهائية الو والمثالية...على الأقل بنظرتي الخاصة .. ....ومنتمنى من الجميع اعطاء الراي ...وبدنا نشكر حسام على هالديمقراطية اللي سمحتلنا انو نعطي آراءنا ويلبي رغباتنا مو مثل ديمقراطية ال ......
شكرا من القلب لتعب حسام الكبير اللي بدو حقيقة شكر لانو هالشي اخذ من وقتو كثير على حساب بيتو ومرتو لانو هاد كان حلم بالنسبة الو انو يحققو قبل ما يسافر وما يعود يلاقي وقت لانو يعمل هالشي ..فكلنا امتنان الك على هالتعب .....
شكرا يا حسام
Posted by: habibalomrre
حسام الله يعطيك العافيي على كل ها التعب ( هيك منيح كتير ), بس لا تنسى كمان بالنسبة للمنتديات تضيف أسم كاتب الموضوع الأصلي وليس آخر مشارك فقط أو بمعنى آخر : ظهور أسم آخر من رد على الموضوع فقط .. فالأفضل لو تعبت شوي زيادة , ـ وذلك حفاظاً على أحقية الكاتب الأصلي للموضوع في الظهور ـ والله ولي التوفيق وشكراً لك ولكل دقيقة عمل قمت بها ... ومرة أخرى أهنئك على الانفتاح الحكيم والمحبب لهذا العقل التقني والمنفتح على كل الآراء ............ سلاااااااااااااااام لك أين حللت.
حبيب العمر
Posted by: hosam abdulaziz
و الصورة الكبيرة بالنص ما التغت صحيح هي يمكن كبيرة بالتحميل بس الصراحة عاطية جمالية بالموقع
كنان الصورة بالوضع الجديد انا نقصت ارتفاعها 50 بكسل كانت 250 صارت 200
اضافة اني زودت المدة الزمنية لقلب الصورة من 5 الى 8 ثواني و هيك بتصور تتحمل الصورة قبل ما تقلب
لقيت كثير مرحبين بالصورة الوسطية لهيك حبيت خافظ عليها اضافة الى جمالية الخبر وقت ينزل اول شيء بالوسط بحجم كبير.
.وبدنا نشكر حسام على هالديمقراطية اللي سمحتلنا انو نعطي آراءنا ويلبي رغباتنا مو مثل ديمقراطية ال ......
سمر لا شكر على واجب بس انا حسيت انه تعبي كله كان عالفاضي وقت لقيت هالاحتجاجات عالشكل الحالي
و انا اكيد ما هدفي من التغيير اني كون مقتنع لحالي بالتغييرات.
لهيك هلق وقت سمعت رأيك و رأي رشا و كنان و حبيب العمر
رجعتلي الفرحة و وصلني حقي مجددا من كل الوقت و التعب اللي صرفته بهالعمل.
لا تنسى كمان بالنسبة للمنتديات تضيف أسم كاتب الموضوع الأصلي وليس آخر مشارك فقط أو بمعنى آخر : ظهور أسم آخر من رد على الموضوع فقط ..
عمي انشاء الله هالطلب و غير طلبات رح حققها لاحقا بس خلينا هلق نخلص من الأساسيات اما الثانويات فمقدور عليها انشاء الله لاحقا.
على كل انا انشاء الله من هون لنهاية الاسبوع بكون انهيت العمل عالتغيير الجديد لأنه بده شوية شغل و خصوصي ليتوافق مع كافة المتصفحات المعروفة.
Posted by: ABUODEE
اللـــــه يعطيك العافية حسام والله لايضيعلك تعب
بصراحة بعد التغيرات الجديدة وتوسيط اخبار المنتدى لمنتصف الموقع صار 100 % ممتاز
فيك تقول رجع الموقع الزيدلي الي منعرفو زيدلي وماتعودنا عليه يكون اخباري سياسي بحت
وبدك ماتزعل اذا لقيت معارضات واحتجاجات على الشكل الحالي لانو التغير صار 180 درجة وقلب موازين المنتدى الزيدلي
وبعتقد بعد هالتوسيط وتخفيف الاخبار رح يرجع كل شي تمام التمام ومارح تشوف احتجاجات ان شاء الله
|
اقتباس:
|
|
على كلٍ انا انشاء الله من هون لنهاية الاسبوع بكون انهيت العمل عالتغيير الجديد لأنه بده شوية شغل و خصوصي ليتوافق مع كافة المتصفحات المعروفة
|
اهم شي الفيرفوكس ابو الحس 
شنو لانو اذا بدك تعمل مثل اول والمشكلة الي كانت بالفيرفوكس رح تلاقيني اول واحد بيحتج 
اللــــه يعطيكم العافية جميعاً وكل الشكر الك ولرحابة صدرك ابو الحس
Posted by: Kinan
حبيت بارك لكل اللي كانو معارضين على التصميم الجديد و قلهون مبروك و انشالله هلق بتكون انحلت كل المشاكل
و بدي اشكر حسام كثير على تعبو و استماعوا لجميع الشكاوي و الاقتراحات حول الموقع
Posted by: Nada1981
مرحبا جميعا
شكرا كنان لطرح الموضوع والشكر الاكبر لحسام على تعبه
الموقع هيك صار بحلته الجديدة اكتر من رائع.
تحياتي
ندى
Posted by: hosam abdulaziz
مرحبا جميعا
بتمنى هالتغييرات الاخبرة تكون لاقت استحسان و رضا الجميع
و شكرا لاهتمامكم و غيرتكم عالموقع
بالنهاية نحن من دون آرائكم ما فينا نصل للافضل
Posted by: samar dahi
حسام مشكور ...كل شي حلو ....بس لازم تكون شفت هالخطأ التقني اللي عم يصير ..وقت اللي عم نكبس على آخر خمسين مشاركة ما عم تفتح صفحة جديدة مثل قبل ..عم تفتح صفحة آخر خمسين مشاركة بمكان المنتدى بالصفحة الرئيسية ...ما بعرف هالشي شو سببو وانتو الاختصاصيين التقنيين لازم تعرفو هالشي ...
وشي تاني بدي قول نفس الملاحظة اللي قال عنها ابو هاني مشان تحط اسم صاحب الموضوع مو بس آخر واحد شارك فيه ............
الله يعطيك العافية من جديد ...بتصور كل شي صار تمام هيك ...
Posted by: hosam abdulaziz
سمر شكرا للتنويه
صححت الخطأ
اما موضوع اسم الكاتب عطوني شوية وقت بس لآخذ نفس و بعدين انشاء الله الامور كلها بتصير عكيفكم
Posted by: hosam abdulaziz
و أخيرا زبطت معي قصة اضافة اسم الكاتب
بس هل بتلاقوا انها عملت شوية ازدحام بالوسط او هيك الامور مقبولة و تمام.
Posted by: silva
الموقع بحلته الجديدة رائع ولكن يحتاج منا بعض الوقت لإتقان استعماله 00بوركت جهودكم ياغوالي حسام وفؤاد بحسب ما قرأت أناملكم المبدعة 00وفكركم المتميز سطرتموه بجمال رائع وفقكم الله وإلى المزيد من النجاحات تقبلوا شكري وتقدير لعمكم
Posted by: Fadi Harris
شكرا لك أخ حسام وإنشاء الله بنضل نشوف أفكارك الحلوة .
Posted by: waddah
عندما دخلت منزلكم الجميل لم أنتبه لجدرانه وششبابيكه وأبوابه وانما سحرني دفء هذه العائلة الجميلة وروحانية الهمسات بين السطور .. دائما نسعى للأفضل وهذا هو المهم ومشكورين على التقدم المستمر
ولكن أرجو التقدم في بنية الموقع مترافقة مع التقدم في تقنياته ..
لاتزال الكروم تنضح بخمور النجاح
تحياتي للجميع
waddah
Posted by: Fadi Harris
طيب أنا من جهتي رح قول شو هوي التعديل ياريت الإدارة بتحط شي صور متحركة من برنامج flash متل ما كان بالسابق بس تكون غير وأحلى يعني مثلا تعمل أحرف كلمة زيدل تدور وبعدين تنزل بمكانها المخصص أو مثلا تخلي حرف Z يبقى يدور طول الوقت ويوقف شوي ويرجع يدور .............. يعني هيك شي .
Posted by: hosam abdulaziz
شكرا فادي للرأي
بس نحن قمنا بالتغيير حتى نغير عن وضع سابق استمر لسنين طويلة
موضوع الصورة المتحركة كانت جميلة عند ظهورها كتقنية جديدة
اما الآن فنحن اقرب الى الهدوء و الكلاسيكية اسوة بالمواقع المعروفة على نطاق واسع.
Posted by: dj-hani
تاكيد لكلام الادارة :
من الخطوات الهامة ببناء الموقع هيي انو يكون الموقع خفيف يعني ما بحاجة لوقت كتير حتى يتحمل ع المتصفح
و الفلاش رح يزيد من هالوقت مما يسبب ملل للزوار و رح يسكرو الموقع قبل ما تفتح الصفحة الرئيسية
هاد اضافة الى انو مو كل الزوار بينتبهو انو ينزلو عندون ال flash منشان تفتح هالملفات ال5فلاش الموجودة بالصفحة .... و بالتالي رح تظهر عندون الصفحة مشوهة
لهيك الواجهات الساكنة و الكلاسيكية هيي افضل و خاصة بالنسبة لموقع كتير ضخم متل موقع زيدل المحترم
و شكرا
Posted by: hosam abdulaziz
المشاركة الأصلية كتبت بواسطة dj-hani
|
تاكيد لكلام الادارة :
من الخطوات الهامة ببناء الموقع هيي انو يكون الموقع خفيف يعني ما بحاجة لوقت كتير حتى يتحمل ع المتصفح
و الفلاش رح يزيد من هالوقت مما يسبب ملل للزوار و رح يسكرو الموقع قبل ما تفتح الصفحة الرئيسية
هاد اضافة الى انو مو كل الزوار بينتبهو انو ينزلو عندون ال flash منشان تفتح هالملفات ال5فلاش الموجودة بالصفحة .... و بالتالي رح تظهر عندون الصفحة مشوهة
لهيك الواجهات الساكنة و الكلاسيكية هيي افضل و خاصة بالنسبة لموقع كتير ضخم متل موقع زيدل المحترم
و شكرا
|
بنشكرك عهالشهادة الحلوة بالموقع
هذا شيء بنعتز فيه
رأيك بنحترمه و هو صحيح 100% , يمكن فادي طلبه بيتناسب مع عمره
شب صغير بعد بيهتم بالشكل و المظهر و التأثيرات البصرية و هذا حق مشروع.
موقع زيدل سوريا حمص
..
خدمات تشات و
دردشة ...
أرشيف المنتدى
vBulletin Copyright ©2000 - 2009,
Jelsoft Enterprises Limited.
vB Easy Archive Final ©2000 - 2009
- Created by Stefan "Xenon" Kaeser
