الارشيف - مين المعلم ومين مانو معلم؟

بسورية بإمكانك أن تصف أي إنسان بالمعلم.
حتى لو ماكنت بتعرف اسمه .
كلمة معلم بتنوب مناب الاسم!
يعني الشخص العادي معلم و الحلاق معلم و المكنسياني معلم و شوفير التكسي كمان معلم !!!
صغار رجال الأمن بينادوا رئيسهم بالمعلم يعني واحدهم بيقلك عندي مناوبة ببيت المعلم
(المعلم هون بيكون رئيسه يعني ضابط بالجيش مقدم أو عقيد أو مافوق)
نواب الوزراء بينادوا رؤسائهم الوزراء أيضا بالمعلم والوزراء بينادوا رئيس الوزراء بالمعلم و كمان كبار القادة العسكريين بينادوا الرئيس ب المعلم!
الوحيد يلي مابينادوله المعلم هو معلم المدرسة لأنه اسمه(أستاذ )!
و الأستاذ بالعسكرية لها معنى غير لائق.
كلمة معلم تجاوزت معناها اللغوي و صارت ثقافة و مؤسسة أو فرع مخابرات.
لأن البعض قد يهددك بالمعلم كأنه عما يهددك بالشرطة أو البلدية.
يعني إذا صار شي خناقة و حدا إجا فك الطرفين بتلاقي واحدهما عما يقول للثاني بفرجيك للمعلم ...
و الأول إذا كان مدعوم بيرد عليه بنفس كمية الحقد لاءء أنا يلي بدي فرجيك للمعلم . علما أن المعلم الأول غير المعلم الثاني.
و يمكن الشغلة تكبر و يتواجه المعلمين الأول والثاني.
و من حسن الحظ أن المعلم مابيرضى لحدا من تحته بالإهانة.
كرامة يلي تحت إمرته من كرامته و هالمبدأ هام من مبادىء ( الثقافة المعلمية)
لذلك حتى تكون بأمان واطمئنان و راحة بال لازم يكون عندك معلم !!!
المعلم مابيقبل الخطأ و لا الهفوات
ما بإمكانك التنبؤ بردة فعل المعلم
يعني قد يمسح واحد من على وش الأرض لسبب تافه جدا و كمان قد يمنح مكافأة ضخمة لشغلة أكثر تفاهة !!!
من صفة المعلم مزاجه متقلب .... يمكن يضحك لما بتتوقع منه أن يغضب و قد يغضب لما بتتوقع منه أن يضحك ...
لذلك يلي حواليه لازم يكونوا جاهزين لكل شيء ...
المعلم ماعنده صفاء ذهني ... ليش لأنه يقضي الليل سهران عما يفكر وقد يخرج ليلا دون مرافقة أحد ,
هالتصرفات هي بتحوله إلى معلم خيالي ( شخص خيالي )
بيتساوى عليه قصص وأسطورات و أقوال و أفعال و يمكن يتحول لأسطورة ( بس لأنه طلع بدون مرافقة و تجول بالطرقات العامة)
المعلم رجل عائلي لأبعد الحدود لأنه بيشرك زوجته وأولاده و أبناء منطقته في كل ماتحت ( معلميته)و عائلته مابتقصر بالتصرف على حساب معلميته
و هيك بتزول الأسماء تبع العائلة و المقربين و يتحول الابن إلى ابن المعلم و الأخ إلى أخو المعلم و الزوجة إلى "مرت المعلم" أما العشيقة فهي "صاحبة المعلم"...
وهيك و طبعا كل هؤلاء لهم نفس حقوق المعلم في حال عدم وجوده.
و يمكن للمعلم أن يفوض أحد الأقرباء بصلاحيات معلم .
و هون بينقال لها الشخص المعلم الصغير ( كلمة صغير هون ليست إهانة, فقط للتفريق بينه وبين المعلم الكبير )
و طبعا قد يتغير المعلم و يروح على المنفى أو السجن أو إلى بيته و بيجي معلم جديد و مابيتغير شي.
كل شي بيبقى مثل ماهو و قد تحتار كمراقب محايد ليش راح هداك المعلم و إجا هاد المعلم و كلاهما معلم أخو أخته!!!
تبقى إرادة المعلم التي لا تعلوها إرادة ... و مهما كلف الأمر و إذا حدا اعترض أو تذمر على هالإرادة بيكفي تجاوبه بشكل مختصر و مفيد و تفحمه و تخليه يسد تمه :
هيك بده المعلم.