الارشيف - دخلك يا طير

دخلك يا طير يا طاير بِِهالوديان

ع ضيعتنا معك رح ابعت رساله

ودّيها يا طير يا ملون بألوان
تايعرفو الأهل شو صاير بحالي

ون كنت يا طير ما بتعرف العنوان
ع درب ضيعتنا بيدلّك خيالي

هونيك مطرح ما يلعبو الصبيان
وضو القمر عتلال بيلالي

ومن حضن الموقدة يطلع الدخان
يفرش لحاف الدفا ع جبل عالي

و بحّة قصب بتليّن الصوّان
عتابا وميجنا وجلسة ارتجالي

ختيار جايي من الأرض تعبان
وعجوز عالمسطبة تقطف دوالي

نسمات الهوى بتغازل الريحان
وصبية تمرجحت تحت عرزالي

تنور حولو تجمّعوا النسوان
وصوت الواوي بعتمات الليالي

بيكفي بقى يا زمن هجران
ايام ضيعتنا عنّت ع بالي

ومهما بالغربة طال الزمان
بيبقى تراب الوطن يا طير غالي

يهمني نقدكم