الارشيف - أجيالنا في الاغتراب

Pages: 1

أجيالنا في الاغتراب
(انقر هنا ان احببت مشاهدة الموضوع الاصلي بالالوان و الصور )

Posted by: hosam danial

بدي ركز على موضوع كثير مهم
ولازم يتناقش فيه بعد ما عرفت انو جميع المغتربين
من بلدنا عم يشوفو ا مواضيع منتدانا الغالي.

بعض الأسئلة التي يجب ان يكون لها أجوبة .
1- ماذا تتوقعون من مستقبل الجيل القادم من المغتربين
- على الصعيد العلمي
- العادات الشرقية لباس - السهرات - الالعاب ........؟
2- هل هذه الاجيال يعتبرون مجيئ أبائهم وأجدادهم هجرة أو .....؟
3- ما هي نسبة محبة هذه الاجيال للوطن ؟

وهناك أسئلة كثيرة أرجو أن تطرح من خلال النقاش

ولي عودة معكم بعد الردود

وأرجو التفاعل لكي نستفيد ونفيد
حسام

Posted by: wajdy barakat

والله يا حسام انا لي راي ولكن قد لا يكون صائبا بما انني اعيش في زيدل ولست من المغتربين او جربوا الاغتراب ....ولكن الظاهر وبحسب ما اسمع وبحسب تحليلي للامور بان الاجيال التي في الاغتراب والتي عمرها ما بين 10 و 15 سنة ان يتعلموا ويصلوا الى مراتب عليا كون الاهل قد اسسوا لهم وضع ياهل للدراسة ولكن قد لا يفكرون في القدوم الى بلدهم الا كل 6 سنوات وما فوق .....الاجيال التي دون سن 10 سنوات لن يعرفوا بلدهم ولن يعترفوا على الاهل لانهم سيعيشون عيشة الاميركان وسيبذرون كل تعب اهلهم واجدادهم .....اما بالنسبة للجيل الذي فوق 18 سنة فهذا سيظل متذكر ايام الوطن و سيحضر اليه سياحة كل فترة واخرى .....الباقي على الدنيا السلام ....هذا رايي وتحليلي وارجو ان يكون خاطىء ....شكرا لك موضوع في غاية الاهمية ويجب ان ياخذ حيز من النقاشات.

Posted by: Nada1981

مرحبا جميعا

شكرا اخ حسام على الموضوع بس انت ماذكرتلنا قصدك المغتربين جميعا ام المغتربين ب اميركا؟

للأسف يا اخ حسام كلمة مغتربين مافينك تشملهم ضمن فئة وحدة, لازم تجزئهم على مجموعات, لهيك بلاول حبيت اعرف منك شو بتقصد من كلمة المغتربين

تحياتي

ندى

Posted by: hosam danial

اخت ندى المغتربين وين من كانو اسمهن مغتربين

وبشمل جميع المغتربين ومن كل الفئات

ووجدي انت ما عم تحكي شي غلط

وفهمت عليي شو قصدي بالموضوع ؟

وشكراً لمشاركاتكن

Posted by: rashafaour

الله يستر يا حسام من اللي جاي و من الأجيال القادمة
بس أنا بدي قلك يا ريت تسأل عن الأجيال بزيدل
وين صار مستوى التعليم أو التحصيل العلمي
و اللباس و السهرات...............
للآسف ما عد في طموح لأي شي
الطموح الوحيد هوي الاغتراب أو أميركا بشكل خاص
و ما بظن انو حدا بفكر بمحبة الوطن
ما فيني قول كل الشباب بس الغالبية منهن
يمكن الأجيال بالاغتراب رح يأسسوا حياتن أحسن من هون بكتير
و رح يكون مستوى تعليمن أحسن بكتير

Posted by: Ozone

من أكبر نعم الله هو الرزق في الوطن... لكن!!! ... الفقر في الوطن غربة والغنى في الغربة وطن.

قلبي معكون

Posted by: hosam abdulaziz

انا برايي هذا هو الوضع من يوم بدا الاغتراب
لا بل الوضع في تحسن كبير عن ما كان عليه و خصوصا مغتربي امريكا الشمالية.

بدات تجربة الزيدليين مع الاغتراب في كل من استراليا و امريكا الجنوبية .
و للاسف يمكنني وصف علاقة هاتين الجاليتين مع الوطن الام بالسيئة.
لماذا؟؟؟؟
نعرف ذلك من اقربائنا اللزميين الذين تغربوا منذ 50 سنة تقريبا :
1 ابن القرية الذي هاجر , زياراته للقرية نادرة.
2 تربيته لأبنائه بعيدة عن اي شعور بانتماء للبلد الذي اتى منه الوالد
3 عدم تعليمهم للغة العربية.
4 عدم تشجيعهم على زيارات البلد الا في حالات نادرة.

ربما الظروف المادية لعبت دورها عند البعض و لكن النسبة اكبيرة مسيورة و لا يعنيها الامر شيئا.

اما الوضع في امريكا الشمالية الى حتى هذا اليوم افضل لكن لا اعلم بالمستقبل.

لكن اريد ان اوضح نقطة:
انا لست ضد الاهالي او الاولاد في هذا الشعور , لنكن منطقيين , بلدي هو المكان الذي اجد فيه كرامتي
هو المكان الذي ترعرت فيه , و تربيت فيه و تعايشت مع اصدقائي فيه.
و لن الوم اي برازيلي من اصل سوري ان لم يفكر بزيارة سورية الا مرة في عمره
او استرالي او ارجنتيني .................

ساعطيكم مثالا على ما اقول:
الجالية الارمنية هي من اكثر الجاليات على مستوى العالم التي عرفت بتعصبها لوطنها الاول و محافظتها على لغتها و عاداتها
لكن !!!!!!!!!!!!! هل فكر ارمن سورية او لبنان بالعودة الى ارمينيا للعيش هناك ؟؟؟؟؟؟
بكل تأكيد لا و الجواب على ذلك هو ما ذكرته اعلاه.

يقال انه في البرازيل 11 مليون من اصل لبناني
هل فكر احدهم بالعودة الى لبنان , بكل تأكيد لا.

اذا الامر طبيعي جدا و لو لم يجد هؤلاء المغتربين سببا حقيقيا للاغتراب لما تركوا اوطانهم.
و بما ان اسباب الاغتراب ما زالت قائمة و فلا عودة في المدى المنظور لأي منهم او لأي من ابنائهم.
--------------------------
يمكن اطلت الحديث حول نقطة الحنين للوطن

بالنسبة للباس و العادات
براي جالياتنا بنسبة كبيرة جدا 90% محافظ و عندهم تعصب اكثر من سكان زيدل انفسهم
و الا ما ينوجد شواذ ابتعدوا عن اصول التربية الشرقة.

الناحية العلمية الاجابة عندك ادق يا خال.

Posted by: silva

الموضوع جدا مهم وشكرا لك ومن روعته يجعلنا ننمي حس الانتماء لهذا الوطن الغالي على قلوب الجميع واشعر وأثق بكل مغتر خارج القرية سواء بعدة المسافة ام قصرة بقلبه المحترق عند سماع اسم الوطن او خبر عنه وهذا الانتماء يزداد في الازمات ويتطور للذروة عند الاخطار لاسمح الله ولنا تجارب في ذلك ..وولكن لابد من انعكاس هذا الانتماء عبر الاجيال القادمة بمسؤولية اكبر خاصة لدى الافراد اللذين لديهم امكانية الزيارة او تعليم ابنائهم لغة الوطن والقرأة والكتابة بلغتنا العزيزة على قلوب الجميع ..ولا يقبل أي عذر بهذا الامر وعلينا نحن المقيمين ان نحسن من اظهار وجه الوطن المشرق لنشوق المغتربين لزيارته ..وسررت بالردود كثيرا وشكرا

Posted by: sulieman safar

أول شي بحب هني حسام, على مقدرته الجديرة على وجد موضوع راهن ومهم من أبسط الأفكار. وبحب نوه وبدون خوف أو معذرة بأن صديقتنا رشا الفاعور قد لخصت الجواب على المضوع في سطر واحد.........

...........الله يستر يا حسام من اللي جاي و من الأجيال القادمة.

ولي عودة الى الموضوع بعد جمع الأفكار وقرائت المزيد من ردودكم الظريفة.

شو بدي قول عن هالجيل ؟ شو بدي قول....................؟؟؟؟؟؟؟؟؟؟؟؟؟؟؟؟؟؟؟؟
ما بعرف!!!!!!!!!!!!!!!! شاتت ؟ بيجوز!!!!!!!!!!!!بافلوفي؟؟؟؟؟؟؟؟؟؟؟؟ اكيد!!!!!!!!! ضايع؟؟؟؟؟؟؟؟؟ أكيد!!!!!!!!!
بيجنن؟؟؟؟؟؟ مو هالقد!!!!!!!!!أحسن من اللي سبقوا؟؟؟؟؟؟؟؟ لالالالالالالالا!!!!!!!!!
.............. وعلينا نحن المقيمين ان نحسن من اظهار وجه الوطن المشرق لنشوق المغتربين لزيارته
أفكار ظريفة ومن جيلي بالضبط.

سليمان.

Posted by: kevin

-----------------اولى--مشاركاتي--------------------معكم---انا--لااظون--ولامتاامل---شئ---من--الجيل------القدم--الاخ--مازن-يوسف--يعرف-تماما--لواني----لااعرفه--شخصين-------------------وشكرا--الى-كل-اعظاء-المنتدئ-------------------------------------------------================================================-=سوريا----انت----------------الامل-

Posted by: mazen youssef

أول شي بدي أشكر الأخ حسام على طرحه للموضوع القييم

ثاني شي بدي رحب بأسمي وأسم الاعضاء بالعضو الجديد الاخ kevin واهلا بك في منتداك زيدل

هذا الموضوع بالذات كان... ولايزال..حديث الجالية هنا على الاقل بمكان اقامتي (غواديلوب جزيرة فرنسية بالكاريبي واللي بحب يزورها فله أخ هنا أهلا وسهلا فيكم)

فكل شخص مغترب له ظروفه الاجتماعية والمالية وقدرته على الاندماج بالمجتمع الجديد ..ووووو....الخ
ولكن هناك أمرمهم انه المغترب سافر بالاساس لتحسين الوضع المادي (غالبا لا حصرا) فلماذا لا يعود بعدما
تحققت الغاية من الاغتراب فهنا السؤال الصعب الذي يحتاج الى مناقشات وأراء أو ربما الى اتخاذ القرار الصعب هل أبقى في الغربة انا واولادي وزوجتي واسافر سياحة الى سوريا كل ما أستطعت( ولكن كما يقولون الغربة مضيعة الأصول)أو أعود الى الضيعة اعيش فيها بعد ما أمن الواحد حالو بشي مشروع (في الغربة أو في سوريا)وللحديث تتمة ..............................................
بدي رأيك ياعم سليمان بالموضوع لانك على حد علمي أنت من الجيل القديم في الأغتراب

ولكم محبتي

Posted by: new_zaidal

خال حسام الحقيقة موضوع هام جدا لانو للاهل دور كبير جدا بترغيب الاولاد وتعليمهم على حب الوطن بالاضافة الى انو بعض الاهل عم يلاقوا صعوبات مع الاولاد في مراحل معينة من العمر يصعب معها السيطرة عليهم لانهم يعيشون في مجتمع منفتح يختلف بشكل كبير من حيث الثقافة و العادات والتقاليد و الحضارة هذا بالضافة الى حاجز اللغة فهو مهم جدا
فمن خلال تجربتي مع اغلب اطفال المغتربين و عائلاتهم فان الاطفال عندما ياتون الى سوريا يكون لهم مساحة كبيرة من الحرية لم يتعودو عليها في بلد الاغتراب بالاضافة الى الحياة الاجتماعية التى تختلف عن حياتهم هناك بشكل كبير فقد لاحظت ان التكلم باللغة الانكليزية بين بعضهم كثيفة لدرجة رفضهم للتكلم بللغة العربية وهناك اهالي تشجعهم على ذلك وكذلك اختلاطهم بالمدرسة و اكتسابهم عادات بغيدة عن افكارنا وضعت بعض الاهالي في حيرة من كيفية التعامل معهم هل يعزلونهم عن المجتمع المحيط ؟؟؟؟؟و الى متى فهناك حدود تربوا عليها وانا اجزم انهذا الموضوع هو الشغل الشاغل لاغلب الهالي في لمغترب وخاصة عندما يصبحوا في مرحلة حلرجة من العمر و انا اشجع جميع المغتربين على بناء جسور متينة مع بلدهم الاموهذا ما الاحظه حيث زادت نسبة الذين يبنون مساكن ثانية في الوطن ولكن الذين يعيشون في سوريا عليهم ايضا مسوولية كبيرة في جعل اقربائهم ينسجمون مع بلدهم ليس فقط عن طريق الحفلات و الرحلات بل بتعريف الاولاد بحضارتنا وكذلك تنظيم مدارس لتحببهم بلغتهم الام لكي يتواصلو مع الاخرين قراءة و كتابة و تنظيم بعض المهرجانات الرياضية و الثقافية لان الاطفال بحاجة للعب والمرح وكذلك الاكتشاف الاشياء الجميلة في بلدناو هو مشروع يحتاج الى جهود كبيرة و لكن يجب ان نبدأ حتى لا نصل الى يوم نفقد فيه اولادنا من الجيل الثاني او الثالث كما حصل مع الهجرات السابقة (البرازيل مثلا)وانني متحمس جدا لهاذا الموضوع كوني كنت مغتربا و اعرف الفجوة الموجودة و التي كلما مر زمن بدون و ضع حلول كلما خسرنا اكثر و لكم الشكر

Posted by: samar dahi

مرحبا للجميع في يوم زيدلي هوائي مميز ....
اريد أن أقول لحسام حيث طرح موضوع سهل ممتنع بالنسبة لنا هنا كمقيمين حيث لم ندخل في حذافير الحياة في الاغتراب ....فلكم حياتكم ولنا حياتنا ...ومن هنا نستطيع ان ننظر ونقول الكثير من الكلام ولكننا لا نعلم إن كان كلامنا حقا قابل للإندراج في الحياة الواقعية والعملية عندكم ففي النهاية أنتم من يستطيع تقييم هذا الجيل وليس نحن ....
ومع هذا بسبب التواصل الكبير والكبير جدا بين ابناءنا هنا و ابناءنا في الاغتراب نستطيع أن نعطي راي بنيناه على الصورة الكاملة والواضحة التي تنقل إلينا منكم إلى زيدل ....فلا يكاد يخلو بيت في قريتنا إلا وفيه اثنين أو ثلاثة في بلاد الانتشار على وسعها ....وكل بيت يتواصل يوميا مع ابنائه فالكل يعرف كيف يعيش ابناءنا هناك ...
ومن هذا المنطلق اريد أن أقول وأجيب على اسئلة حسام ...
العلم في الإغتراب : أظن أن الجيل الزيدلي القادم سيكون رافعاً راية العلم عاليا حيث سنحت له الفرصة أن يتعلم ويدرس في ارقى مدارس امريكا (وهنا أتكلم بشكل خاص عن مغتربينا في امريكا ) وسيكون متاحا له إن رغب في العلم كل الفرص في الجامعات الأميركية خصوصا وأن ابناءنا هناك لا يتوانون لحظة واحدة في دفع اي تكاليف لهذا الغرض
وشىء آخر أن أغلب اخوتنا اليوم يعملون في (ستورات ) وكما هو معروف الشقاء الذي يعيشونه بسبب العمل المضني هذا فكل أب من هؤلاء يرفض أن يعاني ابنه كما يعاني هو .. وليس لابنه طريق آخر غير العلم ومن هنا ترى أن أغلب الشباب يشجع أبنائه على العلم .
العادات : أظن أنه حتى الآن لا يزال هذا الجيل يتمسك بقليل من قيمنا وعاداتنا ....وأظن أن الجالية الزيدلية التي تعيش في جاكنفسل متمسكة بعاداتنا أكثر مما نحن فالحرص من قبل الأهالي على تربية أبنائهم على عاداتنا وتقاليدنا يساعدهم فيها الحياة الاجتماعية التي يعيشون فيها مع بعضهم دون اي اتصال بالأجانب وهذه الناحية ايجابية ولكن لن ننفي وننسى تأثير المدراس على نفسية الأولاد وبالرغم من هذا فالتوعية الدائمة هي السبيل للوصول إلى حل وسط بين عاداتنا وتقاليدنا بحيث يتوازن الطفل في كلا المجتمعين ...وهذه المعادلة صعبة جدا ولكنها ليست مستحيلة إذا عرفنا كيف نوجه وكيف نتبنى ابنائنا بكل حب دون أي ضغط ....

وعن اللباس اظن يا حسام أن هذا الموضوع بسيط ولا يجوز طرحه في خضم مشاكل النمو والتربية الأخلاقية للجيل القادم في الإغتراب ..فاللباس هو حرية شخصية مهما حاولنا أن نوجهها فهي خيار شخصي لكل فرد ولا تعيب أحدا ....فاللباس لم يكن يوما مصدر تقييم وأخلاق ....خصوصا في المجتمعات التي تقدر وتحترم بعضها بعضا ...

وعن مدى تعلق الجيل القادم بالوطن ..فهنا الدرو الكبير يعود للاهل ..فعلى قدر ما يزورون الوطن ويحبونه يزرعوا هذا في قلب ابنائهم ..ومن مشاهداتنا لما يحصل في زيدل ...فأنا أرى أن كل الأجيال الصاعدة التي ولدت في اميركا تحب القرية بشكل غير طبيعي...وكلكم تعلمون أنهم هم اللذين يصرون على القدوم إلى هنا في كل صيف ...فتراهم يتحضرون للقدوم قبل السفر بثلاثةاشهر والفرح في قلوبهم ....وهذه الإشارات أنا اراها ايجابية جدا تجاه هذا الجيل الذي لم يولد هنا ولم يعيش هنا تراه متعلقاً إلى هذا الحد بقريتنا ...إن هذا لشىء يفرح القلب ...

وفي النهاية ....إلى الآن لم نرى التاثير الكبير للمجتمع الاغترابي على ابنائنا المغتربين الجدد ...الذي يختلفون عن المغتربين القدامي الذين غادروا الوطن دون أمل بالرجوع ولهذا صار هذا الإنفصال عن وطنهم وصار للجيل الجديد انتماء من نوع آخر للمجتمع الذي ولد وعاش فيه ...
بينما الإغتراب الجديد له نمط آخر فهو على موعد ولقاء مع الوطن في كل سنة هو أبنائه ومن هنا أرى الإيجابية في الجيل الصاعد في الاغتراب ...
وبالطبع لكل قاعدة شواذ ....والشواذ يمكن أن يوجد في كل مجتمع حتى هنا في مجتمعنا شواذات ولكنها ليست القاعدة كما أن الشواذ في المغترب ليس هو القاعدة ....
نشكر الله أن قواعدنا التي تعيش في بلاد الغربة تستند على أرض اصيلة وصلبة لم تنهر حتى اليوم ...
كل الشكر لك حسام على موضوعك ...ونحن في انتظار ردك .....
كيف تنظر إلى مستقبل ابنتك _ القادمة بعد شهور قليلة _ في امريكا .؟؟؟؟؟؟
كيف تتوقع أنك ستربيها .....وهل انت قادر على زرع قيمنا الشرقية في عقلها رغم كل الظروف المحيطة ......؟؟؟؟؟؟؟
اخبرنا حسام عما يجول في فكرك ....؟؟؟
مع الشكر لكل المتفاعلين مع الموضوع .
سمر

Posted by: syria & joleat

مرحبا جميعا ...
أنا رأي أن البيئة المؤثرة على الأجيال هم الأهل وهذا لا يعني أن الاجواؤ الخارجية لا تؤثر ولكن الاهل هم الاساس ...
سأتكلم من تجربة شخصية نحن نعيش هنا في قطر ولكن لم يتأثر تفكيري بهم قط من جميع الجهات كالتدين والترف وما إلى ذلك ... خالي عاش كل حياته في هولندا وأولاده لا يجيدون العربية ولكن فوق كل ذلك لا تختلف عاداتهم عن عادتنا بشيء وكذلك عمتي المقيمة في كندا ما أحاول الوصول إليه مهما اختلفت البلاد التي هجرنا إليها فسنبقى نتحلى بذلك الطابع الشرقي السوري تحديدا الذي تربى عليه آبائنا وربونا عليه ...
أما على الصعيد العلمي يختلف الامر من شخصا لآخر فالذي يريد العلم يجده كل مكان ولكن كملاحظة يختلف العلم من بلد لآخر .... فمثلا الكم العلمي الذي أدرسه مختلف تماما عن الذي يدرس بسوريا لغة ومضمونا ومن جميع النواحي ولكنه بالأخر علم ..
حب هذه الأجيال للوطن .... أتيت إلى هنا وأنا في الصف السادس الابتدائي أي أنني لا أذكر غير ذكريات طفولة بريئة هناك ولكن كبرت وراهقت هنا ولكن بالنسبة لي شخصيا سوريا فوق كل شيء والذي يتحدث عنها وانا موجودة يراعي الاسلوب تماما لاني حساسة جدا لهذا الموضوع فأنا أحبها حبا أبدياً ... ولكن لا اعرف ما راي المغتربين الباقيين بحب الوطن ..
لا ليست هجرة بل غربة مؤقتة إلى أن تفرج الأحوال فلا يوجد أجمل من الوطن ...

تحياتي لحسام دانيل لفتح مثل هذا الموضوع _ ياسمين _

Posted by: hosam danial

شكراً كثير الكن على هالتفاعل الرائع
وانا متوقع هالشي والسبب هوي
بعرف خوفكن واهتمامكن الكبير على هالجيل
اللي رح يجي وأذا عم نحكي هيك عن الجيل
الثاني اللي عم تتراجع شريقتو
بقى كيف رح يكون الجيل الثالث

ومارح اقدر رد على كل شخص
بس بدي جاوب عن أسئلة سمر
[quote]كيف تنظر إلى مستقبل ابنتك _ القادمة بعد شهور قليلة _ في امريكا .؟؟؟؟؟؟
كيف تتوقع أنك ستربيها .....وهل انت قادر على زرع قيمنا الشرقية في عقلها رغم كل الظروف المحيطة ......؟؟؟؟؟؟؟
اخبرنا حسام عما يجول في فكرك ....؟؟؟/quote]

بصراحة يا سمر في خوف كثير
مو بس على أطفالي على كل اطفال
المغتربين لاني عم شوف شي بالولايات المتحدة
عن جد بيفزع .... ما بدي أحكي كثير
وما فيني من هلق قرر أو خطط لتربية اولادي بعدين
لانو حتى عنا بسورية وبزيدل ما عم نعرف ولادنا شو مخبالهن
ومن شان زرع القيم الشرقية بعقلها
انا رح حاول قدر الامكان لكن مانها شغلي سهلة

بس انا حابب شوف شي كم تعليق من يلي
عندهن أطفال ببلاد الاغتراب
من شان يعطونا خبرة ونستفيد منهن

وبرجع بقول شكراً كثير الكن على هالردود المعبرة

حسام

Posted by: fr george massis

حسام انا كتبت رد بس مابعرف كيف انمحى او انتشل او انخطف على كلن ماهمنا بنرجع بنكتب كرمال عيونك الغالية
يعني الموضوع كبير وكبروا من كبر المسافة وبعدها بيناتنا مقيم همو اللغة والعادات وال..................حتى اللباس مابيرحمونا فيه، وبين منتشر ببلاد الله الواسعة يلي همو كيف يربي ويحافظ على عيلتوا يلي بدها صلاة وصبر كبير كثير ليقدر يطلع بأمانوا.
وهون بدي رد على حسام بالنسبة لمغتربين البرازيل وياريت تحدد شو بدك منهم انا برد عليك ولك عالم طلعو بالسفينة وزوادتهم كم بيضة مسلوقة وعلقوا بالبحر اشهر من السفر منهم وصل محل مابدوا ومنهم ضحكوا عليه وقالوا وصلنا ونزل من المركب ليواجه مصير اكشر لابيعرف لغة ولابيعرف حدا ولابيعرف شو بدوا يشتغل والمصيبة معو عيلتوا كلها ولاد عم يجرهم بأيدوا وولاد على كتفوا واحيانا ببطن مرتوا فالموت مر والهزيمة كشرة..............
وبعد كل هالشرح برايكم عندو وقت يفكر باللغة والعادات ليش هوي متأمل يرجع ويكحل عيونوا بشوفة الأهل والوطن هذا الجيل القديم اما الجيل الرابع يلي عم عاشروا هلق فهو جيل عملي فخور بأصولوا بس عندوا حياتوا ووطنوا ومسقط راسه ورفقاتوا وجامعتوا وكمبيوتروا والعالم بين ايديه لمين بيشتاق بسوريا راح مرة اي وبعدين ..........هلق دور غير بلدان بدوا يحكي لرفقاتوا غير كن الكبة والتبولة والعراس المجنونة والفخفخة الكذابة يعني بدي احكي قصص عن يلي بيروحوا على سوريا من المغتربين اذا راحوا على سهرة واتعشوا بتفضحوهم بالحكي وصارت لليوم بيقولوا اهل البرازيل بياكلوا بالسهرات اي شوف شو هالذنب الكبير .. اذا طلعوا بلباس بسيط وهدايا رمزية يا اخي كراحيت وبخيلين ومانهك كوووووووووووووووووول اي مصيبة الله يساعدنا عليكم لاء وقال بينعتوا المجتمع الغربي بالفلتان بتصدقوا اذا قلتلكم بخاف انا وكثير سمعانها من أهل البرازيل على ولادهم من شبابنا بالضيعة يعني مثلا بالبرازيل يلي ماعاجبة حدا انو الشب يدخن يعني مستحقر من الجميع مثل يلي عامل شي عملي ومرذول من المجتمع اي بزيدل طفالنا شاحطين الأركيلة وين ماكان وراهم دائما حديثنا على سبيل المثال وليس الحصر.....
وهلق بدي اعكس السؤال الأهل براي الكل المسؤولين يا هل ترى ولادنا بيحبوا يروحوا على سورية واذا اي شو بيحبو هناك وشو يلي بيعلقهم يا ريت تفيدونا لأنو هالموضوع كثير بيفيدني بخططي الرعوية القادمة مع حب وتحية لكل الأحبة من البرازيل وجالية البرازيل
الأب جورج والله معكم

Posted by: mazen youssef

تحية طيبة لكل الاعضاء الاحباب والى الأب الغالي جورج تحية حب لكم وللجالية الغالية في البرازيل
لاأعرف مدى تفاعل أبناء الجالية مع الضيعة والوطن ولكن كما أضن انها نفس الجالية في الارجنتين
وبما انني عشت في الارجنتين لمدة 3 سنوات فانا اعرفها جيدا المشكلة الكبرى التي يعانون منها هي
قلة السفرات الى سوريا وهذا يولد عدم الشعور بالانتماء الى الاهل والاقارب والضيعة فسأضرب لك حادثة
بسيطة جرت معي .. لم أتمكن من العودة الى زيدل الا بعد 12 عام فحسيت انني غريب حتى عن الحارة
عن العادات .. عن المفاهيم .. عن طرق واسلوب التفكير...عن كل شئ...(مع انني خرجت من سوريا قبل التخرج من الجامعة اي لم اكن صغيرا)
أما الان بعد ان تتالت سفراتنا الى الضيعة انا وزوجتي والاولاد فقررنا في هذا العام الاستقرار النهائي في
زيدل فتعالو لنقيس ذالك على الجيل الثاني والثالث ...براي وحسب خبرتي المتواضعة في الاغتراب

بحححححححححححححححححححححح ليس هناك بعد أنا أصلي من زيدل أو سوريا

ولكم محبتي جميعا

Posted by: abode durra

شكرا حسام كثير على هالموضوع الحلو و الحساس يعني خلوني احكي من خلال تجربتي الشخصية:
للي ما بيعرف اني شاب عمري 16 سنة كنت عايش بسوريا و جيت مع اهلي على الولايات المتحدة الامريكية هجرة و صلي بامريكا من تشرين الثاني 2007 و هاي ملخص ما شفتو بين ولاد ضيعتني بهالبلد و بعتقد انو اني اكثر واحد فيني فيدكن بهالشغلة:

هون المدارس سهلة كثير بالنسبة لسوريا اللي معروفة بكثافة منهاجها و مشان هالشي الطالب هون ما بقعدلو شي ساعة ساعتين على الاكثر بيكون مخلص و كمان نظام المدرسة اللي كل يوم نفس الشي و نفس المواد بيسهل المدرسة و بيكون الشب عندو كثير وقت فراغ
مشان اللغة المدرسة بشكل عام بتنتهي الساعة 3 ظهرا و هالشي بيخليني نشوف انو الطالب قضى نص نهارو عم يحكي انكليزي و بعدين بالبيت وقت الوظايف كمان انكليزي و بس يخلص بمارس هواياتو اللي بالانكليزي و هالشي بيخلي يتعود على هاللغة و كثير اني شفت رفقاتي العرب بيحكو مع بعضهن بالانكليزي ال لأنو اسهل و معهن حق و ببعض الاحيان مع الاهل

و هالشي بيجيبني لعند الاهل اللي هني الهن اكبر دور بحياة الولاد الاجتماعية و اني برائيي لازم يشجعوا الولاد على مرافقة الولاد العرب و بالاخص من الضيعة و كمان يحاولو يحكو دائما معهن بالعربي و يشجعو على القعدة معهن مشان تقواية اللغة بدل ما يكون على الكمبيوتر او شي العاب فيديو بتلهي

و بس يجو (يروحوا) هالشباب على سورية بتجيهن الحرية المطلقة اللي ما موجودة باميركا لأنو هون الولاد من الخطر يطلعو من البيت لحالهون و بيرحوا على سوريا بيطلعو عوين ما بدهن و مع مين ما بدهن و لاي ساعة بدهن و كمان اللي بخلي الشب يحب يروح هوي الرخص بالاسعار اللي بيلاقيه ( الفرق بين الدولار و الليرة ) مشان هيك بيصرف على كيفو ومافي حدي يقلو لاء و كثير عوامل ثانية

و هل اني خايف يصير هالشي مع اخي الاصغر مني هوي صف خامس و عم يندمج مع هالبلد اسرع مني بسبب العمر و عم قول اهم شي يضل يتذكر يقرا و يكتب مو صح؟؟
بس ما كون كثرت عليكن و كمان بدي قول انو حكيي اكيد مانو شامل حكيي عن بعض الاشخاص اللي بشوفهن و بحكي معهن و اذا عندكن اي سؤال انا جاهز

اسف على الكتابة بالعامية لانو اسهلي

Posted by: دمعة حزن

مرحبا بحبكن كتير

وكنت حابة اشترك بهل الموضوع بما اني في الغربة وفي دولةاوربية وهي هولندا وهنا تعدبلد الحرية وبلد تقول ان لم تستحي افعل ماشئت

بس لسا ماتعرفت على احد لانني مقيمة جديدة في هدا البلد ومدة اقامتي شهرين ولاكنني احسستهم كانهم سنتين فيايت تقبلوني صديقة ولو ماشاركت بالمواضيع بس مشان حس بارواحكن السورية لاني مشتاقة لسوريا

وتراب سوريا فياريت تحسسوني اني بيناتكون

وبسوريا وماتنسوني اختكم المغتربة دمعة حزن

موقع زيدل سوريا حمص .. خدمات تشات و دردشة ... أرشيف المنتدى