يا عِطرها

يا عطرها الـْزَاد الحلا رَشـِّهْ.........ولاحقْ الحلوهْ وينْ مَ بتمشيْ

قلبيْ الـْوَراكـُنْ دومْ لاهِتْ لـَيْشْ .......ما كانْ يطلعلو ولا كـَمْشهْ

=============================
يا عِطـْرْ ظِلمْ وقـَهْر عا حِلـِّو..........مِشْ ناقصَكْ هالقلبْ ت َ تـْذِلـِّو

قـَبْلـَكْ سَواد عيونها إحتلـّو........وهَبـَّطو بليلْ وشـَعَّلو برَمْشِهْ
=============================
هالريحْ لمَّا تـْعَانِدَكْ وتدورْ .........وبْتحمْلـَكْ عَنْ خاطري المكسورْ

ليشْ الحلا بيحكيْ عنْ المستورْ..........بتقولْ عاقلْ صابتو وَشـِّهْ
=============================
و مادامْ إنتَ رْفيقْ المرايهْ .............الليْ بينها وبينْ الحلا حْـكايهْ

إحكيلها شو شِفـْتْ جُوَّاييْ .........بلكيْ الوَجَعْ عَ قـْزازها بْيغـْشِيْ
===============================
ولا َّ إنتْ سِكرانْ , شو هَمَّكْ............وبطحة ْ عَرَقها دَومْ عا تِمَّكْ

الحسرهْ عْلى الليْ شافها وشَمَّكْ...و شِبْرَينْ بـِتـْنانيرها الفـَقـْشِهْ
============================
وعا صدرها كلما برشِّهْ تـْصَالْ ..........القـَبِّهْ الدِلـْعَهْ بتحني بإجلالْ

وبتقول شَرِّفْ فوتْ عَالعِرزالْ.......فـَْراشكْ نـَهـِدْ ومْخدِّتـَكْ نـَمْشِهْ
=================================
يا عطرها يا جَاي منْ باريسْ....(عا لـُوفـَرَكْ * ) بِ مملكة ْ بْـلقيسْ

باللهْ .. حَاجْ تشكشِكْ دْبابيسْ...........الغرقانْ مَ بْتلزَمْ إلو الدَفـْشِهْ
=================================
يا عطر مثل السيلْ فيِّ سَاحْ...........والجو صَاحي والقمر مرتاحْ

كلشيْ هَدَا بالبالْ فـَلّ ْ وراحْ.......وما كانتْ تشتـِّي السما تفـَّاحْ

تا دُوقْ منْ تفـَّاحها نـَتـْشِهْ.
==================================

* لوفرَكْ (متحف اللوفَر)..