الارشيف - انتوا الحكم

Pages: 1

انتوا الحكم
(انقر هنا ان احببت مشاهدة الموضوع الاصلي بالالوان و الصور )

Posted by: hosam danial

يا جماعة بس حابب اطرح هالموضوع وبتمنى اتكونوا انتوا الحكم
وبتمنى تعطوني نصيحة بعد ما تسمعوا قصتي:
كلنا حكينا عن الصداقة وحكينا عن محبة الاصدقاء ووفاء الاصدقاء
لكن انا الشي الي صار معي بخليني شك بالصداقة
وما رح اشمل كل اصدقائي
صديق الي كان معي في احدى المراكز في القرية
(معليش اعذروني عن تسمية الشخص وتسمية المراكز)
سنة 2002 وانا واياه زيارات وتبادل اراء ومحبة
وكان املنا واحد وهدفنا واحد بهالمركز
وهيك لحتى سنة 2005 طلب مني شاركو بمحل تجاري
وحكالي عن قصتو وليش بدو يفتح المحل وطلب مصاري من كثير عالم
وحتى من اقرب الناس الو ما عطوا
وأنا اهتميت بالموضوع وحبيت ساعدو من قلب
وربي يشهد انو بسطي بهالشخص انو بلش يشتغل اكثر من بسطي انو صار عندي شغل ثاني او مورد ثاني
وبعد ما بلشنا شغل وصار المحل مليح وانتاجو كثير مليح
صار ما عاد يشتغل بالمحل كثير
ويهمل المحل وانا حاول اني رجع هالمحل مثل ما كان
لكن عبس
لانو شريكي وصديقي على اساس ما عاد اهتم بالمحل بنوب
ولعلمكن انو المصاري الي دفعها مو منو من احد اصدقائو بأميركا
وانا غلطت اكبر غلطة انو ما كان في وراق بيني وبينو على الشراكة
قلتلو يا صديقي العزيز انا الشراكي معك ما عجبتني
في اخذمصرياتي قلي: ما معي بس الك عليي دين 100 الف ورح ردلك اياهن
وراحت القصة وكل مرة طالبو بالمصاري و يتحجج بانو بدو يتجوز وشي بدو يعمر
وانا
المهم المحل بدو يبيعو واتفقنا انو بس يبيع المحل انا باخذ نص حق المحل
ومن شان ما اعرف ايمت رح يتم البيع وما يعطيني المصاري
باع المحل بالسر مع شخص كمان كان رفيق معي بالمركز نفسو
وشخص ثالث كمان كان معنا بالمركز ولك هالشخص الثالث هوي الي
طلع معي مليح واجا لعند الساعة 1 باليل ليخبرني انو صديقي العزيز
ضحك عليي
ثاني نهار رحت لعند صديقي الغالي العزيز منشان طالب بنص حقي على القليلي
قلي ما فيني اعطيك المصاري لانو المركز او عليي دين
قلنالو معليش المهم انو ديناتي يرجعولي بأفرب وقت
وانا جيت على اميركا وابي يروح لعندو يطالبو لكن ما في مجال

وأنا حطيت هالموضوع لانو من فترة سمعت انو هالشخص
قال لاحد المعارف الي
انو يروح يبلط البحر ما في وراق بيني وبينو

هاذ صديق العزيز
شو رايكن

Posted by: syria & joleat

الاخ حسام :
يعني ياما نصدمنا بناس وتفاجأنا فيهون ولو ما كان صديق عزيز ما بتنصدم بس لانو الصدمة من قريب كتييير صعبة .....
هلأ هو مو صديق ولا بيستحق يحمل هالكلمة ابدا وصدقني رح يجي يوم ويحب إنسان وينصدم فيه يوم ووقتها بيتذكرك ..... وانا برأي انو ما تسكتلو على المصاري لانو هيك ناس كل ما كنت منيح معون بيركبوك ...

ومتل ما بتعرف انو الواحد بيتعلم من كيسو وانشالله الله بيعوضك برفيق على قد نيتك لانو البذرة الطيبة يلي فيك واضحة ......

تحياتي _ ياسمين _

Posted by: m-sattah

من المستحيل ان الانسان ينسى خيانة انسان له لكن يمكن ان تتعامل معه بشكل طبيعى بس اللى بالقلب بالقلب ومستحيل يرجع لنفس مكانه الاول/ الصديق اللى تحاكيه /حيكون فيه ستار يفصل بينكم

بالنهاية كل انواع الخيانى ما يصفالها القلب متل اول

فتتعدد السكاكين والقتل واحد

الله يكون بعون من انخدل بصديق له

Posted by: بنت القمر

مرحبااا حسام
قلما وندر ان نجد الصديق الوفي
اسمحلي بمعاتبه عليك ان القانون لايحمي مغفليين
غلطك من الاول انو ما عملت اي عقد عند محامي او اثبات انو اعطيتوا او في شراكة بيناتكون
اليوم وخاصة بالايام هي ما في ثقة الاخ بااخوه
اهم شي ما تسكت عن حقك وطالبوا بكل قرش
لانو متل ما ذكرت الصديقة ياسمين انو بصراحه بتقوى عينهم وبيركبوك
وانو التطنيش لهيك عالم هوي مجال دافع وقوة
نحنا ما راح نتبع اسلوب اللي اخد مالك خود روحوا
لانو المال معادل الروح
لاءء ولا راح نتبع هيك اسلوب
اهم خطوة لازم تخطيها
تروح لاهلو او تبعت ناس بيمونوا عليهم وتشهد شهود حق مو باطل
ومنهم اللي اجا وخبرك عن الخيانه لانو يعتبر شاهد
اما ازا حكيت لمحامي راح يرددلك القول اللي قلتلك اياه
القانون لايحمي مغفلين
عندي سؤال
كان في حدا وقت طلبك للشراكة كان في ناس شهدت
سمعتكم بتتفقوا
ناطره الجواب
والله يجيب اللي فيه الخيرررر

Posted by: hosam danial

شكراً كثير الكن لاهتمامكن
وانا الصراحة لو ما بحس انو في ناس بهالمنتدى بقدر اشكيلهن
ما كتن عرضت الموضوع
وصعي نحنا بعاد بالمسافة لكن قريبين بالقلب

وبعد ما رديتو على الموضوع رح غير نظرتي عن الصداقة
(للأحسن أكيد)

وبالنسبة للسؤال : كان في حدا وقت طلبك للشراكة كان في ناس شهدت
سمعتكم بتتفقوا ؟
نعم كان في عالم واحد بأميركا والثاني بعيد عني ما فيني شوفو
وأنا معكن القانون لايحمي المغفلين
لكن انا وقت ساعدت صديقي العزيز ما كنت مغفل كنت ابن اصل
والقانون ما بيحمي ابن الاصل

على كل حال شكراً كثير الكن

Posted by: sulieman safar

ولك حسام انت دماتك خفاف والله يساعد ريما عليك واكيد انها ما عم توقف الضحك على قصتك الظريفة.
ولكن حابب اعطيك نصيحة قالها أب لأبن وهي كما يلي:
يا بني ليس هناك الكثيرون الذين ينفعوك في هذه الحياة ولكن اذا وجدت احدهم تمسك فيه.
هذه النصيحة أعطيت من ما يقل عن ثمانين عام ولعلها تلخص معظم العلاقات المادية وغيرها التي نواجها في العصر الذي نعيش فيه. ولكن انا عندي رأي مثل رأي الغالية جوليت السورية ...........انو ما تسكتلو على المصاري لانو هيك ناس كل ما كنت منيح معون بيركبوك ... ويجد أكثر من طريقة قانونوية لملاحقة هذا الصديق الحقير ولو كنت تحتاج لأضعاف رأس المال.
ولك ولريما وبيت العم الكرام بركة العيد.
سليمان.
ملاحظة للغالية syria&joleat
يحرء حريشك شو ضحكتيني باستعمالك لهلعبارة البلدية......... لانو هيك ناس كل ما كنت منيح معون بيركبوك .
ولكي محبتي طبعاً.

Posted by: Desert rose

أنا بالحقيقة مابتأثر على خسارتي المادية حتى لو كانت كبيرة .
ولا على خسارتي المعنوية بفقداني لهيك صديق .
بحزن على ناس رح يفتقدوا بيوم للمساعدة من أشخاص تلقوا من أصدقاء على أساس خيانة وقلة أمانة .
أنا بهنيك حسام على جرأتك بفشة هالخلق ... وإعذرني لو قلت :
لو سردت قصتي على هالصفحة يمكن هين نفسي بسبب طيبتي (( قبل ماهين صديقي المحترم ))...لذلك الصمت أحياناً بيفيد أكثر ...بتمنى ماتسيء فهمي !!!!!!

على هالأساس الله يسامح كل صديق ممكن يتحول بيوم من .............حمل وديع لــــــــ ذئب أكثر من شرير .

على فكرة أنا ما إتعلمت ولا إتعظت من تجربتي ليه مابعرف

زهرة الصحراء

Posted by: hosam abdulaziz

مرحبا
مع احترامي الشديد للموقف اللي انت عايشه يا حسام
بس انا ضد هيك مشاركات بالمنتدى لانه بتصور قصتكم معروفة لنسبة 80% من اهل الضيعة و بالتالي اخفاء الأسماء مثل قلته.
كان بتصور انه فيك تطرح القصة من باب العموميات و نحن سبق و نشرنا نقاشات عن خيانة الصديق لكن بشكل عام.

على كل هالشي اللي قلته سمعناه من طرف واحد و ما فينا نحكم الا لو الطرف الثاني عبر عن رأيه.

بس الشيء اللي قلته اكيد لو صار معي رح انصدم كثير بالمبدأ و ليس بالقيمة المادية.
و الحمد الله لهلق ما تعرضت لعملية غش او خداع من صديق.
و بالنهاية كل مسيحي مؤمن بيقول الرب موجد و هو الحكم و بيعرف يعطي لكل ذو حق حقه.

Posted by: dream night

اقتباس:

المديون: لا يحق له أن يصرف ماله وينسى واجبه
واجب المديون أن يدفع دينه، ولكنه قد لا يستطيع دائمًا. حين كان شاول يلاحق داود، جاء إلى داود إلى عدلام عدد من المديونين الذين لا يستطيعون أن يفوا دينهم فكان الدائنون يلاحقونهم (1 صم 22-2). وهكذا وُلدت ثورة في البلاد. وفي أيام الشدّة والضيق، لا يكون الدائن أفضل من المديون فيضيّق الواحد على الآخر. تلك صورة نجدها في مثل من أمثال يسوع ورد في إنجيل متى: "قبض عليه وأخذه بخناقه وهو يقول: أدِّ ما عليك". وزاد على هذه المعاملة السيّئة "فطرحه في السّجن حتى يوفي الدّين". أما المديون فجعل يتضرع. طلب مهلة (مت 18: 28-30). لهذا كانت العلاقات بين الدائن والمديون صعبة جدًا، ولا سيّما في أوقات الحروب، حيث تكون حالة السيّد كحالة العبد، وحالة الشاري كحالة البائع، وحالة من يقرض كحالة من يستقرض، وحالة الدائن كحالة المديون (أش 24: 1). ويعطي إرميا صورة عن هذا الوضع حين يقول إن الجميع يلعنه مع أنه ليس بدائن ولا بمديون. فالدائن يلعن المديون، وهذا يردّ الكيل كيلين لذاك. مثلُ هذا الوضع يجعل من المجتمع جحيمًا لا يطاق. فيا ليت الدائن يعرف أن يرحم ويتحنّن. يا ليته لا يرفع نسبة الفائدة لئلا يخنق أخاه. يا ليته يمهله.
فإذا كانت الدول تعيد تقسيط الدّيون بعضها لبعض، فكم بالأحرى الإنسان مع أخيه الإنسان، وكم بالأحرى المؤمن الذي يعرف أن كل ما يعمله لأخيه، لأصغر الصغار، لأفقر الفقراء، إنما يفعله للمسيح. "كل ما فعلتم لأحد إخوتي هؤلاء الصغار فلي فعلتموه" (مت 25: 40). عند ذاك يسمع صوت يسوع الديّان في نهاية الأزمنة: "تعالوا يا مباركي أبي، رثوا الملكوت المعدّ لكم منذ إنشاء العالم" (آ 34). وإذا لم نتعرّف إلى إخوتنا، فيسوع لا يتعرّف إلينا. وإذا كنا لا نفعل لإخوتنا، نكون وكأنّنا لم نفعل للمسيح. "كل ما لم تفعلوه لأحد إخوتي هؤلاء الصّغار فلي لم تفعلوه" (آ 45). إذن "اذهبوا عني يا ملاعين إلى النار الأبديّة المعدّة لابليس وملائكته" (آ 41).

منقوول للفائدة فقط

اخي وصديقي حسام :
اتمنى الاستماع الى صديقك قبل كل شيء...
لاتتسرع في الحكم عليه وارد أن يكون صديقك لم يقل شيئا سيئا وانه يريد ايفائك مالك.
دائما تقع المشاكل بين الدائن والمديون وكلنا نعرف قصصا حقيقية بين أخوة تخاصموا من أجل المال..
العاطل بيقولوا ماخلا للصاحب مكان..يعني عم يروح الصالح بالطالح بسبب بعض من هذه الحالات..ماعاد حدا دين حدا.
وبالنتيجة المثل بيقول اذا ناوي تخسر صاحب دينه مصاري..
في امثال كثير قيلت عن الدائن والمديون ولازم نتعلم منها..
_طلب أن يقرضه مالا.
_طلب منه أن يبوس يديه مقابل ان يعطيه المال.
_سأله:اتطلب أن ابوس يديك مقابل اقراضي المال.
_أجابه اليوم تبوس يدي وتأخذ المال..غدا سأبوس قدميك كي تعيده لي.
هذه قصة حقيقية جرت في قرية بالقرب من قريتنا.

القلب الطيب صعب يتعلم وبكرا اذا طلب حدا مصاري من حسام رح يعطيه ..ما بعرفه لحسام بس هيك باينته.,
وزهرة الصحراء كذلك الامر ..معليه المهم الصحة .

Posted by: hosam danial

برجع بشكركن جميعاً
على ردودكن الي ريحتني
بس بدي علق على قول الخال حسام
على انو مافي داعي ينحط هيك موضوع بالمنتدى
معليش انا جيت معكن وأنا اسف على قول الحق علناً
وقصتي مثل ما قلت 80% بيعرفوها
بس هالثمانين بالمية حدى بيسترجي يواجه هالشخص(صديقي العزيز)
وياخذلي حقي
انا متأكد بعد احترامي للجميع ما حدا فارقة معو
وما بيحب يبجيب وجع الراس لحالو
وأنا حكيت مع اقرب الناس الو ومع شخصيات تعتبر الها اهميتها
بالضيعة لكن عبس
بقى اذا للحكومي ما بقدر فش قهري وما فيها تساعدني
وكبار الضيعة كمان نفس الشي وأقر ب الناس لصديقي العزيز
بعدو عن الموضوع
وانا هلق ببلاد الغربي انتوا صرتوا عيلتي الي بقدر اشكيلكن همي
اذا الكن ما فيني اشكي همي اصبح على الدنيا السلام
ونحنا وقت منحط عنوان براس الصفحة (قصة وعبرة) بتكون القصة مؤلفة
أو مزيفة وكلياتنا منقرأها ومناخذ عبر منها
بقى كيف اذا واحد حكي قصة حقيقية وصايرة معو
المفروض العبرة تكون اكبر
وبالنهاية اسف اذا كان هالموضوع بيمس للمنتدى بسوء
وبتمنا الي بعرف هالشخص الثاني يسألو ويرد علي
واذا انا غلطان بدي كل المنتدى يعرف انو انا غلطان
عشان تكون العبرة اكبر واكبر
حسام
ملاحظة :بعد ما تشوفوا تعليقي الاخير بهالموضوع رح احذف الموضوع كلو

Posted by: Desert rose

من وجهة نظر خاصة أنا مابلافي في مشكلة بعرض تجارب خاصة من هالنوع على صفحات المنتدى كون القصة كما ذكر معروفة لناس بنسبة 80 بالميةوالباقي من النسبة كتير قليل ..والقصة أهلية بمحلية وبيبقى للزائر حق إبداء الرأي عند قراءة هيك تجارب حياتية قاسية .
قال اللي بيعرف بيعرف اللي مابيعرف بيقول كف عدس
والجمرة مابتكوي إلا صاحبها
لذلك تمنياتي للجميع بعدم تعرضهم لموقف مشابه من صديق متل صديق حسام مهما كانت ظروف هالصديق .

اقتباس:

وبالنتيجة المثل بيقول اذا ناوي تخسر صاحب دينه مصاري..

عزبزي dream night المكتوب صحيح ولكن برأيك شو الحل ....هل لازم نمتنع عن تقديم المساعدة لأصدقائنا حتى مانخسر صداقاتهم .
وسؤال تاني :....هل مارح إخسر هالصديق عند ما اتمنع عن مساعدته وأنا في وضع مادي جيد قادرة في على تقديم العون لها الصديق عند الحاجة ..
بالحالين الخسارة حاصلة . (( ماتواخذونا

))

زهرة الصحراء

Posted by: الألماسي

.
..
...

اقتباس:

المشاركة الأصلية كتبت بواسطة hosam abdulaziz

على كل هالشي اللي قلته سمعناه من طرف واحد و ما فينا نحكم الا لو الطرف الثاني عبر عن رأيه.

.

.
.
.

هذا ماتتطلبه الحكمه في مثل هذه الأمور..

.
.
.

و بشكل عام ، كم خلقت الماديات من المشاكل مابين

أكثر الناس قرابه ، و كم غيَّرت مجرى الكثير من العلاقات..

...
..
.

Posted by: sulieman safar

.................بس انا ضد هيك مشاركات بالمنتدى لانه بتصور قصتكم معروفة لنسبة 80% من اهل الضيعة و بالتالي اخفاء الأسماء مثل قلته.
يعني بصراحة ما بعرف ليش ابو الحس مدري ابو الحوس يمكن ابو رنيم ضد هيك مشاركات بالمنتدى رغم ان وسائل الشرشحة اصبحت اكبر وسائل لاسترجاع الحق في العالم أكبر . ولعلي أطور في الشرح. يوجد هناك اناس , مثل اصدقاء حسام الدانيال, لا يمكن أن تخجلها الا بواسطة الشرشحة لسبب عدم وجود الضمير عندها وبذلك تبقى كما ذكر ابو ريما, الحكم لك يا أبو الحوس . ولكن هون حابب وجه تهمة لك يا ابو الحوس مدري ابو الحس بأنك تود ان تبقى محايد كون أنك تضن بأن لك يد في وجود المنتدى وهنا يبقى الخطأ المركب لأن وجود المنتدى لا يتعلق فيك أو في غيرك بل بمن يريد أن يطرح رأيه الحر بما يشاء. نشلا تكون البهذلي عجبتك . الموضوع حلو ومنسق ولك الحرية التامة أن تصدق أو لا تصدق يا أبو الحوس وكنت حالف من بعد زواجك لرنيم أن لا استعمل لغتي المزاحية معاك ولكن اليوم فتحت لي الطريق ولذلك أقول لك ........ تضرب.
ولك ولرنيم محبتي طبعاً

100 ألف ليرة صاروا هوينات عند ابو الحس عفواً ابو الحوس.

Posted by: Desert rose

اقتباس:

على كل هالشي اللي قلته سمعناه من طرف واحد و ما فينا نحكم الا لو الطرف الثاني عبر عن رأيه.

اقتباس:

هذا ماتتطلبه الحكمه في مثل هذه الأمور..

على ما أعتقد حسام مابتنقصوا الحكمة بهيك أمور وبالتأكيد قبل ماعرض هالمشكلة على صفحات المنتدى كان متصرف بوعي يفوق الحكمة حكمة .
أما عن اللي ذكروا سليمان عن بعض الأشخاص اللي مش ممكن يتماشوا بلباقة مع هيك أمور عندي متل بيقول :

أشخاص أحياناً يُبصَق عليهم ...فبيوصل ردهم بإنو الدنية عم تشتّي .

لذلك أي توبيخ لهيك أشخاص مارح ترجع على الدائن بأي فايدة ....وبتبقى القصة حرية رأي وفشة خلق مش أكتر

زهرة الصحراء

Posted by: rsafar

الأخ حسام
إن قصتك كثيرة التواتر في هذا العصر المادي لذلك هي ليست حالة خاصة بك بل تهمنا جميعاً
من الصعب على الإنسان أن يخسر مالاً جمعه بتعبه وعرق جبينه ولكن أظن أن الأصعب أن يخسر صديق جمعه بأحاسيس ومشاعر نبيلة
إن خسارتك للمال كبيرة وكانت ثمناً باهضاً لتتعرف على معدن هذا الشخص وهذا بحد ذاته مكسب
أم عن طريقة لاسترجاعك للمال فأرى أن الأخوة قد اسوفوها تماماً , إن لم تنجح أي من نصائحهم فلا أرى لك إلا الله ملاذ أخير

رامي

Posted by: الألماسي

.
..
...

للتوضيح لزهرة المنتدى و المقصود بالإقتباس

إن رأس الموضوع هو طلب إصدار حكم في أمر

تلقيناه من طرف واحد..

ليس مساسا في المصداقيه او بمعنى الإساءه

للأخ hosam danial ، لكن هذه هي المنطقيه

في التعامل مع كل مايستلزم إصدار حكم يتعلق

بطرفين..

...
..
.

Posted by: samar dahi

اسمحولي اني وافق الحسامين بالراي ...
اول شي حسام دانيال ....انا بعرف يا حسام لو ما انو الحال معك وصل لمرحلة ما عاد تقدر تعمل شي مع رفيقك اللي كلنا عارفينو اكيد ما كنت وصلت لمرحلة انك تنشر هالشي هون ......كنت بتمنى منك انو تحاول اكثر مع رفيقك لانو منعرف انو هوي قلبو طيب متلك ولكن انا واثقة انو في سوء تصرف جعل الطرف التاني يتصرف بهالشكل ....ومع هالشي انا مستعدة يا حسام اني اتدخل بهالموضوع اذا بتحب وانت بتعرف معزتي ومحبتي لرفيقك ولمرتو .....بقدر اسمع منهم القصة وانقلك شو اللي صار ....نحنا ولاد مركز واحد يا حسام وما منحب هالشي يكبر بيناتنا .....وهون بدي وافق حسام عبد العزيز انو ما لازم هالشي ينتشر هون لازم نحل الوضع بدون هالشوشرة هاي كلها لانو انا واثقة من محبة حسام ورفيقو لبعضهم وبيجي يوم يا حسام وبترجعو تحكو مع بعض وبتمنى انك ما تندم على نشر هالموضوع ...
انا بعرفك بقلبك الطيب وبعرف رفيقك كمان بطيبتو ولكن انت بتعرف اديش ظروفو صعبة ....
فيا ريت يا حسام تقلي اذا بقدر اخدمك بشي ....
ما بدي اياك تضل مقهور هيك ....الحياة ما بتستاهل غير انو نعيشها برضى وحب وتسامح ...
وانا بتمنى من كل قلبي اني اسمع من الطرف التاني شي اللي يريحك ....
اوكي حسام .....انشالله خير .....
سلملي على ريمة

Posted by: hosam danial

بشكر الجميع على المشاركة
والصراحة ما فيني علق على كل واحد بس الكل معو الحق
والكل بيحب التسامح والكل بيحب يرجع الحق لصاحبو
ومنشان انو الشخص الثاني يا اخت سمر:
انا وقت كان صديقي أكيد كان قلبو طيب وانا ما معرف غير القلبو طيب
لكن الايام غيرتو
و كان معي قلبو مفتوح الي وافتحو قلبي على كل شي
حتى أهم الامور الشخصيي
لكن الزمان جار عليه وانقلبت الأمور بس كان الانقلاب على حساب
صديقو
وأنا من شان قصة المصاري بحياتي ما فكرت فيها لانهاها زبالة
عند الشيئ الجوهري الي رح يضيع منك وهوي الصداقة

Posted by: mariam

مرحبا حسام انا مابحب اتدخل بالمواضيع الشخصية بس عجبني انك قلت كلمة حلوة 0000جار عليه الزمان يعني انت بتعرف انو عندو ظروف قاهرة وبهيك حالة وقت واحد بيضغط على شخص هويي بيعرف ظروفو رح يتوقع اجوبة كثيري منها قاسية ومنها غير مهذبة لانو الواحد بيكون مخنوق من الزمان بيجي الناس اللي هوي بيكون متاكد رح يكونوا معو بيصيرو ضدوا000اكيد كمان هوي بهاللحظة عم يفكر انو وقت وقع بازمة حتى اعز اصدقاءه لم يستطع ان ينتظر عليه 0000
وكل واحد فينا لمن بيخضح لضغوط شديدة نفسية ومعنوية ومالية رح يكون جوابو روحو بلطو البحر لانو بتصوري انو هالشخص لو معو وقادر يعطيك ماتاخر بالبداية لانك صديقو كنت بيوم وهلق لانو رح يقول خسارة الصداقة تتحول هيك0000معليش حسام الشي الاكيد انو لو بتستنى وتنطلر الامور تهدا بلكي الله بيفتحها بوجهو وبدال ماتخسر صديق وانت غضبان بتعود تخسر صديق وانت ندمان 0000
فانا رح اطلب شغلة لمن صديقنا بيوقع مانكون نحنا والزمان عليه0000
لانو الصديق وقت الضيق0000فاذا خسرناه بهاللحظات القاسية مارح نكون قادرين بعدها على ايجاد اصدقاء000
معليش حسام كلنا بنتعرض لهيك مواقف وانا شخصيا اتعرضت لموقف اعطيت حدا مال ضعف اللي انت عاطيه على اساس لمدة شهر واحد0000وبعد فترة سنتين ماقدر يسدد كل المبلغ فسدد عنو بعض اقاربو اللي بقي من المبلغ بس انا ماخسرت هالصديق والشاطر كان يقلي راحو المصاري 0000وكنت قلهن هلق يرجع يطلب علاقتي فيه بتمنعني ردو حتى لو اكل المصاري 0000وبتصور يومها حتى لو راحو المصاري ماكنت رح ازعل لاني فعلا بعرف انو ماعندو امكانية يرد المبلغ 0000بتمنى منك حسام تراجع نفسك شوي وتشوف علاقتك بهالشخص قبل المال وقبل الشراكة وراجع كل علاقتك فيه بعيد عن هاي المشكل واذاكنت ضمنيا حاسس لسا في محبة بقلبك لهالشخص اتاكد انك رح ترجع لصديقك والمصاري بيوصلوك لمن بيصير معو0000في كثير اشياء مابتتقدر بالمال ونصيحة لاتدخل حدا بيناتكن احكي معو وبرواق 00000اكيد انت موعم تفكر بالمصاري قد الاهانة اللي اتعرضت الها 000بس برجع بقلك اذا كنت متاكد انو الزمان جار على هالصديق لاتكون انت والزمان عليه 0000تقبل مني هذا الراي بروح اخوية00000

موقع زيدل سوريا حمص .. خدمات تشات و دردشة ... أرشيف المنتدى