الارشيف - الأعراس والعادات

Pages: 1

الأعراس والعادات
(انقر هنا ان احببت مشاهدة الموضوع الاصلي بالالوان و الصور )

Posted by: wajdy barakat

بداية أود إلقاء التحية على كل أعضاء المنتدى ومني لكم أجمل المحبة والسلام......
منذ فترة ليست بالقصيرة طرحت بإحدى الجلسات موضوع الأعراس في زيدل طبعا بغض النظر عن الأوضاع المادية أو الجنسية(أميركا-مغتربين ككل) وكم أود أن أعلمكم عن وجهة نظري تجاه هذا العائق الاجتماعي......لا أريد أن أتكلم عن البذخ اللا متناهي على الطاولة التي كرهت أنواع الأطعمة أو عن أهل زيدل المتذمرين بشكل دائم حول المطرب وإبداعاته أو........أو................. الخ....أو بشكل عام لا يمكن ان يمضي ساعات على السهرة حتى نرى الانتقاد والقيل والقال(هذه المشكلة بكل العالم وليست حصرا على زيدل) ......... ما أريد حقيقة النقاش به هو نمط الأعراس لدينا نمط الترتيب (تعليلة-صمدة-حنة-سهرة) هل أنت راض عن هذه العادات والتقاليد ؟؟؟؟؟؟؟ هل أنت مع هذا الصرف الزائد؟؟؟؟ وماذا يعني انه على العريس البدء قبل العروس(تعليلة) ؟؟؟؟ أو ماذا يعني (صمدة-حنة) وكم تغيرت هذه المفاهيم في هذا الزمن؟؟؟؟ وهل السهرة ضرورية أم أنها مسك الختام؟؟؟؟؟؟

هل فكر أحد في تغيير هذه القاعدة التي لابد من وجود شاذة لها؟؟؟؟؟؟ أم أننا نفكر ولا نفعل أو لا نملك الجرأة على التغيير أو أن نكون أكباش الفداء؟؟؟؟

هل أنت ممن شعر بالضجر والملل من هكذا نمط أم أنك من المؤيدين المناصرين؟؟؟
هل فكرت مرة بأن تبذر مثل هذه المصاريف في شهر عسل لأوروبة؟؟؟؟ أو أن تشتري هدية مميزة لصاحبة الجلال؟؟؟؟؟؟؟

لماذا نفكر دائما بآراء الناس وكلامهم الفارغ ولا نفكر ولو للحظة بان فرحة العرس لا تتم إلا بوجود الأحباء (أقارب-أصدقاء) مهما بلغ البذخ ذروته وان كلام الناس سيلفظ من أفواههم مهما صرفت وتصرفت...........
هل شعرت أيها المتزوج أو المتزوجة بالندم أو السوء على عمل ما في عرسك أو أمر أردت أن تصنعه ولم تستطع؟؟؟؟؟؟؟

هل لديكم حلول لتغيير هذا النمط ؟؟؟؟؟؟؟؟؟ أتمنى أن تساعدوني

إن هذه التساؤلات لطالما طرحت أمامي ولطالما كانت تشغل تفكيري والإجابة عنها هي يا ليتني أقابل فتاة الأحلام وشريكة المستقبل لتقف معي وتأييد أفكاري لإجراء مثل هذا التغيير........
لقد حضرت مناسبات أعراس كانت فقط قائمة على سهرة ما بعد الكليل (لا تعاليل ولا حنة) وكانت من أروع السهرات والأخف تعبا....كما تلقيت دعوة لعرس ركيزته هي حفلة كوكتيل في إحدى الفيلات الرائعة الجمال ولكن للأسف ظروفي لم تسمح لي................نهاية ما رأيكم؟؟؟؟؟؟؟؟ الله يهني الجميع وعقبا ل العزابية وألف مبروك للعروسين وبالرفاه والبنين.........

قال بالصيفية فيها عراس وبسهراتا في كل الناس
وفي دق الكاس بالكاس وشرب وتعباية راس
ونشعر باحلى احساس ان كان وسكي والا ميماس
ويا كاس العرق يا كاس يا مخربطلي الخمس حواس
بعلمي بتنزل على المعدة شو بطلع تعمل بالراس
وزيدل بلدنا والعرق مشروبنا...............ومحبة الجميع وخاصة الغوا لي.....

Posted by: samar dahi

موضوعك جميل جدا بالفعل عادات زيدل بالأعراس شي مش طبيعي ابدا ....البذخ الزائد بالإعداد للعرس إن كان من ذهب للعروس او فساتين للعروس واهل العرس كلهم شي بوجع الراس الأرقام اللي بتنصرف على هيك اشيا ....وبتجي بعدها السهرات يعني الحقيقة شي زايد عن اللزوم ....
مثل ما قلت يا وجدي يا ريت تلاقي شي بنت تنسجم مع تفكيرك هاد لحتى تغير شي بس للاسف هالشي صعب لانو حتى اذا انت قبلت مع العروس اهلك ما رح يسمحولك بانو تختصر تكاليف العرس لانو بقناعتهم انو بدهم يردو للناس اللي عزموهن على سهراتهن ....ولك يا وجدي هون المصيبة .....قصة معايرة وتقليد ...وشي بجنن ....
مين بدو يبلش بالتغيير ويكون كبش فداء لالسنة الناس ...؟؟؟؟؟؟؟؟؟؟؟؟؟؟
انشالله بيجي يوم وبتتغير هالعادات هاي لعادات احسن ....

Posted by: abode durra

موضوع حلو وجدي و اني خطر عبالي هالشي مرة و كنت عم فكر مثلك و انو هالمصاري اللي عم تنصرف على البذخ و السهرات و التعاليل......... الخ يمكن يفيدوا العرسان بشي ثاني مثلا بيلش باساسات عمارة مثلا او يدخرهن لحق سيارة او اي شي ثاني بيفيد اكثر

بس هون جتني وجهة نظر ثانية و هيي انو هاي العادات و التقاليد ورثناها عن اهلني و اجدادني و اديش بنبسط وقت بسمع قصص من اجدادي عن كيفية التقاليد القديمة مع العلم انو من قديم ما كانهل البذخ الكثير و الاخص ما كانت اهالتكنولوجيا و كانت احلي هلى حكي اللي اكبر مني و خاصة انو ما كان في مسجلات و لا اورغات و كانت التعليلة تقوم على الاصوات الشجية من شباب و صبايا الضيعة و بيقولولك انو كانو يعزموا كل الضيعة على العرس و هالشي حلو كثير و حلو انو نخلي

ايام حلوي و بتمني لو شفت شي منهي بس هون بيجي دور التطور اللي بيلعب دور باي شي بهالحياة و اللي لعب دور كبير بالاعراس و التقاليد و صار المطرب اللي سعرو غالي و انواع الاكل اللي ما بتنتهي من مقبلات لفواكه لعشي و مشروب ........الخ و اللي صارو العالم يتنافسو منو يحط اكثر و احسن و منو بيجيب مطرب اشهر و الخ من هالشغلات اللي بتعرفوهي

بالنهاية وجدي اني من رايك و بالمستقبل اكيد رح يصير هيك لانو التطور مكمل و ما بيوقف
عقبال فرحتك و منجي على البلاد منحضر عرسك هههههههه

تحياتي

عبدو الدرة

Posted by: fr george massis

يعني يا وجدي شو قصتك نازلنا بهالمواضيع على الجيزي شو في شي مفاجأة قريبة ؟
انشالله نسمع اخبار حلوة كثير قريبا..................
لكل تغير بالمجتمع بدو ناس جريئة وشجاعة السؤال وينن؟؟؟؟؟؟؟ على قولة الملكة فيروز
السنة الماضية صرحت انو مانا مطولين رح نشوف مع كل كرت عزيمة مبلغ مالي لحتى المعزومين يشاركوا بالعرس لأنو لاحظت يلي بيستلم كرت عرس كأنو مستلم شي فاتورة او ضريبة غالية يعني العريس فوق مو عايف حالو وحاطط يلي فوقوا وتحتوا الناس عم تتذمر!!!!!
انا مع انو نرجع نحيي اعراسنا القديمة وعاداتنا القديمة بكل بساطة وعفوية وين تعالينا والدبكة الحلو والزمر والطبل ..............
ياريت بنشوف عرايسنا وعرسانا بثياب تقليدية قديمة صدقوني ما في اجمل منها احسن واجمل من أي فستان مستورد ..........
اما من الناحية الروحية بتمنى من كل الكهنة والمطرانيات تنظيم دورات اعداد للزواج وتكون اجبارية لنفهم معنى الزواج والسر المقدس لأنو هو الأهم بكل هالطوشي وهيك مابقى بنسمع فلان ترك فلاني وفلان مانو مبسوط وفلاني زعلاني ..............
والله معكم.............

Posted by: mariam

اهلا بالجميع ---موضوع الاعراس بحاجة لوقفة كبيرة من الجيل الطالع --
يمكن هوي بيشكل جزء من تاريخنا وللاسف هالتاريخ اللي عم نضيعوا يوم بعد يوم وياخوفي يجي يوم نفقدوا 0000وللاسف بحجة التطور 00بس الحقيقة هالتطور عم يكلفنا كثير 00موماديا انما معنويا وتاريخا واصولا 000سهرة الصالة مع مطرب وصوت عالي ومابتعرف ايد مين فوق 000ضجيج ودخان وقعدة كرسي طول الليل ماعاد ممتع لانو صار عبء 000يعني فينا نسهر باي سهرة موضروري عرس مع نفس المطرب ويمكن ننبسط اكثر 00موالقصة قصة سهرة او تعليلة القصة شو بيعني النا التعليلة --هلق انا من جيل بين بين لحقنا التعاليل ولحقنا السهرات 00التعليلة بتعنيلي الفة جمعة 000محبة00بساطة 00يعني مشاركة حقيقية بكل حواسنا 000ماكثير بنتجمل عاساس في سهرة بعدين وماكثير بنتانق لنفس السبب 0000وبندبك وبنرقص وبنرحب بهذا وهذاك00000يعني فيها لسا شي من الجزء الريفي فينا اللي مافينا نطلع منو 00
انا بحب التعليلة لانها بتجمعني بكل الناس اللي بحبهن بدون تكلف 000وبدون مااشعر برسميات 00يمكن غبرة وعجقة وبيتوسخ الفستان 00بس دوش بعدها بيطالع الفرق000
يعني بالمختصر باشعر بعرس التعليلة انو للناس المقربين وبسهرة الصالة للناس الحاضرة تادية واجب مثل اي واجب ثاني 000
انا بحب العرس يبلش من 0000اول الاسبوع بيغنو للعريس -00000ياعريس ماأشيت دارك 00ولارشيتها للغاويات 000
يعني لازم دار العريس تتجهز لاستقبال الناس وبعدين انا كثير بحب عجقة العرس يعني شغل الاكل لازم يكون بالبيت مو من مطاعم 000والمقربين من العريس لازم ينعجقوا ولازم يتعبوا وكل ماكانت المشاركة اكبر كانت الفرحة حتى مع التعب اكبر00000وبتضل حكايا ايام العرس من جيل لجيل ثقافة اجتماعية 000بس للاسف هالايام كلوا جاهز حتى الفرح صار بدنا اياه جاهز00انا بحب الفرح اللي انا بصنعوا وعلى فكرة مابيكلف ماديا 000
العرس كان جمعة ولمة وتعاون ومحبة 000كان فرصة الشباب يشوفوا بعض ويرقصوا ويحكوا ويتعرفوا على بعض وتحت نظر الجميع موبحاجة بس هاي المراقبة كانت مو مزعجة لحدا 000يمكن تقولولي اليوم الفرص اكبر ليلتقوا 000رح قول لا 000لانو العرس بيجمع من كل الاعمار وكل البيئات وبيعطي فكرة عن تصرف الاشخاص بدون مايتصنعوا 0000 نحنا بحاجة للفرح الحقيقي000نحنا بحاجة لفرح بدون ماندفع ثمنوا مال00بدنا فرح مانشتريه 0000انما نحسو000
على كل النا متابعة 000بس ياريت تفتحوا هالرابط و تشوفو بعض الاراء 000

http://www.zaidal.com/229/showthread...DA%E1%ED%E1%C9

اخيرا 00وجدي في تقليد ببيت بركات هوي الطربوش وكاس العرق 000لاتتخلى عنهن 0000

Posted by: a_aroush

لفت انتباهي الموضوع , و هو فعلاً بيحتاج لمعالجة أكثر من المناقشة .

بتأسف لما بسمع التذمر على العادات و التقاليد و خصوصاً طبعاً من الشباب , و الأسف أكثر أن ما منقدر نليمهن .

شو في أحلى من العادات و التقاليد أنها تضل مستمرة بمجتمع و خصوصاً بهيك مناسبات , أنا باتمنى لو ترجع حتى العادات اللي ماتت و تبدلت بأساليب حديثة , باعرف كثير من هالعادات الحلوة و لكن يا ريت من اللي بيعرفها كلها يدونلنا هي هون حتى تضل ذكرى .

بكل مجتمعات العالم الناس بتحافظ على طقوسها بهيك مناسبات شخصية و بمناسبات دينية أو غيرها , بتحافظ عليها مثل ما هي حتى الأزياء اللي الناس كانت تلبسها قديم بيرجعوا بيلبسوها , الرقصات بيضلو يرقصوها و الأغاني بيرجعوا يغنوها , كل شيء صغير و كبير بأي تقليد بيضلو يحافظو عليه , و هالشيء حلو كثير , لأن بيضل تراث و لازم نفتخر بتراثنا ما نخجل منو و نغيرو .

صحيح كل الكلام اللي عم تقولوا وجدي , و لكن ما نبقى نحط اللوم على عاداتنا و مثل ما وضحت الدكتورة مريم أن عاداتنا مانها عبق و إنما نحنا اللي منعملها عبق لما بدنا كلشي يكون جاهز , و غير هيك بدنا نضيف عليه . حتى صار في ناس بتعمل بالتعليلة مثل اللي كانت العالم تحطوا بعرس , و هذا الشيء الخطأ اللي لازم يتغير مو عاداتنا , لأن عاداتنا مو هيك, عادتنا لازم نحافظ عليها حتى بالبساطة تبعها .

طب لو جينا معك و غيرنا عاداتنا , شو بدنا نعمل ؟ إذا كانت أهم مناسبة بحياة الانسان ما عمللها أهمية أو ذكرى بشو بدو يحتفل ؟ . لو عملنا مثل بعض الناس بحفلة كوكتيل مثل ما وصفتها بالبيت اللي رح تشوفوا بكرة أن الناس بدها تصير تتزاحم على مين عم يقدم أحلى كوكتيل و شو نوع المشروب اللي مقدمه و شأد غالي و شأد رخيص و كيف مزينين البيت و غيرو . يعني بشي بسيط ممكن نقلبوا لتكلفة مادية كبيرة , لأن نحنا متعودين ناخذ عادات غيرني و منزود عليها من عني لأن لو كانت مثل ما هي رخيصة ما بيصير , لازم تكلف عشر أضعاف لنشوف حالني.

هون هي مشكلتني , مو هي العادات اللي ورثناها , لا التعليلة اللي صار ينمد فيها طاولات و لا طلعة العروس اللي صار بدها ليموزين عشرين متر و لا الكليل اللي صارت زينتو الورد مو العروس و العريس أما السهرة فحدث و لا حرج . هاذ الفايت عجمل و هاذ بسيف و ترس و هاذ مدري شو !!!! هي مو عاداتنا , بس نحنا اللي منزودها.

عاداتنا لازم تضل ,لكن لازم ترجع مثل ما كانت , و اللي من الشباب بيحب يتذمر على الشي العم يصير و التكاليف المالها طعمة و يكون كبش الفداء و يغيرها, برأيي يعمل عرس تماما على عاداتنا القديمة , أنا متأكد أهل الضيعة كلها رح تجي تتفرج على عرسه, و رح تنبسط أكثر بمية طاق و رح يكون العريس و عروسه و أهله مبسوطين أكثر , صحيح ممكن يكون فيها تعب شوي لكن , اللي متأكد منو أن رح تكلفوا أقل مما ممكن تكلفوا هلأ عشر مرات .

و بالنهاية نشالله منفرح فيك وجدي و بكل العزابية.

Posted by: كاترين

مرحبا

صراحة وجدي مصاريف الافراح بتموت كتير حتى عنا في غزة حنة وسهرة وصباحية واسبوع والله مصاريف ليوم المصاريف

يعني الله يكون في عون الشباب لما يجو يتجوزوا

بدهم شقة ولا بدهم مهر ولا شغل ولا مصاريف عد قد ما بدك

وللاسف الشاب بدو يتجوز وانو يكون معو هالاشيا هاي مستحيل فكل التكاليف بتكون دين وبعيش طول حياتو بسد في تكاليف الفرح ويبكي على حالو ويحكي شو يعني ضروري كان اني اتجوزك افففففففف عليكي وعلى اليوم اللي جبتك فيه
طيب مهو كان بامكاني عيش حياتي اتنطط من هون لهون واحكي مع الصبايا واعمل شو مابدي اجيتي هديتي حالي وكبرتيني مليون سنة هههههههههههه

عاد يا ويلي شو دخلها هالعروس هو خطبها وما بتعرف انو متداين و وضعهم حيكون صعب لهدرجة

وللاسف حياتهم بتنقلب لجحيم من كتر التكاليف

هالحكي مو من عندي بس والله كتير قصص هيك بتصير عنا

عشان هيك قبل يا شباب ما تتجوزوا اتفقوا مع العروسة من راسكوا لراسها والغوا كل هالعادات

سمر عيني والله انت عارفة كيف انا باتصرف وبعمل اللي بشوفو مناسب يعني يوم ما يجيني هداك الشب ما بدي استنى انو يعرض علي هيك طلب الغاء كل التكاليف والمصاريف اللي مش ضرورية انا بتوجب علي اطلب منو هيك والله ما بدي يصير النا 10سنين ونحنا بنسد ديون الفرح هو انا بدي اهتم باولادي واكبرهم واشوف مصاحهم ولا اسدد ديون فرحي حلوة هاي يصيروا ولادي بالجامعة وانا بسدد في التكاليف هههههههههه حسست حالي انو صار عمري شي 50 سنة يايييي يعني شو فيها لما الواحد يعمل شي عالضيق وباقل التكاليف مش ضروري حنة واسبوع وصباحية بكفي بس ليلة الفرح شي بسيط وبعد هيك يعيشو حياتهم بسعادة وهناء

Posted by: sulieman safar

سيارت وجدي لو وقفت بباب الدار
ومرصعة بالذهب يا صنعة الشطار
ولو عليها وجدي هالوزنتو قنطار
تسلم وجدي بتدبير العرايس ما بتحتار

ليك وجدي مو على دورك بدك تغير العادات والتقاليد وحتى اذا العروس وافقت معك واهلك واهلها وافقوا نحنا ما رح نوافق . بدي اسئلك حسام عبد العزيز أو حسام الدانيال احسن منك؟ ما فشرو! مبارحة تجوزا وخربوا الدني. لذلك انا بقترح انو عرسك رح يكون مميز عن كل الأعراس التي سبقته ويصروا الناس يقلدوه(يخربوا بيوتهم) وعندي الاقتراحات التالية ورح نبلش بواسئل الدعاي.
اكيد الفيلا جاهزي ومافي حاجي نتكلم عن التفاصيل والبركي قد ما كبيري حجبت الشمس عن الجيران. من اليوم ورايح ولمدة شي اسبوعين لا تكتب بالمندى على اساس اننا رح نقول انك بالصين عم تتفقد اخر انواع الحرير الي بدك تشتريه لفسان عروسك ومن الصين بدك تورح لاطاليا على شان توجد مصصم ازياء للفستان, أقل من هيك.ورح نطلعلك دعاي بأنك عم تدور على مخرج سينمائي للعرس, اي كلها ابو نصف مليون مطمورة وبنفس الوقت كما يبدو انك رح تتطبع كروت العزيمي وتعطي تعليمات عن اللباس المقبول وغيره من التفاصيل حتى انواع الأكل المفضلة عند كل من المعازيم. يعني تصور وجدي ما رح خلص هالكتابي والا رح نقلب كل العادات والتقاليد على راسها ويصيروا الصبايا يمشوا على الشباب.واكيد رح تنزل بساحة الكنيسة من طيارة هيلوكبتر وكذلك العروس. المعازيم كلها رح تبعثلهم سيارات ليموزين ممطوطة تنقلهم الى الصالة والله يعلم ويين رح تكون الصالة ولا تنسى انو كل سيارة يكون فيها براد ومشروب ومؤكلات على شان ياكلو ويشبروا في طريقهم الى العرس.
يعني تصور وجدي معازيمك ما رح يوصلوا للصالة وفي عندهم مروي يتحركوا وحتى لمن بتفوت انت والعروس على الصالة بحتاج لتحميسهم على التصفيق, اي صرعتهن بعرسك وانهك مقدرتهم على التفكير والمشاركة.
بالضبط الخطوبات والجيزات والأعراس في زيدل اصبحت عبارة عن وسائل للدعاي وليس للمشاركة في الأفراح كما كانت من حيث ان كل الناس كانت تشارك في مشاعرها وحواسها بدلاً عن المشاركة في المظاهر.بالفل اننا ضيعنا القيم لبعضنا البعض كسكان قرية تعرف بعضها البعض منذ اجيال وانجرفنا مع تيار مبني على عادات وتقاليد كأنها غريبة عننا لا نعرف مصدرها ولكن لو بحثنا القليل نوجد بان جذور هذا التيار مسرغة في تركيب شخيصاتنا المبني على سالب كبير وهو الاعتزاز بالنفس فوق مقدرتها.
ولوجدي احلا عروس ولكم محبتي.
سليمان

ملاحظة للغالي وجدي:
بدك ما الصبايا يصدقوا وتكون بلوتك من ورا هالكتابي.

Posted by: wajdy barakat

شكرا لكم على المشاركة التي ذهلت بها الى حد لا يمكن وصفه .........البداية مع الاخت او الرفيقة سمر شكرا لك على المشاركة والقصة انو انا خايف انه توافق العروس بس ما يوافقو الاهل وهون بيصير قدامي خيار الخطيفة هههههه
.......... وعبودي شكرا الك وزودتني بشوية امور كنت اجهلها بس يا ترى برايك لو عملت مثل العادات القديمة رح يشاركني اهل زيدل اكيد لاء ما رح يشاركني غير الختايرة ههههه.........
ابونا الغالي جورج الله وكيلك ما في شي منو وفكرة الزواج شوي مطولي بس قلت بجس نبض العالم وبعدها بقرروان معك بكل تاكيد على فكرة دورات الزواج وصرنا طارحين الموضوع على سيدنا جورج اكثر من مرة وهوي هلق عم يدرس الموضوع لانو فعلا عم يصير مشاكل كبيرة شكرا للمرورك .......
الدكتورة مريم انا اكيد معك انو النمط سابقا كان اروع واجمل وبسيط اكثر والقاءات حميمية وانو الزمن هذا صار واجب وتعب وملل بس كمان انو نرجع لوراء ونستغني عن المطاعم هاي شوي صعبة لاء واصعب من النمط الحالي وشوط دبكة ليومين ولا تحضير اكل للعالم ههههه وانا باكدلك انو كاس بيت بركات مرفوع بمحبة لكل العالم ورح يظل مليان وعم يشرب منو كل الربع والعالم جميعا بس عاد شريبت العرق الاصليين راحوا الله يرحمهن..................
اما للاخ عبدلله: الاكيد انو هاي المناسبة لها اهمية كبيرة بحياة كل شخص بس مثلا لو فكر شخص بجمع مبالغ التعاليل والحنة و......و.... ووضعها كلها في سهرة بعد الكليل فهل ستكون ذكرى غير جميلة مثلا.....وانا معك في ان العادات سابقا جميلةكما ذكرت انت والدكتورة مريم وان لا بد من الحفاظ عليها كتراث لكنها اندثرت و تلاشت مع الجيل الجديد الذي غيرها لكنه لم يجلب البديل المناسب بل جلب البذخ والملل والشعور بالواجب وهذا ما اريد ان اغيره مع الشعور بالرضى لنفسي ولاهلي وللاخرين.............
أما العم الغالي سليمان فلكل الكثير منالشكر للمشاركة وللاقتراحات البنائة اللي بتعمل تغيير كبير بالنمط السائد وكثير عجبتني ورح ادرسها واخذها بعين الاعتبار وخاصة الطلعة لايطاليا والنزول لساحة الكنيسة بالطائرة وانا كثير بحب غير عن الزفة العادية و سيارات الليموزين وفكرة حلوة وما كثير مكلفة هههههه بس بصراحة خايف حدا يقرا المقال وينفذ الفكرة قبلي وبالنسبة للصبايا اكيد رح ابتلي فيهن موبس من وراء الافكار اللي اقترحتها و من وراء موضوع الاصلي هههه
عفوا اخت كاتريت لتاخيرك درجة واحدة: وعلى ما يبدو ان هذه الحلة ليست في سورية او زيدل حصرا وكم ارحتني عندما قرات مشاركتك وبان الهم موجود لدى كل الناس ..........وانشالله بيطرق بابك ابن الحلال اللي بترضي عنو وبتشاركي مرار وحلاوة الحياة..........

شكرا للجميع على المشاركة القيمة وخاصة لكبار اعضاء المنتدى ولكم محبتي واخلاصي ........

Posted by: organist

مرحبا وجدي بعتبار أنه العادات ماراح ترجع مثل أول صعب لأنو عادات الغرب مشي الحال سيطرت علينا حتى صرنا صفقة مربحة لكل صاحب عمل بيتعلق بعمل الحفلات بالصيف من خارج زيدل طبعا أي مجال... أسمحلي جا وبك على بعض الأسئلة وإنشالله أني فيدك بشي.

اقتباس:

هل فكرت مرة بأن تبذر مثل هذه المصاريف في شهر عسل لأوروبة؟؟؟؟ أو أن تشتري هدية مميزة لصاحبة الجلال؟؟؟؟؟؟؟

والله ياوجدي السهرة عما تكلف بحدود 250الف ....أما الرحلة مثلا عا تركيا عا أستانبول يا سيدنا بتكلف طبعا بنتزل بفندق خمس نجوم لشخصين بحدود 60 الف تقريبا مع تذ كرت ذهاب وإياب طبعا لشخصين وبنضل كل العمر إنت عروسك
تتذكرو وتحكو عن الذكرى وكيف أضيتو هالإيام الحلوي أما سهرت الصالي بنصور العرس فيديو بنحضروا لمدة جمعة وبعدين حطيناهن بالجرار راحت حتى إشعار أخر لنحظر مرة ثانيي وتكلفنا كل هالمبلغ ثاني يوم بنسمع الإنتقادات مثل ما ذكرت

اقتباس:

لماذا نفكر دائما بآراء الناس وكلامهم الفارغ ولا نفكر ولو للحظة بان فرحة العرس لا تتم إلا بوجود الأحباء (أقارب-أصدقاء) مهما بلغ البذخ ذروته وان كلام الناس سيلفظ من أفواههم مهما صرفت وتصرفت

لأنو المصاري والمظاهر عمت القلوب ما ظل تفكير لا بقريب ولا بصديق
وأراء الناس بدي قولك بدو يعيش للناس ما بعيش والناس ما همها غير الحكي والكلام مالو طعمي ما ظل حدا يفكر أنو العرس بأهلو أنو لازم أجمع الكل حواليي للأسف ماظل

اقتباس:

هل شعرت أيها المتزوج أو المتزوجة بالندم أو السوء على عمل ما في عرسك أو أمر أردت أن تصنعه ولم تستطع؟؟؟؟؟؟؟]

[والله يا وجدي راح جوابك على لسان أحد أصدقائي حط فوقو وتحتو على عرسوا بعدين قالي لو بهالمصاري حطيتها بلشت بغرفتين ومنافع كان أحسن كنا عملنا عرس من قريبو وخلصت القصة هيك هيك ما خلصنا من لسان العالم.

اقتباس:

هل أنت مع هذا الصرف الزائد؟؟؟؟

الصرف الزائد خلا الكثيرين يطمعو بأهالي زيدل على سبيل المثال المطرب يالي عما يجي من خارج زيدل
عما يا خذ سعر صدقا ياناس عما يحلم فيه خارج زيدل وفيروزة مو بس هيك عما يحملك من نيي بقولك مراعيك بالسعر و الفرق عما ياخذوا بين زيدل و برى 10000ل س وأهل زيدل دفيعة من الحكي وضروب سعر وغيروا..................

هذا الشي لأسف صار يأثر عا جميع الطبقات المجتمع حتى الكوفير السعر بياخذوا من عروس زيدل زيادي عن عرايس برى... أحد الكوفيريي قال زيدل هي مشغلي كوفيريت حمص... حتى أول... الصمدة كانت كراسي ومطرب وبس ....أما اليوم غير طاولات ما بيرضوا وغيرو.... مو رايحة غير عالمعثر مو قادر يعمل شي واقع بهيك وضع وصار وافع بخيارين لأما يبطل يتزوج أو بيخرب بيتو ليعمل مثل الناس

اقتباس:

ما أريد حقيقة النقاش به هو نمط الأعراس لدينا نمط الترتيب (تعليلة-صمدة-حنة-سهرة

)

بهجة العرس مابتكمل إلا لحتى يكون تعاليل وحنة سهرت عرس هيك بيقولو ما حسينا بطعمة العرس مر بسرعة
بس شغلة الحنةهي عادة المفروض ننتهي منها لأنو شغلت جبل هالحني وبصيروا البكي والغني كلو ندب كأنو الفرح بعد شوي بيقلب لعزي شو المعنى خليها سهرت بدون هالمقدمة

بنعتذر إذا حكينا شي غلط

عقبال فرحة العزابيي

Posted by: hosam abdulaziz

مرحبا جميعا
انا رح احكي من تجربة ليست ببعيدة
1 هل تندمت على شيء بالعرس.
رح قلكم قبل العرس بشي اسبوع حضرت سهرة عرس وحيدة قبل عرسنا و بعد ما طلعت منها قلت لوني ملحق حالي كنت رح الغي سهرة الصالة , بس للاسف كنت طابع الكروت و موزع بعضها و عامل اغلب الحجوزات ,
و تأكدت هالفكرة بعد العرس لانه اهل البيت ما بيجي يوم السهرة و بعيونهم ضو ,فلا بينبسطوا كثير فيها و بسطهم بيكون واصل للذروة خلال الايام اللي سبقت السهرة
و المشكلة انه سهرة الصالة هي اكبر التكاليف , مع اقل حماس و صايرة الناس يا دوب تحضر ساعتين و تمشي.
لهيك انا بنصح اي واحد يركز عسهرة الحنة و يكبرها و بلاله سهرة الصالة.
---------------------
2 هل حاولت اعمل تغيير بالعادات.
بالعرس طلب مني احد المقربين الكبار بالعمر انه قوم بتغيير جذري بطريقة الصالة اعمل مثل ما بيعملوا بالبرازيل , انه الناس بتقعد عطاولة فاضية و بعدين بتصير تتقدملهم الماكولات تباعا كل حسب ما بيطلب من القائمة اللي موفرها العريس بسهرته من المشروب و الطعام.
بس ما تجرأت جرب هالفكرة بحالي.

بالخطبة حاولت انه ما لبس عروسي ذهب غير المحابس (رغم اني مشتري الذهب)لقناعتي انه تلبيس الذهب في شيء من الاساءة لمفهوم الخطبة و نوع من البيع و الشراء ثمن للعروس, بس لقيت معارضة شديدة
طيب قلنالهم منيح بنلبس ذهب بس بشرط انا لبس كل الذهب (تعبي و انا حر فيه ) و لأنه شغلة هالقرايبين يلبس كل واحد قطعة مثل التمثيلية و ضحك.
كمان قالوا بتزعل فلانة و فلانة و و ووووو

ففشلت بالامرين و كله قلة عقل نسوان.

و بالمناسبة 70% من مصاريف العرس هو قلة عقل نسوان.

بقا بدكم تحلوا القصة لاقوا عقل للنسوان.

Posted by: RUSHA AWAD

بما انو جبت يا حسام سيرة الذهب رح قلك رأيي.
هلأ من مبدأ انو الذهب ممكن يكون سند للعيلة بالأيام في حال احتاجو لمبلغ من المال مشان أي شي, أني كثير بوافق على هالموضوع.....بس مشترات الذهب صارت نوع من المنافسة والواجب وصرف مصاري عالفاضي واني وحدي من الناس اذا كان عندي القدرة اني اقنع هاللي دايري بفكرة انو محبس واسوارة فقط لا غير رح كون أكثر من مبسوطة لأنو بضمن حالي البس المحبس بس الإسوارة مو عالأكيد لأنو لبس الذهب لبكي عالفاضي......ومنرجع لموضوع الأعراس فياريت القصة بتنتهي بتعليلة وحنة وسهرة عرس, لاء, تعليلتين ثلاث وصمدة وحنة وسهرة وفطور و صرفة شباب وووووو.........التعاليل كانت تمر على دبكة قنينة عرق عم تفتل بين هالناس, تطورت لطربيزات مشروب ومازة.....الحنة كانت طربيزات مشروب ومازة صارت طاولات ومطرب واضرب واطرح......السهرة كانت تمشي بشي 100 او 150 الف صارت ماتصير بأقل من 200 ومافوق طبعا..... مابعرف لوين بعدني ماشيين وطبعا اخر شي ممكن الناس تفكر فيه بالعرس واللي هوي الأهم والأساس "الاكليل" والله شي بجنن...... حرام هالبطر وهالمستوى اللي صرني ننزلو واللي مفتكرين انو كل مالنا طالعين بالمستوى........رحلة اوروبا مابتكلف قد سهرة الاكليل وبتضل ذكرياتها للعمر....غرفة زيادة بالبيت وحتى ولو العريس مأمن بيت بصير عندو قدرة انو يجيب سيارة احسن, يفرش بيتو احسن, لك يحط هالمصاري بالبنك وياخذ فوائدهن يعني في مية طريقة واسلوب لصرف تكاليف العرس بطريقة أذكى وطويلة المدى مقارنة ب3 ايام عرس.
الله يستر

مع حبي واحترامي
رشاعواد

Posted by: talal_alachkar

أنا رح أحكي على نقطة واحدة حالياً و هي السهرة و قصر عمرها و للأسف
أنا من خلال مشاهدة عدة سهرات و أسئل عن سبب انو الناس بتنصرف قريب الساعة 12 بليل
و إستنتجت انو السبب كثرة العراس و التعاليل الي عم يتعبوا فيها و لهيك عم يوصلوا للسهرة تالفين من التعب .
أنا تجربتي الشخصية أنو وزعت كروت عرسي أنا شخصياً مشان أتعرف على الناس الي رح أعزمهم .
و خبرت الجميع أنو مافي تعاليل فقط سهرة شباب عريس مع حنة مصغرة .
حبيت أنو تكون السهرة الرئيسية بعد الإكليل هي كل شيئ لأنها كلفت أكثر شيئ و حبيت أنها تكون ناجها .
و يمكن من خلال رأي الناس بالسهرة أنها كانت ناجحة جداً و الحمد الله بفضل شباب العريس و شباب الانترنت .
لذلك بظن تجربتي نجحت و لو أنو البعض بيفضل التعاليل على السهرة بالصالي .
يتبع .......

طلال

Posted by: فاروق القدومي

اهم شي انك تتأكد انو ما في عادات بتتغير ولو حتى مر عليها الزمن..وهاي البدو بالصحاري عمرهم غيرو عاداتهم في الاعراس...وهيك نخنا كمان**

في عنا بالبلد عادة ما بتتغير بالعرس وهي شوال الرز.....كل واحد بيتزوج عنا بيحصل على اكياس من الرز بدل النقوط النقدي....كل عريس نصيبه حسب سمعته الاجتماعية....احياناً يحصل على 100 شوال وفي اقل وفي اكتر... كل شوال وزنه 25 كيلو وسعره 1000ليرة سوري تقريباً. ويااااااااه شو متعب حمل شوال الرز اذا كان بيت العريس بدون شارع او على طلعه....يعني رياضة اجبارية....هههههههههههه**

شكرأ وجدي على الموضوع**

*قدومي*

Posted by: wajdy barakat

رد للشكر على المشاركة...........اورغنست شكرا فقد اجبت عن الاسئة بالمطلوب وانشالله بعرسك اذا مانك متزوج تعمل مثل ما جاوبت وياريت لو كلياتني منفكر بالخطأ او الندم اللي حس في رفيقك قبل ما نخطي اي خطوة وخاصة اذا بدها تكلف تعب الحياة..........اما الصديق حسام مليح انك حسيت بأهمية التغيير وحاولت ولكن ما نجحت على كلن عرسك كان حلو وراحت على اللي ما حضر وانا هلق صرت اعتبرك مؤيد الي اذا انا قمت بالتغيير ورح توقف جانبي............اما ام الرش الصديقة الغالية تفكيرك منطقي وميال لفكري وهيك رح اضمنك ما تنقي بعرسي على اني اخربهي او اعمل شي ما صار بزيدل هههههه...........اما الصديق طلال بصراحة انا ما الي خبر عن عرسك والنمط اللي اتبعتوا بس المهم انك غيرت وحسيت بنجاح افكارك وهذا المطلوب يعني خليت الميزان عادل لا زودتهي ولا قللتهي ...........ويا اخ قدومي علواه اذا بصير بزيدل مثل عاداتكن وبدال ما يهدوني بالعرس شي ثقيل ما اقدر ردو بالايام يهدوني مو كيس سكر لاء يهدوني علبة بسكوت وهيك انا بصير اكبر مصدر للبسكوت بسورية هههههه والعادات اكيد ما انقرضت بس القصة انو عم ينضاف عليها امور تشوهها وتحجب بسطها...........شكرا لافكاركم وللمشاركة وانشالله كل واحد يحقق اللي ببالو وعقبال العزابية والله يهني المتزوجين وشكرا مجددا............

Posted by: mario

صديقي و اخي العزيز وجدي شكرا الك عالموضوع اللي هوي بيهم كل اهل زيدل و الكل لازم يطلعو علي و يشعرو في و يفكرو في ,,و كلام جميع الاخوة المشاركين صح و كلكن معكن حق بكلشي قلتو ...يعني اسبوع للاحتفال بالعرس هاذ شي كثير و متعب و ممل و مكسر و مثل ما بيقولو كل شي زاد عن حدو نقص او قلب ضدو (هاي باختصار)
و هالعادات هاي ما في احلي منهي كمان بنفس الوقت بس لولا الفشخرة وشوفة الحال و مين بدو يحط اكثر و مين بدو يجيب مطرب اغلي و مين بدو يصرف اكثر ع سهرتو الخ يعني هاذ السبب الوحيد اللي بيشوه جمالهي ....يعني ما بتتصورو شقد هون باميركا بيتكلفو ع هالسهرت يعني اذا قلتلكن ارقام اكيد ما رح تصدقوني بس صدقو ...يعني ابسط عرس و اللي هوي مشان يقدي بالمقام بدو يكلفلو شي 40 الف $ يعني مليونين ليرا يا شباب...و اما اللي متفضي و بدو يقلد فلان و علتان اي ما بيقدي 150 الف $ اي صدقو يعني شي 7 ملاين و نص....اي صدقو..فهاذ الصرف اللي لازم يتخفف....
فلهيك العراس بهالنمط الحالي حلوي و هالتعاليل بتعطي البسط بالعرس و التكاليف رح تصير اذا بدك ولو حتى بسهرة وحدة... يعني مثلا هون باميركا عالم بتسوي حنة و سهرة و الاغلبية بس سهرة و بتطلع ناجحة بس بتضل هالتعاليل بتحسسك بالعرس اكثر صدقوني .....بيجوز السهرات بتطلع ناجحة هون لانو العالم مرتاحة ما في تعب و كل فترة لحتة تصير سهرة ..مع انو هون بكلفورنيا اوقات بيمر كل اسبوع سهرة بس بيضل اخف من زيدل......المهم يعني السهرات حلو و خصوصي سهرات اهل زيدل هون بكلفورنيا(يعذروني اهل فيروزة) بس لانو يمكن نحني اساني قلال شوي بكلفورنيا و تقريبا اغلب اهل زيدل بتنعزم عالعرس و الكل بيشاركو من قلب .... و اكيد بتشوفو الاعراس هون شلون هالشباب كلهن بيلتفو حوالي المطرب و بيقعدو حواليه و هاذ دليل البسط طبعا....بس برجع و بقول منفقد لهالتعاليل يعني حمدو ربكن قيكن تحطوا هالشوادر برا و تسهرو للصبح مو مثل هون هههههههه
عذرا على الاطالة يعني صارت جريدة

موقع زيدل سوريا حمص .. خدمات تشات و دردشة ... أرشيف المنتدى