الارشيف - نيرمين..

نيرمين صبية غنية حبها شب رفضتو لإنو فقير....بعتلا هالقصيدة...

نيرمين ليش تبدل المقياس----تا اللّب فاضي و القشر حسّاس

و ما بلبق بهالحال صهر بيوت---و الباب تذكرتو مهر ألماس؟!

و إلا مع التمثال ما بنفوت؟----كيف بدنا يا سارقة الإحساس

نحمل كرامة ناس من ياقوت----عا بيت مش حامل كرامة ناس!

فلاح بيي و ساعدو أسمر----و توبو رقيق و مشلحو أغبر

و بيجوز من قسوة حجر الكروم----قلبو تقسىّ بس.. ما حجّر

و لا تضحكي لو كوخنا المبروم----العمّار سقفو بالقصب عمّر..

سقف القصب لو كان ما في لزوم----يعزف قْبال الريح تا تسكر

لا تصدقي كان الهوا المحروم----بدو يوّفر زخرفة و مرمر

و الورد هلّي بباقتِك محكوم----كلما قبالِك يدمع و يسهر...

لا تقشعيها شردة المغروم----لما عن الناطور يتذكّر!

و روح الإبا بالقصر ما بتحوم----و حسون بيتِك بالقفص قرّرْ

مهما شطبتي بجانحو الاسمر----يشطب عليكي اللّحن المصوفر

و ترجع من دموعِك بقايا الريش----بتغب كاس النصر.. و بتكبر

عندي نسيم و مصطبة و مشوار----عندِك الجنة.. حارسا دولار

عندي خيال و ملعب و محصول----عندِك خزانة و مقعد و رادار

و من وين عا شفافِك كرم أيلول----عم بشبه الخمرة أو الخمّار؟

و العطر.... بقناني عتم مقفول----متل الغريب بأرض بيّو صار

يصرخ سْقاالله غربة العطّار!

حاجي تقولي الحب و الإيمان----صفّى معلّق عا كتف جزدان

و بدّك أساوِر... بدِّك فْساتين----بدِّك طواق مدهّبة و مرجان

معليش ما في لوم يا نيرمين----وقت الزمان بيقنع القبّان..

يعيد الحساب بلعبة الأوزان----و تا يعود يضحك عا دقن إنسان

يقلّو قبالك انت ما في كنز----بيربح سبق عا طلعة الميزان

إبراهيم ياسين