الارشيف - عيد المعلم 2008

Pages: 1

عيد المعلم 2008
(انقر هنا ان احببت مشاهدة الموضوع الاصلي بالالوان و الصور )

Posted by: الإدارة

مرحبا جميعا
في العام الماضي و بفكرة من الاخ ماهر سطاح مشكورا قمنا بتكريم استاذ من القرية تقديرا لعطائه و ذلك بناء على اختيار اعضاء المنتدى , و وقع الاختيار وقتها على الانسة اسعاف بركات.

و بما اننا الآن قريبون على عيد المعلم و بما ان هذه الفكرة قد لاقت استحسانا من قبل المدرسين و الادارة
نريد الآن ان نقوم مجددا بتكرار هذه الزيارة لتكريم احد الأساتذة و على هذا الاساس نريد ان نسمع آرائكم و اصواتكم و تصويتكم على الاستاذ المناسب
طبعا نوهنا في السنة الماضية الى اننا سنقوم هذا العام بتحديد عدة اسماء تقومون انتم بالتصويت عليها
و بعد استطلاع آراء شريحة مقبولة من الطلاب حصلت الاسماء التالية على اكبر نسبة من الاصوات و هي:
1 ماجد رحال(لغة انكليزية) 2 سهام مخلوف (لغة عربية)3 الياس رحال(تاريخ) 4 تريز دعبول(جغرافية)
لذلك نتمنى على كل المهتمين من ابناء القرية ان يقوموا باعطاء رأيهم و صوتهم للاستاذ الذين يرون انه الاحق بتكريم هذه السنة.
و كل عام و جميع المعلمون بالف خير.

Posted by: talal_alachkar

الحقيقة
أنا الأستاذ ماجد كان له فضل كبير لجعلي أتعلم و أحب اللغة الإنجليزية و بسببه دخلت دورات تلعم لغة لتعلقي بها .
و لكن للأسف شائت الظروف أن أسافر لبلد لغته فرنسي و مع ذلك فادني تعلمي لغة الإنجليزي في بدايات حياتي في بلد الأغتراب .
رقم و احد
الإستاذ ماجد
و كل المحبة و التقدير للأساتذة جميعاً و لكن المسابقة يجب أن تختار أستاذ واحد فقط بينما نحن في قلوبنا أخترناكم جميعاً و شكراً
طلال

Posted by: ziad sattah

كل الشكر لإدارة المنتدى على هذه اللفتة التي تضاف إلى رصيدها .

و لكن التحديد بهذا الشكل يجعلني أنا مثلا ً محرجا ً باختيار أحد زملائي و جميعهم معي في المدرسة ..
و لهذا سأختار اسما ً لم يذكر بينهم ..
و هذا هو الأمر الآخر الذي أريد قوله : ماذا عن معلمي و معلمات الابتدائية ؟؟؟

لذلك اسمحوا لي ان أختار المعلمة و المربّية الفاضلة السيدة سهيلة فزع , لما لها من فضل على تعليم 25 % من أطفالنا في الصف الأوّل الابتدائي
يبقى هذا بالنهاية مجرّد رأي متواضع .
و ألف ألف شكر لإدارة المنتدى مع باقة ورد

و كل عام و أنتم و أنا و كل معلّم في مجال عمله بألف خير ..

Posted by: ابن الحياة

كطالب من زيدل أرى أن الاختيار بين الاسماء المطروحة صعب جداً لأنهم جميعاً يستحقون التكريم وأقترح أن يتم تكريمهم جميعاً.. لكن وبما أني طالب بكالوريا علمي لا يعلمني في هذا العام من الاساتذة المحترمين المذكورين إلا الأستاذ ماجد رحال (لأن البقية جميعهم معلمي مواد أدبية) لذا أصوت للأستاذ ماجد لأنه بالفعل يعطي الطالب متعة في دراسة اللغة الانكليزية وينقله إلى جو آخر يجعله يفكر باللغة الانكليزية بعيداً عن كآبة الكتب المفروضة.. أكرر احترامي للمعلمين الأفاضل الآخرين الاستاذ الياس صاحب النكتة التاريخية والآنسة تريز المحترمة والآنسة سهام التي لم يكن لي الحظ في أن تعلمني.. كما أريد أن أقدم شكري لمعلمي مواد علمية آخرين حتى ولو أنهم لا يعلمون في زيدل أو خارج حقل التدريس كالأستاذ منير رحال و عمي المحترم الموجه الأستاذ هايل فاعور.. وإلى بعض الأساتذة الآخرين ممن علموني سابقاً وكان لهم أثر كبير في حياتي كالمعلمة فضة داوود وأستاذي الغالي زياد سطاح والآنسة وفاء أبوعيد والمعلمة الأفضل إسعاف بركات ومعلمي في مدرسة المتفوقين في الصف العاشر مدرّس اللغة الإنكليزية الأستاذ وليد سباعي.. وجميع من علمني و من يعلمني مشكورين كلهم.. وإن شاء الله أكون عند حسن ظنّهم وأرفع رأسهم عالياً كي يفتخروا بثمرة جهودهم..

وشكراً لكم على هذه الأفكار الجميلة وكل عام ومعلمينا بخير..

يوسف..

Posted by: samar dahi

شكرا لإدارة المنتدى على هذه الفكرة الأكثر من رائعة ...فلا أجمل من ان تعيد ما اعطي أليك بهذا الزخم من الحب لأناس كان لهم الفضل في بناء مستقبلك ...
انا من جهتي لم اتلقى الدروس من اي من الاساتذة التي طرحت اسمائهم ولكنني اكن كل الاحترام لكل شخص فيهم ....وأميل بالتكريم للاستاذ ماجد رحال ...
وكل عام وكل اساتذتنا القدماء والجدد بألف خير ....وكل عام وكل استاذ في منتدى زيدل بالف الف خير....

Posted by: issa george

مرحبااا للجميع .
كل الشكر لهاالعمل الحلو وإن دل على شي أكيد على ذوق عالي وإحترام وحس بالمسؤولية ..وهاي خطوة كتير حلوة شخصياً لقيتها تقدم كتير كبير للأمام كونها أخذت صفة الإستمرارية ..الله يعطيكم العافية
بحب عايد على جميع المدرسين والمعلمين واكيد الجميع بيستحق التكريم ..وكونوا التكريم لشخص واحد رح أتبع قاعدة السيدات أولاً Ladies First وبماأنوا الآنسة تريز درستني رح يقع عليها إختياري .. وكل عيد معلم وأنتوا بخير

كل الحب .

Posted by: RUSHA AWAD

هلأ طبعا الإدارة مشكورة على الاستمرارية بهالمبادرة اللي بلشت السني الماضية وانشالله على طول بضل الموقع يبادر بخطوات حلوي بس أني خايفي من شغلي وهيي انو مارح يصير عدد تصويتات كافي حتى نتخذ على اساسو قرار بالتكريم لهيك اني عندي اقتراح زغير وهوي انو نفس هالموضوع مفتوح عالسبيس وطبعا رأي الطلاب الموجودين بالمدرسة حاليا مهم يمكن أكثر من اراء اللي مانهن موجودين على مقاعد الدراسة بالوقت الحالي لهيك اذا بالإمكان يا حسام انك تعمل احصائية للتصويتات على سبيس زيدل وتضيفها للإحصائية اللي رح تصير بهالموضوع هون بالمنتدى وهيك بتصور بتصير الحسبة عادلة اكثر لأنو حاليا عدد التصويتات لهاللحظة بالمنتدى هوي 8 تصويتات فقط.

مع حبي واحترامي
رشاعواد

Posted by: m-sattah

قـــــم للمــــعلم وفّـــه التبجيلا **** كاد الملعم أن يكون رسولا
أرأيت أفضل أو أجل من الذي **** يبني وينشيء أنفساً وعقولا

شكر و تقدير مني لإدارة المنتدى الكريمة لتبنيها تكريم المعلم في يوم عيده الأغلى
ما أروع أن نبقى أوفياء لمن بذل نفسه و أعصابه من أجل تهيئتنا و رفدنا بجميع علوم الحياة لنكون مستعدين لها وقد حان موعد رد الجميل لجميع المعلمين وأنا على ثقة إن كلمة واحدة تنسيهم تعبهم وهي النجاح
الى جميع معلمي مدارس زيدل (روضة-ابتدائي- إعدادي _ ثانوي) كل عام و أنتم بألف ألف خير

بالنسبة للتصويت صعبتوها كتير ولأني صاحب الفكرة لازم يكون عندي خصوصية شوي لهيك رح صوت لجميع المعلمين اللي و ضعتهم الإدارة و للمعلمة سهيلة أيضا"

في رد على أحمد شوقي الشعر الكبير والي بتمنى من قلبي إنو ما يكون المعلمين عم يقولوا وهو :

شوقي يقول وما درى بمصيبتي **** قم للمعلم وفه التبجيـــــــلا
ويكاد "يفلقني" الأميرُ بقـــــوله **** كاد المعلمُ أن يكون رسولا
لو جرَّب التعليمَ شوقي ساعـــةً **** لقضى الحياة كآبةً وعويـــلا
يا من تريد الانتحار وجدتــــــه **** إن المعلم لا يعيش طويـــلا

مزحة

Posted by: Nada1981

مرحبا جميعا

شكرا للأدارة على الفكرة الحلوة هي.

انا للأسف مافيني شارككم بلتصويت بس حبيت أييد فكرة رشا و نقل الموضوع للسبيس لانه كتير من الطلاب بيدخلو السبيس اكتر من المنتدى.

كمان بحب اقترح على الادارة بوضع التصويت على الصفحة الرئيسية لمنتدى زيدل عند ال Site Voting هلشي بيسمح لكتير من الطلاب او الاعضاء المشاركة بلتصويت.

كل عام و جميع الاساتذة و الانسات الافاضل بألف خير و شكرا لمجهودهم الكبير.

تحياتي

ندى

Posted by: hosam danial

اكيد كل المعلمين الهن كل الاحترام
وما في حدا احسن من حدا
لانو من علمني حرفاً كنت له عبداً
بس بدي اذكر بعض المعلمين اللي
الهن محطة بحياتي
وأول واحد طبعاً هوي والدي الغالي
الاستاذ جرجس دانيال
لانو كان اكثر من معلم
وأختي سماهر لانو كانت معلمتي
بالبيت وهلق هيي معلمي بمدينة حمص
وبعدين عمي (حمايي)الاستاذ ناصر ناصر
أستاذ انكليزي
كان استاذي بصف التاسع والحقيقة
مو لانو عمي ...
بس انا بحبو من وقتها وبكنلو كل الاحترام
وأكيد علم كثير من الموجودين بالمنتدى
وهلق هوي معلمي بالستور
ومن اللي درسوني المعلمين:
تريز دعبول _ هدوة دعبول-منير رحال-أمل ابو عيد-أسعاف بركات
عبد المسيح ابو عيد-سعدالله ابو عيد-هند بركات-دلال العبدالله
وما بدنا ننسى الانسي جانو وردي-وسلام الصايغ وعبد العزيز عبد العزيز
ما فيني عد الكل بس بحب انو نخص كل المعلمين
حتى من الروضة والابتدائية
وبما انو بدنا نعطي صوتنا لواحد فقط
فهوي الاستاذ ماجد رحال
لانو انا بعرفو معرفي شخصية

ولكل المعلمين كل الاحترام
وحتى معلميني بالتعليم المسيحي
من شان ما تزعل سمر

حسام

Posted by: wajdy barakat

يا جماعة كل شي ذكرتوا صح وكل المعلمين خير وبركة ومهم كثير نكرم مدرسي الابتدائي وانا بصراحة برشح ما جد رحال وسهام مخلوف وياريت نكرم الاثنين مع بعضهن واذا انحصر بواحد بفكر بالانسة سهام لانو مو مطولي بتطلع تقاعد اما الاستاذ ماجد فممكن يكون لسا الو مدة خدمة اطول وشكرا للاراء

Posted by: organist

معلمنا هو السيد المسيح

الكل عالعين والراس بيستاهلو التكريم بس من ضمن المذكورين ولا واحد درسني

بس راح صوت للأستاذ ماجد رحال لأنه فنان باللغة الإنكليزية .
تحية خاصة لإحدى ثمار الحب والعطاء في زيدل لمدرسة اللغة الإنكليزية
الأنسة أمل أبوعيد بتمنى نعرف
شو أخبارك والله زمان يأنسي مع أنك بعيدي عن زيدل شوي بس على طول بقلوبنا كل عام وأنتي بخير

من يعمل بيديه هو عامل
ومن يعمل بيديه وعقله هو صانع
ومن يعمل بيديه وعقله وفلبه هو فنان

Posted by: a_aroush

أود أن أكسب هذه المناسبة لأعايد على كل المعلمين الموجودين في منتدى زيدل .. كل عام و أنتم بألف خير.

و تشجيعا لهذه المبادرة أريد أن أضم صوتي أيضاً لمن صوت للأستاذ ماجد رحال .. هو سبب أنني احببت تعلم اللغة الانكليزية.. لا أعرف كيف و لكنه درسني لسنة واحدة في الصف السابع الاعدادي و أظن أنه في ذلك الحين لم يكن قد أنهى دراسته بعد, أو أنه قد تخرج مجددا.

Posted by: RUSHA AWAD

طبعا كل الأساتذة المرشحين للتصويت بحبهن وبكنلهن كل المحبة والاحترام وكلمة الحق لازم تنقال بحق كل شخص منهن:
وخلوني احكي شوي عن خبرتي مع كل استاذ منهن
المعلمة الغالية على قلبي واللي درستني لمدة خمس سنين بالمرحلة الثانوية والاعدادية كانت اكثر من معلمة, احترامها للطالب "طبعا المهذب" مو طبيعي منوب ومابذكر مرة طلعت منها كلمة بحق طالب. لك حتى وقت تبقى بدها تبهذلنا على شي فصل ناقص عاملينو بحصتها او بحصة غيرها كانت من تطليعة وحدي تخلينا نفهم شوبدها تحكي ويادوب كم كلمة مهذبات مافيهن تجريح بمعنى السب مثلا وخلص وهاي هيي الطريقة الوحيدة اللي كانت تشتغل معني.بس المشكلي انو بعد ماتعودت على طريقتها بالتدريس ماعد عرفت اتأقلم مع أي مدرسة لغة عربية ثانية وطبعا المشكلي مو بمدرسات اللغة العربية المشكلي انو بس الواحد تعود على شي ماعد عقلو بيتحمل شي غيرو. بعدين كان في عندها اسلوب للتواصل مع الطلاب خصوصي وقت كانت نائبة المدير وقت بدهن يحطو برامج الفحص النصفي والأخير وسلام وتحية وحب واحترام للمعلمة سهام مخلوف.
الأستاذ ماجد, كنت اعتبر حصتو مكافأة ممتعة بعد حصص الدراسة العادية وكمان بعقلاتي اللي على قدهن كنت حس انو صديق او اخ كبير وعلى هالأساس كان هوي يتعامل معني. وبوافق الأخ اورغانيست انو الأستاذ ماجد فنان متمرس باللغة الانكليزية مع تحياتي ومحبتي لهالأستاذ العظيم.
الأستاذ الياس رحال, الحصص الوحيدة اللي كانت تمر بأكبر كمية ضحك وابتسام وبسرعة هائلة هيي حصص الأستاذ الياس لأنو هالإنسان عندو موهبة من عند الله وهيي القدرة على ايصال الفكرة بأسلوب فكاهي ولا ألز من هيك. بس اصحاكن تروحو على حصة مانكن دارسين لأنو الأسلوب الفكاهي شغال على طول حتى ولو سمعتو الحصة اللي قبلها وجهزو حالكن بالفحوصة للرباع والنصاص بتقسيم العلامات.مع حبي واحترامي وذكرياتي الرائعة اللي قضيتها بحصة هالأستاذ الرائع.
المعلمة تريز دعبول, درستني سنة وحدة جغرافيا وفلسفة والحقيقة هالمدرسة بتفرض احترامها باللاشعور بسبب اناقتها "مو بس باللبس" اناقتها بالتعامل, بالكلام, بإيصال الفكرة, باحترامها لحالها وللطالب "كمان الطالب لازم يحترم حالو". سلام كبير لهالمعلمة المحترمة.

يالله مو مطولي خلصت, هلأ بالرغم من محبتي الكبيرة لهالأربع مدرسين بس اساسا من وقت ماقريت الاقتراح عن اسم مدرس لهالسنة وبدون ماشوف شو الأسماء المرشحة فورا قلت لحالي المعلمة سهام مخلوف ولهيك رح ضل على هالاختيار.

مع حبي واحترامي
رشاعواد

Posted by: الإدارة

شكرا للجميع على هالردود
بس لنوه انه موضوع وضع الأسماء هو لما تضيع الامور علينا مثل السنة الماضية و اللي جنبنا الاحراج وقتها هو الاجماع على الآنسة اسعاف بركات.

بس انتم طرحتوا فكرة جديدة هي باحقية مدرسي الابتدائي بالتكريم
لهيك رح يكون استاذ العام المقبل من هالفئة باذن الله.

ندى طلبك حطيناه قيد التنفيذ بس لنكون صريحين رح نعطي تصويت المنتدى الاولوية بالنتيجة لأنه هو الادق و غير قابل للتلاعب
كمان يا رشا بالسبيس في تصويت مستقل رح ناخذه بعين الاعتبار
و بالتالي فينا ناخذ محصلة التصويت
50% من المنتدى 25% من السبيس و 25% من التصويت العام

Posted by: iyad tahhan

مع احترامي لجميع المعلمين و لكن سأضم صوتي لصوت الأخوة و أقول صوتي سيكون للاستاذ ماجد رحال
شكرا لكم على هذه الخطوة

Posted by: wajdy barakat

شكرا للادراة بس الي ملاحظة صغيرة وهيي انو المفروض يكون السبيس 50% لانو في نسبة الشباب اكبر والاساتذة المقترحين درسو كل الاشخاص اللي على السبيس اما المنتدى فهو جيل الكبار وبعتقد انو في كثير اشخاص ما اخذوا تعليم من الاساتذة الذكورين .............ملاحظة: يا ريت نكرم استاذين بالسنة الوحدة اذا ما في مشكلة ...........لانو اذا اخترتو الاستاذ ماجد مثلا رح ينزعج الاشخاص اللي صوتو للانسة سهام مثلا هههههههه وانا من هالاشخاص وخاصة اذا كان فارق التصويت شيء لا يذكر....ولكم تحياتي والتشكرات على هذه المبادرة

Posted by: ziad sattah

لا تنسى يا وجدي وجود أولياء أمور بين الأعضاء في المنتدى .

أذكُرُ أنني عندما كنت طالبا ً لم أكن أرتاح لمدرّس ما لأنّه يشدد علي ّ كثيرا ً في التسميع و الوظائف و العمل المتواصل , فلا يعطينا و لو دقيقة راحة واحدة في نهاية الحصّة ..... و لكن بعد أن كبرنا و تخرّجنا أدركت أنّّه صنع منّي مدرسا ً يرضي ضميره . ( فهمان عليّي )

Posted by: organist

اقتباس:

لانو اذا اخترتو الاستاذ ماجد مثلا رح ينزعج الاشخاص اللي صوتو للانسة سهام مثلا

معليش أسمحولي أحكي قد وضع التصويت ليكون عادلا بين الجميع ميشان ما حدا يزعل حتى ولو كان الفرق صوت واحد والتصويت ماشالله لأستاذ ماجد كان من المنتدى أو السبيس أو الزوار , كل عام وجميع المعلمين بألف خير.

من يعمل بيديه هو عامل
ومن يعمل بيديه وعقله هو صانع
ومن يعمل بيديه وعقله وقلبه هو فنان

Posted by: talal_alachkar

مثل ماقلنا كل الأساتذة لهم فضل علينا و لكنها مسابقة و يجب أن نختار واحد فقط و في النهاية هي مسابقة مع الاحترام للجميع
طلال

Posted by: RUSHA AWAD

أكيد مارح يصير اي نوع من الزعل لأنو اسم واحد بس بين هالأسماء على كل الأحوال رح يتم تكريمو لهيك اذا بدني نعتبر انو فئة رح تزعل معناتو الزعل موجود على كل الأحوال مع اني مابتصور رح يصير زعل بكل الأحوال.

مع حبي واحترامي
رشاعواد

Posted by: wajdy barakat

اسف ان حدث سوء تفاهم.........وشكرا لك استاذي زياد على هذه اللفتة التي صراحة ام تخطر ببالي........لكن هناك الكثير من الاهل الذين لا يهتمون بالمدرسين (لا تفهموني غلط) كما انو كثير من الطلاب يشوهون صورة المدرس.......وكل فكرتي ترتكز على ان نكرم اكثر من استاذ لانه ما شاء الله في كثير اساتذي بدرسو بكل المستويات بيستحقوا التكريم..........والاكيد انو ما رح يصير اي زعل والكل خير وبركة وانشالله ينعاد عليهم بالخير والصبر على هالجيل وبالصحة والعافية يارب..........وشكرا مجددا

Posted by: hosam abdulaziz

اول شي انا بتشكر الاخ ماهر سطاح صاحب الفكرة العام الماضي.
و اللي تبناها الموقع و المنتدى للعام الحالي و انشاء الله كل سنة

انا بشارك الجميع بأحقية الاسماء المحددة بالتكريم
و ما بعرف يبدو التنافس شديد بين الاستاذين ماجد و سهام

انا عندي اقتراح انه ليش ما بنفكر نكرم الاستاذ ماجد و الانسة سهام مع بعض
خصوصي انه عيد الام و الملعم بيومين متتاليين
فبيكون الحدث واحد.

Posted by: m-sattah

عزيزي حسام أنا بأيد هالفكرة الحلوة وخاصة إنو الاستاذ ماجد و الانسة سهام من الأساتذة الجديرين التكريم
حالهما حال جميع المدرسين الذين يفنون أنفسهم في رفد الأجيال بالعلم و المعرفة .

Posted by: mario

كل عام و جميع المعلمين بالف الف خير ....المعلم الذي يحرق نفسه لكي يضئ درب الاخرين فما هذه التضحية الكبيرة....و لهيك كل المعلمين يستاهلو التكريم في عيدهن لمجرد صبرهن على مشاكل الطلاب و خصوصا الاخيال اللي عم تتطلع هلق يعني اللله يعين هالمدرسين بهالايام شقد بدهن يتحملو لانو هالطلاب ما عاد احترمت حدي.... بس لازم نتذكر انو من علمني حرفا كنت له عبدا..... فكل عام و جميع المدرسين بالف خير .... و كل عام يا استاذ زياد سطاح و انت بالف خير بحيث انك هلق الاستاذ الوحيد من الللي علموني هون بالمنتدى و بلكي لو سمحت تعايدلي جميع المدرسين ايضا و شكرا سلف
اما بما انو التكريم الرمزي بهدية لازم يكون لمدرس واحد و لازم الواحد يختار فاني من جهتي بختار الانسة الفاضلة و الام الحنونة على الطلاب المعلمة العزيزة على قلبي سهام مخلوف و كما قالت الاخت و الصديقة رشا عنها لانو انا و رشا من نفس الصف للي ما بيعرف هههه
(المعلمة الغالية على قلبي واللتي درستني لمدة خمس سنين بالمرحلة الثانوية والاعدادية كانت اكثر من معلمة, احترامها للطالب "طبعا المهذب" مو طبيعي منوب ومابذكر مرة طلعت منها كلمة بحق طالب. لك حتى وقت تبقى بدها تبهذلنا على شي فصل ناقص عاملينو بحصتها او بحصة غيرها كانت من تطليعة وحدي تخلينا نفهم شوبدها )
فيا رشا معك حق بكل شي قلتي و انا بايدك كمان و بحيث انا كنت طالب مهذب هههههههه (مداح حالو يا زينة فعالوههههه) لاء الحقيقة يعني كانت علاقتي مع الانسة سهام جيدة جدا جدا فلهيك بكنلها بقلبي كل الاحترام و المحبة و بقلهاو كل عام و انت بخير
و بالناهاية ينعاد عالجميع بالخير و عفوا عالاطالة

Posted by: silva

كل الشكر للإدارة الممتازة على الذوق الرفيع والمثابرة باستمرار التكريم للمعلمين ولقد احرجنا فالجميع يستحق التكريم ومن خلالكم أتقدم بأرق التهاني لجميع المعلمين أعاده الله عليكم جميع بالخير واليمن والبركات وكل عام وانتم بالف خير

Posted by: الإدارة

وفقا لنتائج التصويت في المنتدى و الموقع و السبيس
حقق الاستاذ ماجد رحال اعلى نسبة تصويت على جميع المستويات
و سيتم تكريمه يوم غد الثلاثاء في الثانوية و سنوافيكم لاحقا بالتفاصيل.

Posted by: talal_alachkar

ألف مبروك للأستاذ ماجد رحال
و مبروك لكل الأساتذة الكرام
و الذين يستحقون منا كل الأحترام و التكريم
و الشكر لموقع زيدل و لأعضائه الأكارم على التصويت.

طلال

Posted by: hosam abdulaziz

مرحبا
قمنا البارحة بزيارة للمدرسة و تقديم الهدية للاستاذ الفائز السيد ماجد رحال
لمشاهدة صور الزيارة يرجى الضغط هنا

موقع زيدل سوريا حمص .. خدمات تشات و دردشة ... أرشيف المنتدى