الارشيف - صطفل .. وليد بيك

صطفل ...!!

م الواضح انو كل مؤامرات العالم صارت موجودة عندكن صوت وصورة .
وكل واحد فيكن تابع لحدا . لأنو حدا واعدو بسلطة من حدا ...!
منشان هيك عم تنفذوا أوامر الحدا .. بحزافيرا . . .
والإّ .. مافي سلطة ..؟
وليد بيك واعدوا حدا بشي ماعاد يتحملو عقلو .. جن ..
شايفينو كيف عم تجيه نوبات يالطيف .. هيك لوحدو .. بيكون مافيه شي
وفجأه بيحمى معو الطلق وبيهب بشكل مو طبيعي .. وبيحكي كلام مو على قدو
بيشوف العالم عم تضحك عليه وتسفقلو ... بطير عقلو أكتر .. بيقوم الحدا بيبعتلو حدا
وبيقلو شي مايقولو لحدا ... ( تيس الجبل ) رح يعملك الحدا ..
منشان هيك بيروح بيزور الملوك ع اساس هو ملك متلن ..
بس الملوك بيعرفوه بلا عقل ...
فا بياخدوه ع قد عقلو .!! وبحشولو الباقي بأوامر حدا . !!!!
مسكين دخّلولو براسو أنو هوّه مفكر ومخترع ..
لأنو آينشتاين كان يحك راسو لما بفكر .
والبيك كمان بحك راسو لما بيفكر .
آينشتاين شعرو طويل من ورا ... والبيك شعرو طويل من ورا ..
آينشتاين ماعندو كلب ... البيـــــك عندو كلاب ..
بعدين
البيك أحسن من آينشتاين .. آينشتاين ماهو ملك ...
البيك ملك .!!
طبعن ...!
الملك عندو قصـــــر ... ايه البيك عندو قصر
الملك عندو خصيان ... والبيك عندو خصيان
الملك الله عاطيـــه ... البيك حــدا عاطيه
الملك بيفرض جزيه ... البيك بيــــاخدا خوة
لهيك البيك احسن م الملك .. طبعن
لأنو الملك مابينزل لهل المستوى ..
بس البيك بينزل قد مابدو الحدا ...
حقيقة شي بيقطع القلب .. شب متل الوردة , قد ما هو حلو ..أختو بتعشقو ..!
منطلع هيك ... منقول ياحويلتو .
بالأول كنا نستغرب منو لتصرفاتو الشاذة كتير ... كتير
منعرفو شب آدمي زكرت ( ابن شارع ) ركيب موتوسكل ..
ألو كاس .. وسيكارة .. وخط ... ماشي عليه .
أجى حدا لعب بعقلو طوشو ....
لوقت ماصار يهجم ع الصغير والكبير والمقندق بالسرير .. أوف ...
سألنا اشبو البيك .. قالوا البيك ارتخت براغيه , وصار يحكي طالع نازل
شي بيسب شي بيهدد .. شي بيطلب من أمريكا تحتل سوريا .. ( بلـــــــــــــدي )
شي بيطلب يبعتو سيارات مفخخة .. (وقت اللي كان عم يمزح )
شي بيصير المدعي العام للمحكمة الدولية وبيعلق المشانق وبيشنق قبل ما تنعقد المحكمة ..
شو هل الملك النيروني .. آه ياوليد بيك .
صرت تحن لطعم الدم .. لأنك مدمنو منيح .. ايديك مهما نضفتن , رح يضل الدم عالق فين .
صدقني عم يكذب عليك حدا .. هذا إذا ماكان أكتر من حدا ..
عمين ساند ضهرك ... أطّلع وراك ...
مافي حدا
بقى حك راسك منيح ( انفضو ) وحسبا كويس
لأنو وقت الجد مافي حدا .. لحدا .
بقى صطفل ...!

صفوح شغالة
حلب
22/2/2008