الارشيف - قصة .........وأمنية...............

من الأزل ، فكر السلام يبني مملكتو، وخلال ستة أيام خلق أجمل جنة،وخلق الإنسان لينعم معو بخيرات هالجنة. أما الإنسان فاختار أنو يعيش بعيد عنو لما عمل الخطية وما سمع أمره...ولما تاه بالأرض وتعبتو مشاعر الحقد والغضب ، النزاع و الحروب اتمنى إنو يجي مخلص ليرجعو للمجد السماوي ، وسلام الملكوت...وقبل 700 سنة من مجيء هالمخلص تنبأ عنو أشعيا النبي و قال : " الشعب الجالس في الظلمة أبصر نورا عظيما ، الجالسون في أرض ظلال الموت أشرق عليهم نور ، لأنه يولد لنا ولد و نعطى ابنا و تكون الرئاسة على كتفه و يدعى اسمه عجيبا مشيرا إلها قديرا أبا أبديا رئيس السلام" (أش 9 : 2-6 ) . تخيلوا إنو قبل 700 سنة كان أشعيا النبي عم يسرد قصة ميلاد مستقبلية : " ها إن العذراء تحبل و تلد ابنا و تدعو اسمه عمانوئيل" (أش7 : 14 ) ...

ولما حان موعد تحقيق النبوءات، وباليلة يلي كان جوف الأرض عم يستقبل الثلج ناصع البياض... كان طفل السلام عم يستعد للخروج من جوف عذراء بتول ... اختار الملك أنو يولد بمذود فقير بحظيرة خراف لأنو هوي ملك التواضع. كمان واختار بيت لحم اللي بتعني بيت الخبز ، لأنو هوي خبز الحياة واللي بياكله ما بيجوع أبدا و بيثبت بحياة الخلاص و السلام والنور. كانت أنظار الملايكة متجهة لبيت لحم اللي كانت نايمة بسكون وجهل عن الحدث العجيب يلي عم يصير على أرضها المتواضعة.

ولما كانت فرحة السما ما بتنوصف ، نزل حشد من الملايكة ليصحوا الرعاة وخبروهن قايلين : " المجد لله في الأعالي و على الأرض السلام و في الناس المسرة" . ولما سمعوا الرعاة هالنشيد حسوا بالأمان وتركوا مواشيهم و أغنامهم اللي عم يحرسوها ولحقوا النجمة ليدوقوا فرح الرب الي فقدوه من زمان.

أما ملوك الشرق يلي شاغلين أعلى المناصب الزمنية إجوا من بلاد بعيدة حاملين هدايا الإكرام اللي بتليق يالملك الإله الطفل ...جابوله الذهب للموك ، اللبان لللآلهة ، والمر متنبإين بموته الكفاري ، وقدموا الهدايا للملك الوحيد يلي قادر يشغل هالمنصب الروحي ...ملك السلام...

أجمل مشهدعجائبي بنشوفوا بقلب هالمغارة المتواضعة يلي مانا قصر كبير وفخم.... ومافيها رخام ومجوهرات ... ولا في ملك جليل على راسو صولجان وحواليه خدم وحشم ... لكن شو فيها؟؟؟ طفل صغير نايم بمذود من قش ، حدوا أمو البتول وخطيبها يوسف النجار ، وملوك من الشرق ورعاة وكلن ساجدين بخشوع لها لطفل !!!
وحتى الحيوانات كانت خاضعة للطفل الإله ملك السلام وعم تحاول تدفيه من برد الشتي...

وبلش هالطفل الوديع يكبر وكان يجول المدن والقرى يبشر بحياة السلام والخلاص والنور ، كان يقيم الموتى ، يشفى المرضى ، يواسي منكسري القلوب ، وينشر تعاليم التواضع، الرحمة، المحبة،التسامح، الوداعة ،افتقاد الأيتام والأرامل بذيقاتهم ،وكل عمل بيعطي فرح وسلام روحي أبدي سماوي " أفرحوا في الرب كل حين وأقول أيضاً أفرحوا " ، "فملكوت الله ليس أكلاً وشرباً بل هو سلام وفرح في الروح " (رو14: 17 ) .

وبالآخر قبل ما يرجع السلام للسماء ترك قوة كبيرة وهيي روحو القدوس يلي لازم يثمر فينا محبة ، فرح ، سلام، طول أناة ، لطف ، صلاح ، إيمان ، وداعة ، وتعفف وتكون هاي هي الزينة يلي منزين فيها شجرتنا بالعيد ...

بس المشكلة أنو من جيل لجيل وبضعفنا البشري فقدنا هالقوة ورجعنا نتوه بوادي الظلام ، شاهرين سيوفنا واحدنا بوجه الأخر بدل ما نوجهها ضد إبليس وجنوده والخطيَة ألي بتبعدنا عن الرب وسلامه . وهيك صارت الخلافات والنزاعات ، عداوات فردية ، عائلية ، قبلية ، وتابعت لتوصل للحروب الدولية والعالمية والي خلفت نتائج مأساوية منشوفها بتاريخ مسيرة البشرية وعم نشوفها كل يوم بحياتنا الشخصية وعلى شاشات التلفزيون بالعالم كله ...

الأمنية ألي بتمناها على هالعيد تبدء بمصالحة لكل شخص مع ذاته أولاً ليحقق السلام الداخلي اللي مابعدو سلام لما بيدرك أنه هو مخلوق على صورة الله ومثاله ومفتدى بجسد ودم يسوع الغالي ، بعدين بينعكس هالسلام الداخلي مع الأخوة وبيلغي كل حقد وضغينة وبيحتمل كل المصائب والصعاب بفرح وصبر ورجاء حتى ينتشر السلام بالعالم أجمع...