الارشيف - أول كتب المكتبة

Pages: 1

أول كتب المكتبة
(انقر هنا ان احببت مشاهدة الموضوع الاصلي بالالوان و الصور )

Posted by: rsafar

يقولون مشوار الألف ميل يبدأ بخطوة
الآن مشوار المكتبة يبدأ بكتاب
عندما أخبرني الأخ حسام عن فكرة المكتبة في المنتدى شعرت أن حلماً قد تحقق فمذ بدايات زياراتي للمنتدى وقبل أن أصبح عضواً فيه وأنا أتخيل وجود مكتبة تعكس مدى النضج الثقافي لأعضائه, ممكن أن يكون هذا الشعور نابع من حبي بالتباهي بأبناء زيدل وأصدقاءها خصوصاً أني كنت أزور المنتدى مع أصدقائي في العمل .
المهم أني لم أعرف بما أبدأ أو أفتتح هذه المكتبة خاصةً أن اهتمامات الأخوة الأعضاء متنوعة
وبتوجيه مشكور من الأخ حسام قررت أن أبدأ هذه المكتبة برواية ذاكرة جسد للكاتبة الكبيرة أحلام مستغانمي الغنية عن التعريف, وكتاب رباعيات الخيام للشاعر والفيلسوف والرياضي والفلكي عمر الخيام, طبعاً هناك الكثير من الكتب المتنوعة المتوفرة التي جمعتها من النت ولكني لا أجد لها مكان في الوقت الراهن خصوصاً أنني مقيد بحجم المرفقات بانتظار المكتبة حتى تولد وأجد لكل كتاب مكان حالياً أجد أن الكتب الأدبية قد تجد مكانها في هذا الموقع ولذلك رأيت أن أبدأ بها ليتم نقلها فيما بعد إلى المكتبة.
أرجو أن تلاقي مبادرتي القبول من قبلكم جميعاً كما أرجو من الجميع أن لا يبخل علينا بما لديه من الكتب وأن لايتردد بطلب أي كتاب وأنا بدوري سأبذل ما بوسعي لتأمينه .

لكم كل الحب
رامي

Posted by: celine

شكراً لأنك مكنتني من الحصول على ذاكرة الجسد كملف يمكن تحميله دون التعرض لمشكلات لأنني وجدتها على عدة مواقع ولم أتمكن من تحميلها باستخدام نوع الاتصال العادي ......شكرا جزيلا مجددا ........
بانتظار المزيد

Posted by: hosam abdulaziz

شكرا رامي لهالحماس الغير محدود لبناء مكتبة زيدل الثقافية
انا ما بحب آخذ حق غيري بالفكرة , و هي بترجع لحبيب العمر و الصديقة عشتروت
و محسوبك عليه مهمة التنفيذ التقنية.

و انت اكيد الك الدور الاكبر في الاسراع بالتنفيذ , لهيك بنتمنى نبني سوى مكتبة كتب مميزة.

انشاء الله خلال ايام معدودة بتكون المكتبة جاهزة.

Posted by: rsafar

لاشكر على واجب يا celine وبما أنك من قراء أحلام مستغانمي إليك المزيد من مؤلفاتها فوضى الحواس وعابر سرير وهما من أشهر مؤلفاتها (على فكرة ضعت كيف بدي خاطبك بصيغة المذكر أو المؤنث من شان هيك تركتلك الخيار لوضع فتح او الكسر على كل كاف مخاطبة)
أما الأخ حسام فأنا لست من أنصار احتكار الأفكار لأاني مؤمن أن الأفكار هي حصيلة تناغم العقول وتبادل المعرفة على كل حال أنا أتوجه بالشكر لجميع الأعضاء الذين ساهمو بمواضيعهم أو مناقشاتهم لإطلاق مشروع المكتبة.
وهنا لابد أن أتوجه بالشكر إلى كل المواقع التي توفر هذه الكتب المجانية وللأمانة فإني لم أقم بحذف أي رابط من أي كتاب يدل على المصدر .
على كل حال سأعود وأشكو إليك صغر الحجم الممكن إرفاقه بالمشاركة خاصة -كما تعلم-وأن الكثير من الكتب حجمها أكبر من 5MB .
وأعود وأكرر رجائي لجميع الأخوة الأعضاء ألايترددوا في طلب ما يثير اهتمامهم من الكتب وفي مختلف المجالات العلمية أو الفكرية أو الأدبية أو السياسية وأنا بدوري سأحاول تأمينها قدر المستطاع

مع كل الحب

رامي

Posted by: rsafar

الحقيقة شي بيخلي الواحد ييأس يعني معقول ما في حدا عندو كتب للمشاركة!!!!!!!!!!!!!
بس هالمرة رح حط كتاب لكوليت خوري كرمال الأخت celine اليي بتنمى تشاركنا

Posted by: m-sattah

شيء حلو كتير ابو الريم
بس انا بعرفك عاشق جبران شو ما عندك شي لجبران خليل جبران؟

Posted by: sulieman safar

شكراً ابو الريم وخصوص على رباعيات عمر الخيام واحث كل قارئينا الكرام على سماع الأغنية لملحنها , رياض الصنباطي , وطبعاً على العود. ولكن يا عم ابو الريم كيف تقول...........على فكرة ضعت كيف بدي خاطبك بصيغة المذكر أو المؤنث من شان هيك تركتلك الخيار لوضع فتح او الكسر على كل كاف مخاطبة).
هل يا ترى ان القمر يخفى أو لا يسطع. ولو كنت تعلم بأن سيلين تملك أجمل الأصوات , وخصوص لأم كلثوم لربط كل شوارع زيدل في حين زيارتها لقريتنا الحبيبة.
معئول هالحكي؟؟؟؟؟؟؟؟؟؟؟؟
سليمان.

Posted by: rsafar

وااله يا صديقي العزيز ماهر جبران بيضل عندي أعظم كاتب طالعتو الإنسانية وكتبو موجودة بس خفت ما حدا يحب يأرالو وتركت كتب جبران للطلب وكرمال عيونك هي ثلاث كتب:
كتاب النبي واللي بيعتبر أثمن وأغنى وأهم مؤلفات جبران واللي تم ترجمتو لمعظم لغات العالم.
كتاب أرباب الأرض أو آلهة الأرض كمان كتاب غني عن التعريف .
وكتاب مناجاة الأرواح.
بس ما ألتلي بعدك بتحب تإرا لنزار قباني لأنو عندي شوية دوواوين إذا بتحب.

عم سلييمان والله يا عم آآآآآآآآآآآآآآآآآآآآآآسف ووالله اعتذرت من celine , لعما صرت ماكل شي مية بهذلة عشان هالغلطة, بس خذوني بحلمكن شوي بضل جديد عالمنتدى وما لحئت اتعرف على كل الأعضاء, يا أخي اعتبرني طفل صغير بهالمنتدى وبدو فترة ليتعرف مين أهلو وبعدها بيصير يبكي بس يبعد عنهن.
بحب ألك أنو عندي نسختين من رباعيات الخيام والثنتين منسوبات لعمر الخيام في شي مشترك بيناتهن وفي شي مختلف منشان هيك أرفقت النسخة التانية من رباعبات الخيام بتمنى تنال إعجابك وتعتبرها اعتذار عن هالخطأ الأحمق اللي ارتكبتو

كل الحب

رامي

Posted by: eyad1982

فكرة هالمكتبة هي فكرة رائعة بكل المقاييس

واحلى شي فيها انو بتخليك تعرف ميول الجميع لنوع القراءة

واكيد انا معك اخي رامي انو جبران اعظم كاتب

وانا برأي انو لم ولن يأتي من يكتب مثل جبران

ولكل الي بحب يقرأ كتاب العواصف لجبران

هاي الملف

انقر هنا

Posted by: rsafar

الأخ eyad1982 شكراً كتير لهالمشاركي الحلوي واهتمامك وتجاوبك مع الفكرة.
صراحة حاومت إني ضيف كل كتب جبران اللي عندي بس المشكلة أنو معظم الكتب اللي عندي pdf وحجمها أكتر من 5MB وعم لاقي صعوبي كبيرة برفع الملفات.
مرة تانيي شكراً المك وبتمنى منك ما تبخل علينا بأي كتاب بتلاقي ممكن نتشارك فيه.

كل الحب

رامي

Posted by: celine

عالرغم من عدم وجود أي كتاب بين ايدي حتى ضيفو لهالمكتبة الحلوة( لأنو انا هلأ مو وقت دور ولاقي بسبب الانقطاع للدراسة ) بس واجبي اشكركن كتير أخ رامي عالكتب كلها..... لأحلام ولأنك كمان ضفت كتاب يبدو انو رائع لكوليت خوري وبوجه النداء للكل اللي عندو للكاتبة السورية المبدعة كوليت خوري ياريت ما يبخل علينا فيها ........شكرا كمان عكتب جبران ..

اخ اياد شكرا عكتاب العواصف ....

وهلأ عم سليمان مابعرف شو لازم قول..... اكتشفت بفضل ملاحظة الاخ رامي انو انا مو محددة بالملف الشخصي اذا انا صبية او شب ..ولهيك سارعت وحددت كرمال مايصير لغط بعدين ......على كل عم سليمان كنت ولازلت دائما بتخجلني بكلامك ودعمك المعنوي لالي بكل موضوع بشارك فيه بالمنتدى من بدايات اشتراكي وضليت هيك حتى بعد انقطاعي عن المنتدى ورجعتي من جديد....... مع انو لهلأ لسى ماشفنا بعض شخصي ...ويمكن صارت الفرصة هلأ لحتى قلك (شكراً) .......شكراً عمديحك لالي هون ....
بالنسبة للصوت طول بالك شو ام كلثوم ....... بتذكر مرة كنت عم هنيك لما سمعت صوت بنتك سيمونا وعرفت انو صوت زوجتك كمااان كتير حلو ...مابعرف اذا حكينا عن صوتي ... المهم السنة هي اول سنة الناس سمعت صوتي بكنيسة ام الزنار بالآلام بدك تسألهن وتحكم بما انك لهلأ لسى ما سمعت صوتي ......... انشالله التقي معك انت والعيلة عن قريب بزيدل ........سلامي للجميع

Posted by: m-sattah

ولو ابو الريم في حدى ما بيحب نزار قباني وانت يمن اكتر واحد بتعرف درجة تعلقي فيه بس عتبك ع الي عندو وقت للقراية

Posted by: hosam abdulaziz

مرحبا شباب
شكرا كثير لمشاركاتكم الجميلة بهالمكتبة
فكرة المكتبة رح تتطور اكثر و اكثر ,و هلق عمندرس هالنقطة تقنيا , ربما تصير مستقلة عن المنتدى بما يعرف مكتبة زيدل
و رح نعطي صلاحيات للمهتمين بادراتها.
القصة بدها شوية وقت, و انشاء الله لبين ما تجي يا رامي بتكون استوت الطبخة.

شكار مجددا للمهتمين و بانتظار المزيد منكم.

Posted by: eyad1982

مافي داعي للشكر اخي رامي هذا اقل شي فينا نسويه

واهلين اخت celine ومافي داعي للشكر

وحبيت حط هالروايتين لاحلام مستغانمي

وهنن

على مرفأ الايام

الكتابة في لحظة عري

وانشاء الله يعجبوكم

Posted by: rsafar

والله يا حسام ما بعرف شو بدي قلك عن جد الله يعينك علينا وعلى مقترحاتنا نحنى منزت الكلمة وبتقع كل الشغلة براسك الله يعطيك ألف عافية.... أنا انشالله بكون بالضيعة بعد بكرة أو الجمعة ومنلتقي

مشكور جداً اخي إياد عرواياتك الحلوي واضح أنو الواحد بيقدر يعتمد عليك لأني رح إبتعد عن المنتدى فترة شي عشرين يوم وكنت خايف الموضوع يموت لأني ما لمست أي حماس بالبداية بس هلأ اتطمنت ومرة تانيي شكراااااااااااااا.

ماهر يا صديقي العزيز كل شي وإلو وأت والعمر بيخلص والشغل ما بيخلص وكرمال عيونك هالكم ديوان لنزار قبل ما إرجع عالضيعة.

كل الحب

رامي

Posted by: rsafar

هذه مجموعة من القصص القصيرة للكاتب الكبير أنطون شيكوف أقدمها هدية للأخ Ozone أرجو أن تنال إعجابكم.

كل الحب

رامي

Posted by: Ozone

شكراً rsafar على الهدية الجميلة
أدخلت السرور الى قلبي

شكراً لك

Posted by: eyad1982

آسف كثير اخي رامي على التأخير.....وعم نستنى رجعتك

حبيت ضيف بعض الروايات للكاتب غسان كنفاني

وانشاء الله يعجبوكن

Posted by: kealee

ازا بتريدو في كاتب أنا كتير بحبو بس ما عم لاقيلو شي كتب هون
ازا هدا بيقدر يساعدني بكون مشكورة
نيكولاس سباركس
nicholas sparks

Posted by: عشتروت

أعزائي الأفاضل

ما أسعدني بكم جميعاً وبثقافتكم وبهمتكم ...

ألف شكر لكم واعذروني لتأخري بالمشاركة وها أنا أعود لأشارككم

بتزويد هذه المكتبة الرائعة

بما أستطيع مع شكري ثانية وتقديري لجهودكم الرائعة .

ثناء

شكر خاص ووردة جورية للسيد رامي على هذه الكتب القيمة.

Posted by: silva

بارك الله فيكم ولمن صمم هذه الورود الجميلة

Posted by: rsafar

في البداية أتوجه بالشكر إلى جميع الأخوة الذين ساهموا في إغناء هذا الموضوع بما قدموه من كتب قيمة ومفيدة كما أنني اعتذر من الأخت kealee لأنني لم أتمكن من العثور على أي كتاب لنيكولاس سباركس باللغة العربية أو الإنكليزية.
واسمحوا لي الآن أن أبتعد قليلاً عن كتب الأدب وذلك بهدف التنويع وأبدأ بهذا الكتاب لفراس السواح الذي أرجو أن ينال رضاكم.

كل الحب
رامي

Posted by: rsafar

لهواة الكتب السياسية أقدم هذا الكتاب لمصطفى طلاس أرجو أن ان أكون وفقت باختياري لأني بصراحة لا أفقه شيئاً في السياسة

Posted by: merellaa

يمكن ايجا ردي متاخر بس صراحة هي من الافكار الرائعة بالمنتدى وانا مع انو يصير في قسم خاص لهالمكتبة وتكون معتمدة بس عتنزيل الكتب مو عالمشاركات العادية

اذا بطلب يتنزل شي هو كتب جان باول ا ليسوعي وميرسي كتير

الى الامام
ميمو

Posted by: Bruse Bekham

البدائع والطرائف للملاك الثائر جبران خليل جبران
.................................................. .............

Posted by: نيقولا_ديب

هذا التركيز الثقافي الواضح يزيح قلق المستقبل
.................................................. .................................................. ...................

Posted by: ثائر العودة

فكرة المكتبة رائعة.....لهذا حبيت شارككم برواية الخيميائي ل باولو كويلو و بتمنى تحبوها.....

Posted by: rsafar

شكراً كثير إلك أخي ثائر رح حاول إنقل هالرواية الرائعة عالمكتبة وإذا في عندك أي كتاب من أي نوع بتمنى ما تبخل فيه علينا
على فكرة صرنا جامعين حوالي 140 كتاب بالمكتبة اللي بتمنى تلاقي طريقها لموقع زيدل بأقرب فرصة

كل الحب رامي

Posted by: Afram

مساء الخير
أنا من فترة فتت على المكتبة الحلوة اللي تم أنشائها بعد أقتراح من أحد الأخوة الأعضاء
واللي كانت فكرة كتير حلوة وعجبتني وبعد تفكير من الإداريين والمشرفين الأفاضل تم إنشاء هذه المكتبة الجميلة والتي نتمنى أن يتم تطويرها بأسرع وقت
ومن عندي رح ضيف حالياً كتاب من عدة كتب رائعة موجودة لدي

والكتاب اسمه
"أحيقار فيلسوف من الشرق"

Posted by: Afram

مرحبا مرة تانية
هالمرة رح حط كتاب كتير مميز ورائع بل أكثر من رائع لأنه بيحكي عن الحضارة اللي عرفها التاريخ واللي بتحكي عن أجدادنا اللي عرفهن من زمن بعيد شوي
ما رح أحكي على الكتاب لأني بفضل القارئ العزيز أنه يطلع عليه ويتمتع بقرائته

الكتاب اسمه
البحث عن نينوى

Posted by: Afram

فصول من كتاب "الخيانة البريطانية للآشوريين"

تأليف: يوسف مالك
ترجمة: يونان ايليا يونان

بخليكن مع الكتاب

تمنياتي بأن ينال أعجابكن

Posted by: silva

باركك الله يأفرام وبارك جهودك لتثمر ثمارا يافعة وناضجة لتتمكن من مشاهدتها ويفرح قلبك بها وأتمنى أن أعرف إلى أين ستصل في أخر المشوار ؟ طمني

Posted by: Afram

مساء الخير جميعاً
كيفك أخت سيلفا بتمنى تكوني بألف خير وصحة ممتازة بأذن الرب
أشكرك على مباركتك وأقول لك أيضاً باركك الله وأفرح قلبك في كل وقت وحين
ولكن؟؟؟
بصراحة أنا ما قدرت وضح معنى كلامك الأخير!!!

وأتمنى أن أعرف إلى أين ستصل في أخر المشوار ؟ طمني

شو المقصود فيها لوين رح وصل؟؟!!!

أكيد رح وصل للمكان يللي الرب بدو ياني وصل أله
أما المكان اللي بدي ياه ما رح أحسن وصل أله ألا بالأعمال الخيرة وكون أنسان كويّس وطبق كلام الرب وتعاليمه وحب الناس وكون أنسان صالح وخيّر
وبأذن الرب وطالما الله معنا والنيّة صافية رح نوصل لآخر الطريق ويللي هو أكيد بتعرفي مثل ما كل الناس بتعرفه
وبتمنا تسألي الأخ زياد عليه بوجهله حبي وأحترامي ومعزتي
تحياتي ألك
Afram

Posted by: silva

مساء النور لأهل النور000
الحمد والشكر لله الصحة جيدة والخير أكثر مما استحق له المجد للأبد00
لا شكر على واجب لأنك تستحق الشكر المضاعف لما تختار من الفكر النير والذي يحتاج لأمثالك أعانك الله وزادك علما ومعرفة واطلاعا وبارك كل مشاريعك الحالية وأظن هناك مشروع أحسست به قبل أن اعرفه لذا طلب منك إلى أين ستصل بالمشروع المحدد الذي أتوقعه 00ولكن لربما حدسي خطأ وأنا تسببت لك بقلق أوشك خاطئ عذرا لذلك
ولعمك لا00ولن أسأل أحدا مع إني أحترم واقدر زياد كثيرا ولكنك لا تحتاج لسؤال عنك وشكرا

موقع زيدل سوريا حمص .. خدمات تشات و دردشة ... أرشيف المنتدى