فلاّح

راجع غـَيم الشتويهْ.......و واقـَّفْ عالبابْ

حامل لحنْ وغنيّهْ ........توعِّيْ المزرابْ

======================

فلّ الصيفْ بشوباتو............وطَلطَلْ أيلولْ

وصار الغيمْ بهبَّاتو..............عَالصبحْ يجولْ

وعنقوديْ عا حَبَّاتو.............بالو مشغولْ

منْ عْصَافير اللي بَاتو.....عَ السروهْ قـْرَابْ

=====================

راجع غـَيم الشتويهْ.......و واقـَّفْ عالبابْ

حامل لحنْ وغنيّهْ ........توعِّيْ المزرابْ

======================
شو صايرْ بين الورقهْ .....وبين الطرنوبْ

الناسيْ العشرهْ والرفقهْ...وخِلـْقو مقلوبْ

خايفْ يرميها بطلـْـقـَهْ....وتِشْرُدْ عَ دروبْ

و قلبا يفِتْ منْ الحِرْقهْ......ويصيرْ ترابْ

====================

يَ فروعْ الغصن الحانيْ......حاجهْ مْشاويرْ

حِمَلـْتيْ الخير ببستانيْ.....وفَضِّلتيْ كتيرْ

الهيئهْ نعِستيْ وتعبانهْ .........ناميْ بَكِّير

شمس الصيف الولعانهْ.....مالِتْ عَ غيابْ

====================

يَ طيور الـْ عا هالتلـّهْ......سْكبتي الألحانْ

الـْكانتْ زيدلنا تحلـّيْ .......وتملى الوديانْ

ليشْ تروحي وتفلـّيْ.......وتنسي الأغصانْ

شوفي شاديْ بهالطلـّهْ....بصوتو شو جَابْ

===================