اول شي حسام استغربت كثير انو انتي تكتب هيك موضوع وكنت ناويي ماعلق او اكتب رد لأنو بعرف انو ممكن, لاء اكيد كانت ذايقة خلاقك شوي ومشتاق للضيعة وأفكار عم تاخذك وأفكار عم تجيبك وقت كتبت وأني مالمتك بالبداية. بس, الموضوع صار يولد نعرة اقليمية بالمنتدى بين الأعضاء الزيادلة والأعضاء اللي من برات زيدل وهون لازم ذكركن بشغلي زغيري خصوصي الأعضاء اللي برات زيدل وعلى فكرة لحد هاللحظة عدد الأعضاء الكامل بالموقع هوي 7125 عضو. بغير منتديات وأغلبها وقت شي شخص جديد بدو يسجل بدو ينتظر فترة غير محددة حتى يتم تفعيل عضويتو وبتصور بكون في قيود وقوانين للمشاركات ولو انو هالقوانين موجودة بمنتدى زيدل كان هالموضوع حاليا محذوف بس بالمنتدى في شي اسمو ديمقراطية حتى للأعضاء الجداد, يعني مثلا الزميل معنا بالمنتدى دريم نايت ماصرلو بالمنتدى 3 شهور ومع هيك انتقد "ربعك" اللي هني جماعة زيدل ومع هيك حس انو عندو حرية للتعبير عن رأيو وهاذ حقو مووووووووو؟؟؟ اي فيني نقول حقو وفيني نقول انو في حدود وطبعا هاذ مثال زغير وبسيط. وحبيت اذكر كم نقطة لو سمحتو:
هادي, بالفعل اني بتذكر انو مرت فترة كل يوم خبرية جديدة وكل يوم عدة مشاركات إلك معني وهالشي مشكور كثير عليه لانو عملت حالة نشاط بالمنتدى مع العلم انو كنت جديد معني بس بدي وضحلك نقطة حتى مايصير في التباس أو تزعل من عدم المشاركة بمواضيعك. انتي بتعرف تماما انو اغلب مواضيعك كانت اخبار منقولة وهالشي بيعني انو نسبة القراءة رح تكون 90% بينما نسبة الرد كتابة مارح يوصل 10% في حال كل الأشخاص اللي عم يفوتو عالمنتدى قروا مواضيعك, هالشي مابيعني عدم الاكتراث بمواضيعك بس طبيعة الموضوع بتفرض عدد الردود وتأكد تماما انو تمت قراءة هالمواضيع من رواد المنتدى الدائمين مو من اللي بمرو مرور الكرام لهيك كمان بجوز يكون عدد القراءات قليل نسبيا بالنسبة لغير مواضيع ورح اعطيك مثال زغير. أني مثلا بتجنب انو فوت على منتدى الشعر ومابفوت الا اذا شي قصيدة اخذت ضجة كبيرة مع العلم انو صرلي من سنة 2003 بالمنتدى وكمان هاي ازواق من الناس وكل مين بحب قسم بفوت عليه . لهيك مالازم تاخذ على خاطرك كثير لأنو بفترة قياسية صار عندك عدد مشاركات يمكن أكثر من اللي كتبتهن اني بخمس سنين.
بنت القمر, لهلأ بعدني عم فكر بموضوعك اللي كتبتي من فترة قصيرة "هل تستسلم وتشرب الكأس" حلو كثير وعمل جدل كبير بين الأعضاء وكل مين فهم الموضوع بطريقة مختلفة, اني برأيي هالموضوع كوم وكل شي كتبتي من قبل كوم ثاني وهالشي مابقلل ابدا من مشاركات السابقة بس كل عضو معني بيكتب شي بخلي بصمتو على صفحات المنتدى وبخلينا نتذكرو دائما وانتي هلأ خلص صرتي من أهل البيت.
ياجماعة كل مين بيكتب ولو كلمتين زغار بموضوع بمنتدى زيدل خلص صار من اهل المنتدى سواء شاركنا بمناسباتو او لاء, سواء الكل عرفو او لاء.
اني مابتصور انو بكون عند اي شخص بيكتب بهالموقع فكرة انو بقية الأعضاء يعايدو مثلا بعيد ميلادو وقت بدو يسجل لانو بتصور قبل ماتسجلو بهالموقع كنتو قراء وتتابعو كل المشاركات وبتعرفو تماما طبيعة الاهداءات اللي بتصير واني ماني عرفاني ليش هيك مزعوجين, فيكن تقولو انتي شو صاير عليكي كل سنة بعايدوكي بعيد ميلادك...اي ممكن وممكن لاء لأنو في سنين بتقطع بدون ما نعايد شخص معين الو دور كبير معني بالموقع فهالشي مابيعني انو يزعل ويفتكر انو المعايدي لناس وناس وماتتصورو انو باب المعايدات رح يتسكر من ورا هالشي او لأي سبب كان.
بعدين لمين عم تنكتب المعايدات, يا أما لأعضاء كانو مؤسسين لهالموقع "ونسيت اذا بعدني عم نعايد الريس وسام بعيد ميلادو حتى ولو وقتو ماعم يسمحلو يتواجد معني" واذا ماعم نعايدو بكون معو الحق انو يسكر هالموقع نهائيا, معايدات لمشرفين كمان عم يتابعو وضع المنتديات "المشرفين القدام", لأعضاء صرلهن سنين سنين من سنة اللي بلش المنتدى وكانو اعضاؤو اقل من مية وهلأ صارو بالألفات.....لأعضاء عارفين مين هني اصلا وناس ممكن نكون قضيني معهن سنين على مقاعد الدراسي, ناس كانو المربين بالتعليم المسيحي واللي قضينا معهن ايام مابتنسى....معلمين درسونا بيوم من الأيام.... أقارب أصدقاء وفيني عدلكن من اليوم لبكرا.......
دريم نايت, سبق وذكرت اني بموضوع سابق انو وقت بينفتح موضوع بيحكي مشاكل زيدل او حالة معينة بالضيعة مابتصور انو اللي برات زيدل رح يقدرو يناقشو "مو لأنو مابيعرفو يردو, لاء" لانو بكل بساطة ماعاشو بالضيعة ولا بيعرفو شو ممكن تكون الصورة او الحالة واذا رح ينتقدو مثلا مارح نقدر نتقبل الانتقاد لأنو كمان مثل ماعم عيد كل مرة هني ماعارفين شو هيي زيدل وهالشي مابيزعل ابدا.
انتن بتعرفو تماما انو القصة مانها بين السطور,
موووووووو؟؟؟ القصة واضحة جدا وحسام مواس انتي من الشباب الطيبي اللي متفاجأة ممكن يزعل من عدم مشاركتنا الو بعيد ميلادو....خذها مني بروح اخوية مشان مايصير سوء تفاهم, بس اللي كتبتو عمل مثل مانك شايف حالة من النزعات الاقليمية بالمنتدى وطلعو اللي صارو من اهل البيت بعدهن حاسين حالهن اغراب وأهل البيت نفسهن اللي استقبلو هالناس عم يأكدولهن هالشي وعلى فكرة وقت انتي ياحسام ابن زيدل سجلت معني بالمنتدى من سنة تقريبا, نحني ماعم نعتبرك من اللي بدني نرحب فيهن انتي وغيرك من ولاد زيدل وقت بتسجلو معني بتفوتو وبتصيرو بتستقبلو اللي عم يفوتو جديد وليك من هلأ عم خبرك ماتنتظر من اهل المنتدى أي تهنئة لحتى تجي بنت الحلال ووقتها رح نهنيك من كل قلبني وفيك تعتبر كلامي بهذلي بس كمان اخت من زيدل
لأخوها من زيدل.
مع حبي واحترامي
رشاعواد
عزيزي
أنت عم تجاوبك حالك بحالك و عذرني عم تناقد حالك بحالك
{{ عندما قلت أنك أجيت على أمريكا و حسيت إني رجعت شوي لأيام خالي }}
هذا يعني أن كل شبابنا في أمريكا مثل حالتك و بظن صار عنهم عذر لعدم مشاركتهم الفعالة لكثرة شغلهم و ساعات عملهم الطويلة و الي أنا شخصياً بحسدك أن عم تفوت و تشارك كثير بالمنتدى و بأوقات مختلفة من النهار ، هاذ الشيئ محرومين منو باقي الشباب في أمريكا .
{{ أنت قلت حسيت شيئ يوم أنك وحيد و انت عايش بمجتمع يتكلم عن قيم و مبادئ و محبة وصدق وتعارف وترحيب بالضيوف ؟؟؟ }}
زيدل و اهلها مثل ماوصفتهم انت بالظبط ، بس أنك تحس أنك وحيد هاي إسمحلي فيها شوي ، يمكن أنا شفت بعرسي و صدقني تفاجئت وفرحت فيك لأني بعرفك بأمريكا و مالي خبر أنك جيت على سوريا و كان شرف إنك تكون من الموجودين بعرسي و أنت قمت بالواجب مثلك مثل شباب العريس والجميع شارك معك و شلة الانترنت التي كانت في عرسي أيضاً قامو بالواجب لنهم تواجدوا في هذا الوقت. و صدقني هاي مرح مرقها هيك سوف انتظر الوقت المناسب لأرد الجميل لك .
و أظنني رأيتك في القرية و كيف كنت تمضي وقتك بصحبة الأحبة و الأصدقاء و لا أظن أنك تذمرت من زيارتك لزيدل و أصدقائك و لاأظنك أيضاً كنت تنتظر أن يأتي أخرون لاتعرفهم ليسلموا عليك كونك مغترب و عاد للوطن ، فهذا الشيئ كان منذ القدم عندما كان المغتربون قليلين و لاكان يوجد وسيلة إتصال لا تلفون و لا أنترنت و لا رسائل و أما الان فأصبح عدد المغتربين أكثر من أجهزة التلفونات في القرية .
{{ قصتك عن الشخص المسيحي الذي يسكن بعيد عن الضيعة }}
نحنوا من قرية بادو قرب المشرفة و سكنا في قرية زيدل منذ أكثر من 35 سنة و خلال هذه السنوات لم يأتي أحد من هاتان القريتان لكي يعايدنا و لكنهم كانوا يأتون وقت تسليم العنب لمصنع زيدل و كنا نقوم بواجبهم . هذا لايعني أن نأخذ موقف منهم أو لانستقبلهم و أن نعاملهم بالمثل ففي النهاية كل مين يعمل بأصلو .
أنا شخصياً عندما أذهب لسوريا أقوم بزيارة جميع معارفي و أصدقائي و أحبتي لأنني أنا فرد و هم جماعة يعني بيوم أو يومين تقوم بزيارة الكل و لكنك تحتاج لأسبوع لتبقى في المنزل لكي تنتظر قدوم الكل و الذي تاخر بسبب عمله أو وظيفته أو بخ العرايس او نزل البطاطا على السوق .
{{ أنت قلت شفت كيف الترحيب بالأعضاء الجدد ماله حدود و ردود على ناس و ناس ... وكنت منتظر كلمة كل عام و انت بخير ياعضو }}
قال السيد المسيح
هل يستطيع بنو العرس أن ينوحوا مادام العريس معهم؟ ولكن ستأتي أيام حين يرفع العريس عنهم فحينئذ يصومون
يمكن وقت الي غاب أعضاء فعالين مثل الأخ جورج دعبول عن المشاركة و الحضور للمنتدى قامت الدنيا و قعدت و لكنهم أيضاً وقت الي كانو موجودين كانوا يشاركون و أظنهم لم يكونوا ينتظروا ردود جميع المسجلين في المنتدى و نعود لظروف كل واحد منهم و أنا أضم رأي لعبدالله بأنه إذا الموضوع لم يكن ذو فائدة لي شخصياً و ردي لم يكن في محله لا أشارك فيه مهما كان الذي كتبه و لأن أشارك فقط لتكثير عدد مشاركاتي أو لأشجع الكتاب الجدد على المثابرة لأنه يا عزيزي أدباء و كتاب و عظماء التاريخ أصبحوا و صاروا من خلال نقد الأخرين و عدم إكتراث الأخرين لهم دفعهم لبذل أقصى المجهود للإستمرار بقوى و إظهار النجاح و ليس اليأس و الأحبط كما ذكرته أنت .
لاكرامة لنبي في وطنه ربما السيد المسيح إنطلق من خلال هذه الكلمة ليبشر بالبشرة لمن يقبل كلمته .
نحنوا كمغتربين نشعر بالوحدة و الإشتياق للوطن أو للقرية أو لأشخاص ربما يعوضوننا عما نفقده في غربتنا و موقع زيدل عوضنا عن تلك الأشياء و شكراً لكل من يشارك و يساهم دون ذكر أسماء .
طلال سليمان الأشقر
بروكسل – بلجيكا
27/01/2008
.
