الارشيف - طل وبعيونو غمزني

عَ مْطَل ضيعتنا بيحلى السهر
وع سطوح بيتنا واقف قمر
يا نِيّالو حَدّو النجوم كتّار
وأنا المحروق سِلافي
من الشوق لَولفي اللهَجر
بشرودي بشوفو من بعيد جايي
وقت الغروب
طلِّ وبعيونو غَمزني
وبراسو عالعين و مالي
من لهفتي يسبقني قلبي
متل فراشة عاشقة للنور
لأ
متل شي حجل
عم يكرج كرج ع دربو

يااااااااااا ه
مُو مصدقة......
طالت غيبتو هالحلو
إشتقت لضحكة عيونو
يا ويلي شو بيعملو فيي عيونو
بدوخ
بدوب
بِسْكَر
وما أحلى هالسَكرة

سحبني من إيدي
( إسْتَحليت وقتا شي غَمْرة
ضلت غَصّة يا حسّرة )
عَ صَخْرة العين قعدنا سوا
ومن دون حكي حكينا بْ الوَمَّا
وبلهفة المشتاق قرب لصوبي
و كلمتين وشوشني بإدني
ومن خجلتي ...
ياااا خجلتي
صار بدي إهرب
لوفيّ إهرب
لو بقدر بقلبو إتخبّى
من نظراتو إتخفى
و من شرودي
ما إصحى
إلا لشوف القمر
تْلّحَف بغيمتين وتغطى
وطال السهر
وطلع الفجر
لا القمر طَلّ
ولا ولفي حنّ و وفا