اخي العزيز الياس
شكرا الك على وجودك بالمنتدى وعلى مواضيعك الجميلة وحقيقة انا مثلك مغتربة باميركا من اربع سنين تقريبا واكيد مرت عليي وعلى اهلي من قبلي عدة مواقف ومثل ماحضرتك ذكرت انو الواحد بيلتجئ للأصدقاء ومين النا بالغربة غير الاصدقاء .
بس اسمحلي قول انو الاسئلة اللي ذكرتها مابتوفي الموضوع حقو يعني البداية الصحيحة لمناقشة موضوعك وبرأيي الخاص بتبلش من عند الاختيار الصحيح للأصدقاء وهالشي مابيختلف في حال ضلينا بسورية او هاجرنا لاي بلد بالعالم والقاعدة بتضل وحدة. الشغلة الثانية مستحيل يكون اختيارك صحيح لشخص ما حتى يكون صديقك اذا بدك تطلب مساعدتو ويخذلك لأي سبب من الأسباب الا اذا كان هالشي رح يسببلو الأذى او اساسا مانو بمقدورو.
هلأ يمكن انا واهلي حظنا شوي مليح بالغربة وقت منكون بموقف ما, بس فعلا لهلأ ما طلبنا المساعدة من اي انسان هون إلا وساعدنا وفوق المساعدة كلمة اهلين وسهلين وبدنا خدمة تحرز. يعني بسلامة اهل الضيعة هون والاصدقاء والمحبين والهن كل شكر ومحبة مني اذا هلأ عم يقروا هالموضوع. بس بالمقابل منعرف انو مثل مانحني ممكن نمر بظروف نحتاج فيهي مساعدة من شخص عندو خبرة اكثر بالبلد كمان في كثير اشخاص بكونو جايين جديد وبدهن مساعدة اشخاص مثلني وصايرة كثير مع عيلتني هون وكل انسان بيعمل اللي باستطاعتو "ياربي قدرتي".
بس خليني رد على اسئلتك حتى كون كتبت رد كامل:

نعم وبدون ادنى شك خصوصا اني اخترت اصدقائي بعناية ولست اقبل او ارضى او ان يفرض علي اي صداقة اذا لم تكن تستحق لقب صداقة.

_



كيف تنظر للصديق الذي لم يعد يرد على مكالماتك وانت في محنة ؟

لم امر بهذا الموقف ولكن واذا حدث ذلك فسيكون ذلك الموقف نهاية العلاقة بيننا ولكن في حال احتاج هذا الصديق لي يوما من الايام فلن اتأخر عن المساعدة اذا كان بالإمكان.



كيف تتصرف بعد وقوفك على قدميك من جديد ؟

كما ذكرت انهي العلاقة واعاود مزاولة حياتي من جديد ولكني سأكون اكثر حذرا.



هل تسامح ( صديق) من شعر انه تصرف بغباء ؟

اسامح ولكن لن انسى بمعنى اخر انه لن يكون في قلبي ضغينة ضد هذا الشخص ولكني أصبح على ثقة اني لن أستطيع الاعتماد على هذا الشخص مرة اخرى.



هل مجرد كلمة انا اسف تكفي ؟

وهل هناك مايكن فعله غير الاعتذار؟؟؟



كيف تكون نظرتك الى كل من حولك بعد هكذا موقف ؟

ماهي علاقة كل من حولي بموقف بدر من شخص واحد ولكن كما ذكرت اني سأكون اكثر حذرا وفطنة.