الارشيف - بعثتنا الأثرية .. زيدل

Pages: 1

بعثتنا الأثرية .. زيدل
(انقر هنا ان احببت مشاهدة الموضوع الاصلي بالالوان و الصور )

Posted by: ziad sattah

من آخر أخبار قرية زيدل أنه و في يوم الخميس الماضي 22 \ 11 \ 2007 اكتشاف حفرة مملوءة بالماء يعود تاريخها كما يتوقع الباحثون إلى الألف الثالث بعد الميلاد ...
و قد تبيَّن وجود عدد من الأشياء في داخل الماء ..
و هنا :
كَثُرَت ْ التكهّنات عن طبيعة و تاريخ هذا الاكتشاف الذي إعتقد َ البعض أنه سيعيد النّظر في تاريخ هذه البقعة من العالم . أو ربّما سيؤدّي إلى رسم خريطة جديدة للعالم العربي على أقل تقدير . ( قولوا: يا رب )
.
؟
!
.
تُرى : هل هي مسبح فرعوني ؟؟
أم أنها حوض سباحة يعود للملكة زنوبيا ؟؟
.
؟
!
.
المهم و بعد عملية شفط المياه تبيَّن أن الحفرة المذكورة هى إحدى غرف الهاتف . و الأشياء التي وجدت في الماء ما هي إلا ّ كابلات الخطوط المعطّلة عند العديد من المواطنين و أنا واحد منهم ... ( اللهم لا اعتراض )
- و ربنا يجعل كلامنا خفيف عليهم ..

Posted by: Desert rose

في مثل بيقول :
.
شر البلية مايضحك
.
مع هالمشاركة فينا نضيف كم حرف لها المثل تيصير :
.
.
شر البلية مايضحك ويبكي
.
بس أنا جد كتير ضحكت
.
وكنت حابة أعرف هل سحبت هالبعثة الأثرية كل الكابلات المعطلة والموجودات ...أو تركت كم كابل لحقبة زمنية زيدلية تانية

.
.
شكراً للعزيز زياد هالخبر الشبه طريف

زهرة الصحراء

Posted by: samar dahi

والله يا زياد لو شو ما حكيو هالعالم بايدهم حق ...
على ما يبدو الآثارات بالطريق العام كثرت ...ما عم يوقفوا اكتشافات ..
مرة بيطلع هاتف ومرة مي ومرة كهربا ومرة صرف ....شو هالحفر اللي ما عاد تخلص ...
على كل حال ولا يهمكم ....رح نخلص ...وانشالله الطريق العام رح ينتهي قريبا جدا ..
قولو انشالله ..::

المهم تصلح هاتفك يا زياد ؟؟؟؟؟

Posted by: talal_alachkar

والله أخي زياد سطاح
هل الحفرة الي وجدتموها في زيدل سببت مشكلة كبير للحماصنة في المدينة وحيرت العلماء
لذلك قررو أن يحفروا حمص على مستوى الجورة ، لما تسبب في حوادث نحنا بغنى عنها
مع تحيات رابطة علماء حمص
وشكراً

Posted by: m-sattah

والله هالخبر ظريف ع ناس و مو ظريف ع ناس تانيين يلي أيدو بالماي مش متل الإيدو بالنار

Posted by: Desert rose

اقتباس:

والله هالخبر ظريف ع ناس و مو ظريف ع ناس تانيين يلي أيدو بالماي مش متل الإيدو بالنار

الهيئة في شي ملوعك من هالبعثة الأثرية .
.
شو قصة المي ..وشو قصة النار
.
خبرنا ماهر
.
هات تنشوف

زهرة الصحراء

Posted by: Nada1981

مرحبا جميعا

اخ زياد لو كان صارت القصة معك هي من شي شهر كنت جبت انستي الهولندية الي كانت بزيارة لسوريا و فرجيتها على الاثارات الجديدة و اكيد هي كانت صدقة انها كانت شي حمام لزنوبيا و كان الخبر وصل لأوروبا و هيك كنا فتحنا باب السياحة لزيدل, بس المشكلة وقتها انه اكيد ماكان رح يتصلح التلفون عندك

بتذكر انه مرة انا حكيتلكم قصة واحد سايح اوروبي بيحب يجي على سوريا كل سنة, و مرة كان راكب بلسيارة مع قرايبنا وقله: انتو الدولة عندكم بتحب التغيرات كتير و كلسنة كل مابجي بلاقي ساحة العباسيين عم تتغير و تتحفر, هو مابيعرف انه الساحة هي الهم شي 3 سنيين عم يشتغلو فيها و لهلا ماخلصت

شكرا اخ زياد بلفعل ضحكت من كل قلبي

تحياتي

ندى

Posted by: ziad sattah

اقتباس:

المشاركة الأصلية كتبت بواسطة Nada1981

بس المشكلة وقتها انه اكيد ماكان رح يتصلح التلفون عندك

ليش مين قال إنّو الهاتف عندي تصلّح ؟؟

على كل حال فقد شكّلنا لجنة قبل ساعتين من الآن , حكيم عيون و أنا و قمنا بزيارة الموقع الكائن بين بيت أبو العبط و بيت زكور .
و نفكّر بإضافة مناقشة هذا الموقع الأثري الجديد إلى بنود مؤتمر ( آنا بوليس ) على أمل أن يصلوا إلى نتيجة واحدة إيجابية من ذاك المؤتمر .
و قد اقترحت ْ لجنتنا أحد أمرين :
فإما أن تبحث مصلحة الهاتف عن حلول تتجنّب من خلالها عدم تكرار تدفّق المياه إلى الغرف الأرضية للهواتف .
و إما أن تقوم مشكورة بإعادة المياه للحفرة و تزرعها ببعض الأسماك ثم تسمح لأهالي زيدل باستثمارها تجاريا ً ( و الله السمك طيّب , و الصيد أحلى و أحلى )
و لله في خلقه شؤون ..

Posted by: RUSHA AWAD

هلأ يمكن مابحقلي احكي لأنو ماني عايشي حاليا بالضيعة ولا عم عاني من المشاكل اللي سببتها الحفريات وخصوصا مشكلة قطع خطوط الهاتف. بس يظهر انو فعلا استاذ زياد طلع في نتيجة تاريخية من ورا هالتحفير واخرها الحفرة اللي ذكرتها , النتيجة انو "ايوب" يظهر انو اصلو من زيدل لأنو هالناس اللي صرلها صابرة على الخدمات السيئة بظن انو من سلالة ايوب. يعني اني وقت بحاول اتصل من هون على شي اربعة خمسة من قرايبيني او اصدقائي بالضيعة وبعد محاولات وتأملات وصلوات لحتى واحد بس يرد وعاد هون بطمنك عالبقية , على بيت فلان صرلو الهاتف مقطوع كذا شهر ولاء الاحلى من هيك صارو اختصاصيين وعلى قولة سمعتي رنة؟؟؟ ولا عطاكي مشغول؟؟؟ على اساس رح تفرق كثير. المهم تخلصو عاد من هالحفريات وهالمشاكل الخدماتية وفعلا اللي ايدو بالمي مو مثل اللي ايدو بالنار والله يكون بالعون.

مع حبي واحترامي
رشاعواد

Posted by: hosam abdulaziz

يا جماعة اناهاتفي من اسبوعين و جاي صار يقع بالساعة , الصبح شغال تمام
بالمسا بيبلش الخشيش و ما افهم شي و باليل العضو بسلامتكم (بيصير يعطي مشغول لكل واحد بيدق) فهمتي هلق شو قصدهم رفقاتك يا رشا.
فأنا من يأسي بالتصليح و لوجود خط بديل طنشت القصة ما قدمت شكوى.

بس من يومين بلشت شمس الشموسة تطل علينا و اذا الحل و العلاج طلع عندها و السبب طلع انه الخطوط بين زيدل و حمص ناقصها فيتامين D و مع اشراق الشمس استعادت الخطوط حيويتها و رجعت الحرارة و بزخم قوي كثيررررر
اللي يدملنا شمس الشموسة و يبعد عنا الغيم ابن الحرام.

Posted by: issa george

شكراً أستاذ زياد لغيرتك الواضحة وبتمنى من هالنقد الحلو يلاقي آذان صاغية عند أصحاب الشأن ..في قول كتير بحبو للرئيس المرحوم حافظ ( لا أريد لأحد أن يسكت عن الخطأ أو أن يتستر عن العيوب والنواقص )..

بلدنا حلوة برجالها

Posted by: Desert rose

اقتباس:

قاعد بحضنا وبينتف من دقنا

هلق حضنن دافي إستاذ زياد ما إختلفنا !!!
بس لازم نعرف شو يعني حضن وشو يعني ذقن ؟؟؟
لنفهم حالنا نحنا كمان وين قاعدين ....وعم ننتف أو ماعم ننتف!!!!!

والله صعب الواحد يلاقي حالوا ضايع
ومش عارف ذقنوا من حضنوا
.
.
والله شي بيرفع الراس

.
.
برجع بشكر الإستاذ زياد لو مش على غيرته ومحبته الواضحة لها القرية ....ولكن بيبقى واجب الشكر على هزوا الورد تنشم ريحتوا .

زهرة الصحراء

Posted by: mariam

اليوم انا مارة من جنب الحفرة الاثرية شفت اثنين عم يصيدوا سمك 000مو طلعت البيوض تبع السمك فقست من حلرارة كابل الهاتف اللي مقطوع من ايار 000بس وحياتك جار لمن شفت السمكات قلت فدا هن الهاتف واصحابوا 00000ولو نحنا بهديك الساعة اللي يصير عنا قطعة بحر وفيها سمك عم يبلعط0000000000000وهيك طلعت لجنة الاثار خايبة0000ولايهمك زياد والحكيم معزومين عالصيد 0000

Posted by: talal_alachkar

يا جماعة
علماء حمص قرروا أنو يعملوا جورة ثانية قرب الجورة الاولى بس الثانية رح يعبوها زيت مشان نقلي السمكات الي صادتهم مريم
وتفضلوا يا شباب معزومين ههههههههههههههه

Posted by: dream catcher

بالبداية اريد ان اشكر كل من تابع وشاهد وزار الموقع الاثري في القرية وللاسف حظي قليل مالحقت هالاكتشاف وانا بالضيعة راحت علينا للزيارة الجااي ...

ورح قلكم شغلة وعندي تساؤل حوله في حدا من اهل الحارة الشمالية جرب يسبح ويغطس بالبركة المزعومة ويشفلنا اذا كان لها امتداد الى نص الضيعة,
على حد علمي ان الاثارات موجودة في نص الضيعة وطالما ضهرت هذه الاثارات الجديدة في الحارة الشمالية بيجوز يكون فيها نفق واصل لنص الضيعة وبهيك بيكون جميع من بنص الضيعة بيقدر يصيد سمك وما يكون حصريا لاهل الحارة الشمالية واذا كان موجود انفاق واصلة لهناك يعني بتوقع انه اي شخص رح يحفرله شي مترين بنص الضيعة رح تصله المي على حسب الاواني المستطرقة وبنكون كمان خلصنا من قضية المياه .

ومشكلة الهواتف بسلامة شركات الموبايل عنا خففت ضغط على استخدام التلفون وصار الواحد يسال عن رقم الخليوي بهالايام اكثر من التلفون لانه مشاكله كثرت بعد دخول الخليوي .(مصائب قوم عند قوم فوائد)

ادعو معي جميعا انه يكتشفوا شي موقع اثري ثاني بس يكون بدال المي مازوت بلكي بيمشي الحال مع العالم وبتنفك ازمتهم هالسنة .

موقع زيدل سوريا حمص .. خدمات تشات و دردشة ... أرشيف المنتدى