الارشيف - لعنة الطبيعة فهمناها بس لعنة الكهرباء شو قتصتها ؟؟؟؟

Pages: 1

لعنة الطبيعة فهمناها بس لعنة الكهرباء شو قتصتها ؟؟؟؟
(انقر هنا ان احببت مشاهدة الموضوع الاصلي بالالوان و الصور )

Posted by: hosam abdulaziz

عمتمر المنطقة بمنخفض جوي قوي عميتسبب بانخفاض بدرجات الحراراة لمستويات لم تشهدها المنطقة منذ زمن و هالشيء عميجعل الاهالي تعاني بتدفئة المنازل و التنقلات و حتى تأمين المياه احيانا بسبب تجمد المياه في المواسير مما ادى الى انفجار او انسداد الكثير منها

و مما زاد في معاناة الناس هو الأنقطاع غير المبرر للكهرباء يوميا من حوالي 10 ايام
بمدة زمنية تتراوح بين 2,30 ساعة الى 3 ساعات(انا هلق عمبكتبلكم هالمشاركة على ضوء الشموع

)
و بيحكم عند غروب الشمس من الساعة 5 و حتى 7.30
و اسوء ما في الأمر انه تقاطع هالبرامج مع امتحانات النصف الأول للعام الدراسي مما ادى الى اضطراب في برنامج دراسة الكثير من الطلاب المجتهدين و اللي منهم مستعدين (تقنيا ) لهيك امر و خلاهم يلتجؤوا للشموع او السرج او اللوكس
و بلشنا كالعادة نحاول نجتهد بتفسير هيك امر من قبل الوزارة
انه بالصيف كانت الحجة تشغيل المكيفات او الاستهلاك الزائد فوق الطاقة بسبب ارتفاع ملحوظ بدرجات الحرارة
اما هلق الجو طواعين(يعني بارد جدا) و 90% من تدفئة الناس بتعتمد عالمازوت فشو المبرر للقطع
هلق في طرف آخر بيقول انه حتى المازوت صار سلعة نادرة و من الصعب تأمينه , مما دفع الكثيرين و خصوصي الميسورين اللي مركبين مكيفات التبريد
الى استخدامها بغرض التدفئة شتاءا و من المعروف انه التدفئة بتستهلك طاقة كهربائية مضاعفة لاستهلاك التبريد

كل هالكلام ما بينصرف معنا
انا اول مرة بسمع بحياتي عن تاجر بيطلب من زباينه ما تشتري من عنده !!!!!!!!!!
طبعا مؤسسة الكهرباء هي مؤسسة تجارية عمتبيع سلعة للناس و عمتاخذ حقها
هلق يمكن في ناس بيقولوا انه عمتبيع سعر الكيلو واط للمواطن بخسارة ؟؟؟؟
انا برفض هيك امر لأنه معروف انه المؤسسة من مدة عملت جدولة للأسعار لحماية المستهلك البسيط و تغريم المستهلك الزائد باسعار اعلى كلما زاد استهلاك للطاقة
و بالتالي لازم تكون العملية رابحة معهم
و بالتالي القطاع التجاري الرابح لازم ينبسط من زيادة الأستهلاك و مقابله لازم يامن خدمات جيدة لزبائنه.
بيشتروا محطات كهربائية بيأمنوا الفيول الها و بيعملوا دراسة بحيث يضمنوا انه السعر للكيلو الكهربائي رابح و متوافق مع دخل الفرد

بس انه يعملوا تقنين بحجة انه الاستهلاك هو اكبر من طاقة الوزارة او الؤسسة فهذا امر مضحك مبكي ؟؟؟؟
خلاني اتخيل شي شركة من شركات الخليوي في سورية عمتطلب من زبائنها تخفيف مدة الأتصال اليومي لأنه هالشيء عميعمل ضغط عالشبكة او ما عمتستوعبوا مقاسمهم.

و لك عيب و الله عيب استحوا بقا.

Posted by: hosam danial

خال شكراً الك على الشرح المطول للوضع
بس ياأخي نحنا هيك متعودين أنت الك عنا شي
نحنا من صغر متعدين شو ما صار عنا تنقطع الكهربا
وشو هالشغلي يعني أجدادنا ما كان عندهن كهربا
وكلهن صاروا علماء وكتاب وشعراء
بقى لشو الكهربا

وبعدين نحنا متعودين انو هيك مؤسسات تضحك علينا
ونحنا أتعودنا أنو ينضحك علينا ونحنا ساكتين

ولمين عم تقول استحوا وعيب ومدري شو
هاي هالكلمات هني تعودوا عليها
وما بتفرق معهن

وبقولولي بلدنا وبلدنا وما في منها
مظبوط أنا لسع ما شفت منها
غير ب.....

شوفو هالخبر
http://www.syria-news.com/readnews.php?sy_seq=69714

وشكراًً

Posted by: organist

هلق يمكن في ناس بيقولوا انه عمتبيع سعر الكيلو واط للمواطن بخسارة ؟؟؟؟

معليش أخي حسام بدك إتطول بالك لأنو مافي غير المواطن رخيص السبب في دفعة مجموعات توليد كهرباء بالسوق بدهن إدفشوها

Posted by: samar dahi

يعني الحقيقة يا حسام شي بضيق الخالق على هالوضع .....معقول كل يوم يا جماعة ساعتين ونص بدون كهربا ....والأنكى من هيك كان هالشي بفترة فحوصات طلاب المدارس ...والواحد منهم مانو عارف كيف بدو يمرق هالفحص على خير ...يعني ضغط فوق ضغط ....لا وكمان شو هالبرد اللي مو طبيعي خالص ...يعني اديش الواحد لازم يتحمل ما منعرف ....
انشالله بتمرق موجة هالجليد والبرد والزأعة على خير ومعها كمان موجة قطع الكهربا ...

Posted by: tony daboul 21

شلونو أبو الحس , والله أنتي موفارقة معك كثير كل يوم بتوصل هالسيارة على المحل وبتشعل نيونين
ولاب توب عندك يعني مافي مشكلي . خخخخخخ
بس لاء عنجد معك حق والله لأنو الحالي مو طبيعية , الله وكيلكن ياجماعة عم نقضيها نوم على قطعة هالكهربا , وبرد كمان , الله ماقالها بس يلا لازم الواحد يطول بالوا شوي
الوضع هيك حاكمنا .
&&&TiTo&&&

Posted by: wajdy barakat

محلولة حسام وما بتستاهل الزعلي بكل بساطة اول الشي بتروح على الحداد وبتوصي على خزان 10 براميل.....وبطريقك مر على واحد يدينك حق مولدة كبيرة مشان تشغل كل شي بالبيت جكر بقطعتهن للكهربا......وانتي نازل على حمص بتمر على الكازية وبتقدم العرض التالي سعر ليتر المازوت بدل (7) سوي انتي (9) وهيك بتامن المازوت للمولدة والخزان........وبتكفي على حمص وبتشتري المولدة.....وبعدها بتقعد وبتقول فخار يطبش بعدو انشالله ما بتجي الكهربا اني مو فارقة معي هههههههههه شلوووووووون بالله؟

Posted by: tony daboul 21

هيي وجدي طول بالك شوي يازلمي
مو كل اعالم بتقدر تتدين حق مولدة
بس على فكرة ياشباب بما انو اني عايش بحلب بهالفترة رح قلكن انو كمان بكل حلب عم تنقطع الكهربا حوالي ساعتين يوميا , يعني مو بس نحنا مقطوعين .
القطر كلو عم تنقطع فيه الكهربا .
&&&TiTo&&&

Posted by: Nada1981

مرحبا جميعا

مع انه انا مابقى بيحقلي احكي هلا بعد ماتركت سوريا من يومين بس حبيت شارككم الموضوع و خاصة اني شفت بعيني شو عم يصير.

حسام مشكلة قطع الكهرباء و المياه يمكن الشعب تعود عليها و صارت شغلة عادية مثل اي شغلة ثانية, روتين.........

انا ضليت بلشام حوالي 5 شهور و يمكن انقطعت فيها الكهرباء مرة او مرتين بس, و كانت بلصيف, من لمى بلش الشتاء ماانقطعت الكهرباء, بس المياه عم تنقطع كل يوم من الساعة 3 او 4 بعد الظهر لثاني يوم الصبح, انا عم احكي على منطقة العباسيين بلشام تحديدا.

هلا يمكن في عالم بتقدر تقعد على ضو الشمع او اي ضو ثاني و تقعد جنب الصوبيا بس الي التدفئة عنده على الشوفاج و عن طريق الكهرباء شو بيعمل وقتها؟
انا مرة رحت بزيارة لعند رفيقتي بصحنايا بلشام و وقتها كان مطر و برد و الطرق كلها بلشوارع كانت عاملة مثل مستنعقات مائية بلأرض و لسوء الحظ بلأكتر انه الكهرباء انقطعت و رفيقتي عندها شوفاج ومافي صوبيا, وقتها رجعنا برجوع على الشام فورا.

انا مافيني قول بللحظة هي غير الله يساعدكم و انشاءالله بيتعدل الوضع

تحياتي

ندى

Posted by: a_aroush

حسام بدك تحمد ربك مية مرة باليوم , بتعرف ليش ؟

لأن سوق الرقيق تسكر من زمان , لولا هيك كانوا باعونا نحنا السوريين بالمزاد العلني شلتنا هي اللي عم بتلومها ليه قطعت عنك الكهربا. قولك شأد كنت بتجيب سعر حسام ؟

والله ببلاش انت ما كان حدا أخذك , كونتا كنتي بيجيب سعر أحسن منك .

يا ريت لو كان المواطن السوري آلة , كان على الأقل بيعملوله صيانة, من تزييت و تشحيم حتى يضل ماشي. عم يأمنولنا شوية أكل و مي لنضل عايشين مو أكثر ولا أقل حتى نضل قايميين بعملنا و نرجع عبيتنا ننام لنرجع عالشغل ثاني يوم هاذ إذا كان عندك شغل, و ثمنا ملجوم ما نحكي و لا منتذمر , و عيونا مغطية ما عد تشوف. بشو بيذكرك هالشيء؟

تامنت التسهيلات للاستثمارات الخارجية , و بدأت نهضة صناعية بالبلد لكن من دون تخطيط , ما في الطاقة الكافية اللي تغطي هيك مشاريع , و حجج الأعطال اللي سمعناها ما عد تدخل بالراس , يمكن كانت دعاية بس حتى ما يخاف المستثمرين و ما يفكروا يرجعوا أو يجو عسورية. فكان سوء التخطيط على حساب المواطن منقطع عنو الكهربا حتى نأمنها للمعامل و المشاريع اللي ما فينا نوقفها و نتبهذل.

فاتحملوا شوية برد و قطع كهربا , هي المشاريع عائداتها كبيرة , و أكيد رح نلاقيها قدامنا محفوظة بحساب توفير بسويسرة

Posted by: hosam abdulaziz

شكرا لجميع اللي شاركونا بهالمأساة
احلى سحبة صارت معي امس, رحت استلم طرد جايين يمن عند العروس من امريكا
و لوسء الحظ كانت الكهرباء مقطوعة بمؤسسة البريد
قلتلها للموظفة شو الدولة مبين ما عندها استثناءات
قال منين يا حسرة.

المهم قامت بدها تسلمني الطرد و قالتلي الحقني
و اخذتني عالمستودع و فتحت الباب و الا عبارة عن غرفة كبيرة كثير ما فيها بصيص للضوء , يعني الأصبح ما بيبين
و اختنا جايبة معها قداحة (ام ضو) مشان تدور عالطرد بين مئات الطرود.
و بلشنا انا و هي نتعمس (نبحث بطريقة فوضوية)
هي بالقداحة و انا عضو الموبيل
و بعد جهد جهيد غدرت لاقي طردي بمجهودي الشخصي و شكرا لرنيم كاتبة اسمي بالعربي سهل عليي المهمة.
-----------------
انا من طفولتي كنت اتسائل ليش اهل هالضيعة ما بيتكاتفوا عشراء مولدة ضخمة تغطي كل الضيعة
و هلق عكبر دوم بسترجع هالتساؤل بس للاسف ما عندي فكرة عن امكانية تنفيذه تقنيا.

بس معقول مثلا هالـ 5 مليون تكاليف الحديقة العامة
او 15 مليون تكاليف المخفر ما كانت غطت تكاليف هيك مشروع ؟؟؟ و بعدين ثمن المازوت بيصير ينلم من الأهالي مع دفعات العمل الشعبي او النظافة

و ممكن هالمشروع يتنفذ عصعيد الشارع الواحد كل شي 10 بيوت بتنسق بين بعضها
و اسوء الاحتمالات عصعيد المنزل الواحد بس رح يزود العبء المادي

انا شخصيا مني سائل عنهم و عن كهربتهم من ناحية الأضاءة و التلفزيون
بس لو هالكمبيوتر بيشتغل عالمولدة الصغيرة اللي عنا

بس المصيبة الكبرى انه اذا اشترى الواحد المولدة الكبيرة عالمازوت , ضمنانين نلاقيلها فيول بشكل دائم
ولك و الله شي بيرفع الضغط.

Posted by: إنانا

ياجماعة شو لعنة ما لعنة ؟؟؟ ...إي صحيح نحنا ما بنقدّر النعمة !!!
رح وضّح قصدي ...يعني ليش نحنا دائماً بنشوف النص ا لفاضي من الكاسة وما بنطلّع على النص المليان ؟؟؟
دائما ً عم ننحز ونشتكي ونتذمّر من ومن ومن وخاصّة من التقنين وانقطاع الكهرباء...بس مو عارفين إنو هي نعمة مو نقمة...إي نعمة ...إي إي لا تطلعوا هيك ...
هلّق عم تنقطع الكهربا من الساعة 5 حتى 8.30 تقريبا...بهالوقت بكون طلع ضوّ القمر ومدري للصدف مدري أنو الطبيعة حسّت فينا لكن عم لاحظ أنو ضوّ القمر بالفترة الماضية عم يكون كتير قوي ومشعشع ...وبما أنو الشاحن بطاريتو خربانة ..فبنكفي ساعتين ونص على ضو القمر والشمعة ... وهون بيجي وقت ساعات الرومانسية (اللاإرادية والإجبارية والقسرية !!) والتي (بتواجد التيار الكهربائي ) لن تحيا هكذا ساعات !!!
لا كومبيوتر ، لا تلفزيون ، لا ضو تقرا كلمة ..فما في عندك غير*** إما التأمل مع تراتيل هادئة تتماشى مع المناسبة هيك بتكون عم ترجع شوي لعلاقتك الروحانية مع الله...
*** أو بتحوّل السهرة مع الحاضرين أهل وأصدقاء إلى سهرة حب & و دار الدوري ع الداير يا ست الدار و ردّوا عليي ...وهيك بنحيي مع بعض أغاني الزمن الجميل...وكمان مطمنين بالنا أنو مصارينا(مثل ما قال الأخ عبدالله ) عم تزيد ونحنا سهرانين بالمصارف و البنوك السويسرية ...واووو
بقى خلّونا على هالهدوء الطبيعي ولا تسمع حسام من طوني ووجدي بلالك هالمولدة والضجة ومازووووووت...
ويا ندوش إذا رفيقتك ما عندها شوفاج بسيطة بس مو مؤسسة الكهرباء!!! لعلمكم الموظفين عم يطقوا سن بسن من البرد ... و إذا في إستثناء كان لازم يبدا مع الشركة نفسها فلا تزعل حسام إذا ما لقيت كهربا بالبريد؟؟؟

وبعد هالموجز المفصّل ، شو رأيكم نكّارين نحنا مو هيك ؟؟؟
وتفضّلوا قد ما نقيتوا ما عادوا قطعوا الكهربا و راحت علينا كل الفوائد والميزات اللي ذكرتها...

تحياتي...

Posted by: a_aroush

اقتباس:

وهون بيجي وقت ساعات الرومانسية (اللاإرادية والإجبارية والقسرية !!) والتي (بتواجد التيار الكهربائي ) لن تحيا هكذا ساعات

إنانا .. سلام أولاً .

ما قدرت ما علق على ردك . هلأ هي الرومانسية اللي عم تحكي عنها , تراتيل و دار الدوري عالداير يا ست الدار !!!!!!!! . بطيبها هالزلم عم تجيب مولدات كهربا .

اقتباس:

و بلشنا انا و هي نتعمس

حسام والله ضحتكني , من زمان ما سمعت هالكلمة نتعمس . شوف شأد رنيم فهيمة حاسبة حساب تكتب اسمك بالعربي حتى تلاقي الطرد بسرعة ما تضلو عالعتم انت و الموظفة , لأنو لو مطولين أكثر ما بتعرف شو كان صار ... يمكن تقلب معكن دار الدوري عالداير يا ست الدار.

Posted by: talal_alachkar

والله يا عبدالله سبقتني
يعني عمرك أطول من عمري
أنا كنت رح علق على سبقتني أنتا عليه
و أكثر قصة هالموظفة و الكهرباء المقطوعة و حسام أبو عيون الخضر
بس لهون و من دون تعليق هههههههههههههههههههههههههههههه
طلال

موقع زيدل سوريا حمص .. خدمات تشات و دردشة ... أرشيف المنتدى