الارشيف - ماذا لو تحولت زيدل من قرية إلى مدينة

Pages: 1

ماذا لو تحولت زيدل من قرية إلى مدينة
(انقر هنا ان احببت مشاهدة الموضوع الاصلي بالالوان و الصور )

Posted by: iyad tahhan

ماذا لو تحولت زيدل من قرية إلى مدينة ؟؟؟
اليوم و بعد أن اتسعت زيدل و كبرت و تعدد سكانها و اختلف انتمائهم لم يعد مصطلح قرية لائق على زيدل و ممكن أن يأتي يوم و تتحول زيدل حسب التقسيم الإداري إلى مدينة و بهذه الحال تصبح زيدل مفتوحة أكثر للهجرة الداخلية و خصوصاً قربها من حمص و التضخم الهائل في حمص أدى إلى الهروب من حمص باتجاه زيدل و أيضاً الهجرات أتت إلى زيدل من جميع أنحاء سوريا لذلك أقول ماذا لو أصبحت زيدل مدينة هل تُنسى عادات و تقاليد القرية هل سيكون تحول زيدل إلى مدينة خير على القرية أو معاناة .
كيف يمكن لنا أنا نتخيل هذا الواقع هل نحن اليوم بوضع و بظاهر يٌوحي إلى توجه عام في زيدل لتحويلها بالشكل و المضمون إلى مدينة و هل سيُرضي هذا جميع أبنائها ؟؟؟
لا أحد يُنكر أن التغير دائماً يأتي لصالح المواطن أو أحياناً قد يكون في غير صالحه و لكن هل يمكن لابن زيدل الذي تعوّد أن يسمي قريته بزيدل الخضراء و يصفها بجمال الطبيعة و نقاء أجوائها و طيبة أهلها أن يتحمل نتائج هذه التغيرات ؟؟؟

Posted by: hosam abdulaziz

التغيير قادم لا محال اخي اياد
بس بتمنى ما يصير هالشيء عدوري.
حياة القرية لا يعلى عليها , و دائما كنت اقول يا ليت زيدل ابعد عن المدينة بقليل , مثل قرية الفحيلة مثلا
لكن بنفس الوقت القرب من المدينة يسهل علينا امورا عدة.

لذلك اتمنى من ابناء هذه القرية ان يحاولوا قدر الامكان الاحتفاظ بهذا الطابع القروي عن طريق وقف السيل المدني المندفق نحونا قدر الامكان
و عدم بيع الاراضي بطريقة عشوائية .

اذا بتلاحظوا هالفترة درجت كثير اقامة العزب(عِزية) في المشاريع و صرف مبالغ كبيرة عليها , او على شكل خيم متطورة ......
و ان دل هذا على شيء فهو على حب ابناء القرية لاجواء الهدوء و السكينة و البعد عن الاصوات المزعجة .

يعني من هون لـ10 سنين رح نلاقي البيوت بلشت بتل بلان و مرّة و فرتقة و سيّة (هي اسماء اراضي في زيدل لمن يستغرب المصطلحات)

شكر ا اياد عهالموضوع و انشاء الله تبقى زيدل قرية طول العمر.

Posted by: samar dahi

الله لا يقدر ياإياد ...ما بدنا زيدل تتحول لمدينة بكل معايير المدنية ..
نحن منفتخر بزيدل باننا منعيش بضيعة فيها من المحبة والانفتاح على بعضنا كابناء قرية واحدة وهالشي عم يخلينا نعيش بهالتلقائية والعفوية مع بعض ...
وانا ما بتصور انو ممكن زيدل تتحول لمعنى المدنية بيوم من الايام وهالشي ممكن يصير لما بنبطل نكون فلاحين بما منبطل نكون ناس طيبين لما مننسى انو نحن قرايبين ولاد عم وولاد خال وبتصور هالاحتمالات هاي كثير صعب نوصلها فهالسبب بدي طمنك يا إياد انو زيدل رح تبقى ضيعة وبتحمل كل معاني الضيعة ...
الله يخلينا هالضيعة الحلوة اللي بتجمعنا كلنا على الحب .
كل الحب لك يا زيدل ...ويا زيدليين ...
سمر

Posted by: wajdy barakat

ضيعتي الغالية زيدل ..........هل يعقل ان يحدث بك ما يتخيله اياد ؟؟؟؟؟ هل يعقل ان تتحولي الى مدينة لا يعرف الجار جاره ؟؟؟؟؟؟؟ هل ستنسي انه قد عبر في وجودك فلاحين عاشروا المر وذاقوا الحلو ؟؟؟
لا والف لا لتغييرك يا اروع قرية ولدت وترعرت فيها ........يا اجمل طرقات تمشيت فيها ليلا بهدوء رائع وسكينة لافتة .........وصباحا جميلا مع ظهور خيوط الشمس عند الانطلاقة للعمل بالارض .......
ربما بدات تغييرين بدخول الغرباء لكن اثري فيهم ولا تجعليهم يؤثرون فيك ......ربما كسرت الغربة قلبك لكن ما زال قلبك ينبض حبا لهم .......قريتي الغالية لكي من اجمل الحب في كل صباح ومساء.... في كل سكينة اقضيها في ارضي ........في كل لمة مع اهلي واصدقائي .........زيدل ستبقى خضراء طالما ان الارض موجودة والزرع مثمر والاهل متوافقين لا يدخلهم مكروه ولا يفككهم حقد .........

Posted by: mazen youssef

انشالله بظل تصورك مجرد تصور

مشكور أخي أياد عالموضوع الذي حرك فينا حب الضيعة فورا

فلا ينقصنا بتصوري أي خدمات موجودة في المدينة بسبب قربها من المدينة

وتطور الضيعة بشكل مستمر والفضل لابنائها الذين يعشقونها

فكما قال أخي وجدي كل مشوار في ليلها يرد لك الروح

فأتمنى معكم ان تبقى ضعيتنا الخضراء قرية وهوائها معطر برائحة اللوز

ومشكورة أختي سمر طمنتينا والله يسمع منك

تقبلو تحياتي جميعا يا أبناء زيدل الطيبين

Posted by: a_aroush

باعتقد أن هالشيء شوي بكير التفكير فيه بزيدل و ما بظن يكون على دورنا , و لكن المستقبل أكيد كفيل بهالشيء بسبب قربها من المدينة .

لكن الشيء الأهم من هيك اللي منخاف منو , أن تصير زيدل ضيعة بدو ..و أكيد مفهوم ليش .. لاحظت أن عددهم عم يكبر . و خطر هالظاهرة باعتقد أن رح يأثر على زيدل قبل اقتراب المدينة , و الأسباب لهالشيء كثيرة , و هذا الشيء هو اللي بدو فعلاً تفكير و حل مع الناس و طريقة لتتوقف .

أكثر الغرب اللي هاجرو على زيدل من قرى أخرى , و انغمسوا بمجتمع زيدل و نسبة كبيرة منهم من قرى صديّة بتجمعهم و بتربطهم قرابة مع عائلات زيدلية كثيرة , و هم أسهل أن ينغمسوا بمجتمعنا من قرى أخرى . و قسم ثاني كمان من قرى قروانية و هجرتها على زيدل قديمة جداً و مثل ما المغتربين بأمريكا بتجرجر بعض لهون كمان هني بيجرجروا بعض على زيدل و كمان نغمسوا بمجتمعنا و تزاوجوا و صاروا منهم و فيهن .

الخطورة لكن ما يصير مثل ما عم يصير بقرية فيروزة و حقيقة أنا أسفت لهالشيء , الناس باعت أراضيها بقلب الضيعة للغرب و خصوصا من مدينة حمص , و هذول عم يشتروا ليستثمروها و يعملوها شقق سكنية , و هالشيء عم يحول مظهر البناء لمظهر المدينة و ممكن يحول الضيعة لمدينة من دون ما تصير بقلب المدينة , عشرات المباني السكنية عم تتعمر و هي كلها بكرة بتتعبى غرب بكميات هائلة صعب كثير أن يأثر عليهم مجتمع فيروزة , باعتقد هني اللي رح يأثرو على مجتمع فيروزة أكثر . و وقتها رح ينتهي كل شيء لمعنى ضيعة .

لهالشيء باتمنى من بلدية زيدل وقف هالظاهرة من انها تمتد لضيعتنا , لحتى نخلي زيدل .. زيدل . و نخلي أهل زيدل هم أهل هالضيعة .

و أخيراً منقول نشالله ما يجي يوم بتصير زيدل مدينة أبداً يا إياد .

Posted by: iyad tahhan

الصديق و الأخ حسام التغير قام لكن نحنا منقول انشالله لا أما بخصوص إقامة العزب الخييم في أراضي القرية فأنا مع هذه الفكرة و ذلك بعد الصخب القوي الذي حل بالقرية في الفترة الأخيرة و خصوصاً كثرة السيارات و الموتورات و أخص الموتورات لما تسببه من ازعاج بالصوت و طريقة القيادة لبعض الأشخاص و من هذا الواقع هناك أمر آخر بأن هذه الفكرة تعمّق ارتباط ابن القرية بأرضه .

الصديقة و الأخت سمر بوجود أشخاص محبة لهذه القرية هذا يؤكد أن القرية ستبقى دائماً محافظة على جمالها بضم صوتي لصوتك و بقول انشالله لا و الله يحمي زيدل من كل خطر .

الصديق وجدي عشق زيدل متجذر في كل قلوب أبنائها و هذا ما يجعلها تعلوا أكثر فأكثر و يذيع صيتها في جميع أرجاء العالم و ستبقى ورودها متفتحة و سيبقى الناس فيها محافظين على عاداتهم و تقاليدهم مهما عصفت رياح التغير .

الصديق مازن يوسف زيدل تفتخر بأنكم أبنائها و لن تبخل يوماً عليكم بمشاويرها وعطر زهر اللوز و بساتين العنب و الأزهار شرط أن يدوم حبنا لها .

الصديق عبدالله أنت فعلاً طرحت مشكلة أصبحت تعاني منها القرية و أنا رأيت هذا و كم كان حزني لأرى ما قلت عنه يزداد ليحتل مساحة كبيرة من أراضي القرية هذا الشيء يُحزن جميع أبناء القرية لكن ما هو الحل هنا تكمن المشكل فجميع أبناء القرية و دون استثناء حينما تطرح عليم مشكلة و تطلب الحل يتسابقون فيما بينهم لتحميل ذلك الحل للغير و لا نصل إلى نتيجة و انما يبقى الوضع في تزايد مُحزن ( رزقالله على إيام الماضي وقت اللي كان بالضيعة أشخاص وقت اللي كانوا يقرروا على شي يعملوه ولو كان هالشي ممكن يسبب مشاكل بس كانو يعلوم و يتحملو نتيجة عملهم لأنهم مؤمنين بقريتهم ) .
أشكركم جميعاً على ردودكم التي تعبر عن محبتكم و خوفكم على هذه القرية .

Posted by: new_zaidal

شباب انا لفت نظري الموضوع و شكرا للاخ اياد على طرحه
انا راح احكي عن تجربتي انا عشت 90%من عمري خارج زيدل بس ابدا ما بتصور انو في حدا بحبها اكثر مني لانو عيشة المدينة للي ما جربها ما بيعرفها الما انتقلنا الى زيدل من العاصمة صابنا فراغ رهيب حيث انوا لم نعش فيها و لكن بعد ما تعودنا حبينا العيشة الهادئة و المحبة الدافئة للاقرباء و الاصدقاء و انا هلق لما بروح على الشام ما بندم ابدا لانو الزحمة فيها لا تطاق
بس انا ما بنكر انو هدوء الضيعة احيانا مخيف و خاصة في فصل الشتاء و كذللك فرص العمل في المدن للشباب اكبر بكثير و انا رائي انوا مستقبلا مستحيل نقدر نواجه طوفان المد الذي راح يجينا الا بحالة وحدة و هي انو نقدر نستثمر اراضينا صح و ما نفرط فيها و انو ما يصير فينا مثل الجارة فيروزة التي الان نسبت الغرب فيها زاد عن النصف لدخول تجار البناء و المقاولين الذين يبحثون عن الربح السريع و لا تنسوا انوا زيدل راح تصير على قائمة البلدات السياحية خلال السنوات القادمة بسبب و جود منتجع 4 نجوم و هذا له تبعات على لقرية ككل شئنا ام ابينا و انشالله ما توصل لمرحلة بعض البلدات الي سبقونا سياحيا بعشرات السنين مثل (المشتى )
لانو اي بيعرف بيعرف والي؟؟؟؟؟؟؟؟؟؟؟؟

Posted by: الريم

الصراحة مابتمنى لزيدل تتحول لمدينة وخاصة عنا التحول بدون دراسة ولامعرفة
يعني بيكتر البناء والخدمات بتبقى خدمات قرية والعجقة والازعاج والدخان وماحدا بيعرف حدا وبتموت التواصل بين الناس
كلامي من تجربة لانهم عملوا بالقرية اللي ساكن فيها وموتوا كل شي حلو
عن جد منظر البناء مكان الشجر بشع كتير

Posted by: imad_dahi

قريت الموضوع وكانو عم اقرا تحول من جيد الى اسوأ

الضيعة او المدينة هي اهلها

واياد كان قصدو تحول العقليات والتقاليد

ليش من شو بيشكو اهل المديني بعاداتون وتقاليدن

المديني والضيعة كل مين الها جمالا وكل منها الها سلبياتها

قولولي شو بتكره بزيدل بقلكن كتر الحكي ....

كل الناس بتعرف بعضا وكل الناس ما بتخلى شي على بعضها ....

مستلمين الرايح والجاي ... شو عمل وشو لبس وشو اكل ويلي على العروس ويلي شو لابس وشو لابسي .... والشباب هادا لي متحلف لهادا وهادا لي ما بيعطي طريق لهداك لو بيكون معو شبح

والمديني فيها هيك امور بس كتير كتير قليل..
الجار ما بيعرف جارو .. اي بس بزيدل صار مذابح مشان شباك بين الجيران و وهدول ع اساس في خبز وملح بيناتون

وياما محاكم صارت مشان اشيا ما بتستاهل

بكتير اشيا اهل المديني احسن مننا .. واشيا كتير نحنا احسن منن

بس انو ناخد التحول بشكل سلبي ... ما بلاقيه واقعي

انا عشت تص عمري برا زيدل .. وما بنكر اشيا كتير تغيرت في... بس من جوا والقلب زيادلي

التغيير رح يصير وهاي اذا ما صرنا .... ومشي الحال

نحن منحب نصير متل المديني بجو ضيعجي بس ...

المهم شو ما صار يبقى القلب وزيادلي والحب يزيد والقعدات الحلوي تزيد

واذا صارت سياحية بيكون النا الفخر ... لانو اكبر دول العالم عايشي ع السياحة ... مو احسن من الهجرة ونترك زيدل للغرب ....

ع كل حال زيدل هي زيدل ........

Posted by: iyad tahhan

شكراً أخ new_zaidal انشالله بتضل بزيدل طول العمر و تكون اقامتك كلها سعادة إذا كانت هاي رغبتك أما بخصوص تعلق أهل زيدل بالأرض يمكن ما عادت مثل الأول بالعكس زيدل كل سنة عم تخسر أجزاء كبيرة من أراضيها لعدم رغبة البعض من الجيل الجديد بالزراعة .

شكراً أخت الريم على محبتك لقريتنا و دعوتك لتبقى قرية بعيد عن دخان المدن و تلوثها مع أني خايف من هالشي لأنو زيدل قريب من أجواء مصانع المدينة و هذا الشي عم يخلي فيها نوع من التلوث انشالله بعد انهاء العمل بمصفاة حمص الجديدة بتصفى أجوائنا .

يا صديقي الغالي عمادووو نحنا مو ضد المدينة و ما مننكر انو المدينة بتكون بأغلب الأحيان متطورة أكثر من القرية بس نحنا عم نقول انشالله تبقى زيدل قرية لأنو نحنا تعودنا على هيك حال و حبينا زيدل القرية الخضراء قرية كل انسان بيحب بيوم من الأيام إذا مرق على انسان من الضيعة يسلم عليه و يرد السلام إذا دق باب جارو بطلب يتلبى طلبو تحس بوجودك تفرح بفرح غيرك و تحزن لحزن غيرك هاي زيدل القرية اللي نحنا ما منتمنى نخسرها .

موقع زيدل سوريا حمص .. خدمات تشات و دردشة ... أرشيف المنتدى