Pages: 1
زياد سطاح علقت والله علقك
(انقر هنا ان احببت مشاهدة الموضوع الاصلي بالالوان و الصور )
Posted by: Desert rose
42 سنة .................عز الصبا وعز الشباب
كل عام وإنتَ بألف خير استاذ زياد
عنوان المعايدة لحقت وعلقت
فشو يعني علقت
العلقة والله علقة حلوة ونحنا منستاهل وحضرتك قدها .
يعني حابين هالمرة يكون للأغلبية نصيب بحصة الأسد من موهبتك الشعرية والشاعرية
فلذلك تمنياتي استاذ زياد
خلق باقة شعرية مخصصة بأسماءالأعضاء اللي رح يقدموا التمنيات لحضرتك بالتوفيق وبطول العمر .
حضر حالك
تسلملنا ياطيب وتسلم لعائلتك طول الدهر
زهرة الصحراء
Posted by: عبير طبيقي
العمر كلو استاذ زياد
وانشالله كل سنة بتكون عليك أحلى من سنة
مع تقديري واحترامي
Posted by: إنانا
بقدم أطيب الأماني القلبية للأستاذ القدير زياد السَطاح صاحب القلم المعطاء أدامك الله للمنتدى و لعائلتك و أمدك بثوب الصّحة و العافية و بالعمر المديد...
غمرتني بلطفك و كرمك منذ بداية تواجدي في المنتدى و كانت عزيمة الكنافة و النابلسية والمشوية غير شكل ...بس هلّق بدنا نزيد الكاتو 
و تكون عن جدّ !!! وما في حجة.. فيروزة دقيقتين... ولا شو ؟؟؟
ملف مرفق 3393
مجدداً كل عام و أنت بألف ألف خير....
تحياتي...
Posted by: الألماسي
.
..
...
.
.
.
مع الشكر الجزيل لزهرة المنتدى على منحنا هذه المساحه
لتقديم التهنئه لصاحب الكلمه العذبه الأستاذ / زياد سطاح..
...
..
.
Posted by: RUSHA AWAD
الأستاذ المحترم زياد
كل عام وانت بألف خير , أتمنى من الله أن يمدك بالصحة والعافية لتكمل رسالتك كأب وكمعلم وكشاعر في منتدانا الغالي. وطبعا لابد من سؤالي المعتاد في أعياد الميلاد:
هات لنشوف 
كيف كانت السنة الماضية معك وشو هيي أهم الأحداث اللي مرت عليك
مع حبي واحترامي 
رشاعواد
Posted by: الأب جان سيف
الأخ والأستاذ العزيز زياد سطاح:
كل عام وأنت بألف خير وانشالله بتنعاد عليك دائماً بالصحة والسعادة التامة والرب يكون معك ومع عائلتك دائماً.
حبيت جرب حالي بالشعر: (يعني تجربة ها ما تعلقو كثير
)
الدنيا مِنْ خَلقِتْ زياد
الرب محبِّه عليها زاد
وانشالله عليك بتنعاد
بسنين وأيام مْداد
الخالق بحبو يغطيك
والروح القدس بيحميك
والرب الفادي بيعطيك
أسعد عيشة وأطيب زاد
وكل عام وأنت بخير
Posted by: ABUODEE
كل سنه وانت بألف خير الاستاذ الرائع والقلم المبدع
وان شالله تكون سنة جديده كلها افراح وسعادة
وتتوفق في حياتك وتحقق اهدافك
Posted by: جعفر حيدر
حبيبنا الغالي
نشاء الله سنينك بتكون كلها محبة وحب
ونشاء الله بتضل حبيب الجميع
أتمنى لك الخير والصحة والعمر المديد
جعفر
Posted by: عشتروت
الشاعر الجميل الأستاذ زياد
كل عام وأنت الشعر والزجل
كل عام وأنت المحبة والعطاء
كل عام وأنت ... زياد سطّاح
عقبى للــــ 100 سنة من الحب والعطاء والسعادة
ثناء
Posted by: hosam danial
استاذنا العزيز زياد
كل عام وانت بخير وأنشالله
كل أيامك خير
ومثل ما شعلت هالشموع لاجلك
تضل أنت مشعل شموع العلم والنور للجميع
وعقبال 113
حسام & ريما
ملف مرفق 3396
Posted by: ziad sattah
اقتباس عن مدام سناء :
اقتباس:
خلق باقة شعرية مخصصة بأسماءالأعضاء اللي رح يقدموا التمنيات لحضرتك بالتوفيق وبطول العمر .
حضر حالك
|
مادامت الفكرة على هذا الشكل فتكرم عينتينك
( لأنّو ما بـ يطلعلي أكثر من معيدة أو اثنتين . مو كل سنة )
فـ َ تكرموا صبايا و شباب . الأبيات قيد الانجاز ..
------------
أمّا رشا الغالية :
اقتباس:
هات لنشوف كيف كانت السنة الماضية معك وشو هيي أهم الأحداث اللي مرت عليك
|
سأخبك ما حصل معي اليوم بالتحديد :
منذ فترة و أنا أفكّر بتعزيل ( تنظيف و ترتيب ) السطح و المستودع , و قمت اليوم بالمباشرة في العمل منذ الصباح و حتّى الساعة الواحدة ظهرا ً , و كانت حالتي يرثى لها . و عندما قمت بتشغيل جهاز التلفزيون سمعت قارئة الأبراج تقول لمولود هذا اليوم :
ستنجز اليوم مشروعا ً طالما حلمت بالقيام به !!!!!!!!!
فتصوري يا عزيزتي هذا الانجاز .
Posted by: بنت القمر
إيش اقدم لك هديه مايوفيك القصيد
إنت أغلى من هدايا الكون
إنطفت من عمرك41 وعقبال المزيد
لو توفيك المشاعر لو توفيك القصيد
عقبال الـ120 زياد
Posted by: samar dahi
كل عام وانت بالف خير استاذ زياد ...
انشالله منشوفك سنة الجاي عم تعزل سطح الدار من جديد ..لانو بتعرف هاد التنظيف ما بينتهي ....
بتمنالك سنة حلوة ومميزة بكل شي فيها ...وانشالله عقبال المية بالخير والحب ....
Posted by: angel
أستاذ زياد .. انشالله العمر كله يارب بالصحة والسعادة مع العيلة الكريمة ...
وانشالله مامننحرم من قلمك الغالي على قلوبنا ...
كل عام وانت بخير ... وانشالله المنتدى بظل عامر بالمناسبات الحلوة ..
أنجيل ووسام ...
Posted by: hosam abdulaziz
استاذنا الغالي زياد
كل عام و انت بخير , كل عام و انت من المعطائين لمنتدى زيدل الغالي
بنتمنالك طول العمر
و النا بنتمنى تبقى معنا شاعرا و مشرفا الى ما لا نهاية
عقبال ال 100
حسام و رنيم
Posted by: emado1
على مهلكم ياجماعة
انا هلق وصلت ومابدي يضيع مني حصة الكاتو
استاذ زياد
انشالله كل عام وانت بالف خير
وانشالله هالسنة بتكون مصدر الهام كبير لقلمك المميز
وبتكون اجمل من 41 سنة السابقة
وعقبال 100 سنة تانيين
وتقبل مني كل الاحترام
Posted by: a_aroush
كل عــام و انــت بخــير استاذ زياد .. و عقبال المية سنة .
.................................................. .
Posted by: حكيم عيون
إقتباس عن الأستاذ زياد
اقتباس:
أمّا رشا الغالية :
سأخبك ما حصل معي اليوم بالتحديد :
منذ فترة و أنا أفكّر بتعزيل ( تنظيف و ترتيب ) السطح و المستودع , و قمت اليوم بالمباشرة في العمل منذ الصباح و حتّى الساعة الواحدة ظهرا ً , و كانت حالتي يرثى لها . و عندما قمت بتشغيل جهاز التلفزيون سمعت قارئة الأبراج تقول لمولود هذا اليوم :
ستنجز اليوم مشروعا ً طالما حلمت بالقيام به !!!!!!!!!
فتصوري يا عزيزتي هذا الانجاز .
|
يا قلبْ لـْزهور المحبَّهْ (v)فـاز........عِطركْ سَكـَرْنا و عا رضانا حَازْ
ما شي وبإيدكْ شمعة الإنجيلْ..........وبالثانية شِعْر بشموخو بَاز
أللهْ بعمركْ كل ّ يومْ يْطيلْ....................تَ بمنتدانا مِثلْ مَ بيتـَكْ
إنجاز يتـْوالى ورى إنجازْ
==============================
وكل عام وأنت بخير
Posted by: ziad sattah
أشكركم جميعا ً. و نزولا ً عند رغبة السيدة سناء أهديكم هذه الأبيات :
أبدأ من أوّل من هنّأني بعيد ميلادي و هي:
زوجتي
مِنْ قَبل مـ َ تْفَتِّحْ شمس يومي الهَني
قِلتي : يـ َ ربّي تْعيشلي ميّةْ سنه
صَلّيت ْ لـ َ ربّ السّــما و رْكَعْتلو
لنّو زرع ْ بِجْنينتي هالسّوســــنه
_________
زهرة المنتدى ( سناء )
كلشي انكَتَب مِن يوم مـ َ الشِّعر انكَتَب ْ
وْ كلشي عِطِرْ أزهار بـ قْناني انسَكَب
لـعـيــون زهــرة مـنـتـدانــا الـغـالـيـه,
سبحان ربّ الكون شو أعطى وْ وَهَب
______
عبير
محتار ْ شــو رَحْ قُول للحلوه عبير
واقِفْ عـ َبابِكْ مِثلْ هالواقف عـ َبير
شايِفْ بِعَينو المَي لاكِن مـ َ ارتَوى
وْ مهما اغتَنى بْـ عينيه رح يبقى فقير
________
إنانا
قالو : الطَّمَع ْ بالدّين يا جار الرِّضى
الأمس إنتهى بالأمس, والماضي مضى
دوقــي الكلمهْ الـ ْ مِنْ شـــفافكْْ طالعهْ
حِسّي بْطعمها وْ هيكْ طـُلبهْ بتنقضى
___________
ألماسي ( شعر نبطي )
خَويّي لو تَسَلْ عنّي تِلاقي اسْمَك ْ على كْتابي
و لو إنَّك حَجَر: تنطقْ, فَكيف وْ إنت ْ ألماسي
أنا قبْل ٍ تِعارَفْنا : يَتيم ٍ مـ َ انْطَرَق بابي
وْ أنا بعد ٍ تِلاقينا: رَفاقى كَمْ صفى كاسي
________
رشا
عم تسأليني يا رشا عن هاك عام
شو حَقَّقِت ْ أحلام وتـ ْ حَقّقْ مرام
حَقَّقْت ْ حلم كْبير راوَد ْ خاطري
لمّا التقينا بْسَهرة الغالي حســــام
_________
أبونا جان
صَدِّق ْ يـ َ بونا دعْوِتَك ْ الله استَجاب
لـمّـا فَـتَـح عيني عـلى نور الكِتاب
مِن بَعد مـ َ بْواب الخَطيّه اوصَدِتْها
ربّي فَتَحْلي بـ ْ صحْبتَك ْ مليون باب
_______
( يتبع )
Posted by: ziad sattah
عبّودي ( تعليقا ً على الصورة المرفقة )
مِن مَطبَخَك ْ يا شيف عبّودي تعى
حامِل على إيدَيكْ طُرطه مْرَصَّعه
حَمَّلْتها لـ بْسَين ْ!!! الله يْســـامحك ْ
وْ أودَعْتها يا خال بَطْن الضّفدَعه؟
_______
الشاعر جعفر
و الشاعرة ثناء
( لون العتابا كونكما تحبّانه ):
أسَرْني بـ كلمتو جعفر و حيدر
كأنّو مِن على منبر وحي دَر
بـ ْ عَرينو اللي احتوى لبوه و حيدر
لأهل الشِّعر فاتِح مية ْ باب
***
عميق الفكر مِن قََولِك وَصَلْ لي
اوعِديني دَوْم يبْقالِـك وَصِل لي
عـ َ إسم الرّب إدعيلي و صلّي
الدُّعى بـ ْ إيمان مِنِّك مُستَجاب
______
حسام دانيال
شاكِرْ إلَكْ ممنون لطفك دانيال
قْلال الرِّجال وْ إنْت يلـ مثلَك قْلال
بِدْعي لـ َ الله يـ ْ وَفّقَكْ بِ غربِتَكْ
وْ تِبقى لأهل بْلادَك ْ الحلوه مِثال
______
بنت القمر
كلْ بِنتْ - بيقُولو - بـْ أبوها مُعجَبهِ
وْ مِن هَيك قالو البنت أهنى مْن الصَّبي
لاكِن عَـكَـسـْتي القَول يـا بـنـت القمر
لـمّـا القمر هـام بـ ْ جَمال الـمـوهـبـه
_____
سمر
أمّا سَمَرْ :لو غاب أو طَلّ القمر
بـْ تبقى قمر سهران لو نامو البشر
قالو: سَفيرةْ مجلس القرية. أَبَدْ
إنتي السّفيرة للجواهر و الدُّرَر
_____
أنجيل
شعْلةْ فِكِر, أنجيل تِفْهَم عَالوَمى
يا كَرتْ رابِح بالأخير بـْ قَدِّمى
كل ما انْوَجَدْتي بِفْتِكِرْ نجم المجوس
بْـ لحظةْ ظُهورو بـْ يِنشِدو جْنود السّما
______
( يتبع )
Posted by: ziad sattah
حسام عبد العزيز
خَيّي حسام الـ ما حدى عم يفهَمو
حكمه وْ فِكِرْ صافي إلالو ألهَمو
لاكن بِقَلبو الأبيض الـبَعدو طِفِل
حاوي ألوف النّاس, الله يـْسَلّمو
_____
عمادو
أهلا ً عمادو شَرّفِت ْ مُتْصَفّحي
عندي كلام كْتير لاكن مِستحي
نـ ِ حْكيتْ عنَّك ما زِدِتْ بـ ِ مسرَحَك
وْ إنتَ بْوُجودَكْ هَونْ زَغْرَدْ مَسرَحي
_____
عـ - عرعوش
أطْلَقْ لِسانو صَوت صارِخ بالمَدى :
قُولو الحقيقة وْ لا بَقى تـْ هابو حدى.
بِذْكُرْ أنا بـْ هاك الرّوايه اللي كَتَب
كيف تا عَلينا تْغَلَّب وْ صِرْنا صَدى
____
د. ماجد ( الحكيم )
عمّي الحكيم اللي حَمَل راية أديب
مِن يوم يومو ماجد بـ ْ مجد الطّبيب
لكـن عـن الانجاز أوعـى تدْقَرو
ياما قَطَعْنا ايدين بِمْقَصّ الرّقيب
____
طلال الأشقر ( مع محبتي )
أعجَبْتني بـ ْ توقيع نابِع ْ عن فَهِمْ
إنتَ الشّهم لـو كـان بـالدّنيا شَـهِـم
عن ضَيعِتَكْ دافَعْت و الشّاهِد حُسام
وْ وَعَّيت ْ كل من كان عايش بالوهِم
_______
شكرا ً
Posted by: Nada1981
الأخ العزيز الاستاذ زياد
كل عام وحضرتك بألف بخير وعقبال ال 100 سنة يارب
اسفة على التأخير بس اكيد حضرتك رح تعذرني
تحياتي
ندى
Posted by: ziad sattah
ندى
مِتْأسّفه ؟ عم قولْ بعدو في حَدى
غايب عن الزّادو ضياء المنتدى
عُمرو جمال الورد مـ َ بْيِكْمَل إذا
ما كان عالأوراق في قطرة ندى
__________
سهير
عندي نَظَرْ ؟؟ لو كان في عندي نَظَرْ
ما كنتْ بـِ انســـى اســـم بالبال انحَفَر
ان ضِحْكِتْ سهير بـ يضحكو عيون الدّني
وْ لمّا ســــــــــــهير تـ ْ غيب بيغيب القمر
***
Posted by: wajdy barakat
استاذي العظيم والحبيب والطيب القلب ....كل عام وانت بالف خير وانشالله كل سنة بتمر عليك بتكون احسن من القبلها.......وبتظل لاهل بيتك منور ومالي البيت .......
قد لا اكون اول المهنئين لكنيي اصدقهم 
اسف على التاخير وعقبال المية سنة
Posted by: ziad sattah
وجدي
ما كنت أوّل من حكى أصدَق ْ كلام
وْ مَعْليش ْ لولا تْأخّرِتْ,ما فيي ملام
كنت الختام بـ ْأخوتي اللي بارَكوا
ما أطيَبَك ْ مِنْ عطْر يا مسك الختام
ْ ْ ْ ْ ْ ْ ْ ْ ْ ْ ْ ْ
Posted by: Desert rose
اقتباس:
|
قد لا اكون اول المهنئين لكنيي اصدقهم
|
ونحنا شو منطلع .....أكذبهم 
مزحة ((وجدي)) بس مابعرف كيف مرقلك ياها استاذ زياد
الهيئة عندك واسطة
بمناسبة التعقيب التاني ... أستاذ زياد لأختصر المسافات بدي قلك :
كل العبارات لاتفي حقك يامبدع الكلمات
زهرة الصحراء
Posted by: mariam
مرحبا زياد0000
هلق انا بدي هنيك انك خلصت من العلقة والعجقة 0000يعني اللي بيقرا العنوان بيقول ورطة ومالها حل 00طلعت نقطة ببحر كلماتو مالها حدود 000وشوماانحكى بتلاقيلها ردود000كل عام وانت بخير والله يزيدك من نعيم العطاء0000
مريم
Posted by: ziad sattah
د. مريم
شو مـ َ انحكى وْانقال : نقطة من بحر
بَحْرِكْ يـ َ دكتاتورِة ِ صْروح النَّثِر
بْشِـــــــعري بَنَيْت قْصور حلوه مْزيّنه
وْ إنـتـو بْمشــاعر حـُب عَلّيتو الـقـصر
ِ ِ ِ ِ ِ ِ ِ ِ ِ ِ ِ ِ ِ ِ ِ ِ ِ ِ ِ ِ ِ ِ
مدام سناء : مين قال إنّو مرّقتلّو ياها ؟
راجعي أول شطرة بردّي عليه !!!! ( و لو؟ )
Posted by: m-sattah
عيد ميلاد سعيد و كل عام و أنت بخير أخي
ينعاد عليك بالصحة و العافية و السعادة و الهناء
تمنياتي لك بتحقيق كل ما ترغب به في حياتك الشخصية و العملية
و أسأل الله أن يزكي عمرك في طاعته
فعيد سعيد و عمر مديد
و لا مفر من الكاتووووه و المشروبات ليكتمل الاحتفال
بحضور كل الإخوة و الأخوات لتهنئتك بعيدك السعيد
Posted by: merellaa
يا الله يا ربي انا اتاخرت كالعادة
يا الله راحت عليييييييييييييييييييييييييييييي
كل عيد وانت بالف خير ويا رب يا رب يا رب تحقق كلشي بتتمناه بحياتك الك ولعيلتك
عنجد اسفة عالتأخير
وهي وردات جوريات لعيونك
سلام الرب
ميمو
Posted by: ziad sattah
ماهر
الخَي خَيّ الرّوح مش دَمّ وْ جَسَــــد ْ
وْ انتَ الجّسد و الرّوح عـعْيوني تمون
حُبّ البَشَر رِسْـمال عُمرو ما كَسَد
وْ حُبّي ألَك ْ يِتْجاوَز بْحَدّو الجنون
_____
ميريللا ( مرموره)
أربع خمس وردات بالصّورة ؟؟
وين الورود الناثره عطورا ؟؟
كلْ ما جوريّه سْألْتْ: شو إسمِك؟
بـ غمزِة خَجَلْ بتقول: مرموره!!
***
موقع زيدل سوريا حمص
..
خدمات تشات و
دردشة ...
أرشيف المنتدى
vBulletin Copyright ©2000 - 2008,
Jelsoft Enterprises Limited.
vB Easy Archive Final ©2000 - 2008
- Created by Stefan "Xenon" Kaeser
