الارشيف - الله يستر من هالطريق الجديد

Pages: 1

الله يستر من هالطريق الجديد
(انقر هنا ان احببت مشاهدة الموضوع الاصلي بالالوان و الصور )

Posted by: new_zaidal

فرحنا جدا عندما علمنا ان الطريق الجديد لقريتنا الحبيبة قد انتهى و انتهت معه عدة مشاكل من الغبار الى تكسير السيارات .......الخ
ولكن بدأت مشاكل اشد خطورة وأشد فتكا بارواح المواطنين فلم يكمل الاسبوع الاول من فرحتا بالطريق حتى بدئنا نسمع بحوادث مؤسفة اولها بدأ الاربعاء الماضي بوفات احد الشباب من خارج القرية قد ضربه مكرو نتيجة السرعة و اليوم الجمعة وقع حادث (الله ستر بدون اصابات في الارواح)على مفرق طريق المصنع بين تركتورو بين شاحنة واقتصرت الاصابات على الحديد +خلع عامود اضاءة جديد من شرشو و كلو نتيجة السرعة ووجود مفارق كثيرة وعدم وجود مطبات او حتى اشارات مرور للتنبيه فهل نبادر الى استئصال المشكلة وحلها بسرعة ام ننتظر مشاهدة النعوات معلقة على الاعمدة و الله يسسسسسسسسسسسسستر.

Posted by: Issa Safar

انا اقترح عمل مطبات ( من الوزن الثقيل) على نهاية كل طريق فرعي يتقاطع مع الطريق العام
وكذلك ايضا عمل مطبات (من الوزن المتوسط) على الطريق العام نفسه
good luck

Posted by: organist

مرحبا جميعا

الحادث يالي صار اليوم شي مو طبيعي والحمدلله ما صار شي

أنا برأيي دورية مرور للطريق العام لأنو مطبات ما راح تكفي لأنو في كثير شباب بالليل عما

يتسا بقو عاموتورات ليلا بمعاكسة السير وشكرا

Posted by: Kinan

لا بدها لا دوريات و لا شي ما بدها غير كم مطب عند كل لفة و مصالبة حتى لازم ينحط مطبات عالطرقات المتفرعة من الطريق مو عالطريق نفسو لانو في كثير عالم بتدخل عالطريق بدون ما تشوف اذا فاضي او لاء
و اذا اقتضى الامر ينحط مطب صغير و بعدين مطب كبير بالاماكن الخطرة مشان يضطر السائق انو يهدي

عل كل حال طريق جديد و رئيسي و بالاصل قبل ما يتزبط العالم كانت تسرع عليه بس وقتها كان في مطبات

خليهون يرجعو هالمطبات و انشالله بتنحل هالقصة و ما منعود نسمع اخبرا حوادث

و اذا اقتضى الامر خليهون يركبو هيك مطبات اكيد بتحل القصة من اساسها

Posted by: hosam abdulaziz

من غير المنطقي انه نكون تخلصنا من مشاكل الحفر , لنوقع بمشاكل المطبات .
تخيلوا كل50 متر في مطب ؟؟؟؟
على كل اذا تم وضعها بطريقة مدروسة ما في مشكلة
مثلا عند مفارق الطرق تكون كبيرة كثير و مرتفعة
اما اذا بقلب الطريق فلازم تكون قليلة الارتفاع و معلمة بطريقة واضحة ليتم تنبيه السائق لوجودها احسن ما يصير المطب هو مسبب للحادث بحد ذاته.

Posted by: mariam

سيارة كبيرة ضربت الصهريج وقلب0000وضربت عمود الكهربا وقلبتو0000وبعد المفرق من الاتجاه الثاني للطريق ضربت حيط جديد وخلعتو 0000شو برايكن رح يفيد معها مطبات؟؟؟؟؟؟؟؟؟؟؟؟؟؟؟؟؟؟؟؟؟؟اكيد سرعة بهيك اصابات يعني!!!!!!!!!!!!!!!!!!!!!!!1الله يستر

Posted by: samar dahi

شكرا منذر على هالموضوع ...
الحقيقة انا مبارحة شفت الحادث ..وما بتتخيلو شو صار في وقت شفت هالمشهد ..عامود كهربا جديد واقع ...وحيط مكسر.....وصهريج بالأرض ....وسيارة مضروبة ....
يعني الواحد شو بدو يقول ...
كأنو ما إلنا حق نفرح بهالطريق الجديد الحلو ....
انا بدي اقترح حملات توعية لهالشباب المتهورين بالسواقة .....شي بجنن كيف عم يسوقو على هالطريق ..ما في لا رادع ولا خوف ...
يعني الحل ماني ملاقيتو غير بانو هالشباب تكون واعية شوي ....لأنو حتى لو حطينا مطبات للسيارات ما رح يردع الشباب على الموتورات ....شباب ضيعتنا ومنعرفهم ...
الله يستر وبس ....

Posted by: wajdy barakat

هههههههه يعني شيء بضحك وببكي يعني الله يستر من هالطريق ...الحقيقة انو حلو للسرعة والواحد من غير شور بحس سيارتو عم تكرج (هههه تسرع) بس الحقيقة نحن ما بيلبقلنا لا شوارع عريضة ولا مزفتي ولا منصفات ما حدا عم يتقيد فيها .....الحل الوحيد يرجع الطريق مثل ما كان بلا زفت مليح بس يخففو الحفر شوي وهيك بتزبط الامور ههههه شلووووون؟؟؟؟؟ هلق عن جد طريق طويل هيك بدو شوية مطبات بس ما يكثروهن لانو الكثرة ضريبة صرف بانزين وضرب كوليات الفرامل هههه ...وشكرا والله يكون بالعون انشالله يمر الاسبوع الجاي بخير

Posted by: Issa Safar

يعني اولاد هالضيعه ما الهن اهل يرشدوهم ويوعوهن وبعدين وين دور المدارس والكنائس بموضوع

التوعية(وين الاخلاق والادب عندهالشبيبه) يعني انا اعتقد انه من المفروض ان تكون التربية والتوعية اهم من بناء المطبات واذا كان العكس هو الصحيح فانا اقول وبكل اسف (بسلامتكم)

وانما الأمم الأخلاق ما بقيت فإن هم ذهبت أخلاقهم ذهبوا

Posted by: sulieman safar

السرعة عند الشباب هي اكبر مسبب للحوادث في جميع انحاء العالم. المطبات وكمرات تلقط المسرعين بشكل دائم وغرامات عالية هو ما يستعملوه في أستراليا( السائق يخصر شهادة القيادية لثلاثة أشهر بعد ضبط واحد اذا كان سائق تحت 3 سنوات وثلاثة ظبوطة اذا كان سائق لأكثر من 3 سنوات). اذا استمر الحال على المخالفة يتعرض السائق الى خسارة شهادة القيادة أو السجن. عم عيسى ما ذكرته كان ويبقى جميل جداً ولكن ما الفائدة عند جيل يود أن يعتبر نفسه قدوة التفكير ويعيش حياته في المستقبل بدل من الحاضر.

بلكي بنحط أصحاب العقول الفورملية بالسجن وبنتخلص منهم.
لا تخافوا أكيد رح اجي طل عليكن وزيد البهذلي.
في السرعة الندامة.........
سليمان

Posted by: ayham alkhouri

سبحان الله مافي شي بيعجب الأنسان وخاصة اهل الضيعة يعني ماصدقنا وخلصنا النق على تزفيت الطريق هلأ بلش النق على المطبات والله يستر نصير نطالب بإشارات ضوئية على مفارق الطرقات .......
بس الحل الوحيد هو التوعية واللي مو سائل عن حياتوا وعن حياة ألأشخاص اللي عم يستخدموا هالطريق لازم يتبلغ عنو ونترك السلطات المختصة تتخذ الأجراءات المناسبة ..
والشيء بالشيء يذكر انا مرة عملت غلطة اني دخلت على الجسر بسرعة عالية ودوبلت سيارة من جهة اليمين قام لحقني سائق السيارة لحتى وقفت وإلا بيطلع تحريات وطلب الرخصة والملكية وماحكي شي غير انو نعتني بالمستهتر وحسيت حالي صغير بنظروا ومن يومها لليوم كل مابركب السيارة بتذكر كلمتوا وعلى فكرة صرت استخدم حزام الأمان وهو كثير مفيد
ومابتمنى غير السلامة للجميع

Posted by: RUSHA AWAD

ذكرتوني بسحبة صارت من شي سنتين.....ابن عمي صرلو بأميركا فوق ال 15 سنة وماراح ولا مرة على سورية فيهن وكالعادة الناس بس جات من شي سياحة على سورية بتصير تحكي عن السواقة بالضيعة وانو سبحان الله اللي عم يمشي السير بحمص وزيدل وهون طرح حضرتو سؤال خلا الموجودين يفرطو من الضحك والسؤال كان: مافي ستوب ساين "اشارة توقف" على كل ملتقى طريقين بالضيعة؟؟؟؟؟ اي يمكن بكل سورية مافي 5 ستوب ساين من هالنوع "طبعا من باب المبالغة يمكن"....بس هلأ بعد كم سنة وبعد ماصار هالطريق طلع فعلا من الضروري يكون في اشارات توقف بالضيعة وطبعا لازم تتسمى الشوارع عاد حاج بعدني لهلأ اذا بدني ندل حدي على اي بيت بزيدل مناخذ معمل العرق نقطة علام ومن هناك منبلش على يمين ويسار وسأل بيت فلان عن بيت علان......أني مابعرف شو المانع من وجود وتطبيق هالشي طالما انو كثيرين بيعتبرو انو هالشي الو حسنات ومنفعة وسلامة لأهل الضيعة المشاة والسائقين.

مع حبي واحترامي
رشاعواد

Posted by: samar dahi

خبر طازج من قلب البلدية ...!!!!!!!!!!!!!!!!!!!!!!
حادث جديد على الطريق العام بسبب التهور والسرعة وعدم التزام النظام جرى البارحة مساء .....
كل يوم عنا شي جديد ...............

شر البلية ما يضحك .......
ياجماعة الحقيقة الطريق صار كثير خطير وضعو ...اذا هالشباب بدها تضل بهالتهور ...
قال بقول عن حالي إني بأسرع ...لا لا ....انا طلعت كثير ملتزمة وهادية عند غيري ....شو هاد يا جماعة ....الناس ما عم تعرف تهدي .....
بس شو بدكم الطريق برغب بالسواقة ....ما بدي اكذب.....بس الواحد لازم يكون واعي أكثر لما بسوق لأنو الناس ما عم تلتزم بالجهات ما بتعرف من وين ممكن تطلعلك السيارة او الموتور فالواحد بدو تضل عينو عشرة عشرة ....
انشالله بيجي يوم ومنقدر ننسجم مع وضع الطريق أكثر ......

Posted by: mariam

المثير بالموضوع انو الحادث اللي عم تحكي عنو سمر كان جايب طفل مريض لعندي وعند الدوار اللي عملوه ومابعرف ان كان صح والاغلط0000زبسبب السرعة الزايدة لسيارة قادمة من حمص للضيع الشرقية طلع بوجهها البيك اب واتصادموا والله ستر 00حديد بحديد00000يعني رابع حادث بيصير خلال اقل من اسبوع0000000000000000000

Posted by: emado1

يعني بدي اسأل سؤال
واحد طالع من شارع فرعي شو بيخسر من وقته اذا خفف سرعته اوحتى وقف قبل ماياخد الطريق العام
يعني كان عنا مصطلح لفة الموت على على طريق زيدل فيروزة
ضروري ندخل مصطلح اتوستراد الفناء على طريق زيدل حمص
يعني القصة مابدها لا اشارات ولا مطبات
بدها بس شوية توعية للسائقين مو اكتر؟؟؟؟؟؟؟؟؟؟؟؟

Posted by: hosam abdulaziz

الجميع اجمعوا بالحل للمشكلة هو التوعية قبل القيام باي خطوات تقنية لحلها.
قد يكون الأنترنت و منتدى زيدل احدى وسائل التوعية لكنها ليست الأفعل
لأن شريحة كبيرة من الاهالي 70% و اكثر لا يعرفون ماذا يدور في عالم الانترنت

لذلك يخطر ببالي منبر آخر لتوعية الآهالي و شرح المخاطر التي تنتظر ابنائهم ان لم يتوعوا و يدركوا حقيقة القيادة الفوضوية
الا و هي الكنيسة
لا اريد ان يصبح الكاهن في زيدل مثل (الكاردينال صفير او المطران الراعي او المطران عودة .....)
لكن اتصور انه من واجبهم في وعظات الآحاد و الأعياد ان يتطرقوا دوريا الى مشاكل و هموم القرية

و بهذه الحالة يستمع الحضور و معضمهم من كبار السن و اولياء الأمور لهذه المشاكل
و بالتالي يقومون بتوعية ابنائهم و كل حسب وعيه و تقديره للمسؤولية المترتبة عليه كولي أمر.

و اتذكر دائما نصيحة والدي و قناعته بأن ( لا يمكن ان يحدث حادث مروري الا بسبب السرعة)
و انا مقتنع بذلك و الحمد الله لم اتعرض الى هذه اللحظة لأي حادث مروري.

Posted by: Issa Safar

انا حاسس انه اهل قرية (سكره) صابونا بالعين على هلبوليفارد الفظييييييييييع وصار الشغله بدها
مطبات زرقاء اللون
ملاحظةــ انا مغترب من اربعة وثلاثين سنة واخيرا اخذت ايدي على الكتابة بالعربي

Posted by: suher issa

مرحبا للجميع
شو هل الاخبار هي كل نهار خبر حادث بالطريق والله يستر على الرح يجي
بما اني دارني على الطريق العالم رح نتأثر كتير بهل الحوادث وكمان الضجي السيارات ادا من قبل كان طريق ما منيح والعالم ما تقصر بالسرعة كيف هلق اادا زقت وكبير
يعني ما عارفين نضحك ام نحزن بهل الشيء ما حدا رضيان بشيء
ان بزفت ام بلا زفت
يالله انشاءلله خير وانا بوعدكم ادا رح روح رح وقف عند الطريق كل نهار واحمل لائحة تخفيف السرعة هههههههه هي البغدر ساعدكم فيه
سمر وحسام اسحبونا شي صورة على الطريق وهو مزفت يعني مشان نشوف كيف صار وشكرا

Posted by: samar dahi

اول شي بدي قول لعيسى ابن خالتي الغالي ....اهلا وسهلا فيك يا عيسى ...انا مبسوطة إني عم شوف مشاركاتك الحلوة والمهضومة ....شكرا لتجاوبك معنا ....وهلق بتصور مثل ما قلت مشي حالك واخذت إيدك على العربي ...بتمنى نشوف دايما مشاركات الك ...
سهورة ...تكرم عيونك ...مو صورة بس ..رح اخذلك صورتين ....وحدة بالليل ووحدة بالنهار وقدام بيت خالي كمان ...انت عنا بصورة يا سهورة ...اليوم أكيد بينزلو ....تكرمي ...
اليوم مشي الحال ..ما في حادث ....بس لسا النهار ما خلص ....
انشالله خير ....

Posted by: new_zaidal

شباب الحقيقة مثل مل بتعرف خيرو لتجرب غيرو كثير بينطبق علينا فانا بلشت اعرف حسنات مكرو زيدل يعني تخيلو في عنا مزاحمة بين المكرويات لحتى يلحقو زبون مثل تبع طريق الشام بتتخيلو كم واحد راح يروح كل يوم هذا غير الفراطة ؟؟؟؟؟؟؟
و شو يعني نصف ساعة حتى يوصل على حمص على الاقل بوصل الركاب بخير و سلامة
وصار كل ما واحد فينا راح و رجع على حمص ؟؟ لازم نقلو
الحمدلله على السلامة.

Posted by: mazen youssef

والله كنت عما أستنا أحد الاعضاء يحطنا صورة هالطريق الجديد الضاهر ماتمت الفرحة ................ أخبار حوادث وموت الله يستر المشكلة كبيرة بدها حل من جميع الجهات بدها كم دوار على كم مطب على كم اشارة للتقيد بالسرعة على شي كم رادار للسرعة على شي كم دورية شرطة . والاهم يكون عند السائق الاحساس بالمسؤولية وهو الاهم . واتوقع مع تطبيق قانون السير الجديد ستقل الحوادث لما فيه من غرامات وعقوبات رادعة أنا شخصيا سقت بسوريا بس الصراحة لاول مرة بسوق وأنا خايف منين بتطلع سيارة أو شحن أو ماتور ....مابتعرف .لائحات التوقف غير موجدة ..أنعطاف ...تمهل خفف السرعة ...الخ والله يسترنا جميعا

Posted by: hosam abdulaziz

مرحبا جيعا
سمر انا استنيتك ما حطيتي شي صور لهيك رح اسبق عنك بصور الليل و خلي عليكي صور النهار هي صعبة عليي شوي و ما بدي قلكم ليش

هي اول صورة تقريبا من مقابل البلدية باتجاه القسم الشرقي للطريق (يعني هيك اللي جاي من سكرة)
ملف مرفق 3794
هي الصورة من امام البلدية تقريبا للقسم الغربي للطريق (يعني اللي جاي من حمص )
ملف مرفق 3793
هي الصورة كمان للقسم الغربي بس من امام مسرح الجريمة

اللي صار فيه الحادث
ملف مرفق 3796

اما هي الصور فهي الاضرار اللي صارت (عمود مخلوع + حائط منهار لبيت السيد فيصل سموع)
بالنسبة للعمود بنوعدكم من هلق لشهر أيار يكون مركب بداله , بس ايار الـ2009 ليكون بعلمكم

(كاسك خيي برهوم)
ملف مرفق 3795

Posted by: hosam abdulaziz

قال نحن بنقول عن بلدنا ما عندهم خطط خمسية (حرام عليكم ليش الظلم)
طلعوا منيح و تمقلوا بالصورة 1 و 2 من المشاركة اعلاه و لحالكم بتعرفوا بعد النظر و التخطيط من الي قام بدراسة هالطريق (ما بعرف اذا حدا فركلوا اذنوا و هوي عميصمم)
بس شفتوا هالتقنية اللي عاملينها (بفقسة زر بيصر الطريق شاعل) لمبة اي لمبة لأ , لمبة اي لمبة لأ , عشكل زيك زاك .
هذا تخطيط بعيد الامد رح قلكم كيف:
هلق وقت جتهم التعليمات ليطفوا ضو ضيعتنا (الله يسامح اللي كان السبب) اضطروا يسخروا مهندس من البلدية + سيارة رافعة + فني كهربائي
و بلشوا برم بهالضيعة لمبة اي لمبة لأ (اللي لأ يقطعوا السلك تبعها قطع)
و تخيلوا كم عمود وقفوا عندوا و قطعوا السلك تبعوا .....................

المهم هذا القرار بالقطع ربما يجي قرار معاكس اله قريبا باضاءة القرية مجددا(مستبعدددددددد)
و بالتالي رح يستنفر نفس الكادر مجددا ليوصل اللمبات المقطوعة و الوصل اصعب من القطع (تقنيا) يعني فيها دبلة و وجعة راس.

فهلق بالطريق الجديد عملوا تقنية خصيصا لتتناسب مع قرارات المحافظة و بعد نظرها الثاقب في طرق تقنين الكهرباء. و بالتالي عملوا انارة الطريق على خطين منفصلين كل لمبة من العمود ذاته مغذية كهربائيا من سلك منفصل عن الثاني
و بالتالي وقت يتم وصل اول سلك بيشعل لمبة وحيدة من العمود
و وقت نشغل ثاني سلك بيشعل اللمبة الثانية من نفس العمود

اي بشرفكم مو تخطيط كبير هالقصة !!!!!!!!!!!

هلق يمكن تستغربوا كيف الجهة من مفرق المصنع باتجاه حمص منورة من الجهتين انا بقلكم ليش:
هذا بما انه الحادث صار هون , فلما تتحمل البلدية مسؤولية الحادث و انه بسبب ضعف الانارة قاموا بانارة الجهتين مبدئيااااااااااا تما يطولهم مسؤولية بالحادث (كمان هذا اسمه تخطيط و بعد نظر)
برافووووووووووووووووو
كاسك خيي برهوم

Posted by: Issa Safar

بعد هالمعلومات يلي شفناها من حسام انا اقترح تسميت الشارع (شارع الميلاد ) لأنو لمباتو متل
زينة الميلاد شي بيشعل وشي بيطفي

Posted by: mazen youssef

يسلمو ايديك أخي حسام على المجهود الصور حلوين كثير بالليل بسسسسسسسسسس مابعرف .... باللنهار شلون بكرة بس روح عالضيعة بدي أشتري كم سطل دهان مشان نخطط الطريق بيطلع منظرو أحلى وبنعود نفكر نحط شي كم شاخصة للتوقف -ستوب- و50 للسرعة بيطلع أحلى مو هيك على كل حال ...... مبروك الطريق الجديد...

Posted by: samar dahi

مسا الخير للجميع ...
انا وعدت سهير انو نحط صور الطريق بالليل والنهار ...حسام حط صور الليل .....وانا هلق دوري بالنهار ...ولا يهمك حسام ...انت نام وما عليك ....وابقى سلمنا على رنيم.........
هاي أول صورة من البلدية باتجاه الشرق

وهاي الصورة الثانية من البلدية باتجاه الغرب

وهاي الصورة الثالثة مشان سهورة قدام بيت خالي

هاي الصور اللي قدرت اخذها لحتى الكل يشوفوها ...
بس بدي قول لحسام شي .....طيب يا حسام انت اجيت لعند اللمبات العطلانة وصورت ...وحياتكم يا جماعة التقنين ما اطبق على الطريق العام لسا ...حسام مو عارف انو هدول اللي مطفيات هون لمبات عاطلة ورح يتصلحو قريبا ...
وعن العامود بتعرفو اديش كلفة العامود الواحد ؟؟؟؟؟ 45 الف ليرة سورية ....اتغرمو فيهم اللي عملو الحادث وانشالله قريبا بيتصلح ...
فيا جماعة خفو شوي عن البلدية ...

نحن عم نتبهدل يا شباب ....

قول في ناس من البلدية هون .....

يالله كلكم بتمونو ...ولا يهمكم ....

Posted by: RUSHA AWAD

هلأ خلص الطريق ويهنيكن السلامي بخلاص الطريق وبسلامة الناجين من هالحوادث بس لفت نظري الصور اللي نزلتهن سمر وخطر ببالي سؤال انشالله يكون بمحلو:
كم سيارة فيهن يمشو حد بعض بالروحة او الرجعة لأنو مثل ماني شايفين الطريق مو مخطط لنعرف سيارة, ثنتين, ثلاث او مثلا سيارتين وماتور او سيارتين وماتور وبسكليت.......
يعني من باب التساؤل مشان بس صار حوادث بالأيام ما نستغرب لأنو بدو يصير التطحيش عاليمين واليسار وعالميلين.

مع حبي واحترامي
رشاعواد

Posted by: hosam abdulaziz

اقتباس:

مو عارف انو هدول اللي مطفيات هون لمبات عاطلة ورح يتصلحو قريبا ...

سمر !!!!!!!!!!!! شو عمياكلوا بعقلكم حلاوة بالبلدية و اقنعوكم انه اللمبات عاطلة !!!!!!!!!!!!!!!!!!!!!!!!
اي شو هاللمبات ما صار عمرها التشغيلي شهر و عطلت للصدفة عطول الخط من كل عمود لمبة ؟؟؟؟
1 اما اللمبات مقطوع عنها التغذية بفعل مقصود و هدف تقنيني.
2 انه المتعهد غشاش و جايب بضاعة شغل غربستان و مفروض يتعاقب كونه اكيد بالعقد بيكونوا ملزمينه بلمبات بمواصفات عالية و خصوصيييييي انك عمتقولي العمود مكلف 45 الف , يعني اللمبة لازم تكون شغل الماني او انكليزي , و ما بيصير تعطل قبل 20 سنة.

رشا:
بمعاينة واضحة لصور سمر بتلاحظي انه بالمكان اللي صافف فيه سيارة عيمين الطريق , رح يبقى مكان لمرور سيارة ثانية فقط.
يعني الطريق ما بيمرر اكثر من سيارتين (ما تاخذي عخاطرك طريق حمص الشام اهم طريق بسوريا , بمعظم مراحله بيمرق سيارتين بس)

Posted by: imad_dahi

والله انا تابعت الموضوع من اولو لاخرو وقلت يا رب حدا يفطن ويحط صور لاتوستراد زيدل.. وهاي بنت العم الله يخليلنا اياكي .. 3 صور كافيين ...
ع فكرة حسامو .. اتوستراد زيدل اهم من اتوستراد الشام نسبيا.. يعني طريق الشام لازم ع اهميته لازم يكون الخط اربع سيارات روحة واربعة رجعة
بزيدل كافيين سيارتين .. ما هيك
بس يالله

وبالنسبي للحوادث .. بعمرو بزيدل كان سبب الحوادث هي الطرقات .. واذا بتحطو بدل المطب الف .. رح نضل نسرع ونعمل حوداث .. هاي هي شباب زيدل ...

فالتوعية اول حل ... لانو هيك طريق صدقوني حرام نحط عليه مطبات .. اي منموت الف موتي ومنعيش مشان نشوف هيط طريق حلو ومريح بدون ما نعمل الف فريم والف تقليعة

بايطاليا نسبيا كل يوم في 5 حوادث مميتة او اكثر. على مدار السني .... يعني القانون بقول نحن الدولي لي علينا منعملو ... طرقات حلوي.. كونترول ... مخالفات .. ولي بدو يسرع و يموت يموت ... هو حر ....

بس طبعا بزيدل ما فينا نقول هيك لانو كلنا على بعضنا عشرة وكلنا قرايبين .... فالتوعية احلى شي ... وما بيخلى الامر من كم مطب ... واشارات المرور كتير مهمي

فيا شباب وصبايا ... التوعية عن طريق الانترنت .. عن طريق المناشير ... عن طريق الاجتماعات بالبلدية وبالاخويات .. وبكل مكان .. شي مهم ... صدقوني ومفيد...
بزيدل بدنا توعيه على السرعة وعلى النضافة .... بهمة الشباب واهالي زيدل

والله يكون معكن ومع الجميع
منشوفكن عن قريب انشالله ...............

هو يمكن اخر واحد بيحقلو يحكي عن السرعة هو انا واخواتي .... بس والله حوادثي قليلي وما بينذكرو

Posted by: mazen youssef

يسلمو أيديك أخت سمر على المجهود طريق حلو لاحلى ضيعة وأنشاءالله بيكون كلامهم صحيح أنه أعطال مؤقتة وبشيلونا هالتشائم الموجود عنا بس ياريت هالطريق يتخطط بيصير أحلى وأفضل للسائقين ........ ولكم أحترامي جميعا

Posted by: rmmash

الحل الوحيد هوي تقبيع الزفت وحفر الطريق كلو من اول مشان نحطنا شي 10000 ثانية عالسيارة
ههههههههههههههههههههههههههههههههههههههههههههه
رامي العيسى

Posted by: samar dahi

ولك اهلين بالخال ابو الريم ...هاي انت رماش ونحن مانا عارفين ...اهلا وسهلا فيك يا رامي .....
بدي قول شي للكل ....وخصوصا لمازن ..
انو بناء على توجيهات السيد المحافظ بدو يتخطط الطريق بأضوية أرضية مثل اللي بحمص ..هاد كان أحد توجيهات المحافظ لرئيس البلدية بعد مرورو من الطريق الإربعاء الماضي ...بس طبعا البلدية ماعندها مخصصات لهالشي ونحن رفعنا كتاب للسيد المحافظ بهذا الشأن ولنشوف الرد ...يمكن يخصصولنا شوية مصاري مشان تخطيط الطريق بطريقة حضارية ..قولو انشالله ....

Posted by: mazen youssef

مشكورة أختي سمر على الخبر هيك بيصير الطريق أجمل بكثير ....... ما بعرف حابب أطرح فكرة اذا كان بالامكان طرح موضوع التبرعات للاعضاء بالمنتدى الزيدليين والمغتربين يعني من كل واحد شي 100 يورو وهيك بجوز نغطي باقي المصاريف ياريت تفكروا بالموضوع والى الامام لاحلى ضيعة بالعالم لكم تحياتي

Posted by: m-sattah

من قلب الحدث ...
لم يطل انتظارنا طويلا ً هذه المرّة لمشاهدة الحادث الخامس في تاريخ طريق الميلاد . ( طريق عام زيدل الجديد )
وقع الحادث الجديد في بداية الطريق قرب محطة الوقود عندما اصطدمت سوزوكي غريبة عن القرية بدرّاجة نارية و عليها شابّين من خارج القرية أيضا ً ..
ممّا أدّى مبدئيا ً إلى تهشّم واجهة الآليتين معا ً .. أمّا الإصابات البشريّة فلم تعرف بعد
كون المصابين تم نقلهم منذ دقائق إلى المشفى و الله بستر .

Posted by: wajdy barakat

شكرا سمر والله اذا بدو يصير مثل ما عم تحكي بدو يطلع الطريق شغلي كبيرة وبيجوز يدخل بكتاب غنيس ههههه او على الاقل ينحكى في وين ما راح الشخص وتوجه ....اليوم رحت باليل على الكازية عبي بانزيت للموتور والصراح ما اسرعت حكان منور بكل الاضواء حسيت حالي باوروبة او عم سوق شي هارلي بهولليود ههههه ....انشالله يظل هيك ما يحفروا على جيية المغتربن لانو نفخنا لشبعنا بوجهن بالطريق فيجو بكرا يلاقو محفور خاي كبيرة بحقني هههه؟.؟؟؟؟؟؟؟

Posted by: ziad sattah

في شي فاتكم يا شباب و ما لاحظتوه !!!!!!!!!!
سيارة البييك آب التي تظهر في الصورة الثانية للأخت سمر .. و التي تقف أمام مبنى البلدية , و أرجو ألا ّتكون سيارة البلدية نفسها . ألا تلاحظون معي أنّها تقف في الاتجاه الممنوع ( المعاكس ) ؟؟؟

فليست السرعة فقط هي سبب الحوادث ... و الله يستر .

Posted by: hosam abdulaziz

للاسف سمعت كلام غير دقيق و مؤكد عم وفيات في الحادث الاخير , ارجو التأكيد ان كان احد علم بذلك.

بالنسبة للبيك اب استاذ زياد فعلا هو بيك اب البلدية , سنرفع الصورة للسلطات المختصة ليبتوا بالموضوع.
بس ما بعرف بدنا نعرف من سمر لو اكل بيك اب البلدية مخالفة مين بيدفع او هذول معهم حصانة ؟؟؟؟

Posted by: mazen youssef

يمكن العالم تعودت عالطريق
والله أنا كان قلبي حاسسني وعما قول انو السرعة على هالطريق مؤقتة لانه العالم بدها تجربوا والحمدلله
هلق أغلبية العالم جربو وعجبهم لهيك وتعودو عليه فنشكر الله لحد هلق مافي حوادث جديدة
وانشاالله مابنعود نسمع غير الأخبار الحلوة (قولو أنشاالله)
مع حبي للجميع

Posted by: m-sattah

والله يا أخ مازن العالم لسى ما تعودوا ع الطريق والدليل إنو اليوم الثلاثاء 6/5/2008 صار حادثين
يعني صارت البلدية مطالبة بإيجاد حل لانو والله حرام في أقل من شهر يصير ع الطريق سبعة حوادث

Posted by: mazen youssef

نتمنى الافضل

مشكور أخي m-sattah لاأعرف بماذا أجيبك أو أرد على مشاركتك فلقد تعثرت الكلمات

وتبعثرت الأفكار فالأفضل أن نكتب لا ئحة أحذر خطر الموت على أول الطريق

الله يعافينا ويعطينا الصبر

نشكر الأدارة الكريمة على تصليح العطل لاني منذ ثلاث أيام لم أستطع المشاركة

جزيل الشكر لكم والله لايحرمنا من هالمنتدى الرائع

Posted by: tony daboul 21

يعني ياجماعة والله أنو وضع الطريق وضع سيء , هلق ليكوا من جهتي الطريق مالوا علاقة ابدا
والله بصراحة انو الطريق حلو كثير والشوفير وقت اللي بيشوف طريق أتوستراد طوله 2كيلو متر تقريبا
والله دعسة البنزين بتصير لحالها تكبس على الصاجي مثل مابيقولوا , بس يعني اكيد السرعة قناعة شخصية , وأنا برأيي أنو الحق مو على الغريببين اللي عم يعملوا الحوادث على الطريق بل الحق على أهل الضيعة اللي عم تطلع من على المفارق الفرعية بشكل جنوني ومانهن مطلعين ابدا لا يمين ولايسار .
وبالنسبة للمطبات مو غلط , يعني الطريق مابيحتاج أكثر من 3مطبات في المناطق التالية :
1- منطقة المفرق الأول عند محل وسيم السموع للموتورات , لأنو هالمنطقة اخطر منطقة أظن .
2- منطقة مفرق مكرو الضيعة عند معمل العرق , كمان منطقة خطرة .
3- منطقة مفرق اللي صار عليه آخر حادث قبال بيت فادي سطاح .

والله يهدي الشويفرية على الخير ؟
ومثل ماقال المثل في التأني السلامة وفي العجلة الندامة .

Posted by: new_zaidal

اقتباس:

المشاركة الأصلية كتبت بواسطة rmmash

الحل الوحيد هوي تقبيع الزفت وحفر الطريق كلو من اول مشان نحطنا شي 10000 ثانية عالسيارة
ههههههههههههههههههههههههههههههههههههههههههههه
رامي العيسى

يا رامي لما الواحد بقول الله يستر ما بكون عرفان انو اي سوء راح يصيب حدا من اللي بيعرفهون فكيف اذا كان والده قد وقع ضحية الطريق الجديد والله سلموا و عرفت انو كان بالعناية المشددة فترة ثم بعدها اصبح احسن فباسم الجميع بقللك لحمدلله على سلامتو و يا شباب انا رايي لازم نعمل شي فعلي و نحطوا قيد التنفيذ لانو الي حصل مع العم ابو رياض ممكن يحصل مع اي واحد فينا او مع قرايبينا و ما بدنا نضل مثل الدول العربية
نستنكر بعدين نشجب بعدين نرفض بعديييييييييييييييييييييييييييييييييييين ؟؟؟؟؟؟؟؟؟؟؟؟؟؟؟

Posted by: silva

القيادة فن وذوق واخلاق واتمنى ان نغرسها عند كل من نحبهم ونكررها في كل لحظة نشاهد أحدهم يسير على الماتور ثم 000000 لنمتلك هذا الروائع ونرسلها عبر الاحساس بفرح الحياة بعيدة عن مأزق الحادث وتداعياته ولتكن هنا ارشادات للشبان الحلوين على اهمية وسيلة النقل بالحفاظ على دروس الأمان فيها وفرح اللقاء بالاحبة وسرور الوصول بالسلامة 00ولتكن شاخصات تحدد السرعة وكما ذكرو ا الغوالي من كاميرات وغيرها لنحافظ على حياة من نحب ونبعد شبح الحادث وألم سماعه او مشاهدته وابعد الله الجميع من أذيته0000
[IMG]ttp://www7.0zz0.com/2008/05/30/13/880261934.gif[/IMG]

موقع زيدل سوريا حمص .. خدمات تشات و دردشة ... أرشيف المنتدى