مَـرِّة حِلمْ

لَ تفكري هالقلبْ لو مَرِّتْ سنهْ ......................مَرِّة حِلم عا غفلة النومْ الهنيْ

ضيَّعْ شيْ ذرة شوقْ ليكيْ أو ولـَعْ .......منْ يومْ مَ فـْـتحْـتيْ عيونو عْلى الدنيْ

======================================

وكِلما بقفل البابْ مِفتاحِكْ حَرَكْ............عا موعد رجوعِكْ , حنينيْ الليْ انترَكْ

محبوس جوّا عيونْ ورموشكْ دَرَكْ.............بيقولْ روح الروح جايهْ تفكِّني

========================================

لولا إنحبس هالقلب بعيونكْ وهَامْ ..............مشْ هَمْ هَيْكْ يتـَمْ مِيِّهْ وألفْ عامْ

ما دام متلو طيورْ ورفوف لـْ حَمَامْ ...........صافي السما بكلْ عينْ فيكي مْزيِّنهْ

========================================

بعدِكْ صِرتْ ندمان عَ العمر اللي راحْ..........وعا كلْ دقة قلبْ سكرانهْ بْلا راحْ

وكِلما ضِحِكْ عَ مخدتي بوجِّكْ صباحْ......بدعي االشمس توقفْ وتبقى ساكنهْ

========================================

وبيتِكْ كأنـّو ثوبْ وعْليكي لـَبقْ ...........معْ كل مسى بنسماتْ إيديكيْ عَبَقْ

وكِنتيْ الزهرْ يلْ سَيَّجو وكِنتي الحَبَقْ ........الـْ منْ غير ما هزّو بعطرو هَزَِّنيْ

=======================================

ولمَّا جناح الليلْ يفردْ عالمدى...............وعجقة نجومو تصيرْ تحكي بلا صدى

إنتي وانا يا ريتْ نبقى عالهدى.................بْلا كهربا ,و تبقى عَ طول مْقـنـَّنِهْ

========================================

حَدِّكْ أنا حِسِّيتْ شوْ هوِّي الأمانْ........وشلـَحت خـَوفيْ الـْ كانْ بِِ وجْ الزمانْ

وعْمِلتْ من صابيعْ إيديكي كمانْ................بشريان قلبي عِزفتْ قطّعهْ مْلحَّنهْ

========================================

شو حَشَّركْ بالكهربا وشِرْباكها...........ارضى بْكـَرَمها وقنـِّن استهلاكها

يمكنْ مزاجا يروقْ عا غفلهْ وتجيْ......يا صاحبي وينعْنِشَكْ كـُنطاكها

===================================

لولا شعوركْ صار عاليْ المستوى..........وألفينْ واط تجمَّعوا بردَّكْ سوى

بتكونْ عَمْ تصدمْ فؤاديْ بوقتها .........تَ يجنْ فيهْ الشعر, بِِ جُرعهْ دوى

=======================================

جروحْ السما يَ رعودْ , ياللهْ تـَفتـَّقِيْ....و صُبّيْ جَحيمْ الشعرْ , نيرانْ إنتـَقِيْ

بِشريط ْ فكرو جاي جعفر يتقـِّيْ ............شِحناتْ غيْميْ , لـُوْ عَ أرضو بيلتقيْ

عَا كَمْ حَجرهْ منْ شعورو مِستقيْ.................نافشْ رياشو وضَنْ حالو مِرتقيْ

أبراجْ حَرفكْ يلْ فتحتْ سوارها ..............لـْحَالـَكْ فتحتا قبورْ , قـَيِّسْ و إنتِقيْ

=====================================

هيدا القمعْ الـْزغيرْ مشْ قبْر إنسما.........هيدا عَ حَدَّكْ خِرِمْ صاعقة السما

لمَّا ببرْقهْْ ردِتْ تفهمْ بالوما...............لكنْ شو بعملْ وانتْ مْبليْ بالعمى

برجكْ هوا برعدهْ هوى بوادي إنرمى..........وبعدو يَ شاعر عُنفوانكْ مَ اندما

وهالكشتبانْ الليْ فـْكارَكْ عَظـَّما .........الـْخَلاَّكْ تجني من المطر بَسْ الظـَما

مهما أنا شتـَّيتْ مِشْ رحْ ينتلِيْ ................لنّو إنقلَبْ عَ دماغْ عَا قدّو نـَما

=================================

جَعفر يَ جعفر : شو الكَبَرْ فَوَقكْ عَبَرْ...وخلاَّكْ تشمخْ عا غـَريمَكْ بالزغـَرْ

هالبحر لوْما كبيرْ عا مدْ النظرْ...........ما كانْ سحرو بيخلبْ قلوب البشرْ

ولوما السما بتـْسَاعْ أشواقْ القمرْ........ما كانْ فيها نجومْ بتحِبْ السَهَرْ

وما دامْ عِندكْ مِخْ يَ خَطـِيِّ إنحصَرْ........وبتظـِنْ فينو الزهرْ أطنانْ إنعَصَرْ

رحْ ضَلْ نَقـِّرْ تا يرنْ وتسمعوا.................وتقنـَعْ بأنـَّكْ عَاتلو بَيضة ْ حَجَرْ

====================================

بيضهْ بَعدْ بيضهْ , إذا فكرَكْ بيبيضْ ................يمكنْ نهرْ صيصانْ ,هالمنبر يفيضْ

وما فيْ أمل منْ هالحجرْ , ما فيْ وميضْ.......وادعيْ لـْرَبَّكْ عنْ قدسْ ضاعِتْ يعِيضْ

مادامْ صوتْ الحقْ بزْمانَكْ بغيضْ...............والباطل الـْمسموعْ دومْ , عْلى النقيضْ

وهالبحر يلليْ عِلِيتْ رايتو غيْماتْ بيضْ.........يمكنْ بلحظهْ يقرضْ الشاطيْ قـْريضْ

وعصفور شِعرَكْ لوْ عِلِي جناحو العريضْ....تَ يطالْ شمس شموسْ مملكهْ القريضْ

تأكـَّدْ إذا بيعملْ لعقليْ معاينهْ ..................دغريْ بضربة شمسْ رحْ يوقعْ مريضْ

==========================================

بَصَّيتْ عالفاضي وقتْ شِفتْ الليْ فـَاتْ............بردودَكْ الليْ مْلِيْتـها بالترَّهاتْ

هَودي اليهود اللي إجوكْ من الشَتاتْ............وخلو العروبهْ فَوقْ إيدَيْنا رُفاة ْ

بالعِلمْ والحيلهْ ...وتخطيطْ لـْدُهاة ْ............بيفكّرو لـْـقرونْ مِشْ يَومْ وسَاعاتْ

وعصفورْ يلليْ بالقفصْ شَافْ الحياة.........بينطر صَوابعْ تطعموا كِلشيْ فـُتاتْ

بحِريتو لوْ يومْ عا غصنو يباتْ ...............يمكنْ صباحو ينجليْ تَ يكونْ مَاتْ

هيدي الحقيقهْ ان شافها مِخْ العَرَبْ ....يمكنْ تشوفْ القدسْ أطـواق النجاة ْ

======================================