الارشيف - طلال حيدر

Pages: 1

طلال حيدر
(انقر هنا ان احببت مشاهدة الموضوع الاصلي بالالوان و الصور )

Posted by: daoud

الشاعر اللبناني المتميز
يكتب أغلب أشعاره باللهجة العامية
تجمع أشعاره بين البساطة والصدق وجمالية الموروث الشعبي
يكتب عن الحب، الوطن، الحزن والسعادة
يرسم أجمل لوحات
هنا مقتطفات من أشعاره ...

Posted by: daoud

حبّ

خدني معك يا حب، شي مشوار

وع السكت وشوشني، سرار سرار

محّي لأيامي بايديك الزغار

مدري شو صابو، هالعمر

فتّح وصار قمار

يا ريت هالعمر الهرب

يرجع ونحنا زغار

لا بعود اقرا بها الكتب

ولا بعود عمّر دار

بقشّقش حوالييّ حطب

وبشعّل بها النار

Posted by: daoud

طلال حيدر

************************************************** **********
ركوة عرب -

أحلى من الركوه
على منقل عرب
أحلى من الفنجان
حلوه
متل عُبي القصب
خيط القصب تعبان
جيبوا حدا من دمر
يدقدق وشم
جيبوا من الهامة
والوشم
بن محمّص وهب الهوا شامي
غمازة لعالخد
ماإلها إسم؟
والخد قدامي
ومكحلي ...
والكحل راسمها رسم
مين لبرا قلامي
ومشنشلي متل الفرس
والسرج خيّالي
بإيدا أساور من دهب
بتخش
بتخش؟
بيدور الطرب ليوم القيامة
************************************************** ***********
قومي اطلعي ع البال

قومي اطلعي عالبال
بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال
ع كتر ما طلع العشب بيناتنا
بيرعى الغزال
وَدّيت مع راعي حماه
يشفلي الطقس شمال
قللي السني جايي هوا
بيوَقّع الخَيّال
ياريت
ما سرجت الفرس
ولا بْعَتْ هـ المرسال
************************************************** **********

طقس

بيتي
متل ورقة احترق
ما عاد عندي أهل
شبهتك بهاالسهل
بقرص العسل
عملو ع مهلوا النحل

شبهتك بحالك
بالعمر
ماشي وراك يلملم خيالك

وجك طقس متل الصحو
دايخ ومش سكران
متل الشتي
نازل على حزيران
شبهتك بقوس القدح
جايي على لبنان

وجِّك وطاف النيل
غرق مصر
في مملكة عم تنسرق
مفتوح باب القصر

وجك
من هون بيحدو الشتي
ومن هون حده التلج

وشاعر
حمل حاله بها الموت وحده وهج

شبهتك بكل الدني
من بعدك عليها السلام
بس تفرحي
بيطير من صدري الحمام
وبس تزعلي
ع مصر باخدلك الشام
************************************************** ********************

سجر الــبن

بيني وبينك سجر البن

وحبّ الهال

وزهر النوم

بيني وبينك تسع جبال

وعرب وصحرا

وغيبة يوم

بيني وبينك ضربة رمح

وفرس وسيف

وهجم الصبح

بيني وبينك طيرة طير

ونادوا كلُّن ع الفراق

وقطفني متل الصبيّر

صوت الغنّو بالعراق

رايح إسرقلك غابة،

واسرقلك جان

وعلق ع سجر البحر

عقود المرجان.

لو نقدك كان مدينة

وبالشام العرس

لاركب ع الفرس وجبلك

مفتاح القدس.

Posted by: daoud

طلال حيدر

**************************************************
يا من حلب

يا من حلب
يا من الشام
هالحنة شمالية .....
حنيت ايديك
يا بو خطوط محنية
بيلبقلك التوب
والشملة الشامية

لك سحاب سيفك وغني
بتلبقلك الغنية
مكتوب ع السيف
والكلمات كوفية
مكتوب حبيت
الباقي حروف ممحية
**************************************************

مينن هن

لبسو الكفافي ومشوا
وما عرفت مين هن..
ماعاد رح يرجعوا
ياقلب حاج تعن
لاحصان جايب حدا
ولا سرج عم بيرن
لك ضحاك
سنك دهب
خليه يبان السن
خليك متل القصب
كل ما عتق بيحن
يابن اسمك حلو
سميت حالي بن
رد العباية القصب
ع الكتف
محبوبي
والعين قوس القدح
وسيوف مسحوبة
راحو
لبسوا العتم !
قامات مهيوبة
ناديت
بالله رجعوا
ماتلتفتو صوبي

************************************************** *****

فوق

كان في غصن بردان
ع مرجة هلي
سألتن لمين الطقس
قالولي إلي...
وطلعت اتفقد إذا ردوا البواب
وبقيت فوق
وما حدا قللي نزلي
**************************************************

وحدن- غناء فيروز

وحدن بيبقو متل زهر البيلسان وحدهن بيقطفو وراق الزمان

بيسكرو الغابي بيضلهن متل الشتي يدقوا على بوابي على بوابي

يا زمان يا عشب داشر فوق هالحيطان ضويت ورد الليل عكتابي

برج الحمام مسور و عالي هج الحمام بقيت لحالي لحالي

يا ناطرين التلج ما عاد بدكن ترجعو صرخ عليهن بالشتي يا ديب بلكي بيسمعو

وحدن بيبقو متل هالغيم العتيق وحدهن وجوهن و عتم الطريق

عم يقطعوا الغابي و بإيدهن متل الشتي يدقوا البكي و هني على بوابي

يا زمان من عمر فيي العشب عالحيطان من قبل ما صار الشجر عالي

ضوي قناديل و أنطر صحابي مرقو فلو بقيت عبابي لحالي

يا رايحين و التلج ما عاد بدكن ترجعو صرخ عليهن بالشتي يا ديب بلكي بيسمعو

Posted by: samar dahi

مرحبا يا داوود ...على ما يبدو أنو أنت كمان من محبي الزجل اللبناني .....
انا أكتر شاعر زجال بحبو هوي طلال حيدر وبيجي بعدو هنري زغيب ....يعني هدول الإثنين بس حكو كانهم عم يقولو شعر .....وفي شعراء قديمين متل شحرور الوادي ورشيد نخلة ومن الحديثين موسى زغيب بالإضافة إلى شعراء الزجل المغنى زغلول الدامور أمير الزجل وزين شعيب (أبو علي ) واليوم ابنو لزين شعيب شي بجنن , انا حصلي الشرف بهالصيف أني احضر حفلة لزغول ومعو جوقة من الزجالين اللبنانيين ومن بيناتهم ابن زين شعيب ....الحقيقة هدول الشعار بياخدوك على محل حالم جداً وسامي لابعد الحدود بالصور والتشابيه اللي بتطلع معهن بشكل ارتجالي رائع ...
انا بلاقي أي قصيدة زجل بتسوى مليون قصيدة جاهلية ...ما بعرف يمكن لانو بيلمس القلب فوراً وفي ميزة السهل الممتنع .....انا ما بشبع ابداً من إني اسمع الزجل ...
وعلى فكرة عندي اخي بيكتب الشعر الزجل بطريقة مميزة جداً وأنا عندي كل قصيدة من شعر أخي أجمل من كل شي بسمعو لأنو شعر أخي بكل بساطة
وهي قصيدة لطلال حيدر
مَ دام

مَ دام
نوم ولادهن طيّر ورق بالسهل

مَ دام
ما عاد بدهن يخلوا الصبي
يدقدق جراس النحل

مَ دام
إيديكِ البيوت الفاضيه

مَ دام
ما بَقْ في حدا
غير القفاص العاليه
وغير الصدى

مَ دام
إيديكِ السهول

مَ دام
بس تلململي دَيْكي

بيتلملموا طراف الحقول

مَ دام
مهما قلت
رح أسكت ع طول..
ما عاد بدي قول

وانشالله يا داوود تتحفنا بقصائد تانية لطلال حيدر ولغير شعراء كمان
خلينا نعمل هالموضوع هادا لكل الشعراء الزجالين ..
وانا بوعدك إني رح ساعدك بهالشي
يالله بلش بشي قصيدة لهنري زغيب مثلاً
وهاي مني قصيدة لزين شعيب (أبو علي )
قالوا كبرت يا بو علي والعمر فات
ويمكن صرت عاجز تأدّي الواجبات
كان لك زمان تغازل زهور النبات
وتفيّق النسر اللي بقلب الوكر بات
***
قلتلهن وحياة كل الآنسات
وكل شي خلق الله حلو ومرطّبات
بعدني لولا كمشت شلف الحديد
وقت اللي بدي بعملو غزل البنات
***
اللي بيكون عندو مال بيموّن جموع
ليش حتى ينحرم ويموت جوع
آدم كسر ضلعه وعمل منّو مرا
لنّي محلو بكسر الأربع ضلوع
فينا نكمل يا داوود متل ما قلتلك
سمر

Posted by: daoud

شكراً كتير سمر. شوقتني اسمع شي من شعر أخوك عصام. أنا طولت لحتى رديت بس عجبتني الفكرة لأني بحب الشعر كتير إن كان عامي أو فصحى. خلينا نتشارك بالكلمة الحلوة سواءً بل الزجل أو بالشعر الحديث. الزجل معرفتي في ضحلة وهي فرصة أتعرف على شي جديد وحلو.

Posted by: daoud

خلينا نكمل مع الشاعر هنري زغيب واخترت وحدة من أجمل ما غنته ماجدة الرومي :

نجمة الســــــــــــــــــلام

يا طفل المغارة
وسع المغارة
وطنى بردان
وسع له الطهارة
تايرجع مناره
فى عتم الزمان
بليله بردانه
ما فيها الغطى
بنسمة شردانه
اتسربت بكير
لقيت على بابك
و الدنيا ع الباعه
و التاج مواعيد
أبيض مثل الأمل
واسع للمحبة
كان العتم عابس
صار العتم حلو
وعاد إليها كواكب
صاروا ينجلو
و بالزوايا صاروا
و أجراس قناديل
قربنا حتى
سمعت تراتيل
يا يسوع
يا يسوع
و من يومها السلام
اتوسع فى الدنيا
و كبرت السعاده
فرحه ملونه
كرما للبراءة
كرما للطفوله
لمشردين
للناطرين العيد
دايرين ع بيوتنا
تا تفرح البيوت
يا فرح العيد
يا يسوع
يا يسوع
يا طفل المغارة
وسع المغارة
وطنى بردان
وسع له الطهارة
تايرجع مناره
بعتمة الزمان
من دفا عينيك
امسحه بالإيمان
و بشر أهالينا
ميلاد الأمان
يا يسوع

Posted by: mazen youssef

موضوع اكثر من رائع انا شخصيا احب الزجل وبما انه شعر ارتجالي على ما اعتقد فهو يحتاج الى أناس فعلا مبدعين ولكن للاسف اني لا احفظه فارجوا من الاخوة اتحافنا ببعض ماعندكم من الرجل مع الشكر للجميع

Posted by: samar dahi

مرحبا داوود ومازن من جديد ...
انا ربيت في بيتنا على سماع شعر الزجل واذكر عندما كنا صغار كيف كنا نلتم شلة من الشباب والصبايا لنسمع اخي يترنم بزجليات زغلول الدامور (صدفة التقو بعيونها عيوني ....وإلى ما هنالك من أشعر الزغلول والتي سأضيف جزء كبير منها ) وانا سأذكرك يا مازن إن كنت تذكر الزجليات التي كان يغنيها عصام في سهرات زيدل لا أعرف إن كنت من الشباب الذين كانوا يتابعون سهرات ضيعتنا فأنا أذكرك تماماً ولا أعرف إن كنت تعرفني فأنا سمر ضاحي أخت عصام وسامرضاحي وأظنك تعرفهما جيداً أكثر مني ...
وأعلم أنك تقيم في الجزر ....وهذه القصيدة سأهديها إليك باسم أخي عصام فهي لكل مغترب غاب عن تراب هذه الضيعة الجميلة ....وايضاً إليك يا داوود لأنك قلت بأنك متشوق أن تسمع شيئاً من شعر اخي ...فهذه القصيدة مهداة إلى كل أهالي زيدل المغتربين

بزيـدلــنا بـدنـا نعـمّر وكلشي عـنا نعطيها
عـن زنـدك قـوم وشمّر شـيّد فـيها وابـنيـها
وضـل بزيـدل متسـمّر لا تهجرها....تبكّيـها
ودروب الضيعة تْمرمر لـما بـتـفـقد غـالـيها
وغـصون الخـفر تجـمّر لمـا بيـرحل راعيـها
اصـحا تـهاجـر بـدمّـر حلـم كـبير اللي فيـها
وفـكرة هالهـجرة طـمّر دفنـها بأرضا ونعيـها
وضل بأرضك واستثمر خـضّر كـل روابـيـها
عصور العنبات وخمّر حنطة بذرها واسقيـها
وحصود الزرع وغمّر وبـيـادرها ذرّيـها
وخبيـز الخـبز وقـمّر لا قـربـان لبـاريـها
كـداح وكل زيدل ثـمّر جـنّي عملـها وحميها
ومن شمس بلادي سمّر زنود تْشَرّف حاويـها
وِلْ بـالـغربـي مـتذمّـر وكَارِه كـل ملاهيـها
ع الضيعة رجاع وعمّر زيـدل حـلوة ليـاليـها

سنعود مع قصائد الزغلول

Posted by: daoud

شكراً كتير أول شي لأني متغرب عن سوريا وتاني شي لأني كتير بنبسط بمواهب كل سوري وتالت شي لأنك يا سمر حفظتي كل هل شي وحسستينا بجو الضيعة الحلو وابتمنى يكون عطول حلو.

Posted by: samar dahi

مثلما وعدتك يا داوود بأن نكمل مشوار الزجل فهانذا أفي بوعدي دائماً وسانقل لك الآن قصيدة لزغلول الدامور تغنى بها أخي كثيراً في سهرات زيدل وأعتقد ان اغلب اهل زيدل يعرفون هذه القصيدة لأنه لم تكن تمر سهرة إلا ويغنيها عصام بلحن يضاهيها جمالاً ....وهذه هدية مني لك عربون شكر على الهدية (نذروني إلك )
صدفة التقو بعيونها عيوني

صدفة التقو بعيونها عيوني وعالبيت من دون وعد عزموني
وقلبي فلت مني سبقني وطار ومدامعي عالدرب دلوني
ولحقت قلبي وعملت مشوار عابساط جانح ريح مجنوني
ومن غيرتي عليها خيالي غار وتحارب جنوني مع جنوني
ووصلت والقيت القلب محتار والعازمتني مقدّرة فنوني
واحلى ماايدي تحترق بالنار عابابها دقيت بجفوني
وسمعت صوت بيشبه الاوتار حرك شعوري وفيق ظنوني
وقالت يااهلا ودخلت عالدار وعيونها بديو يحاكوني
والشعر ياليلة بلا انوار من عنبر كوانين مشجوني
وجبين طافح بالحلى فوار خلا عقول الناس مفتوني
والحاجبين الجار حد الجار سيفين بالحدين دبحوني
وجوز الحلق عادينتين زغار من الجرح بعد الدبح شفيوني
وخدين مثل الزنبق بنوار اكثر مابدي عطر عطيوني
البيشوفهن بقول توم قمار جاعو وطلبو الاكل والموني
وشفاف حمر يسكرو الخمار من فرد نقطة خمر سكروني
شقيقين تعمشقو عاشوار وقالو مارح فيهن يقطفوني
وسنان شال الفل منها زرار بيضا بلون العاج مدهوني
والعنق مثل الخيط عالبيكار مسكوب لا ورقة ولا معجوني
والصدر من اثقل وأغلى عيار متحف درر وكنوز مدفوني
ورمانتين بيبهرو الانظار عالصدر ياريتن يقبروني
وعالخصر عيني بتحسد الزنار لو مطرح الزنار حطوني
تاكنت اكشف بقوة الاسرار ومعليش لو مجنون عدوني
ياناس هيدا اللي حرى والصار وتاتصدقوني وتاتعزروني
روحو معي عابيتها مشوار وتفرجو عاحسنها من بعيد
وان ضل فيكم عقل لوموني

ولنا موعد آخر مع قصائد أخرى

Posted by: mazen youssef

الاخت سمر والاخ داوود والى جميع اهالي زيدل الحبيبة ......................ارجع بذاكرتي لتلك الايام الجميلة ..السهرات البصيطة الجميلة الخالية من التكلف والتملق وال.....الخ...........عدت الى سهرات عيد الخضر وعيد السيدة الى الاغاني والعتابة الى حواش اللوز واغانيه الى عرس زيدل الذي قدم في مدينة زغرب والفرقة الزيدلية الرائعة الى كل دبكة او جلسة طرب و زجل الى الجلسات الجميلة مع الاخ الغالي عصام وابتسامته الحلوه وصوته العذب وكنا نشاركه بعض الاحيان بشي كم بيت سويحلي انا والاخ سامر والشباب ليس لدي كلام لكي اضيفه سوى كلمة انها ايام جميلة من الذاكرة وارجوا المزيد من الزجل اذا كان لديكم مع الشكر للجميع وسلام ملئ بالمحبة للاخوة الغوالي عصام وسامر ولكل اهالب زيدل الاحباء .................

Posted by: daoud

سوف اشارك بمحاولة متواضعة وليدة الحنين إلى سوريا الحبيبة ، أرجو أن تنال إعجابكم

إلى عاصمة الياسمين ، تحية وبعد

أين أنت يا أبي ؟
وأين يداك وعيناك وشواربك الشوكية
دفاترك وأقلامك وفواتير تسليفك الشعبية
إضحك فأنت لا تعرف كم تحينا تلك الضحكة الهنية
بماذا أوصيك ؟
أوصيك صابوناً من حلب وياسميناً من الشام وحلاوةً حمصية
أوصيك بأمي وأدويتها الدورية
بأختي وضفائرها الذهبية
بشجرة الليمون ، اسقيها عني ولا تنسى الوردة الدمشقية
لقد أثمرت العريشة عنباً
غداً سنشربه خمراً سوية
أبي ، عندي لك هدية
نقطة في بحر عطاياك السماوية
خبأتها لحين عودتي كي أراكم جميعاً وأتحسسكم بيديَّ
وأتسكع ملياً في شوارع دمشق الحبيبة الحميمة القديمة الشهية

داوود

Posted by: daoud

بقدملكن يا سمر و يا مازن هل القصيدة للسيد محمد المصطفى ع أمل نكمل سوى . وشكراً سمر ع قصيدة زغلول الدامور كتير كتير حلوة.

ضلّي وعديني وغيبي شهور وانسيني
وعدك الكاذب بهجرانك يسلّيني
بتخايلك جاي وعليك من الوقار ثياب
في عكس حوّا القديمي وثوبها التيني
بتخايلك جاي عادرب ملفلفي بجلباب
بغطّي حلاك بخبّي زينة الزيني
شوما لبستي بيبقي سحرك الجذاب
بيغوي مراهق وشب وكهل تسعيني
وبتخايلك ريمة فلا من حول منها دياب
وحدي الحارس عابابك رح تلاقيني
ومن بعد ما بخلّصك من غدر أهل الغاب
لا تفكّري مقابل عمل واجب تكافيني
بتخايل البسمه عاتمّك من خلف الحجاب
بسمة رضاك عليّ يا تقبريني

Posted by: samar dahi

شكرا داوود على هالقصيدة الحلوة .....
رح انقلك قصيدة لزغلول خطرت ببالي هلق بس الحقيقة حافظة المطلع ونسيت الكمالي ..رح اسمع شريط زغلول بكرة وكفي القصيدة :
قشعي حالك يا أم خدود زيني لحظ عينك جرح قلبي ونسيني
تا اشكيكي ليكي ما عرفت وينك ولا كنت ع جرحي تسألني
انا زغلول ريشي بجانحينك تعي ومطرح ما بدك طيريني
وبسيفين اللي هني حاجبينك وقت ما بتتعبي مني اذبحيني
واذا في فاصلة بيني وبينك ومــا فـيّ قابلـك وتقـابـلينـي
تا ابقى حي ضلي دخل عينك من مرة لمرة على دقات قلبك سمعيني
هاي جزء من القصيدة اللي متذكرتو هلق ...انشالله بكرة بسمع باقي القصيدة وبنقلها كاملة
هاي يا داوود كان عصام اخي يغنيها و يقول بدل انا زغلول ...يقول أنا عصام ريشي بجانحينك ..ألخ
فلهالسبب انا متذكرة هالقصيدة هاي لانو كمان كان عصام يغنيها بسهراتنا .
شكرا على حسن المتابعة منك داوود .....ما بعرف كمان يا مازن اذا متذكر هالقصيدة هاي من تم عصام .

Posted by: samar dahi

هاي القصيدة للزغلول من حفلة تكريم قديمة الو ما بعرف اي سنة بالضبط بس بعرف على عهد الياس الهراوي .....
اسمها

لما الربيع اخضر يا عصفور

لما الربيع اخضرّ يا عصفور والزنبق اتعرّى من تيابو
فليت وتركت القفص مهجور والريح عم تصفر على بابو
ونسيت كم صرلي سنة بربيك وبقول بعدك ما إلي عيشي
وصرت من كتر اهتمامي فيك اللي بسجن تحكّم بريشي
وعليك خفت من الشمس والفيّ ولفلفتك من البرد بجفوني
تا كلّ ما صوتك عطش للمي يسقيك مناقدك من عيوني
واحترت كيف بعاملك تتكون راضي ولكن ما كنت راضي
جنيت فيّ وبعدني مجنون وخايف جنوني يروح ع الفاضي
مش هيك بيكون الأمل يا شريك من غير داعي تهجر ربوعي
بعدو القفص مستنظر يغفيك ع سنابلو ال شلتن من ضلوعي
وقلبي إلك مفتوح يا طيري تا ترجع وكفّي معك سيري
خليك عندي بالقفص مأسور , اسرك معي أفضل إلك بكثير ما تكون عايش حر مع غيري

Posted by: daoud

هذه واحدة من زجليات الزغلول التي وجدتها على النت. أرجو أن تعجبكم :

يا سامعين الصوتْ لا تملُّوا
العطشان لازم يرتوي غِلُّو

اشتقنالْكمُ والشوق موجِ بحورْ
والقلب شو مْنِقدر نعملُّوا

سافرت وتركت الزمان يدور
وعجِّلْ قَدَرْ ما فيكْ قِلْتِلُّوا

ومن بعد غيبة خمس ست شهور
رجعت من هون ودي التحية للشعب كلو

* * * * * * * * * * * *

وبغيبتو الزغلول لو طَوّل
لا منهجو تبدّل ولا تْحوّل

بَعْدو الحبيب وبعدكُنْ احباب
منكن وَحِي بيظل يتموّلْ

وراح قِلكُنْ شو السرّ والاسباب
تا بْظَلّني سافر وإتجوّلْ

هونيك عنا بدنيةِ الغيّاب
لبنان ثاني وكل سني بنروح
تنذكّروا بلبناننا الأول

* * * * * * * * * * * *
وكل شي برمنا وكل شي غِبْنا
لا افكارْنا تعبت ولا تعبْنا

وبْنِعتبِرْ كلّ التعبْ بيزولْ
عنا إذا قِمْنا بواجِبْنا

لو قدّ ما عمرِ الغياب يْطول
ما همّنا الا لْبِيناسِبْنا

وبين الشرق والغرب فينا نقول
بدنا رضا غيّابْنا علينا
وبدنا رضاكُمْ يا حبايِبْنا

Posted by: اناسيما 86

والله طلال حيدر من المبدعين ..
وشكرا على الشعر
على فكرة يا شباب ...في مغنية لبنانية اسمها غادة غانم بتغني شعر طلال حيدر
عنوان البومها ريحة شتي ..حدا عندو فكرة او اغنية
......................................
صوتك مرق عالمسافة وسلم عليها
ما صدقت المسافة تشافت الحنة ع ايديها
قال الصوت خليكي مادام جايي هواه
رح ضل ناديكي يالله نبقى سوا

Posted by: daoud

تكرم عينك اناسيما 86 أنا عندي أغاني غادة غانم بس حضرهن رح وارجع اكتب الرد

Posted by: daoud

ريحة شتي
ألبوم لغادة غانم
من كلمات طلال حيدر
من ألحان زكي ناصيف , ايلي شويري , شربل روحان ...

http://www.akhawia.net/showthread.php?p=601627

موقع زيدل سوريا حمص .. خدمات تشات و دردشة ... أرشيف المنتدى