الارشيف - تعلم الحمصية بكذا يوم وليلة...

Pages: 1

تعلم الحمصية بكذا يوم وليلة...
(انقر هنا ان احببت مشاهدة الموضوع الاصلي بالالوان و الصور )

Posted by: Kinan

بعض المصطلحات الحمصية .... في شي ناقص ؟؟

علاي: عليه مثل الحق علاي وتعني أنه هو المذنب أو المقصر في الأمر

شوية اللخر : بعد شوي ..

تعا كل يوم : أداة للتخويت

حسن صبي:بنت مستزلمة

زكُوْرْت : زلمي (رجاااااااال يقبرني شو رجال) منالخالدية، باب السباع، باب الدريب، باب تدمر، جورة الشيّاح وهالحارات القديمة

شووو مشان : أداة للتساؤل

شوفي ما في: أداة للسؤال عن كل شيء بكلمتين

خملت: أي حسبت (ظننت)

لسع: ليس بعد

مصرع : تعني حدوث الشيء بأسرع من المتوقع، مثال : مصرع ما اجيت اي اجيت على حين

على حين : بكير

لا ولو : أداة تخويت و مسخرة

أحِّط : تعني حليق و باللغة الفصحى اذهب من هنا أيها الوغد

ايووووووو: أداة للنداء والاستهزاء، مستخدمة من قبل شوفيرية الميكرو على وجه الخصوص

عم تبلتس : يعني فاتح البلوتوث و عم تظبط شي بنت

أبو عبدو : أداة للتكلم مع شخص ما بتعرف شو اسمه

تطلع : شوف (انظر)

خيوووو: تعني ... هادا يا أخونا الكريم...

ولا شمعة: مصرووووووووع ( مجنون ) وضاربة فيوزاته

طلاع من راسي : حلّ عني

ماااااااااخرج : أداة للنهي و التملص

كفوووو : أداة نفش

كبييييييييير : كمان أداة نفش

وجع:تعني و حسكة و علة

سرسري : شخص صاحب مشاكل كتيرة (مشكلجي)

محسوبك : خدام شورابك

طنط : شب محسوب بالغلط عل الشباب

نيان : متل طنط

حاج تتمسخر : حاج تتخوت

دشرو: اتركه

ماني غضران: غير قادر

عم يزوغل : يعني عم يغش

اقطعله كرت : يعني احلقله عالناشف

الله يمنترك؟؟؟؟ لا اعرف شرحها مرة بقولوا لشي منيح ومرة لشي عاطل

تنزل عليك النزلة .................. دعوة خفيفة على حدا

مفشكل : أي غير مرتب ولها مرادف مخربط

بفرد مرة = معا

يندفس ......يعني ينام

يئبر بعضو......يعني يصطفل شو بنعمله

أبو شمسو....... اشهر بياع حمُّص بأبو العوف

عمنوَّل.......... وتعني السنة الماضية

أول عمنوَّل ........ وتعني السنة ما قبل الماضية

شلافيط ............ تعني ساخن جداً او حار جدا

حاجي عاد ............ أداة طلب للتوقف عن فعل أو قول

حبالتاي...................... وا أسفاه عليه

يتربح خطيتا............... يحمل ذنبها

ولآن الجوع.............. جائع كثيرا

كماجي...................رغيف خبز

عم يبرطن............... عم يثرثر

عم يأفلم ............ عم يتخوت

مشلبن................. ناعم

مصرصع ............... ضعيف جدا

مسحلل ...................... كمان ضعيف

منظنظ .................. ناعم زياده

مزوزأ .................. شديد الاعتناء بنفسه

مونون..............موسوس

مونَئ .................. ما بيعجبه العجب

مسودن................ شديدالنظافه

مكرشن.................مزموم

مكرِّش .................. أي صار له كرش

مطبلج .................. سمنان

معجعج ............... سمنان حتى مرحلة العجعجة من وين ما برمته

متصربع .................. قاعد ومجعوص على شي كرسي

أريضه..................لا معنى لها بتقولا إذا شي دايقك أكتر من مرة

زرز............... دمه خفيف

أبّوع .................. وهو مايوضع فيه الايس كريم

كُبّاي.................. قرص كبه

المباراي ................ هي المباراه

كمشة ................... تعني شوي

جاموقة: بركة المي خاصة بعد المطر

مأآآآآطخ : آخذ وضعية منحنية

مطبوز : حردان

هايشي: و معناها أجدب أو جدبي وتطلق على المذكر والمؤنث على حد سواء

Posted by: talal_alachkar

و الله يا كنان كنت مفكر أنو الفرنسي الي جنني أنو أصعب اللغات هههههههههههههه
طلع في اللغة الحمصية أصعب ههههههههههه
شايفلك رح بلش علم الفرنسيين هون لغتنا مشان نقدر نتعامل مع بعض ههههههههههههه .

طلال

Posted by: samar dahi

ولك شو هاد يا كنان ....الحقيقة جننتني .....
بس بدي اعرف من وين جمعت كل هالكلام .....
هلق هاد كلو منعرفو ...بس شلون خطر ببالك كل هالكلمات هاي ....
ولك تاريك شغلة يا كنان ...
ضيف هاي
تاريك : إذ بك
شغلة: عبقري .. .................

Posted by: abode durra

هههه اشو هاذ عنجد زابطات معك بس يعني اديش ضليت عم تلم فهين
ليك ضيف هالكم وجدي كمان :
كمان...........أيضا
اللخ................ايضا
اديش.............كم
وين...............اين
ليش...............لماذا
عوين..............الى اين
اشو................ماذا

اني.............انا
شلون.............كيف
يمكن.............ربما
سداج...........سجاد
شباك..............نافذة
برداي................ستار فوق الشباك(النافذة)
شنتة................حقيبة
وحدي..................تأتي بعني فتاة او اي شيءاخر بالمفرد
اجر=رجل...............ساق الانسان

تحياتي

Posted by: Kinan

شكرا سمر و عبودي عالاضافات
الصراحة عجبتني الفكرة بلكي اذا حدى بيضيف بعد الشغلات الناقصة
بيصير فينا نعمل قاموس المفردات الحمصية

بس شو مشان انو اغلب الكلمات الموجودة منحكيها بزيدل

لا يصيرو يقولو علينا حماصني بعدين

يالله على كل حال بكرى الاربعاء

Posted by: talal_alachkar

تعليق على
كباي -- كأس

طلب شيف مطبخ من عامل حمصي يعمل في المطبخ أن يحضر له 5 كبايات
فأحضر العامل الحمصي خمس كاسات فاضية هههههههه

الشيف كان قصده كبة برغل هههههههههههههه

مع التحية للجميع

طلال

موقع زيدل سوريا حمص .. خدمات تشات و دردشة ... أرشيف المنتدى