الارشيف - سلطان الطرب ضيف العرّاب غدا الجمعة

Pages: 1

سلطان الطرب ضيف العرّاب غدا الجمعة
(انقر هنا ان احببت مشاهدة الموضوع الاصلي بالالوان و الصور )

Posted by: hosam abdulaziz

اعلنت قناة Mbc ان سلطان الطرب جورج وسوف سيكون ضيف الاعلامي نيشان في برنامجه العراب
يوم الجمعة الواقع في 2-5-2008
الساعة التاسعة مساء.
------------------------------
خبر جميل لكل محبي سلطان الطرب , المقل باطلالته الاعلامية
اتمنى ان يحمل هذا اللقاء في طياته اجمل الاخبار عن الوسوف و خصوصا الصحية منها
نذكر بان الوسوف اطلق البوما جديدا بعنوان كلامك يا حبيبي منذ عدة اسابيع فقط

Posted by: samar dahi

شكرا يا حسام على هالخبر الحلو ...
انا هاد البرنامج بحبو كثير كونو نيشان هوة اللي بقدمو ....وما ادراكم من هو نيشان ..؟؟؟ هو احب مذيع إلى قلبي ...شعلة من الذكاء والحضور المميز والذوق والأدب والإيمان النادر ......
نيشان ما بتخيل في مذيع مثلو بيعطي قيمة لكل ضيف ...غريب هالإنسان اديش الله عاطيه مواهب ونعم ....
وليلة الجاي مثل ما عم تقول يا حسام إذا كانت مع جورج فهي غنية بامتياز .....واو ( نيشان مع جورج ) يا ويلي شو هالحضور القوي .....مع انو انا ماني من محبي اغاني جورج كثير ولكن كإنسان انا بحبو بشكل غير طبيعي بسبب عفويتو وتلقائيتو وكمان لانو زكرتاوي مثل ما منقول وكريم كثير على كل الناس اللي حواليه ....
يعني الليلة الجاي رح ننتظرها بفارغ الصبر ..
اكيد حلقة غير شكل ...
رح خبر كم واحد من اللي حوالي عن هالحلقة خصوصاً هدول اللي بيعبدو جورج وبيقعدوا يجاكروني فيه .....
وبتصور بالمنتدى هون في عنا كثير من الشباب والصبابا اللي حبهم لجورج واصل حتى العبادة ...وما أكثرهم بسوريا ولبنان ....
الله يهديكم....

Posted by: sweet-w

فعلاً رح يكون لقاء كتير مميز .. بين افضل مذيع .. وسلطان الطرب

بس سؤال ؟؟؟؟؟

ليش الحلقة تسجيل .. وما نها مباشرة متل كل الحلقات

Posted by: Nada1981

مرحبا جميعا

معلش سمر سمحيلي المرة هي كون مختلفة معك بلرأي شوي

انا مابحب نيشان ابدا بحسه مذيع فاشل لأبعد الحدود و اول حلقة من العراب حضرتها كانت مع اصالة نصري و انغام قلت بلكي بغير شوي من اسلوبه او بيكون البرنامج هدا لابقله بس للاسف هو و البرنامج ماعجبوني ومابقى حضرت غير هلحلقة هي

بس بما انه ابو وديع معه بلحلقة رح كون قاعدة قدام التلفزيون من الصبح هدا الوسوف ولوووووو

كل العالم بتعرف انه نيشان من المعجبين بجورج و ابو وديع بيحبه كمان بدليل انه نيشان كان معه بسهرة تكريمه على روتانا من كم سنة.

سمر جورج بيضل و رح يضل سلطان الطرب ومافينا ننكر شعبيته و نجوميته و عنجد كتير بنفتخر انه حمصي مثلنا بما انه هو كمان بيفتخر بلشي هدا

يمكن الحلقة تكون مسجلة بما انه سمعنا انه ابو وديع هلا ب أميركا بس لهلا ماحدا بيعرف كيف رح تكون الحلقة بكرا

تحياتي

ندى

Posted by: RUSHA AWAD

مارح اكتب محبة بجورج وسوف بس كرامة هالمشحرين اللي مو مصدقين يشوفو بمقابلة ولو خمس دقايق, محطة الام بي سي اعلنت انو الحلقة يوم الجمعة بس اني اليوم حضرت الإعلان تبعها وكتبو انها رح تكون يوم الأحد لهيك يا شباب ويا صبايا "خصوصا اللي عندهن النزعة الحمصية يعني الحمامصة" تابعو مزبوط لما يفوتكن شي فقرة من البرنامج. ندى تسلميلي, رحت اطلع من عقلي وقت شفت ردك, هلأ يعني نيشان بكل ثقافتو وهضمنتو وحضورو المميز لاشيء وجورج وسوف سلطان. طبعا اذا بدي كون جدية شوي أكيد ماني من مجانين جورج وسوف بس بحب الأغاني القديمة تبعيتو يعني من عشر سنين ولورا وطبعا كشخص ماعندي ضدو أي شي وعلى فكرة في نسبة كبيرة من أهل زيدل هون بجاكسونفيل قاطعين بحفلتو بميامي "مابعرف ايمت" يعني الواحد بدو يسوق ست ساعات مشان يحضر حفلة 3 ساعات. والله لو فيروز لروحهن مشي بس جورج وسوف؟؟؟؟؟؟

مع حبي واحترامي
رشاعواد

Posted by: hosam abdulaziz

حضرت اللقاء و آه من لقاء
لم اعرف من كان المحاور نيشان ام السلطان
لكن رغم عدم حضوري المسبق لأي حلقة للعراب , لكني اكيد ان البرنامج لم يمشي بسياقه الطبيعي كما اراد نيشان او كما فعل سابقا مع زواره
بل استثنائيا مشى كما اراد الوسوف ,
جماهير مخلصة داخل و خارج الاستديو عبرت عم اخلاصها او عشقها الاستثنائي لهذا المطرب.
مواقف عفوية من ابو وديع ادخلت الضحكة مرارا الى قلوبنا.
صدق , عفوية , بساطة لم نجدها في اي فنان عربي.
صوت رغم غدرات الزمن , ما زال يصدح و يسلطن و يطرب جميع عشاق الوسوف.

العراب كان او محطة تلفزيونية في حياة الوسوف (برنامج حواري)
و ذلك بناء وعد قطعه على نيشان سابقا (بيوعد و بيوفي)
فهل يا ترى سيوعد الوسوف مذيعا آخرا حتى نتفائل بلقاء آخر في السنين المقبلة.
اتمنى ذلك.

كلمة اخيرة:
وسوف كما وصفه نيشان هو حدث بما للكلمة من معنى.
استثناء بما للكلمة من معنى
اطلالة استثنائية تتمناها اي محطة تلفزيونية و لقاء يمني به النفس اي مذيع.
لا يمكنني ايجاد حالة جماهيرية مطابقة لحالة الوسوف , هي حالة من الحب لا اكثر ’ العشيق ايضا اكثر , التعبّد ؟؟ اتصور لك.

ابو وديع شكرا شكرا شكرا, اطربتني اضحكتني و ابكيت الكثيرين.

Posted by: مي زيادة

كان اللقاء غير شكل..وهي أحلى حلقة من العراب ومتل ما قال الأخ حسام الحلقة كانت تمشي كما يريد أبو وديع ، عأي حال قبل بشوي كنت عم أقرأ مقال عن الحلقة لكل الي بيحبو يشوفوها http://www.syria-news.com/var/articlem.php?id=3437

Posted by: Nada1981

مرحبا جميعا

رشا يمكن الاعادة يوم الاحد او الاثنين بس القناة اعلنت انه الحلقة رح تنعرض يوم الجمعة, يعني صحيح نحنا حماصنة بس لمى الشغلة بتكون عن الوسوف تأكدي انه الحماصنة اول العالم رح يتابعوه

الحلقة كانت حلوة كتير وخاصة انه الوسوف ديمقراطي كتير بأجوبته و طبعا لانه كان لوحده غير عن حلقات العراب الثانية الي بيستضيف فيها نيشان 2 من الفنانين مع بعضهم. الوسوف كمان عمل الي بده ياه و حكا الي بده ياه و نيشان ماغدر عليه و احلا شي لمى رفض يطلع على الدرج و الغرفة المسكرة منشان يسمع السؤال الخاص و بعتقد وقتها عصب نيشان منه

كيف مابدنا نحب الوسوف بعد ماقال بلحلقة: انا فنان سوري و بس

رشا اغاني الوسوف كلها حلوة, و عندك مثلا اغنية بستنى بليوم و اليومين هي ماعمرها 10 سنيين حوالي كم سنة و مع هيك من احلا الاغاني الي غناها الوسوف.
تحياتي

ندى

Posted by: samar dahi

كانت حلقة مميزة مميزة جدا جدا جدا ...هاي مشان اللي بحبو الوسوف ....روحوا انبسطوا ...
بس بصراحة يا جماعة شخصية جورج مو معقول اديش قريبة لقلوب الناس ...والله شي بيخيل اديش هالناس بتحبو .....
حلقة العراب هالمرة طلعت عن سكة الترين المرسومة ( طالما انا اليوم متاخذة هالقد بالمحطة هالفترة ) هاي اول مرة بيكون مثل ما قالت ندى ضيف واحد فقط ...وشي تاني جماهير غفيرة خارج الاستديو ....الوسوف خلى نيشان يمشي مثل ما بدو هوة ....
اكثر شي عجبني بالحقلة وما قدرت ما زقف لما قال ابو وديع انو هو مطرب سوري ....رغم اديش اللبنانية متمسكين فيه على انو لبناني ....فشكرا يا ابو وديع على هالحس بالانتماء لبلدك سوريا ...
بس يا ندى بدي قلك شي ...
لو ما إنو نيشان هالقد مميز ابو وديع ما بيقبل يعمل لقاء معو بهالفترة الحرجة من حياتو خصوصا انو إطلالات ابو وديع نادرة على الشاشة ...فنيشان هو المذيع الأول اليوم .....فالثقافة اللي بيتمتع فيها والزوق والأخلاق اللي انا عرفتها من خلال متابعتي لأخبارو ما بتلاقيها عند إعلامي غيرو ...يا ندى لا تنغري بأي مظهر خارجي ...بتمنى تتعرفي أكثر على نيشان وتعرفي شي عن حياتو لحتى تغيري رايك فيه ...ورغم كل شي فهو الحضور القوي والمؤدب ...
على كل حال ....نحن هون لحتى نكتب عن ابو وديع ...مو على شان نيشان ....
دخيل عينو ما أحلاه كان مبارح ...ودخيل ( هالرب ) اللي بتطلع من ثمو كل ما بدو يبلش غناء ...
الله يقدملك الصحة يا جورج ...وانشالله على طول منور كل الشاشات ....

Posted by: hosam danial

أنا وين ما شفت موضوع عن ابو وديع بدي شارك فيه
ما بقدر مو بأيدي ما بعرف ليش...
المهم أنا لسى ما حضرت اللقاء بس بعرف انو رح يكون
مميز >>> السبب : هوي انو ابو وديع ما عندو كذب مثل باقي الفنانين .
انا كنت حب ميادة الحناوي
لكن بعد ما حضرت اللقاء تبعها بالعراب اكتشفت سخافتها وكذبها ...
لكن الغالي جورج ما بيعرف يكذب , وصادق مع الجميع
وما بتفرق معو وأنا بعتقد محبة الجميع لجورج لهل سبب
طبعاً بالاضافة لاغانيه الرائعة ان كانت بالكلمات او اللحن
وبرجع بعيدها انا وعيت على صوت ابو وديع
واذا بينزل شريط او سي دي فاضي الو انا بشتريه
(معليش خليهن يقولو احمصي)

Posted by: Kinan

تفضلو شباب اللي بيحب يحضر الحلقة كاملة على يوتوب هي اللينكات الصراحة ابو وديع غير شكل و حلقة بتجنن و على قولة حسام ابو وديع ما بيكذب شوفو الحلقة و اتأكدو

موقع زيدل سوريا حمص .. خدمات تشات و دردشة ... أرشيف المنتدى