الارشيف - شجرة عيد الميلاد بطريقة حمصية

اول شي ايدكم معي وهاتو ساعدوني حتى نعمل شجرة على طريقتنا الحمصية
هلق انا تاخرت بحط الموضوع لانو كنت عم لملم فوارغ وعُلب حتى كمّل هالشجرة وهلق صارت جاهزة

يالله هاتو لنشوف المثقب (drill machine) وعامود رفيع وكم سيخ
وشي الف علبة فارغة سفن اب اذا بدكم اياها للشجرة بلون اخضر
اما اذا بدكم اياها بلون احمر معناتو لازم تجمعوا فوارغ كوكاكولا
وقنينة واحدة فقط لاغير سفن اب 2ليتر وربع (يالذيذ يارايق)
المهم انا من عندي جمعت كل شي في فوارغ بابو ظبي والامارات ولملمتهن من هون شوي ومن هون شوي مشي حالي
انتوا روحوا دبروا راسكن

يالله وبلا كتر حكي جيبو المثقب وثقبوا العامود على الطول ثقوب صغيرة وبعدين فوتوا السياخ
من الطرف الاول لتخرج من الطرف الثاني وهيك مثل الصورة
وكمان ثقبوا فوارغ السفن اب حتى يدخل سيخ الحديد فيها وخليكم رايقين
بس انتبهوا لازم تكونوا مثبتين القاعدة مزبووووط طوط طوط

وهيك على داير من دار البوري يعني ( العامود) وركبوا الفوارغ بانتظام مع مراعات تقصير سياخ الحديد كل ما طلعنا لاعلى الشجرة

شايفين كيف طالعين من تحت بشكل دائرة كبيرة وكل مالها عم تصغر
هيييييييييييييييييييييييييييييييييييييييك وكل شوي بتصغر
وبيقل عدد الفوارغ كل ما طلعنا بهالطلوع

طبعاً لما رح تثبّتوا القاعدة ياريت تختاروا موقع الشجرة قبل هالعملية وتعتمدوا بشكل قاطع على المكان
لانو انا بعرفكم وبعرف مزاجكم كل شوي بتنقلوها على محل
اعتمدوا قبل ما تشتغلوا وياريت تكون قريبة على شي لوح بلور تبع باب او تبع شبّاك
بس ماتفهموا من حكيّ انو تحطوها عند الباب (يقوم شي حدى فاتح الباب ولا رايحة الشجرة شطيح) انا نبّهتكم
ولا تنسوا تحطوا براس الشجرة قنينة سفن اب 2ليتر وربع

وبعدين فيكم تحطو شريط لمبات من النوع الصغير او متل مابيقولولو بحمص
( شريط لمبات حبة الرز) ههههههههه بيكون صغير وناعم قال حبة رز قال

حلوة لا تقولولي مو حلوة والاحلى لما رح تطفو الضووو
(تطفوا الضو على شان تشوفوا نور الشجرة مو تروحوا تطفو الضو وتروحوا تعملوا شي شغلة ها خليكم بشغلكم وخلصوه بعدين اعملوا الي بدكم اياها)

وخاصة انها قريبة على لوح بلور عاكس
اذا عجبتكم رح حطها جنب شبّاك غرفة زيدل الصوتية
وكل سنة وانتم بسفن اب عفواً قصدي كل سنة وانتم بالف خير

اي ياســــمين هيدي ماونتن ديو
بس بحمص كل شي لونو اخضر اسمو سفن اب

وانا حمصي على حد علمك بدك ما تواخذيني
يمكن التغطية مو واصلة لعندك
بس لما تزوري حمص وتطلبي سفن اب الله العليم شو بيعطوكي
يا اما ماونتن ديو او سفن اب او شي نوع اخضر صودا

متل ما عودنا عبودي كل مره شي حلوو
بس ياعبودي كم من الوقت اخدت معك هالشجرة اللي بجد تحفة
وكم وقت اخد تجميع العلب

يسلمو عبودي بالفعل رائعة