الارشيف - قهوة صباحية

Pages: 1

قهوة صباحية
(انقر هنا ان احببت مشاهدة الموضوع الاصلي بالالوان و الصور )

Posted by: hosam danial

صباح الخير
ذايقة خلاقي وما قدرت نام باليل
ما بعرف ليش
فقت الساعة ثماني وجيت على الكمبيوتر
وشعلتو وحطيت الركوي على النار
بدكن تقولولي غسل وجهك اول شي
لاء أنا معي هالعادي بفيق فوراً بشعل
الكمبيوتر وبحط الركوي على النار وبعدين بغسل وجهي
هيك اسرع ..... ايه وين لاحقيني
المهم بلا طول سيرة قعدت أشرب قهوي على أخبار
العالم أي شو هالقهوي وشو الاخبار وشو هالصباحية
عالم عم تموت وعالم عم تتفجر وعالم مو عرفاني شو بدها تسوي
وجورج بوش عم يتسلى بالبشر وبرتني سبيرز جاني
أي اكيد بدها تجن والله شي بجنن
خلصنا أول فنجان (على فكرة انا بشرب ركوي كل صبح يعني 4-5 فناجين)
مو مليح بعرف بس هاي عادتي.
المهم خلصنا من اخبار العالم وجينا على اخبار المنتدى الغالي
طلع نفس الشي طلال مدري شبو والعم سليمان ذايقا خلاقو وعبد الله مدر شو عامل
ولك ليش هيك عاملين بحالكن
يالله المهم الصحة
صحة!!!!! منين بدها تجي الصحة
لسع هلق كنا عم نقول اخبار بتفزع وبتجيب الجلطة
يالله كل واحد الو يومو
وما بيحصل غير الخير انشالله
خير !!!! ومنين بدو يجي الخير
أذا جنبلاط متنح وموعارف وين بدو يروح
وجورج بوش بدو يخلص على كم دولة قبل ما تخلص رئاسته
والبترول غالي المعيشي على العن والعن
لعما انا ليش هيك عم نكدها عليي وعليكن
لاء وعم أكتب بالعامية البحته
طيب بلكي شي حدا من هالاعضاء ما بيحكي صدي
كيف رح يفهم عليي
على أساس اذا حكيت بالفصحة رح يفهم عليي
بعين الله
انا فصحة ما بعرف
اي انا بفحص العربي بالكفاءة
بدي حط شاهد شعري على موضوع عن الام
حطيت
الام مدرسةً إذا اعدتها اعدت مدناً لا عماد لها
ولك ونجحوني كيف ما بعر ف
على كل حال صباح الخير
والخير موجود وكلشي و هالمنتدى بالف خير

Posted by: love whisper

الخير موجود بس وين صايرة اراضي الله اعلم

يعني ماحدا فاضي يدور عليه

ئال كل واحد بدو ينسى همو ئوم بيستلملك التلفزيون وبينزل بالمسلسلات والافلام
كانو عم يستفادو شي او يمكنن ناطرين الدعايات لتطلع مشان يتصببو على بنات وشباب
الاعلانات
بيملو من التلفزيون بيروحو للئيل والئال
النسوان على نئل حكي وشعر هي ولبس هديك وطبخ مابعرف مين و...
والرجال عاملين فيها محللين سياسين وكل واحد يابعدي بيفهم اكتر من مجلس شعب بحالو

عيشة جنان مابحب القهوة ومع هيك بنجبر اشربها فنجان يوميا لراعي الوضع
درنا عالاركيلة مشان تفتل معنا وننسى نحنا وين ومين ئام متل الحشاشين ماعد همنا
رحنا عالمتة لنضيع هالوئت الثمين يلي عنا مااستفدنا شي
حالة بتشيب يعني من وين بدنا نجيبها مابعرف
بنجي يمين بتنطلنا شمال وبعدين الله اعلم لوين ماشين

Posted by: sulieman safar

ولك حسام انت واحد ما بعرف شو بدي قول عنك
البركي دماتك خفاف وروحك مرحة وطريقتك في الكتابة حلوي
الى درجة انو بدي صير اكتب مثلك.
صدقاً شعرت اني معك في ذاك الصباح ولذلك مرا ثانية حسوب حسابي
بفنجان قهوي معك عند الصباح.
ولك احلا فنجان قهوي صباحاً ومسائاً ومحبتي.
سليمان

Posted by: wajdy barakat

اااااااااااااااااااخ منك يا حسام سوفتني فوق ماني سايف واني بعتقد انك كنتبقمة الملل وقت كتابة هالمقال الطالع معك كثير حلو وبشد الواحد والاكيد هاذ هوي اسلوبك اللي بعرفو ما تغير ..........انشالله الصباحية الجاي بتكون الامور وامورك احسن بكثير ههههه

Posted by: samar dahi

اهلين حسام ...صباح الخير ومية هلا بهالعين ....
ولك يا حسام اربع او خمس فناجين قهوة ....؟؟؟؟؟؟؟؟؟؟؟؟!!!!!!!!اي شو هاد ما عندكم متي يعني ...
روق يا عمي وطول بالك ...القصة ما مستاهلي كل هالشي .........
الأخبار حلوة وبتجنن وحياتنا احلى واحلى ....وشو بدنا نحكي ........
ابقى فيق الصبح وشراب متي وروح على شغلك بدون لا أخبار ولا غيرو ...هيك بضل نهارك احلى وازبط .....اسمع مني ....وانا اكبر منك ومعلمتك وبعرف اكثر منك .....اوكي

Posted by: فاروق القدومي

والله يا صديقي العزيز ضرر القهوة اكبر مما تتصور خاصة شربها بكثرة....بنصحك تشرب كاسة حليب مع حبتين تمر وياااااااه لو كان في ملعقة عسل بدل السكر وشوف الفائدة...أما في المساء فنجان قهوة مع ارجيلة وما تثني قهوة**

*قدومي*

Posted by: mario

مثل ما دوم بتقلي ع القهوات يعني عندك اياها الصبح احسن من النترنت هاي يعني حب كبير و بالنسبة للحياة ترا مثل ما قالولك يعني الحياة حلوة بس نفهمها الحياة غنوة محلا انغامها و الشغلي بسطة يعني يعني دوم حاول تمشي عالكوع الجالس و اشتمل تغريب بتعمل يمين عالكوع اليسار بتمشي بهالمطر الغزير و الدني حراقي بهالنص كم و هالسترة اللابسهي بتمشي بتمشي يتمشي يعني شي مترين بتوصل و بتكون اسع ما بلشت المشي ...............الخ فالحياة حلةي يعني اسهل من هاشي هاذ فشوف ما احلاها

Posted by: hosam danial

من جديد صباح الخير
حطينا القهوي وقعدنا على الكمبيوتر
(مو على الكمبيوتر على الكرسي)
وكالعادي منشوف الاخبار اللي
بتمقت وبتكرهك حياتك
بس هالمرة حبيت اني
حط شي غنية لفيروز
عم دور على غنية من الانترنيت
لقيت موقع حاطط اغاني لكل البلدان
وفي مطرب طلع بطريقي اسمو
شعبان عبد الرحيم( شعبولا)
اي يا تقربني ... لاء وحاطينوا
مع مجموعة أغاني مصرية
يعني مع ام كلثوم وعبد الحليم
قعدت اسمع شوي لاغانيه
اي يا محلى علي الديك
بلى طول سيري
رجعنا على المنتدى الغالي
لاحظة ملاحظة انو صاير كل
واحد بيحط موضوع وحزيرة تحتو
واذا حزر الواحد بيطلعلو جائزي
شو القصة يعني ما عاد نشارك
بهالمنتدى بلا جوائز
على كل حال وين مارحت وين
لفيت ما رح لاقي احلى من زيدل ومنتدى زيدل
وصباح الخير لاحلى اعضاء منتدى زيدل

Posted by: abode durra

اي صباح الخير حسام يعني زودتنهي اربع خمس فناجين
يازلمي عا ايش هالقد مكثرهن
صحي عم تعمل قهوة عربية و لا اميركانية هههه
اذا اميركانية نص مصيبة
بس اذا عربية الله يعين
عمي برايي تحول عالشاي و احسن من القهوي

يا عمي هالمنتدى اشو بدي قلك شغلي
يعني من وين بدك اتبلش
ما بتعرف وين تقرا على وين ترد
و تعا قرا و روح رد
و ضل على الحالة شي ساعتين
اما الخبار يا ويللي
كل يوم بيطلعولك بخير ازفت من الثاني
صاير دورلك على شي خبر اختراع او اكتشاف
ولك ماضل منهن كل اسبوعين شي مرة واحد
هيك بيمر على جنب
هيك هيك ما بتحس فيه غير جاك واحد

بيعمي القلب

اي روحوا عنا يا (مع الاحترام)
ما ضل للواحد غير انو يطفي الراديو التلفزيون
ويحجب مواقع الاخبار لحتى يتهني
بالعيشة

بس بيضل هلأ موسم عياد كل عام و انتو بخير
والواحد لازم يروق و يتمنى تصير الامور احسن

تحياتي

Posted by: silva

صحتين القهوة حلوة كل صباح من كل الانواع واذا بتعزمنا خليها بلا سكر افضل بعد كم سنة بتشوف القهوة المرة أطيب والف الف صحة برأي أجل سماع الاجبار لبعد الظهر وبعد القهوة والعمل اقتراح بتمنى يعجبك اكثر

موقع زيدل سوريا حمص .. خدمات تشات و دردشة ... أرشيف المنتدى