الارشيف - اين تكمن المشكلة بالمنتدى ام بالسبيس

Pages: 1

اين تكمن المشكلة بالمنتدى ام بالسبيس
(انقر هنا ان احببت مشاهدة الموضوع الاصلي بالالوان و الصور )

Posted by: hosam abdulaziz

معظمنا عرف انه تم اضافة قسم جديد او مولود جديد كما وصفته رشا و هو zaidal community

الامر الاول الذي لفت نظري هو عدد المسجلين به خلال اسبوع من اطلاقه و قد وصل الـ 250 عضو زيدلي

و الأمر الآخر الذي يهمني بالطرح هو اقبال الاعضاء على ما يسمى بالمدونة
و هي عبارة عن ما يشبه المفكرة بحيث يطرح العضو فكرة و يتم التعليق عليها بطريقة قريبة الى حد ما بالمنتدى

هذه المدونة كنت افكر بالغائها قبل اطلاق السبيس , لاني كنت اعتقد انها لن تستخدم نهائيا
لكن اتفاجا بان الكثير من الأعضاء قاموا بالمشاركة و تحاوروا بمستوى جيد في مواضيع شبابية او نقل اخبار او ما شابه

بيت القصيد و التساؤل هو:
هؤلاد الأعضاء ال250 من زيدل لا يوجد منهم معنا بالمنتدى ربما 10% منهم
فلماذا لم يفكروا يوما بالتسجيل معنا بالمنتدى؟؟؟؟؟

و بما ان لديهم حب النقاش و اضافة المدونات
لماذا لم يجدوا في المنتدى غايتهم و فضلوا السبيس عليه ؟؟؟؟

هذا يدفعني للتساؤل ؟؟؟؟؟
هل نحن جادون ربما مما يدفع البعض للعزوف عن الأنضمام لنا خوفا من عدم المقدرة على خوض هذا الغمار
هل مستوى نقاشات المنتدى مخيف الى هذا الحد ؟؟؟؟

هل هناك خلل في ادارة المنتدى و سير عمله و توجهاته
ام ان السبيس هو عالم شبابي بحت و يجد الشباب فيه ضالته للتواصل مع الفئات العمرية القريبة منه و هذه حالة طبيعية .

استفسارات عديدة هل عندكم اجابة لها.

Posted by: Desert rose

أولاً_ مبروك للمهتمين بهيك مواقع
ثانياً _ إعذروني أنا هيك مواقع مابتعنيني كتير ولابحب يكون الي فيها لا اسم ولاصورة ..ومن دون مبالغة كل السبيس العربي والأجنبي ولا مرة شدني و فكرت ادخل تشوف مين ممكن يكون منتسب لهيك مواقع .
هلق التبريرات كتيرة ولكن لاداعي لذكرها كلها ....أهمها بإني ولدت بمنتدى زيدل ..وعشت بمنتدى زيدل .... وعشقت منتدى زيدل واتعرفت على كل اللي حبوني وحبيتهن بمنتدى زيدل ولقائي معهم عم يتم من وقت لوقت على الماسنجرات وبالغرف الصوتية ولو حبيت ابعت صورة لصديق او صديقة هالشي عم يتحقق عن طريق الإيميلات .
والأهم من كل هالشي تنظيم أفكاري وكل اللي كتبتوا من سنين بمنتديات محقوظة ومصانة .
وبيبقى آخر شي بحب قولوا ....أنا بحب كل العالم وبكل صدق ولو حبيت اتقرب من أي إنسان غريب عن قرية زيدل بفضل يكون عن طريق منتدى زيدل .
أما عن إنوا الإدارة فيها غلط فــــــــــها الشـــــــي مش نحنا فينا نقرّ ونعترف اذا في غلط او مافي.... ربما بيكون للغير رأي أفضل .
شكراً
كل المحبة والإحترام للجميع

زهرة الصحراء

Posted by: mariam

انا عن نفسي بقول انو سجلت بالسبيسمنشان يقدر البعض يشوف بعض الصور خاصة ببلاد الغربة وبتضل طرقة اهون من الايميلات خاصة بعد ماظهرت مشكلة تبديل الصور بالمنتدى واللي لحد الان مابعرف اذا حسام لقي السبب والا لا 0000
اما المدونات فغالبا عم تستعمل بدل التشات لانو بتضل محفوظة فترة اطول من المنتدى لانو مع زحمة المواضيع وكثرة الاقسام رح تكون هيك همسات بسيطة بسرعة بتطير او انها رح تحول المنتدى الى غرفة تشات كبيرة 000
ونحنا كادارة يمكن لسا دقة قديمة بدنا يكون المنتدى للفائدة اكثر من المتعة مع جمع الجهتين 000يمكن تكون الادارة بعمر ختيار شوي بس كثير صعب الرجعة لعمر اصغر لهيك بعد انتهاء فترة الادارة الحالية بنوعدكن نسلم عنصر الشباب 000000وبعدها يمكن يصير السبيسمثل المنتدى او العكس0000
بس الي تعقيب على العدد ياحسام بدك تحسب حساب انو العدد اللي سجل مجبور يسجل ليقدر يشوف الصور يعني حتى يشوفو صوري تم تسجيل ثلاث اعضاء غيري 000عيد الحساب بتلاقي كلهن اعضاء بالمنتدى000000

Posted by: samar dahi

حسام انا حبيت سجل بالسبيس لسببين :
اول شي لانو انت اللي عاملو وانا هاد الشي كتير بيعنيلي ....
وشي تاني لاني بحس انو هالموقع خاص كتير كتير لاهل زيدل (هلق بشكل مبدئي وبعدين ما منعرف شو بيصير )....وهاي اكبر فرصة شايفتها مشان نتواصل مع بعض اللي بالمغترب باي مكان كان وأهل الضيعة اللي هون ....وانا كتير بهمني اني كون بموقع خاص لشباب وصبايا زيدل ...
وبعدين ليش هالفرق بالاقبال بين المنتدى بموقعنا الاصلي وبين السبيس يمكن لانو شي جديد عم يقبلو عليه كل شباب وصبايا زيدل بكل حب , وعم يحسوا انو هالشي هوي الهم وخاص فيهم بس ...وانا حاسي بهالشي ....
على كل حال حسام ...الموقع اقبال عليه كبير ولا تفكر بالأسباب كتير بيكفيك انك لقيت نتيجة تعبك بهالاقبال الكبير ...بتمنالك من كل قلبي انو الله يوفقك بكل شي بتعملو لانو انت بتستاهل كل خير يا حسام ....
وبالتوفيق والخير للكل
مع كل الحب
سمر

Posted by: RUSHA AWAD

هلأ كل مين عندو رأيو ومجبورين نحترم اراء الاخرين حتى ولو كانت بتختلف عن اراءنا.
أني بشوف السبيس مكمل لموقع زيدل وهالتساؤل اللي عندك حسام بتصور عندي الإجابة علي.
من فترة وأنا عم أتذمر من شغلة بالمنتدى وسبق وذكرتها عدة مرات بس كانت على طول إجابتكن وحدي
بفترة من الفترات صار في أعداد كبيرة عم تسجل بالمنتدى وكلو عم ينقبل وهالأشخاص صارو ينزلو مواضيع شكال لوان ونبهتكن عن هالشي ومدى تأثيرو السلبي على مستوى منتديات زيدل بس يظهر هلأ حتى حسيتو بهالموضوع "على الأقل حسام". قراء المنتدى وأنا سمعتها من كذا شخص, صارو يحسو بالتدني بمستوى المواضيع واذا بتحبو فيني اذكرلكن اسماء لعدة مواضيع مارضيتو تحذفوها أو عالقليلة توقفو باب الرد عليها وهاذ كان سبب كافي لعشرات الأشخاص من زيدل على الأقل انو مايشاركو معنا كتابة "لانو الهم صار الكمية ومو النوعية". ثاني شي, بتتذكرو إنو الإقبال كان بسنة 2003 و2004 كبير كثير من أهل الضيعة وكان في ناس وسمعتها من أكثر من شخص انو ليش مابتشاركونا كتابة "لانو على فكرة في كثير ناس بتطلب انو ياريت تطرحو الموضوع الفلاني وأنا انطلبت مني عدة مرات" وجوابهن بكون أنو بحسو حالهن أقل قدرة عالتعبير من الأعضاء المشاركين بشكل دائم ومافينا نلومهن لانو اللي منعرفهن وفعلا هلأ عم يكتبو كلهن على مستوى علمي وثقافي يعتبر عالي نسبيا "مع العلم انو هالشي مانو مقياس بالمرة بس الناس بتعتبرو سبب كافي". لهيك حسام الشباب والصبايا عم يعبرو عن أفكارهن بأسلوب بسيط عفوي مهضوم بس بالنهاية عم يعبرو عن حالهن, عن حالة وواقع معاش.
على فكرة في كثير ناس مشاركين مابيعرفو يكتبو ولايقرو عربي لهيك بكون التواصل بالانكليزي وهوي شي مقبول بعالم السبيس اللي عما يلم كثير وفوق ماتتصورو وعم يخلي الناس على تواصل وبضل المستوى تبعو أهم من التشات وغرف المحادثة خصوصي انو حسام مستخدم تقنيات كثير حلوي وبضل هالمشروع كثير مهم حتى ولو ماكان مهم او مستخدم من قبل شريحة معينة من الناس.

مع حبي واحترامي
رشاعواد

Posted by: hosam abdulaziz

قبل ما علق عآرائكم جميعا حابب اطرح هالمشاركة اللي بتحكي عن نفسها و وصلتني من صديقة من زيدل

اقتباس:

هاي حسام
بصراحة اني بدي رد ع الموضوع اللي بالمنتدى تبع السبيس بس مستحية رد هناك لانه رح يتمالسو عليي بس رح قلك ليش
هلا حسام المسنجر والسبيس و و و وكل عالم النت للشباب لجيل الشباب
يعني هلا متلا او ما انت عرفت بالسبيس ما تشجعت وقلت شي حر بس هوي بالنسبة النا شي مانه حر منوووووب بالعكس شي للتسلاي اولا تانيا كل واحد بعمري بتصور يعرف العالم التانية اللي من جيلنا كيف بتفكر وو و و

هلا صراحة سبب انه الكل يكتبو مواضيع بالسبيس لانه صبايااا وشبابببب يعني ما في حدا اكبر من الثلاثين وفوق رح يقرا
يعني بصراحة ومن دون زعل نحنا بهالعمر عم نعيش اول حب وبجوز تاني حب وبجوز تالت حب و و و ......بقا هون بيكونو عم يكتبو عن تجربة بتعنيلهن بس تعا طراح هالمواضيع هاي قدام سناء او عمي سليمان او الدكتورة مريم او سمر او ايلي السويد او او اي بيصيرو يضحكو علينا لانه شي نحنا بالنسبة النا مهم لانه عايشينو ولسا ما شفنا شي اكبر منه وهم اكبر من انه هاذ الشب حلو هاذ الشب لا هاذ هيك بيحكي هاذ هيك سيارتو نحنا هاي هممومنا بس تعا حكي بالمنتدى عن هيك اشيا اي بيضحكو عليك

بقا فارق العمر كثيرررررررر بيلعب دور هاي اولا
ثانيا اني عرفانة اللي رح يردو عليي من ضيعتي رح يحترموني كيف ما كان رائيي بس بالمنتدى عالم اشكال الوان بجوز اختلاف الرئي يخليهن يسمعونا كلام طالع نازل
هلا سوي منتدى خاصصصصصصصصصصصصص للشباب وخلي شي حدا من الشباب يمسكو مواضيعو وشوف بجوز وقت يلاقو انه هاذ بس ليكتبو في الشباب ما حدا رح يكتب بالسبيس والكل ينتقلو ع المنتدى

يا سيدنا اذا بقلك سبيس زيدل صاااااااار سيرة اساسية بكل قعدة ما بتصدق
هلا متلا اليوم بالجمعية قضينا شي ساعة عم نحكي عنه والكل بشكل عام مسجلين فيه نحني تسعة والتسعة مسجلين وحابينو كثير لانه لزيدل وبس
بقا ثانكيو مرة تانية
بااااااااااااااااااااااااااااااااااي

Posted by: ziad sattah

موضوع قيّم جدا ً , و سيكون له آثار إيجابية على المنتدى لو أحسنّا التعاطي معه ..
و حبّذا لو أوصلتم مشاركتي هذه إلى روّاد السبييس :

اختلاف الأعمار :
هذا العذر لعدم الاشتراك بالمنتدى ليس في محلّه , و الدليل أنّه يوجد بيننا أعضاء شباب أثبتوا تواجدا ً و حضورا ً بموضوعاتهم و مشاركاتهم و خير دليل على ذلك ( و على سبيل المثال لا الحصر ) : العزيزة تامي و موضوعها : << مدارسنا .... >> بالرغم من أنّني لم أتّفق معها في موضوعها إلا ّ أنّها أوصَلَت ْ ما تريد إيصاله و بطريقة تدل على وعي و نضوج و محاولة لإصلاح ما ترى فيه خللا ً يجب محاربته .
و أيضا ً العزيز : ابن الحياة الذي وقف أمامي يتحداني بالزجل , و أنا الذي أكبره ب 22 سنة و كنت سابقا ً استاذه ُ . و أمثلة اُخرى كثيرة لا مجال لذكرها منعا ً للإطالة ..
اختلاف الأفكار :
الأمر هنا هو أشبه بالخلاف نتيجة الاختلاف الذي يحصل بين الآباء و الأبناء . و لكن إذا لم يتحدّث أبنائنا عن مشاكلهم و همومهم أمامنا فهذا إمّا دليل عدم ثقة بنفسهم ( و هذا شيء سيّئ ) , و إمّا عدم ثقة بنا و بتجاوبنا ( و هذا أسوأ ) . من هنا أقول : ما فائدة منتدى شباب يناقشون مشاكلهم فيما بينهم , هم يتكلمون و هم يسمعون ؟؟ بصراحة أقول لهم : إن لم تُسمِعونا صوتكم و تفرضوا علينا مشاكلكم و آرائكم فكأنّكم لم تفعلوا شيء...
<< و اللي مـ َ عندو كْبير بيقول المثل : يبرم عـ شخص كْبير ياخذ معرفه >>
مواضيع الكبار :
هل أتحدّث عن مواضيع العم سليمان ؟ ( بالمناسبة كل عام و أنت بخير يا عمي )
بالرغم من بعض مواضيعه الجّادة , له أيضا ً مواضيع مازحة , و مواضيع دينية . مثله مثل زهرة المنتدى ( سناء ) و الحكيمة ( مريم ) و حضرتي ( زياد ) و أخوة أعضاء آخرون : لنا مواضيع جادّة , و لكن لنا بالمقابل فرفشات علـ خفيف : مثل زجلية المتّة و القهوة و الأركيلة ..
حرّيّة الاختيار :
إذا قمتم بتنزيل موضوع و لم يلق تجاوبا ً فيكفيك فخرا ً أنّك كنت صاحب الفكرة ..
و هنا أذكر على سبيل المثال موضوع للعضو الجديد الأخ العزيز : ر. سفر ( رامي ) و موضوعه القيّم : المكتبة الإلكترونية .. و الكثير من المواضيع التي لم تجد مشاركا ً واحدا يضيف عليها أي رد ّ .
- بالإضافة إلى تنوّع المنتديات و المواضيع , فإذا لم يستهويك هذا المنتدى أو ذاك الموضوع فدعه لمن يستهويه و تابع ما يلفت انتباهك و اهتمامك ..
- ما لفت انتباهي في منتدى زيدل ( بعكس المنتديات الاُخرى ) هو كثرة القراءة للمواضيع و بنفس الوقت قَلّة الردود, و كأن ّ أحدنا لا يريد أن يقوم بتنزيل مشاركة ما لم يكن لديه شيء يضيفه للموضوع و إلا ّ فيكتفي بالقراءة , و هذه ميزة جيدة برأيي ..
- لا تبنوا لكم مجدا ً في غير أرضكم , لأنّه سيأتي يوم تعودون فيه إلى بيتكم , و عندها ربّما لن تجدوا لكم موضع قدم . فبادروا بالتسجيل في منتدى زيدل ..

Posted by: Desert rose

والله ياجماعة عم تحسسونا إنو السبيس صار اهم من المنتدى

واذا حاسيين إنو السبيس صار اهم وفي مشاكل كتير بالمنتدى خلص ....نسفوا المنتدى من أساسة ....بمعنى سكروا المنتدى وخلوا السبيس مادام في ناس عم تستحي تكتب او خايفة تكتب ومادام في ثغرات كتيرة مش قادرة الإدارة او الأعضاء أو المشرفين يسدوها .
الدكتور مريم حكت عن التسليم بصيغة المستقبل
عني انا بحكي بصيغة الحاضر
لو حاسين ياحماعة بإنو المنتدى ماعد يمثل زيدل ولا قراء زيدل ولا مثقفي زيدل وإنو السبيس بديل ياريت تخبرونا ...أكيد رح تريحونا .
.
.

ياعمي وين كنتوا بتغيبوا بتغيبوا وبترجوعوا لتـــــــــــــــــــــ .........نونا

ولك واحد منكن عالقليلة يقول :
شكر للأعضاء اللي مازالت محافظة على بنية منتدى بيمثل زيدل من عــــام 2003حتى العـــــــــام 2008

ولووووووووووووووووووووو

الله يذكرك بالخير يا أبو الويس .(( يعني وسام ))
ومنيح في عضو رحل عن المنتدى لو موجود لهلق لكان سلقكم بللالالالالا مي !!!!!
نهيالك عبدلله

زهرة الصحراء

Posted by: الألماسي

.
..
...

بما أن ( السبيس ) يمثل مرحلة أحدث بالنسبة للكثيرين

الى الحد الذي يرى فيه البعض أنه مواكبة للتطور على الشبكة

العنكبوتيه بما فيه من خصائص و إمكانات تجعل المُلمِّين بسُبل

التعامل معه أصحاب وعي أكبر من المتمسكين بصفحات المنتديات

و في كل الأحوال سيكون التوجه بطبيعة الحال للتقنيه الحديثه

و الاكثر تطورا تمشيا مع القناعه بالأفضليه لكل ماهو جديد..

اذن فالمشكله تكمن بتلك القناعات التي يحملها أصحاب الرغبه

في التغيير و الذين ربما أصابوا في بعض النقاط و ربما

كان هناك بعض الأخطاء..

كل الشكر لك حسام على إثارة هذه النقه للنقاش..

و الشكر موصول لكل المشاركين..

...
..
.

Posted by: dream night

اقتباس:

( رشا عواد) "لانو على فكرة في كثير ناس بتطلب انو ياريت تطرحو الموضوع الفلاني وأنا انطلبت مني عدة مرات" وجوابهن بكون أنو بحسو حالهن أقل قدرة عالتعبير من الأعضاء المشاركين بشكل دائم ومافينا نلومهن لانو اللي منعرفهن وفعلا هلأ عم يكتبو كلهن على مستوى علمي وثقافي يعتبر عالي نسبيا "مع العلم

معك ببعض ماقلتي

تعقيب بسيط انه حتى عندما أحد الاعضاء الجدد يشارك في المنتدى ولو كان موضوعه بيستاهل المشاركة ما حدا بيرد عليه (تطنيش يعني)فكيف بدك واحد يقدم أكثر من مشاركة وما حدا يرد عليه بكلمة ..كيف رح يتابع وماملاقي حدا واقف معه ولو كان مشرف من الادارة .ولو من باب التشجيع البسيط..
وفي مواضيع ولا الاولاد الزغار بيتنازلوا يعملوا هيك مواضيع وبتلاقي المشاركات صارت وكانه ضربة الموسم .

بعتذر عن هيك مشاركة بس لازم قول رأيي..
أذا كان في غلط سامحوني
أنا شخصيا متألم من هيك مواقف
أتمنى تفهم الموقف..
أو

Posted by: RUSHA AWAD

دريم نايت, الكلام اللي ذكرتو مانك غلطان في لأنو انتي هيك شايف واذا هيك وجهة نظرك مافيني نقول غلط. بالعكس كلامك صح وبيعبر عن قصدي تماما بس انتي شرحت بشكل أفضل وأني معك برأيك لأنو في كثير مواضيع بتنزل وخاصة الاجتماعية بتلاقي ماحدا شارك فيها ومع الوقت راح من صفحة المشاركات وصار الواحد مابلاقي غير بالصدفة بعد شي كم شهر "بتصور هالشي صار بموضوع لسمر ضاحي" وهالموضوع انفتح من اول وجديد وصار في نقاش واخذ حقو بس مواضيع كثير ماعم تاخذ حقها وطبعا السبب هوي الإهمال. وهون المسؤولية هيي لكل عضو عم يكتب بالمنتديات انو يشارك واني عن حالي بعترف اني ماني نشيطة كثير.
بس للتنويه مو أكثر, انو السبيس شي والمنتدى شي ثاني وكل نوع الو دور واسلوب بالحوار بيختلف كليا عن النوع الاخر لهيك لازم نفصل ونتذكر انو عم نبحث الاسبااااااااااااااب.

مع حبي واحترامي
رشاعواد

Posted by: mariam

شكرا للجميع مشاركتهم 0000
الشكر الكبير للاخ زياد فقد اوفى بجوابه نقاط كثيرة000000
لنبدأ واحدة واحدة 0000
السبيس يعتبره الشباب يخصهم وكان بامكانهم ان يعتبروا المنتدى يخصهم ايضا 000
اولا للاخت سناء انا مع الشباب السبيس موشغلة بسيطة بالنسبة الهن يعني فيهن يتواصلوا فيه وعلى فكرة هاي الفكرة من فترة كنا عم نتناقش بالادارة انو نخصص قسم من المنتدى للشباب يعني بس للتعارف واقامة فرص للمعرفة الجدية بين ابناء القرية ولكن لظروف توقف الموضوع 000واليوم قام السبيس بهذه الخطوة000
اما انو نترك الادارة الهن مهزومين لا 0000نحنا عنيد مابنترك بسهولة لهيك يورجونا بطولتهن ويجربوا يزيحونا 00بس بالكلمة الحلوة 000ولو سناء نحنا لسا شباب ماكبرنا هالقد بس المشكل اللي عم يطرحوه الشباب فرق الاجيال والثقافة 000
طيب اغلب الشباب اللي عم يكتبو القصص هني بالعشرينات واغلب الغزل والحب وكلام العشاق كتبوا هالشياب 000ومين نزل اغاني الجيل الجديد والقديم ومين كتب اشعار نزار قباني 000المشكل لمن بيكتب الواحد مابيقدر يرمي ثقافتوا وراظهرو يكتب اي شي فبدل مايتشجع الشباب ويكتبوا ويحاولو يناطحونا انسحبوا وهاي سلبية كبيرة بجيل الشباب 000ماخلق حدا شاعر او كاتب انما بلش بخطوات صغيري كثير وكتب كلمات يمكن ضحكوا عليه كل الحواليه بس دافع عن وجودو واعطى كل مرحلة حقها ---يعني كتبنا شي حلو وكتبنا شي موحلو بس ولامرة خفنا نطرح افكارنا 000ليش الجيل الجديد بيخاف يقول كلمتو بينا 000بس لانو خايف نتمالس عليه مع انو ولامرة عملناها 000بالعكس شجعنا كل شخص بيكتب واتحركشنا بكل واحد عندو مشاركات بس المشكل انو هوي لمن بيكتب بيعرف وخايف من الاداريين او المشرفين يعلقوا او ماتعجبهن كلماتو لانو بيعرفنا شخصي 00ليش هالمشكل مو موجود مع الاعضاء من خارج زيدل 0000طرحنا مواضيع اجتماعية حوارية كثير وكنا عم نستنى ردودكن وعم نحاول نتاخر بالرد حتى مايكون الرد الو طابع علمي او ثقافي معين حتى بعض المواضيع هربت قبل مانرد عليها ونحنا ناطرين منكن ردود 000حاولنا مايكون كل الردود بتمثل جيل بس للاسف فيكن خوف ليش مابعرف ---000كلنا مرينا بمراحلالحب والعشق ويمكن عادورنا اصعب من اليوم كلنا غازلنا واتغازلنا وكرهنا وحقدنا ولمن بيتركنا واحد بنحبوا نياس ونفكر انو هون حدود الكون ولمن نلاقي حدا يحبنا نقول هون حدود السما 000رجعنا لدفاترنا العتيقة لنكون قريبين منكن بس للاسف يمكن ماوصلتكن كل هالرسائل 000بس اكيد المشكل مو فينا فيكن لانكن مابدكن تستفادوا من تجارب الاقدم وخايفين تقولو تجاربكن 000

لهيك الدعوة موجهة للجميع خاصة الشباب 000اذا ماقدرتوا تعبرو عن حالكن بمنتدى ضيق صغير مثل منتدانا واذا بدو يضل خوفكم من خوض تجربة مشاركة الاجيال الاكبر موجودة انا اسفة قلكن انتوا جيل كسول بيحب يتلقى ويكون منفعل مابيحب يكون فاعل 000
ماحدا فينا لمن كتب اول موضوع اتوقع العالم يصير يعرفو كنا لمن نكتب نخاف ماحدا يقراها ماكنا ننتظر حدا يرد كنا ننبسط انو في حدا عم يقرا 0000
الخت دريم نايت 0000في كثير مواضيع كانت تمر بوقت الادارة او المشرفين موقادرين يردوا او يدخلوا على النت حتى لهيك في مواضيع انظلمت على حساب مواضيع 000
والمواضيع التافهة اللي كلنا يمكن نشارك فيها ابدا مو تافهة هاي مجرد صورة للتفاعل 000كيف فيك تتفاعل مع موضوع بيختلف عن ثقافتك وعن شخصيتك 000كنا نحاول نقول للشباب انو هذول هالشياب اللي بالادارة قادرين يكونو مراهقين مثلكن وبالمقابل قادرين يكونو جديين وقت اللزوم 000التفاعل الاجتماعي الو اكثر من شكل والمواضيع اللي بيشوفها البعض غير مناسبة اوقات بتكون ضرورية لتغيير الجو والطابع العلمي الثقافي البحت اللي بيشوفوه اغلب الشباب انو جاف وماعندهن قدرة يتعاملوا معو00
لهيك يارشا بين الوقت والوقت الواحد بدوا يمرر كم موضوع مو مقتنع فيهن لانو في كثير اعضاء غيرو هيك مواضيع عاملي عندهن هاجس 0000
نحنا مافينا نكون على طول مواضيعنا جدية ولافينا نكون على طول مزح وضحك 000حلو التنوع 0000بنحاول قدر الامكان ارضاء اغلب الاعضاء ولو كانت غير مطابقة لثقافتنا 000مولازم ننحصر بثقافة وحدة 00000
على كل هلق خلينا نجرب تتفاعلي مع الشباب اللي ماقدرو يتفاعلوا معنا ونحنا بانتظارهن 0000بحب وجه كلمة للجيل الجديد 000كونوا الحرية لكلماتكن لاتحبسوها لانو انتم من يحدد سجنها او اطلاقها 000والحرية والخوف لايمكن ان يجتمعا 000لاتخافو من كسر الحاجز مع الاجيال الاكبر وانسوا انكم تعرفونا بشكل شخصي 000انا عندما بدات كان اصراري ان اكون مريم ولست الدكتورة مريم 000لذلك تعاملت من هذا المنطلق وكتبت في كل الاماكن وتفاعلت مع اغلب الاعضاء لكن لاادري البعض لايستطيع ان يتعامل معنا الا من خلال معرفته بنا وخوفه ربما من نظرتنا له 000لكن هذا الخوف وهذا الخجل لايفيد--اذااردتم بناء شخصية لجيلكم انطلقوا من هنا وعبرو عن انفسكم ولاتعتقدوا اننا سنستسلم بسهولة وننسحب نحن جيل عنيد 000لكننا نرى فيكم عمرنا الماضي الذي نحن اليه فلاتحرمونا وجودكم الى جوارنا ----( رشا عواد) "لانو على فكرة في كثير ناس بتطلب انو ياريت تطرحو الموضوع الفلاني وأنا انطلبت مني عدة مرات" وجوابهن بكون أنو بحسو حالهن أقل قدرة عالتعبير من الأعضاء المشاركين بشكل دائم ومافينا نلومهن لانو اللي منعرفهن وفعلا هلأ عم يكتبو كلهن على مستوى علمي وثقافي يعتبر عالي نسبيا "مع العلم
هون حطنا الجمال 000اللي بيعاشر مثقفين بيحاول يثقف نفسو مو ينسحب 000بيحاول يستفاد وعلى فكرة الثقافة بتجي بعمركن وبعمرنا بتبلش تنحسر قدرتنا على القراءة والحفظ بتمنى تحاولو تكون اعلى مننا ثقافة لانو ظروفكن احسن بكثير من ظروفنا والثقافة مو كتب وبس في شي اسمو ثقافة اجتماعية بتجي من حوار الاجيال 00000
اما الاخ دريم نايت 0000الموضوع مو موضوع تطنيش :اولا عم نعطي فرصة لغيرنا يرد حتى ماتلومونا وتقولو مستواه غير
ومن جهة ثانية بحب كلكن يعرف انو مودائما عنا القدرة على الكتابة والمناقشة يمكن ظروف العمل ويمكن ظروف البيت ويمكن ظروف المنتدى والوضع العام بيلعب دور بس الاكيد انو موتطنيش 00الكل بيعرف انو مافينا غير حسام متفرغ هالوقت للنت وكلنا عنا شغل ثاني ووقتنا محدود واحيانا بيجي اعضاء بيحطوا مشاركات كثير مابنلحق نقرا الكل لهيك في مشرفين وللاسف كمان وقتهن موكافي 00بس عنا نعمة مليحة انو في اعضاء مخلصين لمن بيشوفو موضوع مو مناشب بيخبرونا ولمن بيكون موضوع بدو تفاعل بيتفاعلوا بدلنا 00000
وهاذ شي بنتمناه من الجميع
0لهيك شباب السبيس ورجونا حالكن 00000ولاتخجلوا وتخافوا لانو اللي بدو يعمر بدو يبدا باساس 000000وخلوا اساسكن من هون0000000000000000000
يمكن طولت عليكن الحديث بس لازم نسمع منكن وتسمعوا منا 000

Posted by: hosam abdulaziz

مرحبا جميعا
ما بعرف ليش سناء و الدكتورة(اولا بعدين فهمتي عليي بالرد الثاني) فهمتوا انه انا عمبعمل شي حملة دعائية للسبيس , او عمقلكم انه رح ينجح اكثر من المنتدى
السبيس و المنتدى هما برمجيتان القواسم المشتركة بينهم قليلة و بينهما انفصال تام.

بس انا طرحت موضوع دائما راودنا (وين الأعضاء الزيادلة ؟؟؟؟)
و مع دخول السبيس العمل , تبين انه عنا كثيررررررر مستخدمين للنت بزيدل بس هني بعاد عن المنتدى .
فخطر ببالي انه ليش ؟؟؟؟؟؟؟؟؟؟؟

بس انتم رديتوا عليي بطريقة بعيدة عن هدفي من الموضوع
و يمكن الرد الأفضل و اللي بمحله للأستاذ زياد له كل الشكر.

انا يمكن من رد الأستاذ زياد و نتيجة رسالة صديقتي تبلورت القصة معي اكثر و انا عندي تجربة شخصية فيها

انا وقت نشأ منتدى زيدل 2002-2003
كنت بعمر تقريبا 26 سنة , و وقتها كنت من اصغر الأعضاء و الشاطر يتمقطع فيي و بمزحات محببة لقلبي , يعني يا دوب كنت خلص حالي بيناتكم.
بقا كيف رح يكون موقف و شعور رواد السبيس اللي معظمهم بين 13 حتى 25 سنة حوالي 90%

هلق انقلبت الآية عليي
صرت انا بالسبيس حس بشعور اللي ما تجرأوا يكتبوا بالمنتدى
لأنه انا هنيك حاسس حالي ضايع بين هالشباب و الصبايا (متجوز و اكبر منهم كلهم و و و ) و صدقا متلبك
بس حاليا مضظر كون معهم لضرورات تقنية.

و بالتالي زبدة الحديث
انه السبيس هو بيئة شبابية , لبت تطلعت الجيل اللي ما كثير بعد بيحب الجد و المسؤولية

و المنتدى هو ساحة ثقافية بتتطلب ثقافة و جرأة الى حد ما ما بتتوفر غير عند البالغين

و الطفرات اللي حكا عنها الأستاذ زياد ما بتشكل مقياس او نسبة لناخذ فيها.

و بالتالي يا سناء
المنتدى مستمر و لا هو رح يأثر عالسبيس و لا السبيس رح يأثر عليه لأنه كل واحد اله استقلالياته و توجهاته.

اخيرا بقول للدكتورة مريم , أي واحد طبعا في يستخدم هالسبيس بهدف التواصل مع قرايبينه بالصور و بطريقة مميزة افضل من الجالري
لأنه صورك رح تكون مجموعة بخانة وحيدة و انت بتتحكمي فيها عكيفك
لهيك صحيح نسبة الشباب و الصبايا كبيرة , بس كمان في عدد مقبول سجلوا و بيستخدموا لنفس الغرض اللي انا و انت متواجدين فيه هنيك.

سمر بقلك شكرا من القلب عكل كلمة بتقوليها بحقي
و بوعدك رح اعمل جاهدا على ابقاء هالسبيس زيدل صدي فقط , و نحمي اخواتنا الصبايا من أي مضايقات خارجية

رشا و الألماسي الف شكر لمروركم و اهتمامكم

دكتورة انا رح انقل هالمشاركة للشباب و الصبايا على امل تعمل نتيجة او يكتبوا ردود و انا بوصلها

Posted by: mariam

حسام يمكن طرحت الموضوع بتساؤل والتساؤل بدو جواب 000وانا جاوبت على ردود رشا ودريم نايت بشكل خاص لانهن عم يحكو باسم الشباب اللي ماعم يقدروا يتواجدوا بالمنتدى والهدف بتصور واضح انو نحمس هالشباب ليدخلوا المنتدى ويخوضوا حوارات البالغين وياخذو منهم ويعطوهم يعني نحنا عم ندعيهم ليكونو بالمنتدى بدون مايتركو السبيس بس يسمعونا صوتهم مايخافوا من ثقافة البالغين والختيارية مثلنا لانو لومتنحتك بالاكبر منا ماكان عنا هالثقافة 0000لانو الكتب والجامعات وحدها مابتعطي ثقافة يمكن تعطي علم بس مو ثقافة 000هاذ الهدف من الرد وبتصور الشباب فهموه مليح 0000حتى نطور ثقافة الشباب لازم نشجعهون يكونو جنبنا مايخافو من الحوار معنا 000لانو نحنا بيوم من الايام كنا محلهن وبنعرف شو شعور واحد عم يناقش ويحاور شخص اكثر منو اطلاع 00000
هاذ الهدف من الرد لاتحورو لشي ثاني لانو انا قلتلك انو ماني ضد السبيس وانا من الاوائل اللي سجلوا فيه 0000

Posted by: بنت زيدل

مرحبا لكل أعضاء موقع زيدل
انها أول مشاركة لي معكم وبما أنني "بنت زيدل" لذلك لم أطلب ترحيب ولكن يجب أن تعرفو رأيي ورأي جيل كامل وموقفنا من المنتدى والسبيس.
بكل بساطة لا أرى مشكلة بين المنتدى والسبيس وأنتم من اخترعها او ابتدعها ولا أعرف لماذا؟؟؟؟
الاستاذ زياد اختلاف الأعمار عنصر مهم جدا ليس بالنسبة للمنتدى ولكن بالنسبة للسبيس اذا لامشكلة بالنسبة للمنتدى. السبيس جمع جيلا واحدا "تقريبا" أنا أتابع كتابات الأعضاء من جميع الأعمار, لابل أستمتع ببعضها ولكنها ليست كافية لتعبر عن جيل معين فنحن بحاجة للتواصل مع أبناء جيلنا في هذه السن الحرجة. هل تعلم ماهي النسبة المئوية للشباب والصبايا بعمر تامي يستطيع او تستطيع أن تعبر وتناقش بشكل مقنع؟؟؟
بكل المنتدى هناك حالتين من زيدل استطاعتا اثبات الوجود بينكم وهما "تامي عيسى , رشاعواد" وأعرفهما لأنهما تستخدمان اسماؤهما الحقيقية حتى لا أظلم البعض.
العزيزة سناء, مثلي مثل كل اللذين يتابعون المنتدى يشهدون لك بكتاباتك وبثقافتك الواسعة ولكني تفاجأت من موقفك بالنسبة للسبيس واعتقدت أنك ستكونين من أول المسجلين او حتى أضعف الإيمان المهنئين لأن السبيس بالنهاية هو عبارة عن ملحق " اذا صح التعبير" بموقع زيدل ولا أعتقد أنه سيؤتر على نسبة المشاركات في المنتدى ولكن لست أدري لماذا قرأت بين سطورك شيء من الانزعاج الواضح الفاضح وموقفك العدائي الساخر من السبيس وكأنك تحاولين تصغير اهميته "مهما كانت صغيرة". أما بالنسبة للعضو الذي "ذهب مع الريح" ابحثي عنه في السبيس فربما تجدينه هناك.
الدكتورة مريم, لم تتركي ثغرة ولم تجدين لها اجابة ولكني أود لو أنكم فعلا تنشؤون منتدى خاص بالشباب وتسلمو مسؤولية الإشراف إلى أحد الشباب أو الشابات الذين يعرفون كيف نفكر وبنفس الوقت يعرفون كيف يديرون زمام الأمور.
شكرا لكم

Posted by: Desert rose

اقتباس:

العزيزة سناء, مثلي مثل كل اللذين يتابعون المنتدى يشهدون لك بكتاباتك وبثقافتك الواسعة ولكني تفاجأت من موقفك بالنسبة للسبيس واعتقدت أنك ستكونين من أول المسجلين او حتى أضعف الإيمان المهنئين لأن السبيس بالنهاية هو عبارة عن ملحق " اذا صح التعبير" بموقع زيدل ولا أعتقد أنه سيؤتر على نسبة المشاركات في المنتدى ولكن لست أدري لماذا قرأت بين سطورك شيء من الانزعاج الواضح الفاضح وموقفك العدائي الساخر من السبيس وكأنك تحاولين تصغير اهميته "مهما كانت صغيرة". أما بالنسبة للعضو الذي "ذهب مع الريح" ابحثي عنه في السبيس فربما تجدينه هناك.

كنت اود لو من تكتب هي بالفعل بنت من زيدل ..ولكن للأسف حلمي لم يتحقق .
أنتِ قرأتِ من مفهوم ...وأنا كنت قد أرسلت الرد من مفهوم آخر .
لاأعلم مالذي دعاكِ للتخفي تحت إسم مستعار ..الأمر الذي يضعف من قيمة ردك حوالي 75 بالمئة ...ويخفض من مستوى أن تكوني ممثلة لبنات زيدل والجيل الصاعد بنسبة 100/100 .
..
فاتك أيضاً ياعزيزتي اسماً حقيقياً آخر أثبت وجوده هي الصديقة العزيزة سمر ضاحي ....لاأعرف إن سقط سهواً ...أو أن سمر ليست من الفئة المعنية؟؟؟
..
أما عن العدائية والسخرية التي تكلمت فهذا الأمر يخصني جداً ولي كامل الحرية في أن أعبر عن شيء يعجبني وآخر لا بالطريقة التي ارى فيها تهذيباً من وجهة نظري لامن وجهة نظر الآخر ين مع احترامي الشديد لما يفعل الآخر . .
..
مسبقا ًنحن نعلم أن الممالك لاتدوم لأحد ...وهذه المملكة... مملكة منتدى زيدل الخضراء التي ُأنشأت يوماً بسواعد قوية وفكر نيّر وبصبر وجلد.... لابد أنها زائلة بيوم مع من بناها وتبناها ...لذلك ومن هذا المفهوم لاأرى داعي للإنتظار ...وسأقترح عليك أمراً اريد جواباً عليه لاإهمالاً :

مارأيك يا ابنة زيدل من خلال اقتراحك بانشاء منتدى آخر والذي لاداعي بأن نخلق له رديفاً ... أن تجدي بديلاً عن سناء في المنتدى الحالي لتسلم دفة القيادة من فئة الشباب الذين تتحدثين عنهم....!!!!(( ربما تكوني أنتِ مثلاً ))
وصدقيني لو تأخرتي بإيجاد البديل ستكوني من الخاسرين وستكون الجولة الأولى الرابحة من صالح من أسس منتدى زيدل ومازال على الوعد والعهد .......لذلك أ نصحك بالإستعجال ولكم كامل محبتي واحترامي ولكم كل ماتريدون .

تحياتي اليكِ ....بانتظارك

(( رح كون ممنونة إعلن إستقالتي بكرة اشالله

))

زهرة الصحراء

Posted by: mariam

اهلا بروح الشباب بيننا 000
اهلا بنت زيدل 0000اعتقد ان المنتدى الاجتماعي اصبح المسؤول عنه سمر ورشا 000يعني سلمنا شباب مو هيك 000بس بعد تجربتي الشخصية مع المنتديات لايمكن تسليم منتدى كامل للشباب فقط ليس انتقاصا في قدراتهم لكن لقلة خبلراتهم في التعامل مع الاخريت0ن وهذه لايمكن ان تكون الا بالخبرة والزمن 000اما انتم فلا شيء مطلوب منكم الا المحاولة وليس المطلوب الاقناع بالنقاش المطلوب فقط اظهار رايكم بالتاكيد الاقناع لايمتلكه الكثير من المحاورين حتى لو كانو بعمر الكهولة 000هناك الكثير من اعضاء المنتدى بعمر تامي ورشا ولديهم مشاركات رائعة والمشكل اننا نعرف الكثير من شبابنا لديهم هذه القدرة ولكنهم لايملكون الجراة وهذا ما نطلبه منكم 000اثبتوا الجراة في طروحاتكم دون الخروج عن نطاق الحرية في التعبير 0000
اما سناء فالاستقالة غير مقبولة ولايرضاها حتى هذه الفئة من الشباب 000لكنهم كما يقال بعمر المراهقة الواحد جلدوا مابيوسعوا لهيك دائما بحب يهرب من رقابة الكبار 0000ننتظر الشباب ليعبروا عن انفسهم

Posted by: talal_alachkar

منتدى السيبس كنت قد رأيته للمرة الأولى منذ بدايات موقع زيدل و كنت أتمنى لو أن وسام وضعه في الخدمة منذ ذلك الوقت ، إلى أن جاء منتدى زيدل كان قد وفى بالغرض المطلوب .
ولكن المنتدى شيئ و السيبس شيئ كما فسر البعض و هذا واضح حتى لصغير عمره 5 سنوات .
ولكن بالسيبس تأخذ راحتك أكثر و تكتب بحرية و من دون مسؤلية أكثر و تستطيع أن تكتب بأسماء عدة لشخص واحد من دون ان ينتبه أحد عليك لأنه ليس هنالك رقيب .
أما المنتدى برأي هو أكثر جدية و وقار و له خصوصية محترمة و الذي يفعل ما يفعله الأخرون في السيبس لا يجد مكان له في المنتدى .
و المنتدى من خلال إدارة ناجحة تستطيع أن تظبط و تعرف من يدخل أو يستخدم عدة أسماء ليجادل بها و يناقش بها و إن دل يدل على ضعف شخصية ربما يستطيع ان يخفيها عن نفسه فقط و ليس عن الأخرين .
الله يخليلنا الأي بي الي كشف رؤوس كبيرة و نصر رؤوس صغيرة .
حسام شكرا من القلب لأنك تعبت و سهرت الليالي على صنع هالجوهرة النفيسة للشباب .
وشكرا لكل الي ساند عمل حاز على إعجاب الأكثرية .

طلال

Posted by: hosam abdulaziz

اقتباس:

ولكن بالسيبس تأخذ راحتك أكثر و تكتب بحرية و من دون مسؤلية أكثر و تستطيع أن تكتب بأسماء عدة لشخص واحد من دون ان ينتبه أحد عليك لأنه ليس هنالك رقيب .

غلطان كثير طلال
السبيس حاليا مراقب قد المنتدى 100 مرة (لا اعني ان المنتدى غير مراقب)
لكن السبيس لا يرحب الا بالعضو الزيدل او الصدي عموما, بينما المنتدى ساحة مفتوحة لكل الناس و في المنتدى كثير من الأعضاء يستعملون اكثر من اسم (بتشك بهالشي )
و اضف لذلك فالسبيس هناك اسم العضو او صورته يجب ان تعبر عن شخصه او (النبذة عن العضو) و من لم يظهر نفسه باحدى الطرق الثلاثة فمصيره الحذف
و سياستنا نحن ضد العضو المجهول الهوية

لذلك انا اغالطك تماما بهذه النقطة

Posted by: ابن الحياة

تحياتي للجميع وآسف عالانقطاع بسبب الدراسة..
بالبداية مشان السبيس برأيي ما صار الاقبال عليه عن عبث لأنو أغلب الشباب اللي سجلوا مثل ما شفت كان عندهم تجربة سابقة على (سبيس فيروزة) واللي فيه نسبة كبيرة من شباب زيدل (بالمئات) وبصراحة وبدون زعل مشان السؤال عن الاتجاه للسبيس وعدم الاتجاه للمنتدى هوي أنو الشباب بيلاقوا مجال أكبر للتواصل المباشر مع أشخاص بيهموهم والبعض من اللي مالهم خلاق عالمواضيع الثقافية بيلاقوا السبيس مجال أوسع لطق الحنك..!

ومشان المنتدى الشبابي بسلامة المشرفين اساتهم كلهم شباب و مو مهم نكون نحنا (كشباب صغار) مشرفين لحتى نكون فعالين.. المهم نثبت وجودنا بمواضيعنا.. والفهم والوعي طبعاً مالو دخل بالعمر..

وشكراً

يوسف

Posted by: hosam abdulaziz

اقتباس:

بيلاقوا السبيس مجال أوسع لطق الحنك..!

انا بدي اسألك انت سجلت او لأ ...؟؟؟؟؟ بتصور اي مو هيك
فهل بتقبل تقول عن دخولك للسبيس هو بهدف طق الحنك ؟؟؟؟؟
معليش خلي شوية احترام لكثير ناس سجلت و ممكن تسجل باعمار واعية و هدفها تتواصل و لو بالصورة و الكلمة البسيطة مع اقربائها او اصدقائها بالخارج. و رجاء ما تحكم من تجربتك في اماكن اخرى
كل منتدى اله ادارته و كل سبيس اله سياسته
ياما منتديات فيها طق حنك و حر اكثير من اي سبيس
بس ما تاخذ منتدى زيدل مقياس الله في ادارة و مشرفين و اعضاء واعيين و بيحاربوا الكلام اللي منه بمحله.

Posted by: talal_alachkar

أخ حسام
لقد أسعدتني بهذه المعلومة لأنه يجب أن يبقى منتدانا راقي و جدير بأن يحافظ على كتابه و قرائه و من خلال معلومتك سوف تتعزز الثقة للكثيرين و لخرين لم يسجلوا سوف يسجلوا لأنهم لن يجدوا مكان أو بيت أمن أكثر من زيدل .

طلال

Posted by: بنت زيدل

بكل بساطة أنا ابنة زيدل أبا عن جد وإذا لم تستطيعي أن تردي على ماكتبته على الأقل ضمن حدود وروح الشيء المكتبوب فلا داعي لاتخاذ اسمي المستعار كذريعة لتقللي من شأن ماكتبت. كل منا له حريته بذكر اسمه أو عدمه ولكن ذلك لاينقص من حريته بممارسة حقه بالرد. أنا أعتز بانتمائي لسورية وتحديدا لزيدل بغض النظر عن النسبة المئوية لتقييمك له. ولكن هناك علامة استفهام حول اسم ورد بمشاركتك وليس له علاقة بما كتبت او الموضوع من اوله وهو "سمر ضاحي" والجواب على تساؤلك ان سمر ليست من الفئة المعنية اذا كان الأمر يهمك لذلك الحد.
يظهر انك لم تفهمي قصدي, عزيزتي يحق لك أن تسخري كما تشائين وتكتبي بالصيغة التي تناسبك مهما كانت ولكن تذكري شيئا واحدا فقط وهو أن تبتعدي بسخريتك عن أهالي زيدل والان انتي تفهمين علي تماما.
زيدل متميزة بأهلها الساكنين فيها. متميزة بمغتربيها الذين يزورونها كل عام
على فكرة, عصر الممالك ولى منذ زمن لذلك دعينا نبتعد عن الاستعارات والتشبيهات. الاستمرارية تعني التجديد والمحافظة على القديم . انتم جددتم طاقم المشرفين وهذا دليل على الرغبة في الاستمرارية ولكني أعتقد أنكم حافظتم على الإدارة وهذا دليل على رغبتكم بالمحافظة على من بدأ معكم . أنا يكفيني أن أكتب رأيي بكل حرية وشفافية وبدون قيود تحد من حرية قلمي وأنا أعتقد أن اسمي المستعار سيساعدني على ذلك ولي كامل الحرية .
اقتراحي عن انشاء منتدى للشباب هو تأييد لفكرة ذكرتها الدكتورة مريم لذلك ردي عليها هي وليس علي.
واخيرا وليس اخرا, نحن نتناقش ولسنا في معركة لأنه لو كنا في معركة وحتى ولو كنت خاسرة او رابحة سيكون هنالك خاسر وحيد في كلتا الحالتين وهو منتدى زيدل مع العلم أن الأمم لا تموت بموت حكامها ولكنها تفنى بموت شعبها.

Posted by: mariam

على مهلكن شوي 0000مو هيك الحوار يابنة زيدل000000000000000000عذرا نحن بالادارة ليس رغبة منا بقدر واجب نقوم به اولا لاجل زيدل وثانيا لاجل اصحاب الموقع 000ونحن لسنا بحكام ولسنا في عصر الممالك 000فعذرا الحوار بهذه الطريقة غير مجدي والاساءة للادارة غير مقبولة 0000ابتعدتم بالاجابات كثيرا 000فان كانت الادارة لاترضيكم لايعني ذلك انها سيئة فلااحد يمكنه ارضاء الجميع واعتقد اننا سنبقى كما نحن ولن يتغير قي اسسنا شيء 000فعذرا عليكم تحملها كماهي ريثما تنتهي فترة ادارتنا لاننا لن نفكر بتركها حاليا 0000ارجو ممن له تعليق على الادارة ان يرسل رسالة خاصة لنوضح له بعض الاشياء0000عذرا بنت زيدل ماهكذا تكون الردود00000

Posted by: suher issa

مرحبا للجميع الله معك حق يا رشروش بأن الدنيا قايمي قاعدي هون
كل هدا راح عني وما الي خبر بس اسفة بسبب انشغالي بعيد ميلادي ما اغدرت فوت وشارك ههههههه
شكرا لرشا الخبرتني
وسوف اشارك
لم اجاوب على حدا ابدا ولم اعلق على احد ايضا
سوف اتكلم عن رأي الشخصي واتمنا ان لا تفهمو غلط كلامي
انا دخلت السبيس ايضا بسبب احببت ان ارا كيف يعمل وما هو من باب الفضول
ولكن الحقيقة لم يشدني ابدا بسبب لم اراه يليق بي لان احسن حالي ان كبرنا على هيك قصص
واعتقد ان كثير ما احبه واحترم رأيه ولكن هدا لا يعني ان كثير من سجل لان يحب ان يشترك ولكن بسبب الفضول فقط
يعني الشيء الذي لفت انتباهي ان يقارنوه بالمنتدى
للاسف كثير من نسا ان المنتدى كان لكثير من الناس شي جميل وكثير مرق علينا ذكريات حلوة ولم ننساها ابدا رغم ان كثير مننا لم يشتركوا بعد ولكن هم يقرأ ما نكتب دائما
لم ننسا كم تعرفنا على عالم جيدة هي الان من احسن الاصدقاء
بالنسبة ان المنتدى ليسا الكثير يخاطوروا بأن يشتركوا ويحاوروا هي تأتي حسب الشخص وكيف يفكر وما قدرته ان يشارك بمواضيع مهمة ومع اشخاص معها الثقافة العالية
ولكن احب ان اقول شيء
منذ 4 سنين بالمنتدى اعتقد ان اصغر بنت كانت رشا عواد ورغم صغرها بالسن تدخل وتشترك معنا وتخاطب اشخاص مثقفة اشخاص بمثابت اهلها ولكن كانت لها الجرأة القوة الشخصية بأن تدخل
ام انا التي عربيتي كانت تحت الصفر وكنت احاور اشخاص معها الشهادات العالية ولم اخاف رغم انني اعرف اين ادخل ولكن هي تأتي حسب الشخصية
للاسف اننا نعيش ببلد له تقاليده وكثير من يخاف بأن يدخل ويشترك ويكون له كلمة الحق وبالذات البنات انها تخاف على سمعتها وتخاف على اراء الناس وما يفكر الناس عنها
مجتمعنا ليسا حر التفكير وهو محجوز بين قطار الخوف الذي يمنع اي انسان التصرف ان يعيش بحريته الكاملة حتى رغم ان نخرج خارج بلادنا ونعاشر اناس متحررة التفكير ونعمل ونكون مجتهدين بعملنا وبدراستنا ولكن للاسف عاداتنا و تفكيرنا هو شرقي شرقي
لماذا لا نتعلم قليلا ما تملك الغرب من افكار وحرية
لماذا نفكر ان كل ما بالغرب هو فساد وخطأ
لماذا لا نحاول ان نحافظ على عادات جميلة من بلدنا وان نتعلم على عادات جميلة بالغرب
كل هذا الكلام هو تابع لشيء اسمو خوف التصرف
لماذا نحن نخاف ان ندخل باسمائنا ونكتب ما نريد ان نتكلم
لماذا ندخل باسماء مستعارة ونقول ما نفكر
هنا منتدى لديه الكثير
وعديد من المواضيع
منها السياسية
منها الفكاهية
منها المجتمع
وووووو
صحيح لجيل الحاضر ليسا بوسعه ان يدخل ويكتب بكثير من هده المواضيع المتعددة والمتشكلة
سوف اوجه رسالة لجيل الشباب
لا تخافوا ابدا بأن تدخلو وتشاركو بالمنتدى فهنا كثير من الناس لديها الاستواعب الكامل بأن تناقش عمر ال 10 سنين لجيل ال 100
بالعكس ادخلو و استفادوا ولم تخصروا ابدا
كلنا مرقنا بفترة بحياتنا ونفهمكم وقد عشنا جيلكم ونفهمه
انا بالنسبة لي المنتدى علمني الكثير وانني ادين له ولكثير من الاصدقاء التي تعلمت منها الكثير والكثير لم انساه ابدا حتى رغم لم اكتب كثير ولكن سوف اكون شاكرا له ولجميع من علمني حرف بحرف بهدا المنتدى
السبيس لم يعني لي بشيء ابدا غير انه عمل جميل للجالية الزيدلية وللذي يهمه الامر فليسا غلط ابدا لان لم ننسا ان نشكر حسام على فكرته ولجهده والله يعطيه العافية
ولكن اسمحلي بان اقول السبيس لم يغلب المنتدى وما هو المنتدى وما فيه المنتدى من كتابات لاشخاص غالية ولذكريات قضيناها بالفرح والحزن وكم تعرفنا على انسان طيبية ونعتز فيها
وشكرا لكم

Posted by: Kinan

يا شباب و الله القصة مانها مستاهلة توصل لهون يعني القصة و ما فيها كانت سؤال بسيط بعدين وصلت لا زعل و قتال و شي ما كان لازم من الاساس ... مع احترام رأي الجميع

السبيس ما رح ياثر على المنتدى لأنو كلشي و الو شغلتو يعني السبيس و حسب ما بعرف بجميع المواقع اللي بيقولولها سبيس انو موقع تعارف و صداقة بالاضافة لاشياء ثانية بس هوي بالاساس موقع تعارف و هي شغلتو الاساسية
اما المنتدى هوي مكان للحوار و تبادل الافكار و النقاش

يعني ما بعرف ليش عم تجمعو هاذ بهذاك طيب اذا صار وحدى كتب بالسبيس شي مقالة ...منقول انو صار منتدى ثاني ؟؟؟؟ او عم ياثر عالمنتدى
أنا ماني حاسس انو هالسبيس عم ياثر على المنتدى بأي شي لأنو كل اللي عم يكتبو هني بالاصل ما كانو يشاركو بالمنتدى
طبعا ليش ما عم يشاركو هي الها اسباب كثيرة و بتصور انو انذكرو حتى هالسؤال انطرح بالسبيس و كان الو اجوبي كثيرة عليه
هلق شو ما كان السبب و شو ما كان الغرض من طرح السبيس بس ما لازم توصل العدائية لهلدرجة
نحنا هون كلنا اخوة و منحب بعض... بغض النظر كنو انا أصلي من زيدل أو لاء يعني مو ناقص غير نعمل حرب طائفية هههههههههههههه

انا من جهتي لا عم شارك لا هون و لا هونيك ووقت اللي بدي شارك ماني خايف من حدى مع احترامي للكل لانو وقت بكتب ضمن الاصول و ماني غلطان ليش لخاف من المشاركة لاني عم عبر عن رايي و حتى لو المستوى الثقافي الي اقل بكثير من الاعضاء الموجودين بس بتصور انو يعني انا وقت اللي بدي شارك ما ضروري فوت و بلش اكتب بالفصحة و اعتمد كلمات معقدة هالمنتدى لزيدل و انا بدي احكي مثل ما منحكي بزيدل فيها غلط شي ووقت اللي بعرف اني ماني خرج شارك بشي موضوع بفضل القراءة و بسس (يعني من مشاركاتي المقتلي بعضهي ههههههههه)

على كل حال بتمنا ما حدى يزعل مني بس عنجد الشي اللي وصلتولو بهالموضوع صار بدو حل و انشالله المحبة بتدوم بيناتكون على طول

مع احترامي للجميع

كنان عبد العزيز عبد العزيز

Posted by: mariam

ولووووووووووو كنان هاي مناقشة او مجادلة بالمعنى الدقيق والهدف منها تحميس بعض الاعضاء اللي هلاتهن مثل القمر يعني بالشهر او بالشهرين بيتذكرونا بطرطوشة يعني مليح نتحركش ببعض هالشباب بس المجادلة احتدت شوي شو صار كلنا حباب واصحاب وكلنا هدفنا واحد بس كل واحد عبر عن رايو وبشكل مختلف مرة بحدة ومرة بلطف 000ايه شوصار يعني 000
اكيد السبيس مابيقدر ياثر عالمنتدى بشي بس فكرة وانطرحت00000

Posted by: ابن الحياة

اقتباس:

انا بدي اسألك انت سجلت او لأ ...؟؟؟؟؟ بتصور اي مو هيك

عزيزي حسام لا تتصور لأنو حضرتك ما قبلتني وحذفتني تلقائياً بدون ما تعرف هويتي..
وما كنت عرفان أنو السبيس وحتى لو كان بموقع زيدل هو حكر على أهل زيدل..
خبرتني برسالتك أنو حذفتني لأنو ما كتبت اسم قريتي ولا ذكرت اسمي الأصلي..
بصراحة أنا سجلت باسمي (ابن الحياة) لأنو بيعنيني وبيعبر عن هويتي أكتر من اسمي الحقيقي وهاد نقاش طويل.. وبصراحة كتبت القرية (ســــــــــوريا) لأنو انتمائي سوري مو (زيادلي)..
ولو أنك مستني شوي لحتى خلص فحوصة و افضى حط صورتي مشان تعرفني كنت بتعرف هويتي الأصلية وأني من زيدل وبتهمني زيدل وموقعها أكتر من كتير أشخاص بالسبيس..

اقتباس:

فهل بتقبل تقول عن دخولك للسبيس هو بهدف طق الحنك ؟؟؟؟؟

عزيزي ليش بتاخد الكلام مجتزأ فيك ترجع تقرا ردي وتشوف أنو فيه كلمة (البعض) يعني ما عممت ولما حكيت هيك ما كنت عم اكذب وماني ساحب كلامي.. وإذا فكرت سجل بالسبيس فمو لطق الحنك متل البعض بل (مشان اتواصل مع أشخاص بيهموني) متل ما أنا ذكرت.. ولأني من محبي موقع زيدل والمخلصين للمنتدى.. وفيك تراجع مشاركاتي وتشوف إذا كنت عم طق حنك عالمنتدى ولا عم قدم ردود بناءة..

اقتباس:

بس ما تاخذ منتدى زيدل مقياس الله في ادارة و مشرفين و اعضاء واعيين و بيحاربوا الكلام اللي منه بمحله.

ما بدي حدا يقلي عن المشرفين وكلهم على عيني وراسي بس وقت يكون الكلام عن جد مانو بمحله وقتها يحاربوه..

وبالأخير يا عم مشان ما تزعل ما رح ارجع سجل بالسبيس إذا كان حكر على بعض الأشخاص واعرف أني بفتخر باسمي (ابن الحياة) وبأمتي (ســـــــــــــــــــــــــــــــــــــــــوريا) وأنا ما بدي اللي ما بدهم يقبلوه..
وما تواخزني..

ابن الحياة (يوسف فاعور)..

Posted by: talal_alachkar

الله حي أبناء زيدل و الي بخافوا على زيدل و بيحرصوا على أنو زيدل يكون مرفوع راسها برجالها مو بحجارها .
أخي يوسف فاعور بحكم في قرابي بيني وبينك من ناحية ستي الله يرحمها
رح أدخل بس لاتفكر أني عم دافع أو عم رد بدل حسام لاء أبداً لنو أصلاً ماصار في خلاف لحتى ندافع عن حدا و لأنو نحنا هون كلنا عيلة وحدة .
من خلال تجربتنا بالمنتدى الأولى كانت رائعة جداً و حتى الان هي أكثر من رائعة ، لكن دخول بعض الأشخاص بشخصيات وهيمة أو بأسماء مستعارة بدأو يناقشون و يحاربون إن صح التعبير و يخرجون عن وحدة هذه العائلة الزيدلية التي ضمت في أحضانها أشخاص من مختلف العالم .
لذلك لاتفهم حسام غلط و أظنه سوف يعلق على ذلك ، لكن انا هنا أكتب لك بأسمي أنا .
لذلك أطلب من أن تسجل بأسمك الحقيقي لأنك بذلك تكون قد أعطيت والديك حقهم عليك لأنهم هم من أسمياك بهذا الاسم و انت فخور به كيف لاء وهو إسم للقديس يوسف عليه السلام .
بحكم القرابة و العائلة أطلب أن تعدل عن قرارك و انت مرحب بك في موقع زيدل بما يضم .
طلال سليمان الأشقر

Posted by: hosam abdulaziz

اول شي انا تشرفت بمعرفتك و لو انه عن طريق النت و يمكن ان شفتك اعرفك مباشرة , بس بالأسم عذرني ما كنت بعرف فيه.
هلق انت بتعتبر سورية قريتك الكبيرة, هذا شي انت حر فيه و حر بانتمائك و ايمانك الفكري او العقائدي و هذا مانه هدف نقاشنا.

بس انا رح حكيك من باب خبرة 5 سنين مع موقع زيدل بكل قسم فيه
رح بلش بالاهداءات اللي بتشوفها بالصفحة الرئيسية
كان اول شي مين من كان يفوت يكتب اي اسم و اي اهداء بدون اي مراقبة , لوقت ما صرنا نتلقى اهداءات شي بيسوى و شي ما بيسوى و منا البايخ و منها في قلة ادب
و كثي اهداءات باسماء مستعارة منه معروف لا مين موجهها و لا لمين مهداة.
بعدين طفح الكيل و اضطرينا نعمل تسجيل للاهداءات بيتفعل اول مرة و بعدين صاحبه بيصير عنده صلاحية يهدي دائما بدون مراقبة او انتظار تفعيل المراقية
و بتصور نجحت هالسياسة لأنه معد شفنا اي تخبيص بالحكي و الأسماء كلها معروفة بنسة 95%
و يمكن عبودي بيشهد انه من شي جمعة طلب سجل بالهداءات و رفضت فعله عضويته(ما عرفته) لحتى اتصلت فيي الدكتورة مريم و طلبت مني هالشيء
طبع انا فعلته فورا لأنه تأكدت من صاحب الهوية.

التجربة الثانية مع الفوتو جالري
كمان كان اي شخص يسجل و ينزل الصور اللي بده اياها
انا شخصيا ما كنت رضيان عالوضع لأنه بفوت على معرض صور عأساس انه زيدلي و بتفاجئ بصور لناس ما بنعرف لا مين هني و لا منين و كانه يستعملوه من مبدأ مكان

بيحملوا عليه صورهم و بيبعثوا الروابط لقرايبينهم و هيك بيستفيدوا من موقع زيدل لأغراضهم الشخصية
استمر الوضع ليوم من الأيام اتفاجئ باحدى الصديقات من امريكا باعثتلي رسالة بتقلي فوت شوف هالصور بالفوتو جالري
و اذا بمجموعة صور لبنت عارية تماما .
عاد هون بدون تردد قمت بحذف جميع العضويات اللي منها من زيدل و وضعت قيود عالتسجيل بحيث لازم يفعلها المدير ليصير قادر عالتحميل
و نحن عمليا ما بنفعل غير الأسم الكامل و من زيدل.
كمان انا بعتبرها ناجحة بحيث هلق ما بتفوت عالجالري الا و بتلاقي صور لناس من زيدل.

التجربة الثالثة مع المنتدى
كمان كان التسجيل مفتوح لوقت ما صار ناس يسجلوا باسماء (فيها قلة ادب) و بعدها اضطرينا لمراقبة التسجيل

و كون اكيد لو المنتدى ممكن يقوم و يستمر بجهود ابناء القرية كان أحب عقلبنا انه يحافظ عهالطابع.
بس للاسف عنا مستخدمين كثر للنت بس هني من صنف القراء.

و هلق اجينا لتجربة السبيس
فأنا ما بدي استنى للغلط يصير و بعدين قوم بتداركه , و وقتها بيكون السبيس اخذ سمعة عاطلة و البنات فقدوا ثقتهم فيه
و انت بما انك طرحت اسم سبيس فيروزة لازم تكون سمعت و عندك اطلاع عالمشاكل الكثيرة اللي صارت فيه و الأسماء العجيبة الغريبة
و الصور الفاضحة لبعض الأعضاء.

بالسبيس عنا في بنات اخوة النا و من ضيعتنا و واجبنا نحميهم من اي محاولة اساءة الهم , لحتى تظل الثقة بالموقع و بكل اقسامه

و يا يوسف اذا اي عضو زيدلي فايت عموقع zaidal.com و ليس syria.com
فلازم يلاقي شيء من ضيعته ناس بيعرفهم , و اللي بيحب سورية في كثير مواقع سورية الأنتماء بتيح هالامر اله او ان غلطان؟؟؟؟

بالنسبة لعزوفك عن التسجيل فهذا شيء بيرجعلك

بس لازم وضحلك انه انا ما رفضت تسجيلك كونك سجلت بان الحياة
بالتسجيل في خانة البلد (و محطوط سوريا) و الخانة الثانية (المدينة او القرية) فما معقول تخجل من كونك ساكن بزيدل و تكتبلي سورية.
خلينا نكون منطقيين و نفصل بين انتمائنا الفكري او وطنيتنا و بين موقع زيدل و توجهاته .

انا رح كرر للمرة يمكن الـ100 , التسجيل مفتوح لكل الناس من زيدل و القرى المجاورة و غير هيك رح اعتذر عنه مبدئيا ربما
و لما كون متصلب برأي مع انه انا ما قيدت التسجيل الا بعد طلب البعض (اول اسبوع كان مفتوح التسجيل)
رح قوم بطرح تصويت عأعضاء السبيس و اسألهم شو بيفضلوا (الانفتاح الشامل) او (الزيدلية)

أخيرا بوجه دعوة الك للتسجيل معنا بالسبيس باسم (ابن الحياة البلد سورية القرية زيدل) و انت عالرحب و السعة, و ان ما حبيت فاكيد باحترم رأيك.
بتمنى ما تفهم اني عم اتحكم بالسبيس و اني متملكه انا بس اتطمن عسير عمله رح سلمه اكيد لقيادات شابة لتدير اموره و تهتم فيه.

طلال شكرا لمرورك , انت من اللي عاصروا الموقع من بدايته و بتعرف منيح المشاكل الموجوده بعالم النت.

Posted by: tony daboul 21

أول شي شكرا لكل اللي دخلوا بهالحوار , بس رح قول للجميع انكن بصراحة كبرتوا الأمور اكثر ما بتستاهل بكثير يعني مافي داعي لهالمناقشات المشحوني بيناتكن , لأنكن ابتعدوا عن الموضوع الرئيسي وهوي السبيس والمنتدى .
اأنا برأيي أنو السبيس فكرة حلوي كثير وخاصة لشباب والصبايا اللي برات البلد أي المغتربين .
وكل شي ياتشباب الو اهلو , يعني المنتدى الو محبينو والسبيس الو محبينو , بس في التساؤل اللي انطرح بخصوص المدونات بالسبيس , المدونات اللي عم تنزل بالسبيس فكرتها حلوي وململمي , يعني هالصبايا الصغار والشباب عم يردوا ويناقشوا بطريقتهن اللي مابتتناسب مع المنتدى ممكن , لأنو اكيد مارح تجحي شي بنت ومع احترامي لكل الصبايا على المنتدى وتقعد تناقشلي حسام مثلا بمواضيع اجتماعية مكبرة يعني , أكيد هادا شي مو ممكن , بس بالسبيس صار انو على مبدأ " على قد بساطك مد رجليك "
وشكرا الكن , واللي عندو أي تعقيب على حكيي يحكي .

وبالنسبة للأخ يوسف فاعور , يوسف الظاهر أنت مو فهمان القصة أبدا وليش حسام مافعلك حسابك ,
القصة انو نحنا مابدنا بالسبيس يدخل شخص غريب كثير عنا يعني بدنا نحافظ على مجتمع السبيس اللي بيربطنا مع بعض بشريط اسمو المجتمع الصدي يعني " زيدل فيروزي الفحيللي وووو " يعني اكيد كلكن فهمتوا عليي , منشان هيك يايوسف يعني أنت دخلت سجلت باسم " ابن الحياة " ومع احترامي لحبك لهالاسم طبعا , أنت مانك حاطط شي يدل على شخصيتك أبدا لاصورة ولاشي ولا أنك من زيدل , وطبعا فيك تحط انك من "سوريا - زيدل " , شو هيك مابيمشي الحال , ابقا رجاء يوسف تقدر الوضع وماتعطي القصة اكثر مابتستاهل أبدا , وطبعا نحنا هون كلنا أخوة ومافي داعي نظزعل من بعض .... وبتمنى شوفك معنى بالسبيس عن قريب ...............
&&& TiTo&&&

Posted by: ابن الحياة

شكراً لكل اللي ردوا.. طلال وحسام وطوني..

اقتباس:

أطلب من أن تسجل بأسمك الحقيقي لأنك بذلك تكون قد أعطيت والديك حقهم

اقتباس:

فما معقول تخجل من كونك ساكن بزيدل و تكتبلي سورية

اقتباس:

أنت مانك حاطط شي يدل على شخصيتك أبدا لاصورة ولاشي ولا أنك من زيدل

على راسي كل اللي حكيتوه بس يعني مو معقول هالأحكام السريعة عالأشخاص.. يعني لو مستنيين اسبوع كنت حطيت صورتي وعرفتوني بعد ما خلص فحص بس الظاهر أنو مافي مجال لهيك شي لأنو بدكم تعالجوا المشكلة قبل وقوعها وقبل ما تتأكدوا إذا كان الشخص بيعمل هالمشكلة.. بس مو مشكلة..

بالنسبة للاسم نقاش طويل حاكيه من قبل أنا وسناء بغير موضوع بس رح ارجع احكي فيه..
أنا لما بفوت باسم (ابن الحياة) مو خجل من اسمي (يوسف) ومع احترامي لكلام طلال عن أنو أهلي اختاروه إلي وكلام حسام أنو هاي أفكار عقائدية ما هون محلها بس أنا مو هيك رأيي..

برأيي أن الهوية والانتماء والاسم لا يأتي بالوراثة.. أي أن هويتي أنا من أبحث عنها حتى أجدها وأجد نفسي فيها و أرى الاسم المناسب الذي يعبر عنها وأينما كنت يجب أن أعطي صورة عنها فـ(أنا ما أفكر فيه) لذلك وكما قلت أن اسمي هو ابن الحياة وانتمائي سوري وأفتخر بهذا الشيء وأنا لا أريد من لا يقبلني بهذه الصورة حتى وإن رآها البعض تعصباً.. واعلموا أننا نحن من نشرف انتمائنا ونعطيه صورته الجيدة عندها هو يصبح يشرفنا..
وانتمائي لسوريا يا حسام لا يعني أن أدخل لموقع syria.com ولا يعني أني أخجل من أني من زيدل لكن أريدك أن تعلم أن هناك أشخاص من أبناء امتي السورية أقرب إلي من أي شخص في زيدل وليس بالضرورة أن يكون الشخص من زيدل حتى يكون جيداً وفاعلاً.. وربما يكون زيادلي ويفعل ما تخشونه؟؟
وإن كان موقعنا الغالي اسمه zaidal.com فهذا لا يعني أنه حكر على أهل زيدل وكلنا نعلم أنه أكبر من هذا فيه من كل صوب.. وفي منتدانا الغالي هناك أشخاص من خارج زيدل فاعلين فيه أكثر من العديد من (الزيادليي) اللي فيه وهذا لا يعني أنه إن كان (قدومي) من فلسطين ومؤمن بالقضية الفلسطينية أن لا يذكر ذلك أو أن يدخل فقط إلى موقع palastin.com (ما بعرف إذا هيك بتنكتب)..؟؟؟

وإذا كان بتتعرفوا عالشخص من اسم القرية فممكن أنا إذا كنت من الكونغو أكتبلك القرية زيدل وتقبلني على هالأساس وأنا مو من زيدل بالمقابل ومتل ماصار ممكن إذا كنت من زيدل وكتبت الكونغو ما تقبلني وهاد شي مو معقول؟؟؟؟

ومشان التسجيل من جديد بالسبيس فمو مهم هلأ لأنو بالأساس عهالبكالوريا ماني عم افضى فوت عالنت كتير وبعد البكالوريا لكل حادث حديث..

وبالأخير شكراً إلكم ولجهودكم وحرصكم على صبايا زيدل بس برأيي لازم تطولوا بالكم شوي؟؟! وشكراً لكم وما تواخزوني..

ملاحظة: سوريا تكتب بالألف وليس بالتاء المربوطة (سورية)..

Posted by: tony daboul 21

والله يايوسف الواحد مانو عارف شو بدو يحكي معك بس باينتك مانك حابب تستوعب الوضع الصح , انت مشكلتك بس حطيت شي موضوع براسك مابدك تتخلو عنو حتى لو كان غلط وهذا شيء للأسف غلط كبير
وانا من جهتي حابك ماتزعل منشباب المنتدى لأنهن كلهن عم يحكوا منشانك وتصطفل هذا شيء بيتعلق فيك وبس
&&&TiTo&&&

Posted by: تامي العيسى

المشكلة لا تكمن لا بالسبيس ولا بالمنتدى ... وكل واحد منهم له طبيعته واعضاؤه ...
لقد لاحظت تشعب الموضوع الى مناقشات لا تتعلق بطرح حسام وهو باقبال الشباب والصبايا على السبيس اكتر من المنتدى ....
السبب هو ان اكثر من 150 عضو من الاعضاء المشتركين في السبيس والذي تحدثت عنهم يا حسام لا يهتمون بمناقشة أي موضوع او ابداء رايهم ووجهة نظرهم في موضوعات المنتدى او حتى قراءتها.... لا اعلم لماذا ولكنني اعلم ان مشاركتهم في السبيس لمجرد التعارف والبعض منهم لطق الحنك ( كما قال يوسف ) او للتواصل مع المغتربين او ممكن لانو السبيس فكرة جديدة والانسان دائما بيلفتلو نظرو الشي الجديد .... (يعني السبيس والمنتدى منفصلات عن بعضهم )

ما بدي احكي عن حدا ... بدي احكي عن حالي وعن سبب اشتراكي بالسبيس وهو بكل بساطة لانو عندي رفقات كتير مسجلين بالسبيس وفيني اتواصل معهم عن طريقه ........ وبنفس الوقت انا عضوة بمنتدى زيدل ...

وبظن انو سبيس فيروزة كمان لعب دوره .... يعني نصف اعضاؤه كانوا من زيدل اما هلق صار الهم سبيس لضيعتهم ........

يعني انا ماني عارفة وين المشكلة .... يعني حاسة انو انتم خلقتوا المشكلة ..... المنتدى شي والسبيس شي وما في مجال للمقارنة ابدا بيناتهم .... ( المنتدى للاعضاء اللي بحبوا يناقشوا مواضيع مختلفة ويمكن يكون مصدر للثقافة عند البعض اما السبيس للتعارف مو لمناقشة المواضيع والآراء )

يعني انا تفاجات كتير لما شفت فكرة المدونات بالسبيس .... بس اذا بتشجع صبايا وشباب انو يطرحوا افكارهم عن طريقها وين الغلط بالموضوع ؟ ... بالعكس شي كتير حلو ومفيد وبشكر حسام على هالفكرة الحلوة ....

مع احترامي لكل الاعضاء

Posted by: hosam abdulaziz

شكرا تامي لمرورك و لرأيك الجميل
انا مثل ما فلتي ما كان عندي اي هدف قارن بين الثنين
بل بعد اقبال الشباب عالسبيس و مثل ما قلتي استخدامهم للمدونة بطريقة حوراية
و ان كنت مفكر انه رح تكون منبر دعايات لا اكثر لكل شخص (عند اضافته صور او تعديل ستايل او ما شابه)
بس اللي بيزور المدونة بيلاحظ انه القصة اخذت منحى جميل
دفعني اتسائل انه هالشباب ليش ما كان عنده هالأندفاع للمنتدى مع انه المنتدى عمره 5 سنين.
--------------------------------------------
هلق برجع ليوسف

انا رح احكي ليوسف شو صار معنا بالزبط اول اسبوع و بالأسماء لحتى يعرف شو سبب الاسراع بمراقبة التسجيل و حذف اسمه بطرية سريعة
دون الأنتظار مدة اطول
----------
اول شي يا يوسف مجرد تسجيلك بالسبيس وقت الامتحانات او ردودك على مشاركة ساحة القرية بيدل انه الواحد ممكن يخصص نص ساعة باليوم للنت حتى وقت الامتحانات
و هذا مو اهمال و مطلوب كل طالب يعمله شوية استراحة خلال النهار
بس عملية التسجيل بالسبيس ما بتاكل 5 دقايق و تحميل الصور ما بياكل 5 دقايق شو ما كانت سرعة النت عنا.
لهيك بتصور كان فيك تحمل الصورة فورا بعد التسجيل
-------------
هلق اول ما فتحنا السبيس كنت مفكر خليه شهر كامل مفتوح دون رقابة (متابعة لنوعية الأسماء لا اكثر)
بعد اقل من اسبوع سجل معنا عضوين
الأول اسمه saigon12 و بيدعي انه من السويد و حط صورته الأساسية صليب للمسيح
المهم هذا الرجال بلش يعاكس هالبنات و بيجيني رسالة من صديقة من امريكا (صديقة زوجتي رنيم ) و كمان اسمها رنيم
بتقلي فوت شوف يا حسام شو باعثلي هالعضو و من قهرها , باعثتلي كلمة المرور تبعها لفوت بنفسي عحسابها
و فعلا فتت و شفت كلام ما بقبل انا يتوجه لبنت من قريتي و من شخص غريب آخر همي انه يسجل معنا.
قمت فورا بوقف نشاطه
--------------
العضو الثاني مسجل باسم Christian fundamentalist و ترجمتها (المسيحي المتعصب) و مسجل انه من المانيا
المهم انا شفت الأسم و قلت لأتركه هو حر.
ليوم كنت بسهرة عن رفيقي و بيدقلي شب اسمه جورج صفر , بيقلي انه هذا العضو باعثله رسالة عميسيء فيها اله و عميقله (ليش كل بنات هالسبيس ××××××) كلمة ما بتنقال
انا تركت سهرتي و ارجعت عالبيت خصيصا مشان اوقف نشاط هالعضو.
و هيك صار
-------------
انا قلت اي و بعدين المكتوب باين من عنوانه
سبيس و صبايا حلوين و متأنقات على اجمل طراز و بعدهم بعمر الورد = بؤرة خصبة لتواجد المتطفلين و المزعجين و الـ××××××
و خصوصي انه عميستخدموا اسماء و شعارات محسوبة عطائفتنا كمسيحين

عاد هو انا قمت بحذف كل اسم ما من زيدل و القرى المجاورة و للأسف كنت انت من بين هالمحذوفين
----------

و لنوهك لأمر انا جاني كثير طلبات و كلها من بنات بتطلب مني السماح بتقنية الخاص private
اي انه ما حدا بيعود يغدر يشوف صفحاتهم غير الأصدقاء اللي عقائمتهم

انا هون ما تحمست كثير للقصة مع انه كنت فيني نفذها و بفتح التسجيل و هيك اي صبية بتحمي حالها بايدها .

بس انا كنت ضد هيك خطوة بتأدي لتقوقع و شللية بالسبيس
و بيصير الواحد يضطر يضيف لقائمة اصدقاءه مئات الأعضاء
اضافة لحرمان الزائر من مشاهدة الصور
------------
لهيك وصلنا لنتيجة و قاسم مشترك
انه انا بتكفل بمراقبة التسجيل و المحافظة على انتماء زيدلي للسبيس
مقابل نلغي فكرة جعل الحسابات خاصة

فهذا شرح مفصل للي صار
و انا مثل ما قلت طرحت تصويت بالسبيس للاعضاء
و هي نتيجة اولية اله بتدل انه توجه نسبة كبيرة للزيدلية او للزيدلية و القرة المجاورة

ملف مرفق 3385
دعوة اخيرة الك للتسجيل لأنه اذا حابب فعلا تنظم النا سجل و حجوز هالأسم اللي بتحبه , لربما اجا حدا قبلك و سجل فيه.

اما اذا قررت المقاطعة فأنا بحترم رأيك و قناعاتك.

Posted by: ابن الحياة

ما كنت حابب رد مشان ما ارجع شعب النقاش بس في بعض النقاط لازم قولها:
عزيزي طوني أنا مستوعب الأمر تمام ومع احترامي الك بس ماني ملاقي شي غلط باللي حكيته وإذا إنت ملاقي شي غلط بتمنى تناقشني فيه وتقنعني بغلطه..؟
وللعزيز حسام حابب قلك أني ما كنت مضطر وقت اللي سجلت حط صورتي لأني ما كنت عرفان أنو رح يصير اللي صار وأنو معرفتي من أول ما بسجل كتير مهمة لأنو رفقاتي اللي بالسبيس رح يعرفوني من هاد الاسم..وصار أني سجلت وطلعت وما عاد فتت لبعد اسبوع ووقتها لقيت حسابي محذوف..
وما كان في داعي ترجع تشرحلي اللي شرحتو لأني مقدر حرصك ع صبايانا ومشكور على هالشي..
بس حابب علق مرة تانية على قصة الاقبال عالسبيس وعدم الاقبال من قبل عالمنتدى..
ما رح ارجع كرر اللي قلته من قبل واللي قالته تامي بس حابب قول أنو كتير من الأشخاص من اللي هلأ بالسبيس ما كانو يعرفوا صفحة زيدل غير لما بدهم ياخدوا صور؟؟ ولهلأ في أشخاص بعرفهم حافظين صفحة السبيس بس عالمفضلة يعني بيفوتوا عالسبيس فوراً بدون ما يعرفوا كيف صار شكل صفحة زيدل الرئيسية؟؟؟
ورح ارجع اسأل:

اقتباس:

وإذا كان بتتعرفوا عالشخص من اسم القرية فممكن أنا إذا كنت من الكونغو أكتبلك القرية زيدل وتقبلني على هالأساس وأنا مو من زيدل بالمقابل ومتل ماصار ممكن إذا كنت من زيدل وكتبت الكونغو ما تقبلني وهاد شي مو معقول؟؟؟؟

وعلى كل حال شكراً إلكم وخاصة تامي اللي دوم بتطلع متل ماني متوقعها..

ابن الحياة..

Posted by: hosam abdulaziz

اقتباس:

يا عم انا عندي قناعة شخصية انه اللي بده يكتب بالمنتديات او يشارك بالسبيس ما في داعي ينكر شخصيته الحقيقية لأنه وقت بحكي او تخاطب مع عضو بدون ما اعرف مين هو نهائيا , بحس حالي عمحكي شبح
يعني انا فرقت معي 100% من وقت كنت حاورك كـ ابن الحياة , بين ما هلق عمبحكي ابن الحياة و عرفان مين هو.

و لنقول كثيرين بيحبوا الأسم المستعار و هذا حق
بس ما لازم اي عضو يتقصد اخفاء جميع المعالم اللي بتدل عليه
بالمنتدى انا ما عندي سلطة افرض هالشيء لأنه في اداريين و يمكن شغلة دارجة بكل المنتديات كتابة اسم مستعار لهيك صعب نستثني حالنا بمنتديات زيدل.

اما السبيس فهو حديث العهد و فينا نطبق هالشيء
و برد كرر كمجتمع صداقة و تعارف ما بيصير يكون عند اي عضو هدف اخفاء هويته الأصلية , لأن من اهم ركائز السبيس هو تنزيل الصور و اضافة التعليقات و التواصل مع الآخرين
فاذا شي عضو نزل صور منها اله و اسمه منه معروف و بلش يراسل هالعالم و يحط تعليقات شو بنكون استفدنا
بنقضيها تحزير و تخمين , و هو بيكون مرتاح و عميتسلى و مبسوط
*****************
هلق برجع لتساؤلك حول الكلام المكتوب اعلاه
نحن عن شروط مقسمة لخانتين
شروط التسجيل
بما انه ما في مجال تنزيل صورة عند التسجيل فشرطنا
اما انه يكون اسم المستخدم حقيقي
او ان يكون اسم مستعار (لكن بشرط كتابة اسمه الحقيقي في خانة قمت باستحداثها و هي ما رح تبين لحدى نهائيا غير الاداري لهيك اي شخص في يكوتب اسمه بدون خوف من كشفه للآخرين)
لهيك موضوع البلد و القرية رح يكون اسم ثانوي
لأنه يا يوسف عيش كثير بتشوف كثير
مبارح سجل معنا عضو عأساس بنت و من قرية مجاورة و الا طلع اخونا شب و فايت بس ليزعج بنت لأسبابه الخاصة.
و مع هيك انا ما بضمن السلامة 100% من المشاكل رغم كل القيود
هلق بالنسبة للشروط ما بعد التسجيل
نحن كل ما بيهمنا في الأمر ان لا يوجد عضو مجهول الهوية تماما
يعني ما بيصير يا يوسف تفوت تزور صفحة عضو ما و ما تلاقي شيء بيدل على هوية هالعضو.
اما اسمه او الصورة الي بتبين عنده او (النبذة ) اللي في يكتبها عنه
و انا بوجه دعوة لكل عضو بالسبيس او زائر بيلاقي عضو مجهول الهوية تماما يراسل الأدارة من الرابط الموجود باسفل كل صفحة و يسمي اسمه و انا بتأكد من هالشيء و ببعثله تنبيه اولي و اذا ما صار تجاورب رح ينحذف.

طبعا اكيد اذا عضو قديم باسم XXXXXX و صار شي مرة انه حط صورة بمناسبة معينة و معد انعرف مين هو عالزائر الجديد , بينما كل زملائه بالسبيس بيعرفوه , فاكيد ما رح نقرب صوبه او نطلب منه توضيح هويته.

اخيرا بحب وجه شكري لكل شب و بنت بزيدل قام بمراسلتي للتشكي من عضو ما و منهم وجدي و طوني و جورج و الصبايا كلهم بدون تسمية اسماء
لأنه انا او اي شخص رح يهتم بالسبيس بعدي ما فيه يعمل شيء بدون تكاتف همة هالشباب مع بعضها.

Posted by: tony daboul 21

شكرا حسام على اهتمامك بالسبيس وبالمنتدى
ونحنا دايما معك ولايهمك ابدا
&&&TiTO&&&

موقع زيدل سوريا حمص .. خدمات تشات و دردشة ... أرشيف المنتدى