الارشيف - جاك الموت..

Pages: 1

جاك الموت..
(انقر هنا ان احببت مشاهدة الموضوع الاصلي بالالوان و الصور )

Posted by: ابن الحياة

يا حُبّ ارفع راسكْ وشيلْ الوجلْ ==== جيتَك أنا والمجدْ من حولي تلَلْ..

تا إرفعَكْ وتصيرْ نار عْلى جبلْ ==== وتا علّم الختيار مِنْ فينا البطل

وقلّو لـَ يلّي مأنزعْ وناسي الخجل ==== إحذرْ إجاكْ الموتْ يا هاول الأزل

انطرنا زيادو تا يردّ عْلى الغزلْ ==== تاري الهوا مشْ شغلتو بدنيا الزجل

نحنا شبابْ العشقْ.. الله يرحمو ==== ختيَر وخرّف ما بقي منّو أمل..

Posted by: ziad sattah

لمّا زيــــــاد بـ ْ مَجْمَع الزّجال قال ..... لون الغزل : شِعرو غَزَل للفلّ شال

مِنّي نَصيحة شَيخ: إتركْ هالنّزال........ خَلّي العقل رســـــمال لولا شَحّ مال

وْ شَعْرات بَيضا مْوَشَّحه بْلون الهلال .... بْلون القلب مجبور يِتْحَمّل عيال

مسكين.. جاك الموت يا تارك صلى ... ما فيك ترفع كاس, تا ترفع جِبال

----------

Posted by: ابن الحياة

يا كرومْ زَيدل خمرة العشق اسكبي ==== ويا نجومْ من كاساتْ أمجادي اشربي

شبّ وجِبالْ الكون عَ زندي الأبي ==== حْمَلتا متلْ مَ بتحملْ الأمّ الصبي

وإنتَ يا حسرة شَعرك الأبيض ربي ==== وغطّا عَ عقلكْ تا فقدتْ الموهبة

وبلشتْ تهرُب بالنصايحْ يا غبي ==== ما بتمرق عْلى عقولْ توُجا مدهّبة

فلّ بريشاتك أحلى ما المخفي يبان ==== ونقول الله يساعدك.. جنّ الصبي..

تصحيح بسيط في ردي السابق (هاوي الأزل)..
وبالمناسبة أستاذي الغالي بتمنّى لمّا بيطلع عندي أي خطأ بالوزن تنبهني..

Posted by: ziad sattah

كلمة ( غبي ) يا هالصّبي لـ َ تْعيدها ..... خلّي المراجل بالصّوَرْ تجديدها

مثل الصّبيّه الّلي الذّهب عا جيدها ..... ما زادها . وحدو الأدب بيزيدها

و الـدّالـيـه مـ َ بْيِكْمَلو عْـناقـيـدهـا ....... إلاّ مـ َ تِكْسَح ْ فِرْعِها و جْديدها

وْ كـْروم زيـــــدل خمرها دمّ الفدا ....... إيّاك تجرَح قدْسها بـ ْ عربيدها

-------

--------

Posted by: ابن الحياة

ربينا بـ زيدَل والخمر مالي الكاس ==== عنّا الفكر أفواه زهر اللوز باسْ

فينا الأدبْ مضربْ متَلْ لـَ كتيرْ ناس ==== منطَق أسامينا بيرفعْ ألف راسْ

مزبوطْ دالية الشعرْ عنبا حَواس ==== ونحنا غصونْ الموهبة وإنتو الأساسْ

لكنْ إزا ما الغصنْ فتّح بالربيعْ ==== شَغّل عَ هَيك جذور منشارة وفاسْ

Posted by: ziad sattah

يا ناس طاب الكاس, صُبّو و اشرَبو .....شِفْت الصَّبي سكران حابب لعّبو

نحنا الأصل, و الكل ّ إلنا بـ ْ يِنْسِبو ..... حِكْمه وْ دِرايه , و الغَلَطْ بِنْصَوِّبو

وْ من أصلنا بـ ْ ناخذ فرع بنشَذّبو ...... حتّى إذا مغرور شـــــِفْنا نـ ْ أدّبو

وْ خصمي إذا بيضَل ّ هيدا مذهَبو ..... بـ ْرِدّو عـ َ مدرسة الزّغار, بـ ْ رسّبو

عا روضة الاطفال تنسيبو وَجَب, ...... عا منبر الشّــعّار مشْ رح ْ نسّبو

--------

Posted by: ابن الحياة

يا ريتْ فيني إرجَع الطفل الصغيرْ ==== اخطُفْ منْ الأزهارْ نغماتْ وعَبير..

وإعمُل بـِراسكْ غِلّ يا مْصَغّر كبير ==== ونلعَب دِحَل سوسو وأنا ورامي وسميرْ

يا منَسّبْ العالم، مِنو الـ حطّكْ مدير ==== عا منبرْ الشِعرْ الـ بـِ دمّاتي بـِيسير

وإن كنت بـِ هالمملكة الشيخْ القدير ==== عمْ تتدعي الحكمة وإنتْ للجهلْ بير

مملكة شِعر الحُبّ ما بدها شيوخْ ==== بدها شي شَبّ يكون للمنبرْ أميرْ..

---

Posted by: ziad sattah

مَنّي أمير زْغير . عا عرشي مَلَك ...... بَـيّ الـزّمان الـّلي جَبَرني إقبَلك

إسْأل (حكيم عْيون) و (البدر) السَّلك .... يَـدّي بـ ِ يـَدّو بـ ْ ليلنا زال الحَلـَك

و خَلّيك معْ سوسو و معْ ميمي وْ مَلَك ... وْ لولا ازْلَقِتْ بالبير مش رح إنشلك

و بـالـحُـبّ لـولا شي صَبيّه سـْـألتها ..... جــَرِّبْ إذا بـِتْـمـيـل إيـلـي أو إلـَك

.............

.............

Posted by: ابن الحياة

ويلاه شو بيعمُل غرور الحاقدينْ ==== مِنّي خشيتْ وبالبدرْ عمْ تستعينْ

يا بوعطالله كنتْ مفتكرك رزين ==== عمْ تفتكر حالَكْ ملكْ؟ الله يعينْ

خلّيك بولادك ومرتَكْ يا حزينْ ==== وخلّي الصبايا للشبابْ المُلهمينْ

لكن إزا جانن.. ما رح إعتب عليكْ ==== رجّال عم يمرقْ بـِ جهلْ الأربعين

---

Posted by: samar dahi

بحب شارك بهالمنافسة الحلوة بتشجيع ليوسف الغض بميدان الزجل ..برافو يوسف اللي بيقرأ الشي اللي عم تكتبوا ما بيقول عنك انو جديد بالزجل .....بدايات موفقة .....
وكمان بدي شد على ايد الاستاذ زياد على هالروح الحلوة اللي عم يشجع فيها يوسف ببدايات شعرو وبدي قول للاستاذ زياد كثير حلوة زجلياتك ...
تابعو ونحن معكن ..

Posted by: ziad sattah

جهلان , مش جاهل حَضَرْ حفلة سمر.... عيني على الحلوين, أوّلهن سمر

و عم بستعين بـ ربّنا وْ إبن البَشَر .... يفتح عيونَك بالبصيره و البصر

وِ بـ ْ أربعيني الـ عِشْتهن قَدْر وْ قَدَر .... أستاذ مِشْ تلميذ( كَسّابي) انْحَشَر

و بـ ْ أربعينك من بَعِد عُمْر البَطَر ..... بيقَدّسو من غير حِسّ وْ لا خَبَر

و بـ ْ أربعيني من بعد ألفين عام .... بيردّدولي شْعار بتهِز ّ الحَجَر

----------

Posted by: ابن الحياة

بالبداية شكراً جزيلاً للآنسة سمر على هالإطراء وانشالله بتكون هالبداية بمحاورة حلوة مع أستاذنا الغالي زياد..
وثاني شي بدي إعتذر عن التأخير اليوم لأنو كان عندي ظرف خارج زيدل..

وهلأ بنرجع لموضوعنا.. وعَ ذكر التلميذ والأستاذ وقولتي للأستاذ زياد أنو خليه يغلبني بعدين يذكر الأستاذ (الكسّابي) تذكرت بيت قرّاده قاله شاعري المفضّل أبو ربيع (موسى زغيب) للشاعر (زين شعيب) أبو علي:

ما ببعتلكْ موسى زغيب ==== ببعتلكْ بس خيالو

وإنْ كنّك إنتَ رجّال ==== بتسهر للصبحْ قبالو

وأما عليي فبقول:

بدّك بربّكْ تستعينْ وبالمسيح ==== تا تنتقلْ خطوة قبالي يا كسيح

وبأربعينكْ ريتْ يا ديك الفصيحْ ==== جوقة دجاج تقاقي من حولك تصيح

خلّيك عا قدّكْ عمْ بتحكي مليح ==== ولا تمدّ راسكْ متل قصبة قبال ريحْ

تلميذ (كسّابي) قطعْ صوت الفحيح ==== وآيات شعرو غطّت الكون الفسيح

وكل شي (سمر) حلوة من الـ متلكْ شحيح ==== هربـِتْ عـَ كرمي ومقعدي العالي المريح

ويوم الـ صبايا الحِسنْ حدّي تمختروا ==== قالوا: خطيّ (زياد) هالشايبْ طريح..

Posted by: ziad sattah

هَدّو الصَبي بـ ْ جاه النَّبي ّ المصطفى --- عِرْق الخَجَل عم يقطَعو وْ عِرق الوَفا

بين الشّمس و النّور و سْـــراج انطفى --- شـــــفنا الفوارق شــاســعه مهما نفى

مِـنْ بَـعـد مَرّه بـْ عيدها : حاجي.. كفى --- إيّـاك تمشــي عـالصَّواعـد بـالـحَـفـا

و ْ عِـكّـازتـي الـ ْ فـيـها تْـعَـلِّم عـالـقَـفـا ---هَيدي عصا موســــى إذا مـ َ بْتَعْرِفا

فـيـهـا عَـبَـر بـالـبحر و الـ ْبَعدو اختَفى --- واحد غرق, واحد شهق, واحد طَفا

وْ فيها إذا لَـوَّحـت عـا ســـــاحة رَقِـص --- يِـتْـهـافَـتـو عْـلَـيّـي صبايـا مْـصَـفّـفا

----------------------

Posted by: ابن الحياة

بحقّ المحمّد والمسيح المفتدى ==== حاجي لعب عـَ عقول أهل المنتدى

عامل فوارق بينك وبين العدا؟ ==== الـ بيني وبينك فارق بوسع المدى

إنت هرمت والعشق ما عاد لو صدى ==== بقلب المصدي الليَ العمر عنّو عدا

ومحسوبك الشبّ اللي للعشق اهتدى ==== قلبو.. ومـَ فارق هالقلب رطب الندى

إثبت عـَ (شبّ) و (شيخ) حاجي تصعّدا ==== وتعيد قصة (بيت مري) وتجدّدا

لكن إزا مصمّم يوافيك الردى ==== وماسك عصاك ومش مفكّر تبعدا

رح غرّقك بالبحر هـَ الـ شقّو عصاك ==== وإنْ ضلّ عندك نفـَس بنشوفك غدا..

------

Posted by: ziad sattah

شفت البحر شـ ُ كْبير و مْغَرّق ولاد ؟--- قـلـبـي بَـعِـد أكـبـر و أخْـبَـر بـالعِباد

وْمـعْ كـل ّ جيل مْنِ الحلا يْجَدِّدْ وِداد --- مـا فيكْ إنت َ تْعَكِّرو بـ ْ حفنة رمـاد

وْ عـ َ شْيوخ أهل الكار لا تضْغَطْ زِناد --- وْ خَلّي العصا للّي عصى الشّاعر زياد

يـا شــَبّ لـو ما شَــبّ عـا مَنْهَجْ كَهِل --- قـالـو عَليه النّاس : أشْـرَفـْلـو الرُّقاد

------------

أولا ً أريد أن ألفت نظرك إلى كسر في الشّطر الأخير من البيت الأخير في ردّك الأخير ( بناءا ً على طلب سابق لك )

ثانيا ً : لا زلت غير مقتنع أن يوسف هو الذي يكتب الردود .. لأن ّ الذي كتب ( محاولة متواضعة ) بما فيها من كسور : لا يأتي بهكذا ثقة إلى ( المعنّى) و بهكذا ردود سريعة و فيها بعض التعابير التي تدلّ على الخبرة و تخلو من الكسر في الوزن .

ثالثا ً : و بسبب انشغالي بـ عرس عائلي و لي فيه قسط كبير من العمل : أرجو أن تعذروا عدم تمكّني من متابعة الموضوع , و لكن أتمنّى عليك يا ابن الحياة أن تبقي الحياة في هذه الصفحة و تدعو أحد الشعراء الأكارم ليتابع معك ( فَهُم ْ كثير ) ..

تحيّة من القلب ( الكبير ) على هذه الجولة القصيرة و الممتعة أخ يوسف

...

Posted by: ابن الحياة

يا مدامع العشّاق ضمّي مدمعي ==== ويا نجوم ليلة آب هالنصر اقشعي

ابن الحياة الشبّ هـَ الـ كِلّو سعي ==== للمجد..حرطم شاعر الـ كلو وعي

هيدا أنا مش غير.. حاجي تتدعي ==== فرق العمر بيّن.. مـَ رح تمرق معي

ما بين شبّ وشيخ آخر هـَ اللعي ==== يا ناس حكمتنا بـِ هـَ الليلة اسمعي

بيضلّ شيخ القدْر راعي ألمعي ==== وبيضلّ شبّ العشق ثورة عـَ الرعي

وشكراً لكلّ الـ تابعونا بالختام ==== ولـَ (زياد) بحني هامتي من موضعي

---

شكراً جزيلاً أستاذ زياد على التنبيه وعلى ما أكسبتني إياه من ثقة وخبرة بهذه المحاورة الممتعة..
أحب أن أقول شيئاً وهو أني أعرف ثقتك بي وتقديرك لصدقي الذي لم أتعود على غيره.. ومن هنا أقول لك أنني أنا من كان يحاورك وليس غيري، وإن كنت تقصد نظام فهو لم يخبر بمحاورتي إلا البارحة وأوصلت له دعوتك وأوصل لك معي التحية الكبيرة والإعتذار مؤقتاً لظروفه.. وبالنسبة لي أرى أن وزن المعنّى أسهل قولاً من وزن القصيد الذي أخطأت فيه، ثم أن تلك كانت (محاولة متواضعة) أما هذه فكانت (جاك الموت)

..
ومع الأيام والمحاورات سنرى..
المهم أنك اكتسبتم شاعراً جديداً في منتدانا الغالي..
وبالنسبة لي لا مانع لدي من المتابعة وأنا بانتظار أي شاعر يرغب في محاورتي أو متابعتك أستاذ زياد حين تقدر ولكني أفضّل أن يكون ذلك حتى نهاية هذا الشهر قبل أن أبدأ بإعادة البكالوريا وحينها لن أراكم لعدة أشهر..

شكراً جزيلاً وإلى اللقاء..

Posted by: RUSHA AWAD

مرحبا للجميع
صحيح أني لأ أفقه بالشعر شيئا ولا حتى بالزجل أو المعنى ولكني تابعت المنافسة منذ بدايتها وأنا سعيدة جدا بالأخ يوسف وبهذه الموهبة, طبعا الأستاذ العزيز زياد اعتدنا على شعره منذ فترة ولازلنا نستمتع بقراءة كتاباته المتميزة. تحياتي لكم على هذه الجولات الممتعة وأشد على يدك يوسف لمتابعة المسيرة معنا وشكرا جزيلا لكم وأنا أطلب وأطالب بالاستمرار.

مع حبي واحترامي
رشاعواد

Posted by: إنانا

اقتباس:

المشاركة الأصلية كتبت بواسطة ziad sattah

و بـالـحُـبّ لـولا شي صَبيّه سـْـألتها ..... جــَرِّبْ إذا بـِتْـمـيـل إيـلـي أو إلـَك

.............

أولاً : محاورة جميلة جداً تحمل في طياتها روحاً أستاذية مشجعة و تلميذية طموحة ...بداية موفقة ومذهلة يوسف وشكراً للأستاذ زياد...

ثانياً : أتمنى قبول محاولتي المتواضعة ... مع العلم أنني كتبتها بعد مشاركة الأستاذ زياد مباشرة ولكن لم أتمكن من إدراجها حتى اليوم...

سْأَلتْ الصّبية طلبتْها تعطي القرارْ *** عن ميلها ولو خيّروها شو الخَيارْ

مالْ القلب للشبّ كان الإختيار *** استنكرْ فكرْ فضّل بالعقل ختيارْ

شبّ اللي حلمو ملوّن بأزهار *** وبكرا العمر مخبّي إلو أسرارْ

بريشو عِمل طاووس وبصوتو كنار *** بالليل مع ميمي ومع سوسو بنَهَار

حتّى إن تلي جيبو دينار مع دولار *** بعمرها ما رح تعرف معو استقرار

متلو ما بدها ... تأمّلت ختيار *** حكمة ورزانة ووعي بالأفكار

لكن يا حسرة اللي صار صار *** واللي خرّبوا الوقت ما بيصلحوا العطّار

وبين قصّة شبّ وقصّة الختيار *** سحب منها الدّهر حقّ الإختيار

وقلا وقتك خلص والزمن دار *** وطير اللي كان بإيدك رفرف وطار

وهدّا على غصن أخضر طري *** ضلّي عند أهلك واحرسيلُن دار

........

موقع زيدل سوريا حمص .. خدمات تشات و دردشة ... أرشيف المنتدى