الارشيف - زيدليات لن تموت { مفردت زيدليي قديمة }

Pages: 1

زيدليات لن تموت { مفردت زيدليي قديمة }
(انقر هنا ان احببت مشاهدة الموضوع الاصلي بالالوان و الصور )

Posted by: نديم عبد العزيز

مرحبا...
هاي مشاركتي الأولى بموضوع بالمنتدى وحبيت أكتب عن بعض الكلمات الزيدليي القديمي اللي صار استعمالها كثير قليل : مثلا :
مدهر : جوعان
كان يقال مدهر للي جاي جوكان كثير وبياكل بشراهة و بدون وعي
كانو يقولو فلان مدهر
الموقد و الحوم : الموقد هوي موقد النار المعروف
والحوم : جورة كانو يحفروها قدام النار مشان يطالعو النار و الجمر من الموقد و يحطو فيها ويتدفو عليه أيام البرد و كان يتجمع حوالي كل حوم شي 4 او 5 اشخاص
الجلة : الحطب
كانو يستعملو للتدفئة و للتنور و شغل الخبز
الحيلان : كان يستعملو لدرس { طحن } الحنطة بعد الحصاد وكان الو 4 او 5 اسطوانات كبار مسننات وكان يسحبهن جحش وكان جحش الحيلان يشحط الحيلان وكان احيانا الجحش يتنح وما يمشي لقدا و يرجع لورا واحيانا بدو يطلع عن الشول { المسار } فكان ينضرب المثل ويقولو فلان مثل جحش الحيلان دليل على العناد و كبر الراس
الشول : القش المدروس حوالي البيدر
الطرحة : القش الناتج عن الدرس
الدرس : الطحن
التتبين : كانو يجمعو التبن على شكل كوام و يحطو بخياش وكل خيش تقريبا قد 4 او 5 شوالات وكانو يخزنو بالتبان لأيام الشتي مشان طعام الحيوانات وكان للتبان فوهة بالسطح وكان من تحت لفوق في سلم حوال 258 درجة وكان يطلع شخص عالسلم حامل على ضهرو خيشة وزنها بين 100 و 150 كيلو يفضيها من فوق بالتبان مشان خزن التبن

نشالله يكون الموضوع عجبكن
بس بدي اشكر عمي ملحم عبد العزيز اللي عطاني هل معلومات الحلوي

انى مستني ردودكن بشششششششششششششششششوق

يتبع

Posted by: hasan61

آه يانديم
قرأت كتابتك وراحت ذاكرتي لهديك الأيام . عنا بقطينة بسمو الموقد موءدة مؤنثة وكانو يحطو فيها الجلة اللي هي زبل البقر بعد ما يحطولو تبن ومي وتعجنو النسوان بارجلن وبعدين يعملوه قراص وينشفوه على الشمس . وبأيام الشتي يشعلوه بالموءدة ويتدفو عليه ,
وكان جدي يجمعنا المسا حول المو ءدة على ضو السراج ويحكينا حكايات عن حنا الكذاب اللي راح يرعى الغنم , وكنا نحوص كتير ونقلب السراج ونكسر البلورة , ونشعل بدالو الفانوس , وكنا مرات كتيرة نكسر بلورة السراج عن قصد , مشان ما حدا يسمعلنا الدروس. واذا كانت الدنيا نهار كنا نهرب ونروح نتخبى بالتبان.
سقالله يا نديم ع هديك الأيام , والله بتسوى كل حضارة هالأيام.

Posted by: نديم عبد العزيز

شكرا حسان ورح ضل نكوش كلمات قديمة و نزلها بهاذ الموضوع ...
ونشالله بتعجبك و بتضل تذكرك بالضيعة ....
على فكرة احلى شي وقت كنتو تكسرو بلورة السراج مشان ما يسمعولكن الدروس

Posted by: angel

شي بفرح نشوف نديم عم ينكش كلمات ضيعته القديمة .. بوقت الشباب اللي بعمره بها الأيام بيتباهو ا مين بيحكي مفردات انجليزية أكثر ومين بيعرف يدخل مصطلحات أجنبية بحديثه ...
شكراَ على جهودك نديم وتحية للعم ملحم ...

Posted by: نديم عبد العزيز

شكرا إلك انجيل ...
هاذ موبس واجب هاي شغلي اني كتير بتمتع فيها و بفتخر فيها ...
و انشالله بتكون المجموعة التانية جاهزة قريبا

Posted by: silva

يا عني عليك ياغالي أنت الطفل المدلل الذي ينقذنا عند العازه ..وما ريحني وسرني بأن المستقبل بخير عندما قرأت ما خطت أناملك المنورة وعكست نور قلبك البهي المشرق وفقك الله وزادك كمان وكمان أتحفنا أكثر ..ولربما هذا الجيل استفاد أكثر

Posted by: Elie Dayoub

والله يا غالي عندي رفيق من زيدل
كان يقول كم كلمة ما افهم شو هني
وكنت خليه يفسرلي شو معناتا
هلق بوجودك صار الفهم اسرع
والله على عيني انت و مصطلحات زيدل

ع فكرة نحنا بصافيتا عنا كمان مصطلحات غريبة شي مرة بنزلها كمان

ممنووونك انا

Posted by: bent homs

و الله على قد ما بحب حمص و زيدل و الله حبيتا من حكيكن و لانو شقفه من حمص لانو ما بعرف زيدل و الله ما بحكي غير حووومصي اووح لانو الواحد يلي بينكر بلدو و الحكي تبعو او بيحاول يلصح في عنجد بيكون قليل عقل لانو لازم حب الوطن يكون بكل شى مبين و الله يحميلنا حموصه و زيدل و سوريا كلا (و ما بس حمصيه انا و كرماووويه كمان)

Posted by: Kinan

الله حيك عم الموضوع كثير حلو شكرا كثير لانك عم تذكرنا بهالكلمات اللي اغلب العالم نسيتها و بجوز ما بتعرفها
و شكرا للعم الغالي ملحم و سلملي عليه كثير

Posted by: sulieman safar

يا هلا بكينان والله يطمك الحج والناس راجعة. يعني صحيح عم لحد هلق ما وصلك خبر انو ابو الندمان عن قريب بدو يخطب ويتزوج تحت اساس انو من الضروري يعلن الخبر على شان يوصلك على الوقت !!!!!!!!! ولك تسلملي على برادة هالدم وكلك على بعضك حلو. بعدين عم شو هالصورة الجديدة الك؟ فهمنا الطقم !!!!!!! بس جرافة كمان؟
ولك محبتي.
سليمان

Posted by: Kinan

اقتباس:

يعني صحيح عم لحد هلق ما وصلك خبر انو ابو الندمان عن قريب بدو يخطب ويتزوج

اي انشالله الله يسمعنا الاخبار الطيبة و الله يا عم سليمان انا هون مقطوع عن الاخبار عم يوصلنا كل شي متأخر
بس انو شو معجلو

و الله بكير يا سيدي على كل حال مبروك سلف

عم سليمان مشان الجرافة ترى الموقف كان بيتطلب هيك منيح اللي لقينا يومها حدى يربطها

تحياتي الك و للعيلة جميعا ...

Posted by: ابن الحياة

طوّلوا بالكم يا شباب.. خطّبتوه وجوّزتوه لنديم و هوّي مالو خبر.. خلّوه يخلّص بكالوريا بالأول..
أخي كنان العم سليمان قصدو أنك مبكّر بالرد على هالموضوع اللي صرلو 6 أشهر..

شكراً لكم..

Posted by: نديم عبد العزيز

طولو بالكن يا جماعة ....
خطبتوني وجوزتوني وما عزمتوني عالعرس ....
حكيلك كلمة كنان ....
بربك ولو بيصير عرس لبيت عبد العزيز بلا ما تــــــــــــــــــحـــــــــــــــنـــــــــــــش
ههههههههههههههههههههههههههههههههههههههههههه
عكل حال شكرا للعم الغالي كنان وللعم سليمان صفر ولأبن الحياة وسيلفا وايلي وبنت حومص
ونشالله عن قريب بنزل حلقة تانية من المفردات الزيدليي القديمة
وشكراااااااااااااااااااا للجميع

موقع زيدل سوريا حمص .. خدمات تشات و دردشة ... أرشيف المنتدى