الارشيف - فحص الجنسين قبل الزواج

Pages: 1

فحص الجنسين قبل الزواج
(انقر هنا ان احببت مشاهدة الموضوع الاصلي بالالوان و الصور )

Posted by: hosam danial

أولاً بدي أكتب شي محيرني
ونقاش صار بيني وبين أحد الكهنة (ومن أقربائي)
وأحتد النقاش وأنا ماني مقتنع
بقى ما تاخذوا حكيي انو صح أو خطأ
بي تم أسمو منتدى للحوار

كنا فاتحين موضوع أنا وأحد الكهني وعنا بالبيت
والموضوع عن الطلاق الي عم يصير كثير بهالايام
وهالكاهن عم يجيه كثير أحوال طلاق
سألته شو الاسباب لهلطلاق
المفروض انو تعرفوا كل حالي
قلي : نعم ونحنا منسأل ومن حاول نصالح

أوكي
وشو هيي أكثر الحالات؟

قال : أنو الزوجة ما بتجيب ولاد
قلتلو طبعاً بيكون طلب الطلاق من الزوج
طيب أذا الرجل ما بيجيب ولاد الزوجة بتطلب الطلاق
قلي ما جتني هالحالي

ضربت بمخي هالسالفي
قلتو شو الحل:
قلي المفروض أنو الزوجين يعملو فحص قبل الزواج من شان هيك قصة
أنا الحقيقة نمل جسمي
وخصوصاً وقت قلي: أنو البابا وجميع المؤسسات الدينية عم تطالب
بهالشي

قلتلو : يعني أذا أثنين مرتبطين صلهن شي 5 سنين وعملوا الفحص
وطلعت البنت ما بتجيب ولاد بيدشروا بعض
وين صفى الايمان بالحب وين صارت تعاليم يسوع
عن سر الزواج

طيب أذا الرجل هو الي ماطلع بيجيب ولاد بالفحص ؟؟؟؟
أنا متأكد انو خطيبتو ما بتشرو
ليش الرجل اناني لهل درجي

قلي طول بالك ليش هيك أحتديت
قلتلوا لانكن عم تطالبوا تكون العلاقة الزوجية او علاقة هالحب مصلحة بمصلحة
يعني أذا بتجيبيلي ولاد بتجوزك ما بتجيبي ما باخذك
وبيخلي هالانساني كل عمرها عايشي
بلا قلب لحتى تموت
اول شي حزناً على فراق هالحبيب
ثاني فقدان الامل بالاطفال
بدال ما رؤساء هالكهني يقولوا انو نحنا لازم نهتدي
بأقوال يسوع وتعاليمه ومعجزاته
وأخر شي قلتله أنو أنا سمعان كثير قصص
أنو زوجات او أزواج ما بيجيهن ولاد
وبعدين بأمر الله ويسوع
وأعاجيبهن أنجبوا

بقى شو رايكن صح ولا خطأ
فحص الجنسي
وهل يحق للرجل الطلاق بهيك حالي

وشكراً

تقبلو تحياتي
حسام & ريما

Posted by: tony daboul 21

والله ياحسام فعلا هالمشكلي كبيري بهالأيام ,
بس ليك حتى لو كلنت المرأة او الرجل مابيقدروا يجيبوا ولاد فهذا مالازم يمنع ابدا تتابع علاقتهم الزوجية
ومالازم توصل الأمور بيناتهم للطلاق , لأنو السيد المسيح ماأظن أنو بيوافق عىل هيك شغلي .
بعدين بهالأيام تتطور العلم وصار يقدر يحل أكبر المشاكل وخاصة مشكلة العقم عند أحد الزوجين وصار الها كثير حلول .
وهذا رأيي بالموضوع . ويمكن انا صغير على هيك نقاش وحابب أسمع خبرة الأكبر مني ياجماعة , وانا بالانتظار .
&&&TiTo&&&

Posted by: Nada1981

مرحبا جميعا

شكرا حسام على الموضوع و بصراحة كتير عم نسمع هيك قصص الايام هي و خاصة حالات الطلاق الي عم تصير بسبب الانجاب.

انا رح احكي عن نفسي بما انه حضرتي لسى ما تزوجت ( بعد الشر عني )

انا بشوف انه حرام ينعمل هيك فحص قبل الزواج حتى لو الكنيسة رح تتطالب فيه. كل حياتنا بنتكل على الله بهيك مواضيع و بنقول مافي شي صعب على ارادة الله و كلشي قسمة و نصيب.

مثل ماذكرت حسام المثل انه اثنين بيحبو بعض و بعدين بيعملو الفحص هدا و بيطلع حدا منهم عنده مشكلة وقتها كل مصير حياتهم رح يتغير. بس بهيك حالة انا بقول انه المرأة رح تكون كتييييير عاطفية بقرارها اكتر من الرجال. مثل ماكلنا بنعرف انه المرأة لمى بتحب, بتحب من كل قلبها و مستعدة تستغني عن اي شي منشان الي بتحبه. اما الرجال حتى لو كان بيحبها اكتر ماهي بتحبه رح يقول لحاله بدي ولد يحمل اسمي بلمستقبل. اما اذا كانت العلاقة فعلا قوية و مستعدين الاثنين انهم ياخدو القصة هي بمحمل التجربة من عند الله او يختارو طريق التبني مثل كتير عالم وقتها بيكون القرار هدا سليم بمعدل 50% بس, لانه في حالات كتيرة سمعنا عنها انه الاثنين اختارو يضلو مع بعض على الحلوة و المرة بس بعدين صار في تراجع من احد الطرفين و ابتدأت شغلة التعيير بعدم الانجاب و بلشة المشاكل و وصلت للطلاق.

لهيك من الاخير انا ضد فكرة الفحص قبل الزواج ونخلي كلشي بأيد الله.

حسام مافي حل غير انه نعمل مثل الأجانب و نتزوج بعد ما نخلف هيك بنكون ضمنا الاولاد من دون فحص ههههههههههههه

تحياتي و شكرا على الموضوع

ندى

Posted by: wajdy barakat

والله يا حسااااااااااااام اللي ما بيجي ولاد بهالايام احسن بيعيش مرتاح وما شايل حم حدي ......اكيد عم امزح بس فكرة الفحص قبل الزواج مو غلط واذا الاثنين حابين بعض بعتقد شو ما كانت النتيجة بيستمرو وبيعرفو على اي اساس رح يكملو المشوار.........بعدين انا شخصيا مع فكرة التبني بهيك حالي وخصوصا انو في كثير ولاد تتبناها وعمرهي ايام والاهل هني اللي بربو مو اللي بخلفو......وما جمعهو الله لا يفرقهو انسان

Posted by: syria & joleat

طبعا حسام رأي متل رأيك ومتل رأي ندى .... لأنو إذا البنت كانت بتحب واحد وتخلى عنها بسبب نتيجة هادا التحليل رح تحس حالها سلعة او وسيلة انجاب مو اكتر ... بعدين الرجال حبو للحبيبة لازم يكون اقوى من حبو للولاد لانو هي السبب بتواجد هالولاد وبعدين متل ما قالت ندى والاخ وجدي في تبني...
وبما انو انا مسلمة احنا عنا ما بيعملو هالفحص ولا شي لأنو اول ما يعرف انها ما بتجيب ولاد بيطقها جوازة فوقها وماحدا بيقلو شي على اساس الله محلل وهو بدو ولد ... اما المرة اذا كان زوجها ما بيجيب بتسكت وبترضى بيلي كاتبو الله ....
فكرة الطلاق او التحليل قبل الزواج او الزواج بأخرى مشان الأولاد برأيي غلط .....
ولازم ما ننسى انو الله بيكون يلي رايد هالشي مو المرأة اوالرجل

سلام _ ياسمين _

Posted by: merellaa

وبعد غياب كتير طويل عن المنتدى والمشاركة بالنقاشات حبيت فكرة الموضوع حسام لاسباب معينة

هلق شو رأي بالموضوع ممممممممممممم الكنيسة كل يلي عم تعملو بهيك قرار أنها عم تماشي العقل البشري اللي صاير محدود يعني الكنيسة عم يجيها عدد هائل من الناس يلي بدها تطلق بسبب عدم انجاب أحد الطرفين فالطريقة يلي لا قوها ليحدوا من هالشي وليسايروا هالبشر أنو يعملوا متل هيك فحص .. أنا ما بلومون لانو كتير صار قليل الناس يلي بتاخد بعضها لانها واثقة من بعضها بتحب بتتقبل بتعيش كرمال الطرف الاخر ... هالايام يا حسام ويمكن قبل هالايام ... البنت قاعدة لتنطر عريس معو مادة كبيرة وابن عيلة كرمال امها تنفش ريشها قدام نساوين الحارة والعكس صحيح انو الرجال بيدور عبنت حلوة تزينلو بيتو ليقولوا نيالو على هيك بنت وبالنهاية ما بيكون هالزواج مبني على اجتماعون تنيناتون بالعكس بيكون مبني على اشيا تانية واحداها ولد كرمال حماة البنت ترفع راسها بابن ابنها واذا البنت ما بتجيب ولاد الحماية اول مين بتتطالب ابنها بالطلاق وطبعا شبابنا كلام المامية اهم من اي شي اما لما ابنها بيكون يلي ما بيجيب ولاد ما بتفتح تمها بالعكس بتطالب البنت انها تتحمل هالشي كرمال ابنها لانو بيستاهل

يعني يلي بقولو انو الناس صايرة ممممممممممم مو شبه مادية اكتر من هيك واللي بيفكر بالانسان التاني كانسان وبيتقبلو بكلشي كتير قلال كتير .... يمكن خوفا من حكي المجتمع يلي ما بيرحم ... خوفا من حمل الاسم ... خوفا خوفا خوفا عدة اسباب

أنا ما بقبل أعمل هيك فحص لو شو ما صار بس ما بنكر أنو رأي الكنسية صح مليون بالمية لناس زواجون مبني اساسا بطريقة فاشلة ... و عم يتعكزوا عموضوع الولاد ليكمل هالزواج ...

سلام الرب

Posted by: ziad sattah

المال و البنون زينة الحياة الدّنيا
إن كنت َ عزيزي القارئ أمام خَيارين سيّئين لا ثالث لهما فأيّ القرارين تختار ؟؟؟
هل تخالف قلبك ( الآن ) أمْ تخالف ربّك ( لاحقا ً ) ؟
بالأساس , هل الطّلاق لهكذا سبب هو مُحلَّل ٌ كنسيا ً ؟
و السؤال الأهم : هل الكنيسة ستمنع الطرفين عن الزواج في حال كانت نتيجة التحليل سلبية ( عدم انجاب ) ؟
و سؤال مهم أيضا ً : ألن يخف ّ الطلاق لهذا السبب بعد هذا الحل ؟ ( إن كان الجواب: نعم, فقد اكتفيت).

Posted by: mariam

بالبداية رح اعتذر من الكنيسة انها مابيجوز تفكر بهيك فحص 00ثانيا بدي اعتذر من الشباب لاني مارح ناقش الموضوع بمنتدى روحي 000رح حاول اعمل موضوع بالمنتدى الطبي عن اسباب العقم لانو وجود مشكلة عند الزوج او الزوجة مو هوي كل الاسباب 000حتى وجود مشكلة عند احد الزوجين لايمكن لاجراء فحص عادي انو يكشفها 000يعني هاذ الفحص يمكن بيفيد اذا اجري عند الرجال فقط 000لكشف حالات انعدام النطاف 000بس كشف سبب العقم عند المراة موضوع صعب جدا 000خاصة بوجود حالات عقم عند زوجين سليمين 00000لهيك بتصوري هيك اجراء لايمكن الالتزام فيه واعتبار عدم الحصول عليه مخالف لقانون الزواج الكنسي 000ضرب من الخيال المريض

Posted by: الألماسي

.
..
...

نقاط النقاش..

حالات طلاق متزايده بسبب عدم الإنجاب..

حل مقترح للتقليل من حالات الطلاق إجراء فحص قبل الزواج..

رفض البعض لهذا الحل لأنه سيتسبب في الفرقه و هدم العلاقات و تأكيد

الإعتبارات بأن المرأه فقط للإنجاب..

.
.
.

تساؤل..

أليس من الأفضل أن تكون الفرقه مبكره بناءا على قناعة كل من الطرفين

قبل الدخول في مرحلة الإرتباط الشرعي و سيكون للعاطفه في ذلك الوقت

القدره على الفصل في هذا الأمر بتضحية أحد الطرفين أو كلاهما بقبول الحياة

دون إنجاب من عدمها..

و عليه ستكون الأمور واضحه و منذ البدايه و سيكون القرار أقل تأثيرا في النفس

من أن يكون في مرحلة مابعد الزواج و بعد أن يضطر الطرفين لإكتشاف أمر عجز

أحدهما عن الإنجاب و الدخول في متاهة البقاء أو الإنفصال..

نستطيع أن نقول أن مساحة الوجود العاطفي قادره على إستيعاب مثل هذه الأمور

و الإسهام في خلق القرارات التي ستضمن سلامة الحياة في ظل وجود مثل هذه

المشكله و إكتشافها مبكرا..

و إجراء الكشف الطبي للتأكد من جاهزية الطرفين للإنجاب أمر إيجابي بكل ماله من

أبعاد ، و أقل مايمكن إحتسابه من مصالح في الكشف هو الإطلاع على حقيقة

مكانة كل من الطرفين لدى الآخر و ماتقرره أمام تلك النتيجه في وقت مبكر..

و مادامت الفرقه واقعه في كل الأحوال فلتكن من البدايه كحل أفضل..

.
.
.

و اذا كان للرجل الحق في إتخاذ قرار الإنفصال في حال إكتشافه عجز زوجته عن الإنجاب

فإن المرأه لها الحق أيضا بالمطالبه بالإنفصال في حال كانت المشكله في الزوج و قد حدثت

حالات كثيره حصلت فيها الزوجه على هذا الحق..

و إن كان هناك من بقيت دون المطالبه بهذا الحق فهو عن رضاء منها و قناعه بما كُتب لها

و لا يمكن عد ذلك من التسلط أو هضم حق المرأه في مثل هذه الأحوال..

.
.
.

قبل مايقارب الأربع سنوات أُلزم جميع الراغبين بالزواج في السعوديه بإجراء فحص طبي

شامل للطرفين للتقليل من إحتمالات الإصابه بالأمراض الوراثيه و تلافي مايستطاع من

المشاكل الصحيه للزوجين و للأبناء..

و تبقى المشيئه الإلهيه هي مايحكم حقيقة هذه الأمور و ليس للإنسان الا إتباع الأسباب..

ماورد سابقا رأي شخصي مع إحترامي لكل مايراه الآخرين..

شكري و تقديري للأخ hosam danial..

و لكل المشاركين في هذا الموضوع..
...
..
.

Posted by: hosam abdulaziz

اولا انا بايد الدكتورة بموضوع استحالة كشف العقم بمجرد فحص عابر
و ياما سمعنا عن حالات عدم انجاب عند زوجين سليمين 100%

و عن حالات انجاب بعد عقم 15 سنة

ثاني نقة انا من الناس اللي برفض هيك فحوصات لأنه نتيجتها ما رح تأثر عقراري بالارتباط مع شخص احببته مدى العمر

و بالمناسبة بسوريا كل واحد منا مجبور يجيب تقرير طبي ليتسجل زواجه بس , هالفحص شكلي (هات ايدك و لحقني)

Posted by: RUSHA AWAD

هلأ أني مارح اعطي رأيي بهيك موضوع لعدة اسباب. بس بتصور بالنسبة لموقف الكنيسة, الكنيسة او المسؤولين عن وضع قوانين الكنيسة بيعرفو انو طبيا مو ممكن يتم الكشف عن العقم بسهولة وأغلب التحاليل ممكن تعطي نتيجة ايجابية بس بالأيام مابصير انجاب بين الزوجين لهيك بتصور انو هالقصة مثل
حاجز بيمنع الطرفين من الطلاق لانو اذا رح يحطو عدم الانجاب حجة رح تورجيهن الكنيسة انو انتن طبيا
ومن خلال تحاليل بتسبق الزواج ماتبين انكن مابتجيبو ولاد وهاي هيي الطريقة الوحيدة لتقليل حالات الطلاق هلأ عالغالب يكون تفسيري غلط بس مالقيت غير سبب.

مع حبي واحترامي
رشاعواد

Posted by: إنانا

جرت الحادثة أمامي منذ سنين مضت ولن أنساها ما حييت .. ربما السبب كان سوء الفهم من الأغلبية لمضمون الآية أو أن قساوة الكلام و جرح تلك المرأة هو ما آلمني و رسّخ ذلك في ذاكرتي..

بعد عقدين ونيّف من حياة الزوجية لم ينعم فيها الله عليهما بالبنين ، وبينما كان الحديث محتدّ حول تلك الفكرة ، قال لها : " ألم تسمعي ما قال السيّد المسيح أن الشجرة التي لا تثمر تقطع و تلقى في النار !!! "

آلمني جداً ما قاله قبل أن يؤلمها ، فجهله عن مغزى و قصد السيد المسيح من قوله تلك الآية( عن ضرورة اقتران الإيمان بالأعمال وأن الإيمان من دون أعمال ميّت ... ) يظهر في استخدامه الغبي للآية كشاهد في موضوع كهذا,...!!!

أما النقطة الأخرى التي أحزنتني هي معرفتي أن زواجهم كان خطيفة! أي أنها في ما مضى كانت قد حاربت أهلها و عالمها من أجله لتسمع منه يوما ما كلمة كهذه...؟؟

ربما تقدمت في الموضوع إلى ما بعد الزواج .. ولكن موضوعك أخ حسام نبش جدران ذاكرتي وأعاد ما حدث من أعوام كثيرة..

لم أجرّب الحب يوماً ..ولكني أعتقد أنك عندما تحب شخصا ً فإنك ستقدم راضيا ً باسم هذا الحب أسمى التضحيات ...( طبعا ً إن كان هذا الحب متبادل من الطرفين وعن قناعة تامة ...) وما رح ينسوا أنوا ( كل شيء مستطاع لدى الله ..)

وخاصة بوجود الحلول التي تحدثوا عنها الأخوة كالتبني وغيره ..بس أطرف حل كان من ندوش هيك بيحطوا أولادهم أشابين صغار وبيبدوا حياتهم ع المضمون...

و حسام صحيح على سيرة الأولاد ، بالنسبة للديك والجاجة والكماجة بالحفظ و الصون بس إجيتوا على سوريا ( أنت وريما ) رح وديلكم إياهن... (كونوا طلع لنا نفس الكتكوت ما شاء الله ) ...

تحياتي ومحبتي..

Posted by: talal_alachkar

ياشباب يعني الموضوع يمكن أخذ منحاً دينياً أو عاطفياً
الحقيقة أنا مع الذين فسروا أن الكنيسة وجد حلاً للحد من حالات الطلاق .
السيد المسيح قال عن موسى أنه قبل بالطلاق لقساوة قلوبكم .
لذلك لا أظن أنه لديكم إعتراض على الكنيسة بما أن رأس الكنيسة قال كلمة الحق .
يعني أصدقائي الله من يرزق و الله من يحرم و له في ذلك حكمة ليفهمها من له فهم .
أما بالنسبة للفحص
اخي حسام دانيال
أنا عندما بدأت بأوراق الزواج كان هنالك بند الفحص الطبي
ذهبنا أنا و العروس لنجري هذا الفحص و عندها سألت الدكتور عن سبب هذا الفحص .
قال لي الدكتور
إذا كان الزوجين بنفس زمرة الدم ذلك يسبب مشاكل في الحمل أو تشوهات في الجنين بسبب تشابه الجينات و زمر الدم
هذا هو السبب حسوم
من أجل حماية جيل المستقبل من أمراض و تشوهات خلقية .
شكرا

طلال

Posted by: hosam danial

شكراً لردودكم الواضحة
طبعاً كل واحد الو رأي
يا شباب أنا وقت طرحت الموضوع
كان القصد أعرف قرار الكنيسة بفحص الزوجين قبل الزواج
لسبب الطلاق وليس لغير اسباب
انا بعرف انو الفحص من شان الدم مهم وكثير
وهاي مو الكنيسة الي طرحت هالموضوع
العلم الي اتوصل لقرابت زمر الدم وتشوه الاطفال
هاذ شي مانا غشيمين عنو
انا كمان عملت فحص أنا وريما
بس برجع بقول انو الزوجين أو بالاحرى الخطيبين
ما في داعي يعملو الفحص من شان يتاكدو كنو
رح يجيهن ولاد ولا لاء
المهم العلاقة الي بيناتهن والمحبي
الي علمنا اياه الله
ومو ممكن يفرقهن عدم انجاب الاطفال
لانو هيك بيصير ظلملاحد الاطراف وهاذ شي
الله ما بيريدو
والله قادر على كل شي

Posted by: عبير طبيقي

سلام للجميع
برجع للسبب الرئيسي من طرح الموضوع :
شو اللي خلى الكنيسة تفكر بطلب إجراء فحص لإمكانية الانجاب قبل الزواج ؟

أكيد ياحسام لو ماعم بتكون الخسائر أكبر بحالات الطلاق اللي عم تتزايد بسبب عدم الانجاب ماكانت الكنيسة بتفكر بهيك موضوع ! .
*هلأ دايماً كل اتنين بياخدو بعضون عن حبّ بتكون أحلامون كبيرة وبيعتقد كل واحد فيهون أنو لو شو ما صار ماممكن يتخلّى عن الطرف التاني ,ووقت لاسمح الله وجدّ الجدّ واعترضت مشكلة الانجاب حياتون رح بيكون من السهل كتير التخلّي عن الطرف اللي ما بينجب واللي بتكون بأغلب الحالات المرأة
يعني الحب بينتهي ساعتا وبيبقى الهمّ الوحيد طفل بهالدني.

لهيك من الأفضل ينعمل الفحص لأن النتائج بتكون واضحة قدّام الاتنين والقرار بأنون يكفو سوى أو لأ بيكون مبني على قناعة تامّة وإدراك كامل ومسبق لطبيعة العلاقة اللي رح يكفّو فيها

وهيك الكنيسة بتتجنّب حالات الطلاق اللي عم تتزايد واللي عم تهدم حياة كتير
أشخاص.
" فما جمعه اللّه لا يفرقه انسان "

وآخــــرشي بقول لحسام
&الله يديم المحبة والتفاهم بينك وبين ريما كلّ العمر &

تحياتي

موقع زيدل سوريا حمص .. خدمات تشات و دردشة ... أرشيف المنتدى