إبراهيم ياسين وينك

يمكنْ قمر هالليلْ للنجمهْ صديقْ.......عاشو سوى بصافي السما إختْ وشقيقْ

ويمكنْ رمل هالشط للموجهْ عشيقْ........كلما إلتقو بْتطفي بأشواقو الحريقْ

لكنْ إذا شب وصبية ترافقو..................... قِلـّيْ عَ أيَّا نهجْ بيكفـّو الطريقْ

=====================================

تاريكْ يَ براهيمْ عْلى دربَكْ غشيمْ............بحاجة لـْشواخص ضاويهْ بحكمة ْحكيمْ

توعِّيكْ تا مَ تحيدْ عنْ درب النعيمْ.......................وتدخل بلاد الهاويهْ و نار الجحيمْ

رافقْ من الستاتْ بالكمْ العظيمْ...............وإسبر عقل كلّ بنتْ تَ تشوفْ الصميمْ

بتقولْ مثلْ خـْواتْ نبقى بالسليمْ....................ولا مرجحهْ بعقلاتْ هالربعْ العقيمْ

وكلشيْ عِشِقْ بيعيشْ عْلى الفرقهْ دَهرْ...........الجازهْ إلو بتشابهْ الموتْ الرحيمْ

=======================================

ابراهيمْ بعد الحبْ عَ الجازه رسِيْ...............ولمَّا أنا ردِّيتْ عا حكيو نِسيْ....

شو قالْ , تَ يبلـِّشْ بعقلو وَسوسهْ ......ويُنشرْ دُخانْ فكار شِبعِتْ عَسعَسهْْ

مرتيْ أنا بينْ الصبايا مْقدَّسهْ........................وردة نديّهْ بِ صحارى يابسهْ

ثوبْ الأخوِّهْ للطفولهْ مْلبِّـِسيْ.......................وقلبا لـْنور الرب فاتحْ مدرسهْ

لنـّو الأخوِّهْ دمعة القلب القِسيْ..............وطـُهْر الصداقة مثل لونْ النرجسهْ

مشْ حُبْ طاغي عا قلوب مْدنـَّسهْ.........بشهوهْ رخيصهْ عَ الغريزهْ مأسَّسهْ

ولولا الأخوِّهْ وينْ ظـَهْرْ بيسندَكْ..................لولا شِفتْ مرَّهْ حياتـَكْ عابسهْ

===================================

حكيـَّك عَ راسيْ, ولوْ جهالهْ بتفضحَكْ.....لنـَّكْ بقلبيْ مثلْ خيِّي مَطرحَكْ

بنسى أنا جَرحْ الأخوهْ بمذْبحَكْ...............وبكلْ طيبهْ بعاتبكْ تا سامحكْ

بقلـَّكْ يَ خيِّي : لوْ شي شوكهْ بتجرحَكْ....بتنادي..أخْ ,يمَّا حبيبيْ عْلى الـْمِحَكْ..؟

اللهْ عْلى هالتفكير ريتو يصْلِحَكْ...........تَ تعود تسمعْ خَيْ هَمّو ينصَحَكْ

هيدي الحبيبهْ سلاحْ ضعفا الـْطوَّحكْ.....وخلاَّ إيديها عْلى هواها تمرجحَكْ

إقسى عْليها تا عَطول تريِّحَكْ.............مشْ كلْ يومْ تزاعِلكْ وتصالحَكْ

وأمَّا عن الحجِّهْ الهزيلهْ بمسْرَحَكْ...........يللي عْليها مشْ قليلْ بينضَحَكْ

هابيلْ ليشْ يموتْ لولا من الأصلْ .........يا إبنْ آدمْ لوْما حوَّا تشرشِحَكْ

===========================================

إرجعْ ياخيي الْطاشْ بيكفِّي إندفاعْ............وكفكفْ بهالكلماتْ دمعاتْ اليراعْ

شايلْ عَ خيِّكْ , ليشْ ناسيْ عُمر ضاعْ..رِكبْنا سوى عا موجتو نسمهْ وشراعْ

دمِّيْ معاكْ , ومينْ دمّو بْمالْ باعْ ؟...........ولحميْ إلكْ لوْ تمْ إبنكْ يومْ جاعْ

قاشعْ أخوكْ بنظرهْ عيونْ الوساعْ ......و صوتو لـْضميركْ ما بقى يقلِّكْ سَمَاعْ

بهالشفرتينْ المروحهْ عا خَيْ طاعْ .....نسمهْ لـْشَوبْ العمرْ , مشْ للإنقطاعْ

اللهْ خلقْ حوّا لأدمْ منْ ضلاعْ......................وقال الأخوهْ للبشرْ ما إلها داعْ

ولمّا عَ ورقهْ توتْ هالحبْ انتحَرْ................عاد وخَلقْ زهرْ الأخوِّهْ لـْنَسِلْ فاعْ

========================================

يا حُبْ يَ مْدمِّرْ قلوبْ تعاهدِتْ .........تهديكْ ضِحكهْ , و ورد جوريْ شَهَّدِتْ

ياما عَ دربكْ منْ صَبرْها تنهَّدِتْ ..........وهْديْتها طَعنهْ , تَحتـَّى استشهَدِتْ

وكانتْ الجازهْ بَصِّهْ الْنورْ الْهََدِتْ .................دقـَّاتها لـْدربْ الأبوِّهْ تا هِدِتْ

ونِسْيـِِتْ عُيونْ عْلى قَبرها تشاهدِتْ............لِمَّا الأخوِّهْ بينْ إخوِهْ شاهَدِتْ

مِشْ كلْ جازهْ بالمودِّهْ تمهَّدِتْ ..............روحْ الغرامْ عْلى دَربْها جاهَدِتْ

منْ يومْ آدمْ مَ بعيونو تبدَّدِتْ.................هَاكْ الغشاوهِ وشافْ حوَّا تجَرَّدِتْ

بكلْماتْ اللهْ شوْ العقوبهْ تحدَّدِتْ.................ومعْ حُبْ أو بالْكِرْهْ حَوَّا وَلَّدِتْ

وما زالْ عمْ تطلبْ مثالْ وشدَّدِتْ .............عَ بلادْ منْ فضلْ الأخوِّهْ تزايَدِتْ

بقلـَّكْ مَثـَلْ منْ عَيْلتي بهالمنتدى ........وشوفْ الأخوِّهِ بكِلْ صفحهْ وَرَّدِتْ

======================================

و مشْ كلّ محبوبينْ طارو بالهوى...............عا غيمهْ الأحلامْ عَ جناحْ الهوى

رَحْ دَومْ يَ ابراهيمْ بيضَلّوا سوى...................عا صخرة الأيامْ لوْ حُبّـُنْ هوى

وهالموقعْ الـْ عالنتْ عاليْ المستوى....مشْ بسْ بالأشعار يَ خيِّي ضَوى

في خـَيْ قاشعْ خَيْ مَلّ ْ منْ النوى.....وفيْ خـَيْ فـَضْفَضْ هَمْ بالقلبْ إنطوى

وفيْ خـَيْ بالإيمانْ فاضْ , و مَ إرتوى........وفيْ خـَيْ هَمّـُو يوزِّعْ الضحكهْ دوى

يعنيْ إذا بتشوفْ , طَـَلِّعْ هالحبيبْ.........بهمساتْ هالإخـْوَاتْ قدِّيْشو ذوى

===================================

بكلمةْ (حبيبيْ )لـْشخصْ حُـبَّكْ أنكرو.....غيْرْ( مثلْ خييْ) لـْخاطركْ شوْ بيجْبرو..؟

هالكاسْ يلليْ كتار حَبّوا تمرمرو.................كِلـْما الحبيبهْ لـْمُعْجبيها تمرِّرو

منْ هونْ شوفْ قلوبْ كيفْ تدمَّرو ...............تا بيتْ حلوهْ عَ الخرابْ تعَمِّرو


وانْ كانْ قلبيْ للحبيبْ بْأكثرو................وهوّيْ الـْقَطفْ زهرة حنانيْ بمعْشَرو

لنـّو العشقْ طبعو أنانيْ و مشْ مِثلْ .............روحْ الأخوِّة الليْ زهرها بتـنثرو

=============================================

برضاييْ بْمُوتْ عا خشبهْ صليبيْ ......تَ خلـِّصْ صاحبيْ وخَيِّ وحبيبيْ

الـْكَفرْ بأخوِّتيْ وفَتَّحْ جْراحيْ .................تَ سالتْ مَيْ المحبِّهْ عَجيبهْ

أنا بعْطيهْ روحيْ وإنشراحيْ ..................إذا بيقولْ منْ ورثيْ ونصيبيْ

إذا بحسّو بعطفو مالْ ناحيْ ..................وقتْ بتميلْ عَ كتافيْ مصيبهْ

ويَ إبراهيمْ هَديْ عا جْناحيْ.............جناحْ الشمسْ رفرفْ عا مغيبيْ

أنا نيْةْ الـْعِشِقْ مِشْ إقتراحيْ ...............وانتْ غفلانْ عنْها بْدونْ ريبهْ

حَبيبكْ مالِكَكْ لوْ كِنتْ صاحيْ ..............وكِلْ عشقانْ رحْ يدفعْ ضريبهْ

بيغار عليكْ منْ أمَّكْ ي صاحيْ .....................إذابتضمِّها بلهفهْ وطيبهْ

عْليكْ بيحسدْ زهور الأقاحيْ ........................إذا تأمَّلتها بنظرهْ غريبهْ

وموجْ الـْراسمْ اللجِّة وماحيْ ................بيحبْ صخور عَا شطـّو ربيبهْ

وعشابْ البرْ للراعيْ مَرَاح ِ................... وطـَعْمِتْ خَيرها وهيِّ طَبيبهْ

وبلاها نسلكْ الدربْ الإباحيْ ................لِسانكْ بعرفو شايبْ وشيبهْ

وتَ إختمْ جَولتيْ بْطلبْ سماحيْ ........إذا مَ خْطيتْ بِ حَقَّكْ يا خييْ

وبدعيْ قلوبنا تبقى قريبهْ

===================================