الارشيف - وما أدراك ما الوطن بالنسبة للسوريين

Pages: 1

وما أدراك ما الوطن بالنسبة للسوريين
(انقر هنا ان احببت مشاهدة الموضوع الاصلي بالالوان و الصور )

Posted by: سيلفانا خوري

سوريا هي تلك الرغبة التي تعتريك لتناول " كاسة شاي " وأنت تأكل الجبنة البيضاء البلدية،وذاك الخمول الذي يدفعك بعد وجبة الغذاء الدسمة إلى قيلولة غالية..
هي ذاك المزيج الفوضوي الذي يجري في شوارع العاصمة، آلاف من السيارات والبشر المختلطة وفق منظومة معقدة لا تستطيع أن تدركهاأو تفهم آلية عملها ولكنها في النهاية تعمل، تمتزج، تتحرك،وتنفصل.........
وتتلاشى الحركة في الشوارع لتبدأ الحياة في المنازل التي تحب السهر،وتبقى البيوت المتراكمة المتسلقة جبل قاسيون مضاءة حتى يطفئوها الفجر.. سوريا هي فيروز في الصباح.. و" سيرة الحب " في ليل دمشقي طويل..
أوموال شجي عتيق على أنغام قد حلبي .
سوريا.. نشرة الأخبار بين عشق الرجال وكره النساء،هي السياسة التي ندمنها دون أن نتعاطها..
هي خوف صبية عائدة إلى البيت في متأخر،هي حب مراهق لبنت الجيران،مساء وجوه الناس التي ألفناهاوقصص البيوت التي تناقلناها
هي النميمة في صبحية " نسوان "، و " قعدة " رجالية في مقهى بين طاولة الزهر وعبق الدخان..
سوريا هي جلسة حول " بحرة " في دار قديم و" قرقعة " أركيلة وهي ترسم تنهيدة ألم في الهواء،
هي عدوى الضحك على طرفة " بايخة " تنتشر بين الأصحاب وتتمادى لتصبح قهقهة عالية لا تعبأ لابالمكان والزمان..هي طبخة " شاكرية " على مائدة كريم دعا إليها كل الجيران مسيحي ومسلم الكل يحمدون الله على النعمة ويدعون أن يحفظها من الزوال..
سوريا هي نزعة طفل للتسرب إلى الشارع واللعب مع أولاد الجيران،هي رائحة " الطبيخ " تفوح عند باب كل دار وقت الغذاء،وجلسة دافئة لأفراد العائلة حول مدفأة المازوت في ليلة باردة..
سوريا هي الحارة والأصحاب،المدرسة والطريق الذي " تسكعناه " مئات المرات،هو الطاولة التي درسنا عليها والغرفة التي تشاركنا بها إخوة وأخوات،هي همومنا الصغيرة التي كبرت وأحلامنا الكبيرة التي تضاءلت،هي الذكرى التي تجمعنا في الماضي والأمل بلقاء في المستقبل قد لا يكون..

سوريا هي الحب القديم، هي القلب الذي خفق في صدورنا أول مرة،هي الغيرة التي اشتعلت على فتاتنا تضحك لرفيق لتترك في النفس حرق لذيذ،
هي حلاوة اللقاء الذي كان وربما لن يتكرر،هي الحياة التي انتزعناها من عمر مضى واحتفظنا بها مجرد ذكريات..
هي ضحك، بكاء، مئات الكلمات، أحاديث وصور تبعثرت في ذاكرتنا, يستحضرها الحنين ويحفظها الشوق ونحن نعرف بأنه لا أمل لنافي اللقاء..
سوريا هي أيام عشناها في وطن كان....نخاف أن يضيع،سوريا هي الحبيب الذي هجرناه ولم نستطع أن نعشق سواه،سوريا هي الماضي الذي منه ولدناوعلينا أن نحرص لكي يكون المستقبل الذي يحيا أولادنا فيه..
سوريا كلمةعندما نسمعها، تشتعل قلوبنا بالمحبة، وتدمع عيوننا الحائرة فرحا وحزنا،وتتلعثم ألسنتنا مثل مراهق يريد أن يبوح لفتاته بكلمة.. "أحبك "

سيريانيوز

Posted by: RUSHA AWAD

اشتقنالك ياسلفانا واشتقنا لمواضيعك
وقت اللي قريت مشاركتك خطر ببالي فكرة صرلها عما تراودني من وقت اللي طلعت من سورية وجيت على اميركا او بالأحرى خليني قول تساؤل وبتصور هالتساؤل بيخطر على بال كل مغترب مجرد مايغادر وطنو الأم . بالفعل شو بتعني سورية للسوريين؟؟؟؟؟؟؟؟
اني شخصيا مفهوم الوطن بالنسبة الي بقوم على ثلاث اسس رئيسية "الانتماء للعيلة, الانتماء الديني, والانتماء لسورية" وهالأمور مو ممكن تتوفر بوقت واحد إلا بسورية ويمكن هالشي ماكنت واعية لأهميتو لوقت اللي انحرمت منو مثلي مثل كثيرين ومثل مابقولو مامنقدر قيمة الشغلي حتى ننحرم منهي. هالأمور اللي ذكرتهن صديقتنا العزيزة سلفانا واللي دغدغت هالمشاعر الحلوي والمرة , هالأمور اللي بتحرك جواتني مزيج من التناقضات بالأفكار والمشاعر, هالأمور على الرغم من طابع البساطة وطابع الروتين اللي بيغلب عليها , الها اهمية كبيري كثير بحياة الانسان المغترب لانو بكل بساطة محروم منها ومافي شي بعوضها حتى ولو حاول الواحد يضحك على حالو ويهيء جو معين ليعيش حالي معينة بيفشل. حلو الواحد يحب بلدو بس الشعور الأحلى من هيك هوي شعور الحنين والاشتياق لهالبلد اللي ممكن بيوم من الأيام كان سبب تذمر لكثيرين وسبب تعاسة كمان لكثيرين بس بيبقى هالشعور بالانتماء عايش جوات الانسان وكل مازاد البعد بيقوى هالشعور وبتزيد اللهفي للرجعة. بالنتيجة سورية هيي انتماء بكل المقاييس الموجودة بالطبيعة والانسان اللي ماعندو هالشعور بالانتماء الله يكون بعونو.

ملاحظة للعزيزة سلفانا : انو يعني ياعزيزتي مابيجيكي هالوحي بالمنتدى الاغترابي غير تالي الليل, يعني الواحد بكون عم يلقي نظرة اخيرة قبل ماينام عالمنتدى بتقومي بتعلقي حضرتك باغنية او بموضوع بطير النوم من الراس. خليكي هيك ولاتردي عليي

مع حبي واحترامي
رشاعواد

Posted by: Desert rose

سوريا هي تلك الرغبة التي تعتريك لتناول " كاسةشاي " وأنت تأكل الجبنة البيضاء البلدية،وذاك الخمول الذي يدفعك بعد وجبة الغذاءالدسمة إلى قيلولة غالية..

مشان هيك الشباب مابيصدقوا بهاجروا من سوريا
هي ذاك المزيج الفوضوي الذييجري في شوارع العاصمة، آلاف من السيارات والبشر المختلطة وفق منظومة معقدة لاتستطيع أن تدركهاأو تفهم آلية عملها ولكنها في النهاية تعمل، تمتزج،تتحرك،وتنفصل.........
بباريس وبكتير بلدان أوروبية شهدت عيوني حركة ماشفتها ولا ببلد من البلاد العربية
وتتلاشى الحركة في الشوارعلتبدأ الحياة في المنازل التي تحب السهر،وتبقى البيوت المتراكمة المتسلقة جبلقاسيون مضاءة حتى يطفئوها الفجر.. سوريا هي فيروز في الصباح.. و" سيرة الحب " فيليل دمشقي طويل..
أوموال شجي عتيق على أنغام قد حلبي .
هيك الحق مع كاتب المقال : فيروز الصبح وأم كلثوم المسا ....ليه مافي أغاني حلوة لفنانة سورية
ولو وين شهد برمدا ورويدا عطية
سوريا.. نشرة الأخبار بين عشق الرجال وكره النساء،هيالسياسة التي ندمنها دون أن نتعاطها..
هي خوف صبيةعائدة إلى البيت في متأخر،هي حب مراهق لبنت الجيران،مساء وجوه الناس التيألفناهاوقصص البيوت التي تناقلناها
مابعرف اذا بعد في شي إسموا حب مراهقة بها الأيام بعد ماغزى النت قلب الشب وقلب الصبية
هي النميمة في صبحية " نسوان "، و " قعدة " رجالية في مقهى بين طاولة الزهر وعبق الدخان..
سوريا هي جلسة حول " بحرة " في دار قديم و" قرقعة " أركيلة وهي ترسم تنهيدة ألم في الهواء،
هي عدوى الضحكعلى طرفة " بايخة " تنتشر بين الأصحاب وتتمادى لتصبح قهقهة عالية لا تعبأ
صحيح هي بشهد فيها للكاتب...وبشهد فيها لكل النسوان ببلادنا العربية لا وبياخدوها معهم على البلاد الأوربية والأميركية

......
.
.
.

Posted by: Desert rose

لابالمكانوالزمان..هي طبخة " شاكرية " على مائدة كريم دعا إليها كل الجيران مسيحي ومسلم الكليحمدون الله على النعمة ويدعون أن يحفظها من الزوال..
ولك مين بعد أكل شاكرية ...بعد مادولتنا الكريمة سمحت للكنتكلي .....يفتح بالمزة ...وعقبال مايفتحوا للحمصية .
سوريا هي نزعة طفل للتسرب إلى الشارع واللعب مع أولاد الجيران،هي رائحة " الطبيخ " تفوح عند باب كل دار وقت الغذاء،وجلسة دافئة لأفراد العائلة حول مدفأةالمازوت في ليلة باردة..
ماعد الولاد حبوا اللعب بالحارة ....صار في محلات أهم بكتير ... وصار في كومبيوتر بكل بيت ...وموبايلات ...وآي بود ....والعالم كلها عم تترك المازوت و تحول عالتدفئة المركزية " آل أنظف "
سوريا هي الحارةوالأصحاب،المدرسة والطريق الذي " تسكعناه " مئات المرات،هو الطاولة التي درسناعليها والغرفة التي تشاركنا بها إخوة وأخوات،هي همومنا الصغيرة التي كبرت وأحلامناالكبيرة التي تضاءلت،هي الذكرى التي تجمعنا في الماضي والأمل بلقاء في المستقبل قدلا يكون..

أيا ما ضي؟؟؟؟؟؟؟؟؟ وأياأمل ؟؟؟؟؟؟؟؟؟؟؟

أي شو هالكلام المليان رومانسية ...معقول ؟؟؟

سوريا هي أيام عشناها في وطن كان....نخاف أن يضيع،سوريا هي الحبيب الذيهجرناه ولم نستطع أن نعشق سواه،سوريا هي الماضي الذي منه ولدناوعلينا أن نحرص لكييكون المستقبل الذي يحيا أولادنا فيه..
سورياكلمةعندما نسمعها، تشتعل قلوبنا بالمحبة، وتدمع عيوننا الحائرة فرحا وحزنا،وتتلعثمألسنتنا مثل مراهق يريد أن يبوح لفتاته بكلمة.. "أحبك

إذا هالقد عندكن حنين وحب لها الوطن ....رجعواااااا
حاسدين هالسورية على شوية ضحك... وشوية حب ...وشوية جبنة ....وكاسة شاي ...ولك ياعمي وعلى شو لازم يحسدونكم هالسورية
آه ه ه ه ؟؟؟؟
السورية :
اللي فقدوا الضحكة ... وفقدوا الحب ....وفقدوا الإطمئنان للعلم ..ومش عم يلاقوا جبنة ...وهمهم اليوم وبس

"خبزنا كفاف يومنا أعطنا يارب "

وبعدها الدولة بتسمح بفتح مطاعم بأسماء شركات أجنبية :
لا وشو ...كل وجبة ب250 ليرة سوري ................يعني 5 دولار
يعني بيدفع حقها المواطن السوري متل مابيدفع حقها المواطن الأميركي

**********
ماتتحسروا كتير ....لك أي مابتصدقو ا ترجعوا وقت تجوا لسوريا .

صوح ح ح ح

سيلفانا شكراً .....رشا شو قاعدة عم تعملي بجاكسن فيل ....اتفضلي عيشي بزيدل إذا هالقد محرومة ...بيكفي رشا ...بتركضوا على إيديكن ورجليكن لتهاجروا أو تسافروا ...وبعدين بتبلشوا تنعوا وتنقوا

س: هيدا المقال بالسريانيوز للمغتربين أو للسورية

زهرة الصحراء

Posted by: a_aroush

أهلاً برجعتك سيلفانا .. شو عاملينلك حتى بتغيبي هيك غيبات , و بتحرمينا من هالقلم الحلو اللي صرنا نتعطشلو مثل المي و الخبز بهالمنتدى .

عندك شيء فظيع , بشعرك و بنثرك .. بكلماتك بتطلع المعاني الضايعة .. الحس بينرسم عالورق ألوان .. و منطير لعالم مأسور بالوجدان كلماتك بتفتح بوابه .

ذكرتيني بأول مشاركة الي بمنتدى زيدل .. اللي عملت منها توقيعي .. There is no place like home . رجعتي الحنين و الحب لأشيا ما كنا نشوفها إلا لما فقدناها .

كانت هالمعاني ضايعة . ضايعة بين حرقة ام طفلها موجوع ما عنا دوا , مخزقة هدومه بردان , فقير و ناس عم تنهش من ضلوعه .

ضاعت مع لقمة خبز عالدور عليها الناس سهرانة ... مع وقيتين لحمة العيلة عليها سكرانة .. و دفتر و مريول منحسب حسابها كل سنة .. هم كبير الناس منو فزعانة .

ضاعت مع الأحلام اللي قتلها القهر و ما عاد في منها ثمر . تزوير وواسطة و ضمائر ميتة عم تنخر ببلدنا نخر .. عملوا منا ماشية .. و قرود صاروا بشر .

قلوبنا قسيت على ام مجروحة .. دموعها عم تذرف , و على أب قلبو نكسر .. و أخت حسرانة .. و بواب و عريشة و الدار تبكي .. قلوبنا صارت حجر . و عبنت ناطره لنكبر .. و يكبر الحب معنا .. عيونها بتسوى السما و الأرض و ضي القمر. شو بتعنيلنا سورية ؟ يا ريت كنا نعرف هالمعاني يا ريت كان فينا بصر .

شكراً سيلفانا عالموضوع الجميل .

Posted by: RUSHA AWAD

ولو سناء, يعني تركلينا فسحة زغيرة "10سم*10سم" على صفحات هالمنتدى كل كم شهر مشان نتذكر البلد فيهن, مابعرف شو هوي داعي السخرية بهالموضوع اللي حتى وعلى افتراض انو حكي فاضي وكلام مابيمت للواقع بصلة, بضل الو وقع حلو بقلب هالمهاجرين "او المنتشرين على قولة سيدنا؟؟؟".
صار الواحد بدو يحسب حساب مواضيعك وردودك بكل شي بيتعلق بالمغتربين وانا سبق وكتبت بعدة ردود الى الله لايحيجكن للهجرة وطبعا كلامي موجه لكل الأعضاء والقراء الأعزاء لأي سبب من الأسباب ان كانت مادية او معنوية او......
بدك تقوليلي الغربة كربة والهم فيها للركبة؟؟؟؟؟ اي مزبوط والله العظيم معك حق بس كمان في شغلة رايحة عن بال كثيرين انو الحياة بالغربة هيي تحدي على جميع الأصعدة, تحدي لإثبات الذات بشكل من الأشكال, تحدي للفشل اللي ممكن كان الانسان عايشو ببلادو, تحدي للي بيحكو من فضى وما اضطرو بيوم من الأيام انهن ينلطمو بأمواج الحياة القاسية.
ليش لغة الاستهزاء؟؟؟؟ هالسؤال بتمنى انو ينكتبلو جواب
يعني والله العظيم المغترب مانو مواطن درجة عاشرة, مانو جاي من المريخ, يعني كثير اني بتفاجأ انو بهيك منتدى وقت منحكي انو لازم نراعي شعور القارئ و الأعضاء الاعزاء معنا بالمنتدى وقت منكتب اي رد او اي موضوع, طيب هالمغترب مانو خلق وعالم, مانو عضو وقارئ معكن بهالمنتدى الكريم؟؟؟؟؟
او الحل انو تلغو شي اسمو منتدى اغترابي بالمنتدى مشان الناس اللي معهن حساسية مثل حكايتي.
والحمدلله اللي حرمني من هالأمور الروتينية البسيطة بالحياة واللي كانت تسببلي نوع من الملل احيانا بس بعد ماحرمني من رحمتو لحد الان

مع حبي واحترامي
رشاعواد

Posted by: mariam

ولوووووووووووووووو

شو رشا لاتحمليها كثير يعني هلق صدقت انو الغربة كربة ..........معليش رشا مو القصد السخرية بس هيك الواحد لمن بتفقع معو بيحاول يعطي طابع ساخر ....يعني من كثر الألم اللي جواتنا احيانا بنرقص وبنغني ونسخر ...وبتنتهي الحكاية بثورة بكاء مابنعرف ليش بلشت وايمت خلصت.........
رشا وحياتك القعدة جنب الصوبيا ورغيف مسخن مع شوية قريشة بيجيبو الكيف حتى لو كان هالرغيف مغمس بدمنا وعرقنا ........
يمكن كنا نشوف اللي بياكلو صندويشة همبرغر نحسدهن ونحنا يادوب عم ناكل فلافل بس بعدين بنكتشف انو صندويشة الفلافل كانت ممتعة اكثر من الهمبرغر بالف مرة .......المشكل يارشا انو دايما اللحظات الحقيقية بحياتنا ما بندركها الا بعد ماتروح فبيصير مرورها بذاكرتنا عم يشحن هالحب الموجود للحياة بداخلنا وبنلاقيها اجمل بكثير من اللحظة اللي عشناها.فيها..يمكن لانو صارت جزء من كياننا لهيك بنتمسك فيها اكثر واكثر.........
لهيك هاللحظات الحلوة وهالشفافية لاتخليها تتحول جواتك لغضب لانو ماحدا في يحس باحساس الشخص ذاتو ......يعني انا كثير بيعنيلي هاللحظة اللي عشتها انا بحلوها وبمرها وماكثير بحب افرضها عا حدا لانو يمكن هني يحسو فيها مأساة بالوقت اللي انا بحس فيها راحة ويمكن سعادة.........فما كثير تاخذي عاخاطرك اذا سناء شافت الامور بمنظور غير منظورك لانو كل واحد رح يشوف من منظور خاص ....في ناس بتذكر الماضي وبتقول اسقالله عاهذيك الايام وفي ناس بتذكر الماضي وبتقول الله لايعيدها ..........
من زمان ما حدا اتحركش فيكي ....لهيك نسيتي الحركشة .....بعدين ادعي على سناء تعيش بالغربة شي شوي بس لتقدر ترحمكن .... والغربة الاصعب يارشا واللي كلنا يمكن نكون عايشينها غربتنا عن ذواتنا ....مثل مالوطن ساكن فيكن نحنا روحنا ساكني فينا ومع هيك صرنا نشتقلها ونحّن نداعبها ونتذكر ....على امل نرجعلها ....مثل مابتحّنو لترجعو لبلادكن......ويمكن انتن غربتكن اسهل ....فتحتي المواجع روحي ربي يسامحك........

Posted by: سيلفانا خوري

قد لا يدرك قيمة الوطن الا من غادره.. كما لا يدرك قيمة الام الا من غادر احضانها..ولكن عتبي عليها.. الام تحتضن اولادها ..لا تبعدهم ولا تفرق بينهم لاتقبل ان يهضم القوي حق الضعيف ..ولا تقبل للكاسر ان يجعل من غيره كسيح تعاملهم بالمساواة ..تحمل الجميع في كف حنانها تشجع احلامهم.. وتهيأ لهم الفرص ليكونوا الافضل ..ترفع معنوياتهم وتدعم طموحاتهم.. فلا يسرقهم احد منها وتبقى هي الاولى بعطائهم هي الاولى أن تجني ثمار فكرهم ونجاحاتهم فتهنأ بهم ويهنأوا بها ..
تركت اولادها يغادروها ومازالت جذورهم عالقة فيها فلا استطاعوا ان يعودوا ولا استطاعوا ان ينسوها..تلحفوا بشمس غير شمسها وتفرغت أغصانهم في غير اجوائها ...ولكن مهما تفرعت الاعواد لا تحن الا لأصولها ؟؟

ان غادرناها باختيارنا او مرغمين مطيعين لخيار الاهل كما هو حالي و رشا هذا لايمنع ان نشعر بالحنين الى هواء حملناه في رئاتنا ..ان نعطش الى مياهها ان نحلم بنسائم كسب وصلنفة ببحر اللاذقية ولا تغنينا بيتزا هوت ولا برغر كينغ ولا النوغتس ولا اكلة ثانية عن صحن تبولة في ظل عريشة برفقة الاهل والاحباب ....
مهما غبنا ومهما كانت الظروف التي من اجلها ابتعدنا تبقى سورية اجمل خاطرة نحملها اينما نذهب..
رشا شكرا لترحيبك وانا اشتقتلك اكتر ..الله يجمعني فيك ولو لساعات تحت عريشة من عريشات سورية .شكرا سناء ودكتورة مريم للمداخلة وكل الشكر للطافة كلماتك عبدالله.

Posted by: Desert rose

صحيح انا إنسانة متناقضة
ولكن إنسانة واقعية
وبحب المجاملة
ولكن مش على حساب قناعاتي حتى لو إنفهمت بشكل سخرية
الغربة صارت كلمة ...
كانت كربة ....اليوم صارت لعبة وأحلى لعبة .
ياجماعة تعملوا معروف :
أنا ماعم بحكي عن حالي
ولا أنا الحمدلله بشكر ربي محتاجة للغربة والتغرب
وإذا فكرت بيوم فقط بيكون الداعي الوضع السياسي الممقت بالبلاد العربية .
ولكن مش كرمال لقمة العيش .
الإنسان اللي بيسعى للقمة العيش وبيقدر يحصل عليها وبيعيش بنعيم ماعد بيطلق عليه إسم مغترب ...
وبتنقلب الموازين ....وبيصير المغترب الإنسان اللي عايش بوطنوا ومش عم يلاقي رغيف الخبز
فإذا اليوم المغترب مأمن الخبر بغربتوا قبل دراستوا وعلموا
يطب ويبوس الأرض ويشكر ربوا
بالقليلة بيوم بعد مايخلص دراسة ويشبع الأكل
بيقدر يحقق شوي من أحلاموا
يمكن الحقيقة بتزعج أوقات
ولكن لازم نقولها
شبابنا السوري اليوم ضايع ...وبعض الكتّاب يالمواقع السورية عم يحنوا للصوبيا ورغيف الخبز وصحن الشنكليش " القريش" ....والدلوا وبير المي " هني وين والعالم وين !!!!
عفواً ولكن بتمنى تقروا شوي خلف السطور ...ليتوضح إني رديت على كاتب المقال بالسريانيوز قبل مارد على أصدقائنا المغتربين الأكارم .

شكر للدكتورة مريم اللي أضافت وبواقعية ومنطقية رأيها بالموضوع ...

ومن ثم ضروري نهز الورد لنتنشق عطروا الحلوا
من زمان قولولنا أنو هيك ..... بتنهزوااااا

زهرة الصحراء

Posted by: sara

شكرا لفتح مثل هذا الموضوع على صفحات الانترنيت .
سوريا ...
ماذا اشعر كلما نطقت بهذه الكلمة ؟؟
اشعر بالمسافات البعيدة التي تفصلني عن ماض عشته احيانا بسعادة واحيانا اخرى بتعاسة
قد اشعر بحنين لايام مرت ولكن هناك ايام لا اريد ان اتذكرها.
احب سوريا ولكن السؤال الذي يخطر في بالي الان هل سوريا تحبني؟؟؟
لا اعرف الجواب بعد .
الحنين الذي في داخلي ليس لصوبية المازوت التي كانت تنفض كلما هبت ريح وتعبي البيت شحوار ولازم تنضف الشحوار بالمازوت وتصير ريحة ايدكمازوت وشحار
انما الحنين لذلك المكان الدافئ الذي جمعني واخواتي ,,,و قد كان هذا المكان هنا في اميركا وليس في سوريا.
اشعر بحنين لاصدقاء فرقتني عنهم المسافات وان فكرت يوما بالعودة الى سوريا فان السبب هو للقاء هؤلاء الناس الذين عشت بينهم
..
تهون غربتي علي كلما تذكرت التفرقة الدينية المركزية المادية التي عايشتها في سوريا
تهون غربتي علي كلما علمت بالفرص الكبيرة التي لا تزال مفتوحة امامي والتي اغلقت ابوابها منذ زمن بعيد في وجهي في سوريا
هناك سؤال يدور في ذهني ,هل ساشعر بالحنين لو كان كل اقربئي واصدقائي هنا معي في اميركا؟
الجواب سيكون لا.
مع حبي لسوريا وكل اهل سوريا
سارة

Posted by: mariam

انما الحنين لذلك المكان الدافئ الذي جمعني واخواتي ,,,و قد كان هذا المكان هنا في اميركا وليس في سوريا..........

اذا كان الوطن الذي شعرت به بالدفء هو امريكا فلاغربة تعيشينها الا مع ذكريات ستزول رويدا رويدا مع دفء المكان الذي تعيشين به...وان كنت تشعرين انك بحاجة لبقية من وطن في ذاكرتك هم الاصدقاء فبامكانك ان تجدي في امريكا الكثير الكثير من الاصدقاء وبالتالي لاتعيشين غربة ....لكني اعتقد ان الوطن اكبر بكثير من الاشخاص فمهما حاولت ان تكوني سعيدة في امريكا سيبقى الوطن فيكي اكثر التصاقا من جلدك لالان رائحة المازوت لوثت يديك لكن لانك في هذا الوطن تعلمت ان الحب بين الاهل والاصدقاء وهذا العشق للجماعة والحنين للمة بجوار مدفاة حتى لو كانت في امريكا ...لان هذه المشاعر علمتك اياه ارض اعطت بلاحساب ....هذه الاشياء الصغيرة التي حملتها في قلبك هي الوطن والذي سيرحل معك اينما ذهبت ....حتى لو صرخت ولو غضبت على وطن شعرت به ذات يوم بغبن او اهانة سيبقى حنينك الى تلك الاشياء التي تعلمتها في هذا الوطن ........ان سمحت لي ان اسألك لو لم تخلقي في هذا الوطن ...لو وجدت منذ البداية في امريكا هل سيكون لك كل اولاءك الاهل والاصدقاء الذين تحنين اليهم ........
الوطن ليس فقط اصحابا واهلا واقرباء ......الوطن ...جزء من تاريخنا من تركيبتنا من كياننا ..في عاداتنا في طريقة اكلنا ولبسنا وتفكيرنا جزء من هذا الوطن في حبنا وغضبنا وحقدنا وهدوءنا وثورتنا جزء من وطن .......وفي تراب الوطن سر من اسرار وجودنا وفي ماءه سحر.....لذلك نحن الى الوطن ...الاشخاص تتغير والاماكن تتغير لكن تاريخ وجودنا لايتغير ابدا ...لذلك نحن الى الوطن ....حتى لو كانت حياتن بوقت من الاوقات صعبة ....هل يعيش الجميع في امريكا او غيرها بسعادة دائمة وهل كل المواطنين يشعرون بالراحة ...ان كان كذلك فاذا لايوجد في تلك البلدان من يعاني فهل فعلا هي كذلك ...........لااعتقد....
بالنهاية الوطن جزء من كياننا البعض يرميه والبعض يتمسك به بكل مايملك ...البعض يحمله في قلبه والبعض يقتله في نفسه ......... لكنه بالنهاية يزول الاشخاص ويبقى الوطن...........

Posted by: Desert rose

أهلا بالصديقة سارة بعد غياب طويل
شكراً لك حنينك لمنتدى زيدل
فهو ركن صغير هام من حياتنا
ومن الوطن
جمعنا ومازال بحمد الله يجمعنا معاً.

زهرة الصحراء

Posted by: ياسمين دمشق

يكفي ان تنظر كل يوم في وجهك لتعرف أنك سوري

كلمات رائعة للاخوة المغتربين تعبر عن حنينهم وأخلاصهم لبلدهم وما لدي لا يختلف عن ما قاله الاحبة لذلك لا تعليق على ما قالوه

بس تعليق بسيط على الاخت زهرة الصحراء أختي الكريمة على ما يبدو انكي ترين سورية بعيون لبنانية
عندما تودين النظر الى سورية فما عليكي الا أختلاس النظر بعيد" عن زقزقات الاخوة في لبنان
فالاخوة في لبنان نظراتهم على بلدهم هي غير شرعة
فكيف بنظراتهم الى سورية

vbmenu_register("postmenu_22443", true);

Posted by: Desert rose

أهلا بالياسيمين الدمشقي
أخي الكريم الحمدلله أن الله منحنا أذنان وعينان ولسان واحد
أذن تطربنا وأذن أخرى تمقتنا
وعينان إن أطبقنا واحدة إستطعنا النظر بالأخرى
ولسان ناطقو إن نطق فهو ينطق أحياناً لإطلاق الإتهامات .
لاياعزيزي ................
عندما وضعت ردي كنت أنظر بعين سورية ....بعين إنسانة واقعية ...بعين ترى الحياة في وطني بمنطقية !!!!
وإن دل ملفي الشخصي أنني أعيش في لبنان هذا لايعني أنني نسيت من هم أصدقائي وإخوتي وأهلي في الوطن الأم البارحة.... وغداً .....واليوم .
أحاديث كثيرة نتبادلها أسبوعياً عن وضع الشباب ومستقبلهم بسوريا ...عبارات كثيرة يطلقها الأصدقاء والأهل أهمها :

يجب أن نهاجر لأميركا أو أستراليا أو كنداااا لاأمل من الوطن بعد اليوم...ومهما كان الثمن !!!!!!...مليون ...مليوناااان ...لاهم

أعذر صراحتي سيدي الكريم ....ولكن مثل هذه الحقيقة لم تعد تخفى على أحد ....فكافكم بالله حنيناً للياسمين الدمشقي ...وراعوا شعور الشباب العربي من الجرح .... عندما يقرأون أنكم تحنون لقليل من القريش والعسل .....ودفاية المازوت ...وأنتم تعيشون في بحبوبة العيش وتتناولون من الأطعمة التي يلزمهم ليتناولوها 25 عاماً من العمل ...هذا إن تناولوها .

زهرة الصحراء

Posted by: hosam abdulaziz

مرحبا بك اخي الدمشقي
اني اوافقك الراي في حكمك على زهرة الصحراء بأنها تحكم على الموضوع بأعين لبنانية
لأن من يكتب مثل هذا الرد ان كان من الزهرة او سارة او اي شخص يتكلم على وطنه بهذه الطريقة فهو يخلط و لا يميز بين سورية البلد و الوطن
و بين سورية الحاكم و المحكوم.

انا من اكثر الناس الذين لديهم مآخذ كثيرة على الوضع و لم ارتح له يوما , لكن بنفس الوقت لا يمكنني ان انكر خصوصية الحياة و بساطتها و جمالها في بلدي سورية.
قد يقول البعض انني ازاود في كلامي عن حبي للبلد و اني كثيرا ما تذمرت من هذا الوضع, لهؤلاء اقول اني كنت و ما زلت متذمرا من وضع البلد و هذا امر طبيعي لأي شخص و ربما للأمريكي في اميركا و الكندي في كندا و الأوروبي في اوروبا
لكن لم اتذمر يوما من اني سوري و انتمي لهذا الوطن
البارحة حضرت مسرحية كوميدية سياسية ساخرة في مسرح الكندي في مدينة حمص
و تكلمت كثيرا عن الوطن و مشاكله و التحديات التي تواجهه من الخارج , و لا اكذب ان قلت انني فشلت في حبس دموعي مرتين كردة فعل على بعض المشاهد الوطنية .
و هنا تيقنت ان حبنا و تولعنا بهذا الوطن اكبر بكثير من بعض التذمر الذي يصدر عنا لوضع كلنا امل في انه الى زوال.

Posted by: Desert rose

بالحقيقة مافهمت شو عنيتوا بأعين لبنانية .
وكوني أتهمت بهيك إتهام من الصديق ياسمين دمشق ومن حسام اللي نسي للأسف بأنو إسمي سناء وصار يخاطبني ويحكم عليي باسم زهرة الصحراء ....ومش عارفة إذا بعد مايترك هالوطن رح يتذكر سناء وزهرة الصحراء بيوم ؟؟
أي شو هالحنين الخنفشاري بعد سبع سنين لبنت المنتدى وبنت الوطن !!!!!! ومن هلق !!!!!!
أعذروني ماعندي ردود بتشفي القلب بهيك موضوع !!!
الواقع أهم بكتير من أنو رواغ وغامر ببعض الحقايق !!!!
والأهم بأنو مابقدر رد على إتهام موجه وأنا مش فاهمة حقيقة هالإتهام .
ولكن الأهم الأهم ...فهوي أني بنت سوريا مهما طال إغترابي.....الشئ اللي بعتز في دائماً وأبداً !!!حتى لو أتغييرت الهوية !!!!!

شكراً للإتهام والإهتمام

زهرة الصحراء

Posted by: Desert rose

كوني ماقدرت عدل المشاركة حبيت ضيف هالجملتين :

ومابتمنى بيوم يشار إلي على أني لبنانية ......رغم محبتي الكبيرة للبنان !!!!!... أو حتى لو كنت من حملة غير جنسية .....وبفتخر بكل مكان بتواجد في على أني مواطنة سورية ...ومجتمعي بيشهد بها الشي !!!
أنا اللي غيرت المجتمع ....مش المجتمع اللي غيرني !!!!!

وعذراً على التكلم باللغة العامية " لقيتها أسهل وأسرع "

زهرة الصحراء

Posted by: hosam abdulaziz

عفوا زهرة الصحراء
انا مني قدران افهم شو الرابط بين مناداتي باسمك المباشر او اللقب اللي انت و بكامل حريتك اخترتيه ليمثلك بالمنتدى !!!!!!!!!
و بين وطنيتي او محبتي لعضو من بلدي !!!!!!!!

اذا هاللقب مو عاجبك بتصور فيكي تتنازلي عنه و تستبدليه بالحقيقي و هذا امر متاح لأي شخص بالمنتدى.

الأمر الثاني اذا انا بعرف اسمك الحقيقي و كثير من الأعضاء كمان , بس نسيتي انه الأخ ياسمين دمشق بعده مستجد معنا , و فيما لو خاطبتك باسمك الحقيقي رح تختلط عليه الأمور ليعرف مين المقصود بالحديث.

موضع الأعين اللبنانية ما فهمتيها انا رح حاول وضحلك اكثر
يمكن الفكرة بتكون اوضح لو قلنا بأعين جعجعية

و نحن كمان بنتشرف انك بنت البلد و بتعتزي باصولك , بس هالشي ما بيمنع انك تفكري بالطريقة اللي بتلاقي فيها مصلحة بلدك الأم او بلد الأقامة.

Posted by: ياسمين دمشق

في البداية لدي توضيح للاخت زهرة الصحراء ..........

كوني قلت لك لا تنظري لسورية بعيون لبنانية هذا لا يعني اني منحتك الجنسية اللبنانية
مهما كانت جنسيتك تبقين انسانة محترمة من الواجب علي احترامك
ولكن القصد من كلمتي هي النظرة تختلف بين سوري يعرف سوريا الوطن وبين سوري لبناني
بات ينظر الى سورية بعيون لبنانية

المقال للاعلامي والكاتب المعروف نضال معلوف هذا الشخص كنار على علم في سورية
معروف عنه كتابتاه الناقدة للحكومة وسياستها الاقتصادية والوضع في البلد بشكل عام
ولكن هذا لم يمنعه الى النظر الى وطنه بعيون سورية مخلصة تعرف سورية التاريخ والحضارة على حقيقتها
عاش في وديانها وسهولها وهضابها عاش في ازقتها وحاراتها بين بيوتها العتيقة والجديدة
عاش مرارت الحصول على وظيفة عاش مرارت الاغتراب عن الوطن
عاش قمع الاجهزة الاستخبارتية وعاش الامن والامان والحرية كذلك
عاش بين ارباب السوابق وعاش بين الطيبين البسيطين
كتب ناقدا" كتب عاشقا" كتب محبا" لبلده

فنأتي نحن بكل بساطة لنسخر من محبة السوريين لوطنهم وأرضهم
محبتهم لظلال الشجر والساقية الجارية مبحتهم للشام وياسمين الشام الفواح

الوطن ليس الحاكم الذي يقوده او الحكومة التي تسير اعماله
الوطن هو الارض والشجر والماء والاهل والبيت والشارع والحارة
كان لديك الفرصة لتقولي شيء"بسيط" عن أيام جميلة لاشك انك عشتي روعتها في سورية

هذا المقال في سيريا نيوز علق عليه اكثر من الف شخص من زوار الموقع وكان بحق فسيفساء سورية رائعة الجمال لم يسخر احد من كاتب المقال او من مشاعره او تكابر عليه وتعالى على مقاماته
وبحق هذا المقال من اجمل واروع ما قرأت عن سورية وتناقلته مئات المواقع السورية على الانترنت ... لا يكاد يخلو موقع سوري منه لانه بحق كلام الشعب السوري عن وطنه وحبه له

يبقى لي القول ... سورية الوطن وما أدراك ما الوطن بالنسبة الى السوريين !!!!

Posted by: Desert rose

شكراً للصديق حسام عبد العزيز رده الكريم .
أما للصديق ياسمين دمشق.... فلك مني تحية وطنية معطرة بعبق الياسمين الدمشقي وعذراً منك......أقولها بجد ...... مابعمرها قد تشابهت أصابع اليد .
أتمنى أن القى عند المغتربين..... الحنين الصادق للياسمين .
ولكن لاأنكر أنني ألتقي به من وقت لآخر عند المقيمين على أرض الوطن ولكن ليس عند الغالبية .

لكَ كل الإحترام

زهرة الصحراء

Posted by: fr george massis

ما بعرفك هيك هدامة وكثيرة حكي ونمامة رح على الله وشوي بطل هيامِ
على طريقة فيروز السورية والسريان الكاثوليك بقول
بحبك يا سورية يا بلدي بحبك
بكلشي فيكي بقوتك وبضعفك
بشمالك وجنوبك وكلشي فيكي حلو
بتعرفوا ليش؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لأنو صحيح هون في اشيا كثيرة ما موجودة بسوريا بس هنيك اسمي جورج ابن راتب ابن الياس ابن نعيم ابن النصيص، وهون حرفين وراهم اربعة ارقام (هي سرقتها من غوار) يمكن بيومتها ضحكت مع المشهد الدرامي الكوميدي بمسرحية غربة ولكن اليام كانت كفيلي لتشرح وتوضح كلشي وهون بالبرازيل فهمت عمق المعنى يلي ابدا ما بتحبسوا الأحرف!!!!!!!!!!!!!
بسوريا في قبر ابي وجدي وعظامهم على طول بتناديني لزورهم صحي بمفهوم العقلي بصير مجنون ولكن بقلبي انا اعقل العقال لأني سافرت وتركت قلبي بسوريا والجسد بلا قلب ما بيعيش ...................
بيتسائل البعض ليش كل سنة زيارتنا محددة لسوريا وما بنزور غير بلدان مع العلم أنو تكت الطيارة وشوي فوقه بيعمل احلى سفرة مع مجموعة سياحية ............ في ناس منكم عم بسمعهم بيقولوا لأنو ارخص والدولار بيحكي بخمسين ليرة ووووووووووووووووووووو
ما تعبتوا تعدوا اسباب يا خسارة استنيت اسمع كلمة وحدة وهي الحب بس ما قلتوها لأننا صرنا نفكر بعقولنا وقلوبنا عفنت يا ريت مثل قرص الشنكليش لأنو كل ما عفن بيطيب ولكن قلوبنا عفنت بالغيرة والحسد والحب ضب شنتة سفروا وغاب لغير اماكن بيلاقوا حالوا فيها
الله يسامحكم ويكون معكم.....................

Posted by: Desert rose

اقتباس:

بيتسائل البعض ليش كل سنة زيارتنا محددة لسوريا وما بنزور غير بلدان مع العلم أنو تكت الطيارة وشوي فوقه بيعمل احلى سفرة مع مجموعة سياحية ............ في ناس منكم عم بسمعهم بيقولوا لأنو ارخص والدولار بيحكي بخمسين ليرة ووووووووووووووووووووو

اهلا أبونا .....لا مش لأن الدولار ب50 ليرة وعذراً من اللي بيقول .

ياريت نحكي شوي بصراحة مع رشة كبيرة من الجرأة .....
ولاقي حدا يجاوب على هالسؤال :

ليه سناء .....بتزور سوريا بالتحديد كل 15 يوم مرة ؟؟
وليه بتقضي شهرين الصيف بزيدل ؟؟؟
وألكم جزيل الشكر؟؟

النا لقاء ......

زهرة الصحراء

Posted by: allbaseet

الضوء يميزدائما":
غاليتي أم ملحم كل ما تكتبين هو جميل
وشعورك لسوريا أكيد شعور مغترب نبيل
وزياراتك المتكررة لسوريا هو أكبر دليل
وعسى نلتقي بزيدل ولو لوقت قليل
أحيك / البسيط 11/2/2007

Posted by: allbaseet

أحيكم جميعا" وأشكركم على الحوار الموضوعي في موضوع ( وما أدراك ما الوطن بالنسبة للسوريين ) وجميع أفكاركم التي وردت كانت واقعية وحتى الذي قال : ( تهون غربتي كلما تذكرت التفرقة الدينية ) وإن كانت هذه نادرة في بلدنا أو الذي قال ( ضاعت مع الأحلام اللي قتلها الفقر وما عاد في منها ثمر , تزوير وواسطة وضمائر ميتة عم تنخر ببلدنا ) مرورا" بالذي قال ( الغربة كانت كربة .... اليوم صارت لعبة وأحلى لعبة ) والذي قال ( يجب أن نهاجر .....مليون مليونان لا هم ) والذي قال ( الأم تحتضن أولادها لا تبعدهم ولا تفرق بينهم لا تقبل أن يهضم القوي حق الضعيف ) والذي قال ( يكفي أن تنظر كل يوم في وجهك لتعرف أنك سوري ) وأيضا" الذي قال ( لم أتذمر يوميا" من أني سوري أنتمي لهذا الوطن ومن قال ( بالنهاية الوطن جزء من كياننا البعض يرميه والبعض يتمسك به بكل ما يملك ) .
أحبتي جميعكم يبين مدى الألم الذي يحس به في الغربة والسبب الذي دعاه للغربة والتذمر من بعض السلبيات في بلدنا والحنين والحب لهذا الوطن الغالي وصدقوني سألنا الكثيرين من الذي سافروا إلى المهجر قبل سفرهم وبعض الذين يودون السفر عن السبب الرئيسي للسفر وكانت إجابة غالبيتهم إن لم يكن جميعهم عبارة نحن شباب عزابية لا نملك بيتا" وعمرنا كذا فمتى وكيف وهل يمكن لنا أن نجمع المال اللازم لنمتلك منزلا" ونؤثثه ونتزوج ونستقر وتعرف التكاليف وكم عدد السنوات لتأمين ذلك فإن إيراد عمل عام واحد في أميركا يقابله عمل عشرات الأعوام في بلادنا وسنسافر ونعرف سلفا"مدى التعب والسهر والقهر الذي سيواجهنا حتى نقف على أرجلنا ونحقق أحلامنا والحقيقة هذا القول يمكن أن يكون صحيحا" للبعض الذين لا يملكون أراض زراعية ووضعهم المادي سيء جدا وسنحت لهم الفرصة وبعضهم قد سافر وهو ليس بحاجة مادية أبدا" أو سافر بناء على تشجيع من أصدقاء لهم في المهجر وأيضا" البذخ الذي يرونه الشباب من المغتربين الذين يعودون إلى سوريا والحفلات والسيارات الحديثة وإلى ما هنالك مما يجعل الشاب الذي كان من أوائل الطلبة يضيع ويصبح في أواخر الطلبة لأن أبناء هذا الجيل هم أبناء المظاهر وعصر السرعة ولا أحد منهم يرغب بصعود السلم درجة درجة كما نحن أبناء سن الستين بل يرغبون بالوصول بأقصى سرعة ممكنة وربما هم محقون بذلك ولهم مبرراتهم والغاية من مشاركتي هذه ليست تأنيبا" لجيل الشباب لأنهم يجدون ظروف الحياة قاسية وتتطلب السرعة لأثبات وجودهم في المجتمع الذي يعيشون به ولكن لا أر من الضروري سفر الغير محتاجين ماديا" لأن بلادنا هي من أجمل البلدان وأكثرها أمنا" وراحة" ويوجد مجالات عمل لمن يريد أن يصعد السلم درجة درجة ويتطور ولو ببطء ولو عملوا هنا عدد الساعات أو الأعمال التي يقومون بها في المهجر لأنتجوا وتتطوروا أيضا" ومع هذا نقول للجميع وفقكم الله في مغتربكم وكلي أمل أن تحققوا أمانيكم وأحلامكم على أن لا تنسوا وطنكم الحبيب أو تقللوا من أعميته وعظمته ففي سوريا أصبح الإستثمار ممكنا" وتشجعه الدولة فمن الضروري والضروري جدا" أن يكون لجميعكم بيوت ومزارع خاصة بكم سواء" في قراكم أو على الساحل السوري أو في أماكن الإصطياف السورية لتكن دافع لكم للمجيء إلى وطنكم الحبيب سوريا ويمكن للاستثمار والتجارة أيضا" وفارق العملة يساعدكم كثيرا" ونعرف البعض من المغتربين قد بدأوا بسلك هذا الطريق وبنجاح تام ولنجعل من الغربة التي كانت كربة أن تصبح فرحة وأحلى فرحة أي نعمل في المهجر ونجدد في سوريا حتى يتأمن لنا الدخل الذي يلزمنا لمستوى العيش الذي نرغبه ونرتاح من تعبنا في المهجر ونعود للعيش في بلادنا بين الأهل والأقرباء والأصدقاء ويكون السبب الذي دعانا للهجرة قد زال وأنا مؤمن كل الإيمان بالحنين والحب الذي تحملونه لبلدكم ووطنكم الغالي وأنا مع الذي قال : ( يكفي أن تنظر كل يوم في وجهك لتعرف إنك سوري ) أي إنسان طيب ومشرق الجبين وتعيش الحنين وبصدق إلى أهلك وأبناء بلدك ووطنك الذي يعيش معك وله الحق من قال ( لم أتذمر يوميا" من أني سوري وأنتمي لهذا الوطن ) وإني مؤمن أن الوطن بالنسبة للسوريين جزء من كيانهم سواء" كانوا داخل الوطن أو بعيدين عنه وشكرا" لكم ,
البسيط زيدل في 12/2/2007

Posted by: sara

[left]I never said That I don't love Syria
I allways will love my country ,and allways want to come back
, and for the the young people who say that they cann't buy a house in Syria I say : even in america it is hard to buy a house but you can do it
and if you need to rent a house it is not hard to do so ]

life outside is getting easer that way we running to the outside

sorry I writting in english but I couldn't find the arabic keybord

thankyou
Sara

Posted by: syria & joleat

مسا الخير
طبعا هي اول مشاؤكة الي بس حابة اول انو الواحد لازم يشوف كلشي بهالدنيا من منظاريين السلبي والاجابي
وسوريا الحبيبة هي متل كلشي بهالدنيا فيها المنيح وفيها السيء بس على الاقل وقت تمشي البنت بالليل مابتخاف طلعلها من عصابات نيويورك وغيرها ....
انا متلي متلكون مغتربة وما غتربت الا لاني ماكنت مرتاحة بالبلد بس هادا ما بيعني اني نسيت انتمائي للوطن وطفولتي واهلي وناسي
بكفيني اول انو سوريا هي روميو بالنسبة لالي كجولييت
والله بفدي ترابها بدمي

Posted by: bent homs

و الله ماااااااني مصدقه ايمت يجي الصيف و انزل عحمص راح طق كتيير ضاقه خلاقي و غير هيك انو ما صرلي شهرين راجعه من حمص و اشتقتلا لا و ما مشصى على المدرسه شهر و عم فكر ا النزله يااا ربي على قوله فيروز راجعين يا هوا راجعين بس لسه مطوليييين اي ليكو انا وطنيه كتير و بحبــــــــــــــب سوريا و حمص خاصه قد ما بتئلو و بأذن الله برجعلا عن قريب ادعولي(لن تركع ماه ما دام قائدها الاسد و شعبها سوري و ارضهاسوريـــــــــــــــــــــــــــــــــــــــــ ـا)

موقع زيدل سوريا حمص .. خدمات تشات و دردشة ... أرشيف المنتدى